كوكايين

الحلقة الثالثة و الستون

🔸️حلقة 63
🔸️فهد_يحكي:
هزيت راسي شوية...مع إسمي لي خرج من بين شفايفها نغزرلها و مش مصدق...أصلا منعرفش كيفاش غفيت بجنبها...يومين تعدات...حسيتهم سنين طويلة...لدرجة وليت نحسب في الوقت بالدقيقة...هزيت روحي وقفت و حطيت يدي على خدها نحكي
أنا:رووجين...يا روحي...تسمع فيا ياخي
دوب غزرتلي...محاولة منها باش تخرج الكلام من بين شفايفها...حتى لقيت روحي في وضع صعب بين إني نبقى معاها و لا نادي على ياسين...مديت يدي كبست عالزر لي بجنبها...و عاودت غزرتلها نحكي
أنا:متخاافش...هااني معاك
بدنها لي بدا يتهز و يتحط كيما آخر مرة...دخلني في حيط آخر و معرفش شنية نعمل بالظبط...كبست على خدها نحكي
أنا:رووجين...أغزرلي هوني متخاافش
مدت يدها بالوقت كبست على يدي...جيت باش نحكي أما سكت على الصيحة لي خرجت منها فرد مرة...حلت عينيها مرة أخرى...ترد في النفس ورا بعضو...دخل ياسين و لي معاه بالوقت...قرب مني يحكي
ياسين:فهههد أبععد علييها
أنا:شبييهاا ؟
ياسين:ياااسمين راقب ظغطها فيسع
حاولت نجبد روحي...أما يدها لي كبست عليا منعتني و خلاتني نرجعلها بالوقت...كبست عليها نحكي
أنا:متخاافش...هاني معاك
ياسين:فههد...لازمك تخرج توا
أنا:مانيش خاارج...مستحيل نخليها وحدهاا
ياسين:فههد...متخلينيش نندم خاطرني دخلتك بالطريقة هاذي باش تضيع منا الكل
هزيت راسي غزرتلو و عاودت غزرتلها...عديت عينيا على ملامح وجها...كبست على يدها اكثر نحكي
أنا:اعتبرني مانيش موجود...أماانك ياسين
غزرلي ندرا كيف..و رغم نعرف لهو إخترق قوانينو باللي يعمل فيه...أما منجمتش نبعد عليها...كبست يدها لي حسيتها منجمتش نفلتها...حتى ما نجمت نغزر لحتى حد فيهم...من غيرها...و منعرفش كيفاش تعدا الوقت و هما يفحصو فيها...هزيت راسي على صوتو يحكي
ياسين:الوضع تحت السيطرة توا...راقبها كل نص ساعة
أنا:شنية لي صار ؟
ياسين:لباس متخافش
أنا:باش تفيق مرة اخرى
ياسين:مش قبل ساعتين و لا ثلاثة...إيجا معايا توا
أنا:منحبش...مرتاح هوني
هزلي براسو باهي...و هز روحو خرج...كبست على يدها نحكي
أنا:تعداات يا روحي...هاني معاك
قربتلها أكثر...بستها من خدها..معادش نحب نحط حتى إحتمال آخر في مخي...مدام هي باش تفيق مرة أخرى معناها باش ترجعلي...الخوف لي حسيتو...خلاني نكبش فيها اكثر...إسمي لي خرج من بين شفايفها وجعني...وجعني خاطرني أنا لي وصلتها للحالة هاذي و ما نجمت نعمل حتى شي على خاطرها...و مزالها تنادي عليا...رغم اللي صار معاها الكل جرايري...للحظة حسيت إني نجم نوفق بينها و بين الماضي...أما رغم حرقة الماضي...لي مانيش باش نتعداها...تبقى هي أهم من كلشي عندي في دنيا...تعدا الوقت رزين كي العادة ساعة و زوز و ثلاثة...لين يأست لي هي باش تفيق مرة أخرى...هزيت راسي شوية نغزرلها...تحل في عينيها شوية شوية...قربتلها شوية..و كبست على يدها منحبش نقلقها...و لا حتى يصير معاها كيما قبل...مديت يدي شوية...عديت صوابعي على خدها نحكي
أنا:متخافش...انتي باش تكون لباس يا عمري
بقات تغزرلي من غير حتى كلمة...كبست على خدها نحكي
أنا:وفات و ماهيش باش تتعاود مرة اخرى نوعدك..أصلا بعد توا...باش تكون فما حياة جديدة تستنى فينا
نزلت عينيها من وجهي...من غير حتى حرف...كبست على يدها و بستها منها...نحكي
أنا:نحبك تشد روحك فيسع...و معادش تبعد عليا مرة أخرى
مديت يدي شوية...كبست عالزر مرة أخرى...لي خلى الفرملية تجي بالوقت...غزرتلها نحكي
أنا:خلي ياسين يجي توا
ياسمين:باهي
