كوكايين

الحلقة الثانية و الستون

🔸️حلقة 62
🔸️فتون_تحكي:
سكرت الصاك متاع جواد...و قربت منو...نلبسلو في الفاست متاعو...منعرفش علاش نحس في قلبي مقبوض...من بكري نحس في حاجة خايبة صارت...أما ما نجمت نكلم حد...إحساس الخوف لي تغرس فيا خلاني نستغفر ورا بعضو...نهرب في الأفكار لي جات لمخي...و نزلت عليه شوية...بستو نحكي
أنا:حاضر باش تمشي بحذا خالتي سلطانة...ياخي توحشتها أنت
ضحك بالوقت...وين حسيت روحي تفرهدت شوية ريقلت اموري...و هزيتو في يدي...مدام الخدمة زادت لازمني نحطو في الفيلا و نشد الثنية لسوسيتي منعرفش على روحي كيفاش خلطت...و خرجت من الدار...لقيت عم جمال يستنى فيا كي العادة...صبحت عليه و ركبت...منعرفش علاش حسيتو حتى هو مش قد بعضو...خذيت نفس نحكي
انا:عم جماال...لباس ماهو ؟
جمال:لباس فتون عيشك
أنا:شبيني نحس في العكس ملا...صارت حاجة منعرفش بيها...و لا تحب نعاونك في حاجة
جمال:معرفتش بالاخبار ؟
أنا:أخبار شنوة ؟
جمال:أمس كان فما وليمة عاملها سي هارون
أنا:صحيح في بالي بيها
جمال:نمشيو للفيلا مبعد لسوسيتي
انا:شنية لي صار عم جمال ؟
جمال:حتى شي...من غير ما تقلق روحك
أنا:صارت حاجة في الفيلا
جمال:لا
انا:باهي هاني باش نطلب واحد منهم
جمال:ف..فتون...صراحة فما شكون هجم على الريسترون ليلة أمس
أنا:هجوم شنوة ؟
جمال:عالأغلب فما شكون تصاوب منهم
بقيت نغزرلو من غير حتى كلمة...كأني نحاول نستوعب الكلام لي يقول فيه...خذيت نفس نحكي
أنا:ف..فاش تحكي أنت ؟ شكون لي تصاوب ؟
جمال:روجين و منعرفش شكون زادة...أما الجماعة الكل في الكلينيك
أنا:هزني ليهم
جمال:أماا
أنا:فيسسع
جمال:باهي
كبست على جواد اكثر...اللي سمعتو خلى دموعي تنزل بالوقت...منجمتش نستخايل لي صار...أكثر من فكرة جات في مخي...لدرجة خفت من اللي نستخايل فيه حسيت بالثنية طوالت اكثر...كلشي يهمني توا إني نشوفهم و نطمن عليهم...أول ما وصلت...حليت الباب و هزيت روحي نزلت..دخلت ساقي أعلى من راسي..قربت من رسيبسيون نحكي
أنا:الدكتور ياسين وينو ؟
هي:مشغول توا مدام
أنا:لازمني نشوفو ضروري
هي:مدام صراحة
أنا:أنا مرتو...و منظنش فما شي يمنع إني نشوفو
غزرتلي ندرا كيف...منعرفش كيفاش خرجت معايا الكلمة...على خاطر تقريبا الكل هوني يعرف لي هو خاطب هالة...أما مكانش عندي حل آخر...منجمش ناخو و نعطي معاها أكثر من هكا...هزتلي براسها باهي تحكي
هي:عالأغلب في بيروه توا...تنجم تخلط عليه قبل ما يخرج
كبست على جواد و دخلت...منعرفش على روحي كيفاش وصلت لبيروه...مديت يدي كبست عالبواني...و حليت الباب...هزيت راسي نغزرلو...يقرا في دوسي...هز عينيه في وجهي مستغرب...قربت منو...من غير ما نخمم...ترميت في حملتو...رغم جواد كان يفصلنا شوية أما ممنعنيش إني نحس بقربو...كبست بيدي على جنبو حط الدوسي...و دور يدو على ظهري...و يدو لاخرى تغرست في شعري...نزل عليا شوية باسني من راسي يحكي
ياسين:فتوون...لباس ماهو ؟