نزلت راسي نغزرلها...باقي ساكتة من غير حتى كلمة دقايق و دخل ياسين...قرب منها...يفحص فيها و يحكي فرد وقت
ياسين:البرنساس فاقت ملا...زعمة مزالت موجوعة ؟
هزتلو براسها لا...تنهدت براحة خاطرها تجاوبت معاه عالأقل نحس لي هي لباس...تبسم يحكي
ياسين:نعرف لي أميرتنا قوية...ساعة مزال باش نتعبك شوية...بعدها ترتاح باهي
عدا يدو على شعرها و هز راسو غزرلي...و قحرلي يحكي
ياسين:هيا قوم معايا توا...لازمها ترتاح اكثر
أنا:مانيش باش نقوم
ياسين:الصبر يا ربي
قحرتلو و نزلت راسي نغزرلها...مستحيل نتحرك من بقعتي توا...عدا يدو على وجهو يحكي
ياسين:باهي...هاني باش نخليك نص ساعة اخرى...أما رد بالك تعبها
هزيتلو براسي باهي...و كبست على يدها...عاود فحصها و خرج...دورت راسها غزرتلي...تحكي
روجين:ف..فهد
تبسمت بالوقت...و عديت صوابعي على خدها...نحكي
أنا:يا روح فهد...شنية تحس في روحك توا ؟
روجين:ح..حلمت بكابوس خ..خايب برشا
كبست على يدها أكثر بستها منها...و غزرت لعينيها نحكي
انا:متخاافش...مستحيل نخلي حد آخر يضرك
روجين:ا..أنت كنت الكابوس ي..يا فهد
عديت عينيا على وجها...كلامها خلى دقات قلبي تقوى بالوقت...نزلت عليها شوية لين حسيت بأنفاسها الخفيفة لي ضربت في وجهي...كبست على خدها نحكي
أنا:نعرف روحي السبب في اللي صار الكل..أما مستحيل نتخلى عليك...أنا منعرفش نعيش من غيرك روجين إنتي بنتي قبل ما تكون شي آخر...معادش نحب نعيش الوجيعة هاذي مرة أخرى
روجين:ا..أنت ما ع..عندك ذنب في ح..حتى شي
أنا:مدامني غفلت عليك...انا مذنب...منجمتش نتقبل فكرة لإنتي باش تخليني
غمضت عينيها شوية...و عاودت حلتهم...غزرتلي ندرا كيف تحكي
روجين:خ..خفت برشا
أنا:نعررف...نعرف يا عمري...معاادش يتعاود لي صاار نوعدك...مستحيل نخلي حد يقرب منك بعد توا
روجين:ا..إمتى باش يوفى هذا الكل ؟
نزلت بصوابعي على خدها...بستها من خشمها و تبسمت نحكي
انا:وفى يا روحي...ياخي مزلت باش نخاطر بيك
روجين:ش..شقصدك ؟
أنا:فما بلاصة إنتي تحبها برشا
روجين:فاش تخمم
أنا:نبعدو من هوني
روجين:روما ؟
أنا:مممم...أما المرة هاذي ماهيش باش تكون مجرد رحلة...إحنا باش نستقرو غديكا
روجين:أنا و أنت ؟
أنا:أما قبل هذا الكل توعدني لإنتي باش ترتاح
روجين:ك..كان أنت ماكش تجبرني على حفلة مرة أخرى
ضحكت بالوقت...و هزيتلها براسي باهي...نحكي
انا:آخر مرة يا روحي
جبدت يدها من يدي...و هزتها شوية...حطتها على خدي تحكي
روجين:ش..شبي حالتك هكا
أنا:لباس يا روحي...توا نحبك تخمم في روحك و كهو
روجين:ا..أنا لباس...و أنت لازمك ترتاح شوية
أنا:مرتاح...و مستحيل نخليك وحدك بعد توا
روجين:الكل لباس مش هكا ؟
أنا:لباس يا عمري
نزلت يدها شوية...و غمضت عينيها بالوقت...تحكي
روجين:نعسانة عاللخر
أنا:موجوعة ؟ تحب نكلم ياسين مرة اخرى ؟
روجين:لاا
نزلت يدها شوية...حطتها على يدي...كبست عليها بالوقت...غزرتلي تحكي
روجين:م..منحبش نشوف نفس الكابوس مرة أخرى خليك هوني
خطفت بوسة من شفايفها...و كبست على خدها...نحكي
انا:مستحيل نخليك بعد توا
غزرتلي ندرا كيف...و كبست على يدي أكثر...تبسمت بالوقت نحكي
أنا:شنية تحس في روحك ؟
روجين:ل..لباس...معادش تخاف عليا
أنا:بالله ؟ تعرف قداش و أنا نستنى فيك تفيق
روجين:ك..كان مفقتش ؟
نزلت بصوابعي لشفايفها...سكتها و عديت عينيا على وجها...نحكي
أنا:كنت متأكد لإنتي باش تفيق...ماكش باش تخليني وحدي
روجين:ا..أنت لي ربيتني مش أنا...معناها م..ماكش باش تضيع من غيري
أنا:كنت باش نضيع...إنتي السبب الوحيد لي يخليني نقاوم لتوا...و لآخر نفس في حياتي
روجين:م..معناها معادش تفلت يدي مرة أخرى
هزيتلها براسي لا...و كبست عليها اكثر...بعدت راسها شوية لتالي...تحكي
روجين:إيجا هوني
قربت منها أكثر...نزلت على ركبتي و حطيت راسي بجنبها نحكي
أنا:نحب تشد روحك فيسع...ماك تعرف قوانين سي ياسين
روجين:ششش...م..متخافش...ب..باش يظطر يتنازل
تبسمت على كلامها...و عديت صوابعي عل خدها نحكي
أنا:تعبت روحك برشا...حاول ترتاح توا لين يرجع
روجين:ا..أنت خايف يخرجك من هوني
أنا:حتى حد ما عندو القدرة يبعدني عليك...تهنى
دوب تبسمت و غمضت عينيها..بقيت نعدي في صوابعي على خدها لين غفات مرة اخرى...أما أنا منجمتش نضيع تفاصيلها...أصلا مش مصدق لي هي فاقت و حكات معايا...فرد وقت منحبهاش تحلم بنفس الكابوس مرة أخرى...قربتلها أكثر...بستها مرة أخرى...وين تحل الباب بالوقت...هزيت راسي شوية نغزرلو...قحرلي يحكي
ياسين:أمها تحب تشوفها
أنا:صوفيا ؟ من إمتى ؟
ياسين:يززي فهد...معندكش حق تمنعها أكثر من هكا مهما كانت الأسباب تبقى أمها...حتى الباقي يحب يطمن عليها
أنا:توا غفات...ما نحب حتى حد يتعبها
ياسين:ياخي استلمت بلاصتي أنت ؟
فهد:اكهو...أنا لي نقرر شكون يدخل عندها
ياسين:الصبر يا ربي
فهد:ياااسين...تعرف بالقدا علاش أنا رافض...منحبهاش توجعها بكلامها كي العادة
ياسين:ماهيش باش تعملها...هاك ريت حالتها قبل
فهد:أنا ما نصدق حتى شي منها
صوفيا:ماكش باش تمنعني أكثر من هكا
هزيت عينيا في وجها...واقفة ورا ياسين...منعرفش كيفاش دخلت لهوني...كبست على يدها...بستها منها و جبدت روحي شوية...وقفت و قربت منها...وقفت في وجها بالظبط...نعرف و ريت كلشي تعدات بيه جرايرها لتوا...غيابها و حضورها فرد وقت...خلاها تعيش أكبر صراع في حياتها...اسئلتها لي قعدت تكبر معاها حتى أنا كنت عاجز باش نجاوب عليهم...مفماش علاش ترجع توا...و لا حتى تخاف عليها...و مستحيل نخليها تضرها مرة أخرى...خذيت نفس نحكي
أنا:أخرج من هوني
صوفيا:خرجني أنت كان نجمت
قربت منها بالوقت...وقف ياسين في وجهي...دورت راسي شوية...طمنت لي هي مزالت راقدة...و كبست على يدي بالوقت...غزرت لياسين و عاودت غزرتلها...هي و هارون نفس الشي أكا علاش متأكد انو قبل أي خطوة لازم تكون فما مصلحة في الحكاية...و لي يخليني مستحيل نطمن للي يدور في راسها...خاصة توا بالظبط.
خذيت نفس طويل...و جيت باش نحكي...سبقني كي حط يدو على كتفي يحكي
ياسين:خليها تشوف بنتها فهد...نوعدك لي كلشي باش يكون لباس
جبدت روحي منو...و قربت ليها أكثر...وقفت في وجها نحكي
أنا:كان نعرف لي إنتي غلطت في حقها...صدقني باش ندمرك المرة هاذي
ياسين:مطولش معاها برشا
هزتلو براسها باهي...خذيت نفس و هزيت روحي خرجت...منعرفش كيفاش وصلت لبرا...خلط عليا بالوقت...عديت يدي على وجهي...نحكي
أنا:ياااخي نورماال لي قاعد يصييير...كيفاش تخليها تدخل عندهااا ؟
ياسين:فهههد...صوفيا أمهااا و هذا واقع متنجمش تبدلوو أنت و لا أنا...يمكن هاذي فرصة باش تتبدل علاقتهم شوية
أنا:تتبدل ؟ تحكي على صوفيا أنت...مش حد آخر
ياسين:هدي رووحك...ميجيش لي تعمل فيه
أنا:أنت باش تخرجها من غديكا...و إلا باش نستجرم فيها
ياسين:فهههد..ياخي لتواا مشفعتش أنت...يززي كهو..من غير ما تسمعك و تزيد حالتها
ضربت يدي عالحيط لي بجنبي...و بعدت عليه..خاطرني من غير شي...نحس في روحي باش نطرشق من الفازة اكثر من فكرة احتلت مخي...نعرف كلامها و تصرفاتها أكا علاش كان تغلط معاها توا...مستحيل نشفعلها المرة هاذي