هزيت راسي شوية...عديت عينيا على وجهو...هاذي من المرات القليلة لي يكون تاعب بالطريقة هاذي...خذيت نفس نحكي
أنا:ش..شنية لي صار ؟ روجين وينها ؟
ياسين:ششش...لباس متخاافش
أنا:خفت برشا...و عرفت من عم جمال لي روجين صارت معاها حاجة
كبس على خدي...و غزرلي ندرا كيف...دوب تبسم يهدي فيا و يحكي فرد وقت
ياسين:روجين استقرت حالتها في آخر لحظة
أنا:ش..شقصدك في آخر لحظة ؟
ياسين:متخاافش...وضعها صعيب شوية...أما متأكد لي هي باش تتعداها الغصرة هاذي
أنا:نجم نشوفها ؟
ياسين:توا لا...لازمها ترتاح شوية
أنا:أماانك
ياسين:فهد من بكري عندها..نوعدك باش نخليك تشوفها في أقرب فرصة
أنا:ا..انت...لباس ؟
ياسين:لبااس يا روحي
نزل راسو يغزر لجواد...لي يمد في يدو ليه و يضحك رخف يدو على ظهري...و هزو من حملتي يحكي
ياسين:أهلا بيك يا روح باباتك...شتعمل هوني أنت ؟
قربو ليه أكثر...يبوس فيه و يشم في ريحتو فرد وقت خذيت نفس نحكي
أنا:ي..ياسين
ياسين:شنوة عزيزتي ؟
انا:شنية لي صار ؟
ياسين:منعرفش...كلشي جا ورا بعضو...عالأغلب الهجوم كان لهارون...أما استهدف عيلة كاملة
بقيت نغزرلو مستغربة...منجمتش نستخايل شنية لي صار بالظبط...الخوف لي حسيتو...و أنا نسمع في كلامو منجمتش نوصفو...حتى منعرفش كيفاش نزلت دموعي مرة أخرى...مد يدو بالوقت...عدا صوابعو...على خدي يحكي
ياسين:تعداات...وفى كلشي توا
أنا:ك..كان فما احتمال...أنو الكل يموت ياسين
ياسين:ششش...شنية الكلام هذا لي تقول فيه انتي
أنا:خفت برشا...أصلا من بكري حسيت لي حااجة خايبة باش تصيير
ياسين:إيجا هوني
كبس على يدي و جبدني عندو...عالأغلب كنت بحاجة حضنو توا بالظبط...بحاجة نحس بالامان...الأمان لي فقدتو أكثر...بعد ما لقيت روحي نعيش أنا و ولدي كهو و نفس الشعور تملكني مرة أخرى بعد اللي صار...روجين ماهيش صحبة عادية...و منجمش نستخايل لي هي باش تصيرلها حاجة...و لا نجم نتحمل فكرة إني باش نخسرها...أصلا هي الوحيدة لي تنجم تفهمني...كبست على جنبو نحكي
أنا:نحب نطمن على الباقي
ياسين:باهي إيجا معايا
جبدت روحي شوية...و عديت يديا زوز على وجهي نمسح في دموعي...و نحكي فرد وقت
أنا:الكل لباس مش هكا
ياسين:هدي روحك ساعة...مش باهيلك الغش و الخوف هذا...الكل لباس متخافش
أنا:هزني عندهم ملا
ياسين:باهي...خلينا نمشيو
هزيتلو براسي باهي...حط يدو على ظهري...خذيت نفس و خرجت معاه...نمد في الخطوة بالسيف...جواد عامل جو و هو في حملتو...أصلا وقت يشوف بوه معادش يمشي لحتى حد آخر...أول ما وصلنا...لجين أول وحدة جات عيني عليها..قربت مني بالزربة حضنتها بالوقت...نحكي
أنا:لباس يا روحي ؟
لجين:احسن شي أنك جيت فتون
أنا:إنتي لباس ؟
هزتلي براسها ايه...هزيت راسي نفركس على خالتي سلطانة...نحكي
أنا:وينها خالتي ؟
ياسين:في البيت غديكا
أنا:و فهد ؟
هز راسو يغزرلو...وين غزرت معاه بالوقت...واقف بحذا البلار...لابس كيما ياسين بالظبط...خذيت نفس نحكي
أنا:لازمني نحكي معاه
ياسين:يكون أحسن
عديت يدي على خدها...و غزرتلها نطمن فيها...خذيت نفس و جبدت روحي لتالي...قربت منو بخطوات رزينة وقفت بجنبو بالظبط...و هزيت راسي نغزرلها...و لا مرة توقعت إني باش نشوفها في الوضع هذا...فرد وقت نعرف لي حالتو صعيبة برشا...رغم كلشي تعدا عليهم متأكدة لي هو يحبها...و مستحيل يسلم فيها...برغم أنو عرس...و ظلم زوز معاه...أما الحقيقة الوحيدة لي تجمعهم هي الحب لي بيناتهم...خذيت نفس نحكي
أنا:روجين قوية...و تحملت اكثر من هكا
فهد:كلشي تحملاتو لتوا...كان جرايري أنا...كلشي تعدات بيه لتوا...أنا كنت السبب فيه
أنا:حتى حد ما عندو ذنب في اللي صار فهد...ساعات القدر هو لي يتحكم فينا
فهد:أنا لي جبرتها تعيش الماضي متاعي معايا..و تتحمل على خاطري
قربت منو شوية...و مديت يدي مترددة حطيتها على كتفو نحكي
أنا:معاادش تلوم روحك...ماهوش باش يفيد توا...أنت لازمك تكون أقوى من هكا
فهد:قلبها وقف...و كانت باش تخليني
أنا:أما مخلاتكش...هيا إيجا معايا توا...لازمك ترتاح
فهد:مرتاح هكا
هزيتلو براسي باهي...نعرف لي هو مستحيل يسمعني توا...و مستحيل يتحرك من هوني زادة...عاودت غزرتلها مرة أخرى...و رغم الغصة لي حسيت بيها...أما كان لازمني نتحمل...ضعفي قدام فهد يمكن يأثر عليه أكثر جبدت روحي لتالي...و مديت يدي نمسح في دموعي لي هبطو أول ما تلفت...محسيتش بروحي كيفاش ضربت فيه...حط يديه زوز على زنودي يحكي
ياسين:لباس عزيزتي ؟
هزيتلو براسي لا...مد يدو...عدا صوابعو على خدي يحكي
ياسين:هدي روحك توا
انا:ر..روجين باش تقوم لباس...انت تنجم داويها مش هكا ؟
ياسين:يززي كهو...متخافش...أكيد باش تقوم لباس
أنا:منحبش نخسرها ياسين...أماانك متخليهاش تموت ف..فهد من بكري يقول لي حالتها خطيرة برشا
ياسين:فتون...هدي روحك الساعة
أنا:خايفة برشا...منحبش نخسر أختي
قرب مني من غير حتى كلمة...منعرفش على روحي كيفاش وليت في حضنو...بعد ما ريت حالتها و حالة فهد تعبت أكثر..و مفهمتش شنية لي قاعد يصير بالظبط عدا يدو على شعري يحكي
ياسين:فتون يززي عزيزتي...روجين باش تقوم لباس متأكد
أنا:نحب نعرف كلشي صاار...علاش حتى حد فيكم ما نجم يحميها
ياسين:حقك تعرف...أما مش في حالتك هاذي
كبست على أجنابو من غير حتى كلمة...فكرة أنو روجين تنجم تبعد...منجمتش نتقبلها..أصلا معنديش غيرها..هي الوحيدة لي نحسها تفهم عليا من غير ما نحكي...جبدت روحي شوية على صوت الفرملية لي وراه...تحكي
هي:دكتور ياسين
مديت يديا زوز نمسح في دموعي...و نسمع فيهم فرد وقت
ياسين:شفما ياسمين ؟
هي:هالة تحب تشوفك توا
خذيت نفس طويل و وخرت خطوة لتالي...مع كلامها لي خرج فقت على وضعي...للحظة نسيت روحي معاه و حسيت بحاجتي ليه اكثر من اي وقت تعدا..أما الواقع ديما يفرض العكس...العكس لي يقول أنو الراجل هذا و لا مرة كان متاعي..و مدامني شقيت طريقي وحدي..من غير ما نعاود نتلفت ورايا...و لا نخلي الثغرات متاع قبل تعرضني...الحقيقة تقول إني نحبو و نموت عليه...نحب كل تفصيلة فيه...كلامو...غزرتو...ضحكتو...أما الواقع يقول رغم حقيقتك إنتي ما تملك منو حتى شي..و باش تبقى ديما على جنب بالنسبة ليه...أكا علاش مستحيل نرضخ للواقع...مانيش باش نكون الهامش في حياتو بعد توا...كان هو بالرسمي طلع حاجتو بيا كيما قال لازمو يتعب...و يضحي زادة...و إلا مستحيل تكون ليه فرصة أخرى...و مدام وفى القول...الفعل باش يبدا من توا...هزيت عينيا في وجهو...نستنى في ردة فعلو..زعمة يمشيلها و لا يبقى بجنبي...شكون لي باش يختارها توا انا و لا هي ؟
دورت راسي غزرت للفرملية و عاودت غزرتلو...منعرفش شنية لي كنت نستنى فيه بالظبط...و لا حتى علاش نحب نعرف إجابتو ليها...يمكن نحب نتأكد لي هو كان يقصد الكلام لي قالو بكري...و لي أنا بحاجتو توا أكثر من أي وقت...قص علينا صوت جواد لي بدا يبكي في يد لجين...خذيت نفس نحكي
أنا:تنجم تمشي توا...من غير ما تتأخر جرايري
عدا عينيه على وجهي...من غير ما يجاوبني...حتى منعرفش كيفاش خرج معايا الكلام هذاكا...و لا حتى علاش قتلو اكاكا...دور راسو يحكي
ياسين:ياسمين...خليك معاها توا...باش نجي مبعد نشوفها
ياسمين:باهي دكتور
ياسين:قبل ما ننسى خلي عامر يحطلي الملاحظات في البيرو
ياسمين:باهي
قربت من لجين...هزيت جواد من حملتها...و غزرتلو نحكي
أنا:شبيك ممشيتش عندها ؟
ياسين:طرد فيا إنتي ؟
أنا:لا...أما مش بالعادة تخليها تستنى...شنية لي صار ؟
قرب مني شوية...هز جواد من حملتي و غزرلي ندرا كيف...يحكي
ياسين:هيا إيجا معايا
أنا:نحب نشوف روجين
ياسين:نوعدك باش تشوفها مبعد
أنا:باهي
قربت من لجين...و سكت...منعرفش علاش حسيت روحي إرتحت...من الفازة...رغم إني محبيتش بقية كلامو...خاطرو في الأخير باش يمشيلها و يشوفها..أصلا هي الحقيقة الوحيدة في حياتو...و لي باش يرجعلها هي الوحيدة لي عمل كلشي على خاطرها و على خاطر باش يكون معاها...الغريبة أنو جزء مني يحب يصدقو و يعطيه فرصة...و من جيهة اخرى...لي عشتو جرايرو خلى ثقتي فيه معدومة...و منجمتش نصدق الكلام لي قالو الكل...مدامو محبنيش طول السنين لي عشت فيهم معاه...ماهوش باش يحبني بعد ما وفى كلشي بيناتنا وسط هذا الكل...و مهما كان لي باش يصير مبعد...أما توا بالظبط...منحبوش يختارها هي...منحبش نعيش صراع جديد وسط الظروف هذوما...خاصة بعد اللي صار معانا...و و الوضع لي روجين فيه...روجين لي كانت السند الوحيد ليا و بير أسراري...لي منجم نقولها لحد...هي الوحيدة لي تفهم عليا...هي الوحيدة لي شهدت على وجيعتي و دموعي...و لي عشتو الكل لتوا...منجمش ناثق في غيرها...و منجمش نستخايل حياتي من غير ما هي تكون موجودة فيها...أنا لتوا خسرت كلشي فيش حياتي...بابا و أمي...بعدها العيلة الصغيرة لي حتى هي منجمتش نخليها يد وحدة...برشا وجيعة حد ما يعرف عليها من غيرها هي...و ما نجمت نحكي عليها لحد من غير روجين...روجين لي كانت و باش تبقى أكثر من أخت بالنسبة ليا.