كوكايين

الحلقة الخامسة و الثمانون

🔸️حلقة 85
🔸️فهد_يحكي:
خذيت نفس طويل و كبست عالبواني بعد دقايق..حليت الباب نغزرلها...لمت لي في يدها رجعتهم للقجر في لحظة...مسحت دموعها و هزت راسها غزرتلي...حطيت الفاست متاعي عالفوتاي...و قربت منها شوية...مستغرب من حالتها..فرد وقت كلام لجين حرقلي مخي مستحيل نخسرها...مهما كانت الظروف...جرد فكرة دخلتني في عالم آخر...فقت من سرحتي على يدها لي تمدت تحكي
روجين:إيجا عندي
مديت يدي بالوقت...كبست على يدها و قعدت بجنبها عديت عينيا على وجها...و بعدت خصلات شعرها لتالي نحكي
انا:شبي صغرونتي ؟
روجين:شي تاعبة شوية و كهو...أنت شبي حالتك هكا ؟
أنا:منعرفش
كبست على يدي بيديها زوز...و قربتلي شوية...تحكي
روجين:نسمع فيك
أنا:من غير ما نتعبك معايا أكثر
روجين:فهد...مش على أساس معادش باش تخبي عليا حاجة ؟
أنا:صحيح
روجين:شنية لي صار ؟
أنا:بخصوص الدليل لي حكينا فيه آخر مرة
روجين:عرفت وينو ؟
هزيتلها براسي إيه...و خذيت نفس طويل...نحكي
أنا:عرفت من بلقيس
روجين:بلقيس ؟
أنا:متعرفش لي الدليل يخصني...أنا جيست طلبت منها تتأكد إذا فما حاجات محتفظ بيها من غير ما يعلمني
روجين:و شنية لي صار ؟
أنا:طلع عندو حساب في البنك
روجين:متنجمش توصل للحساب هذا ؟ 
أنا:الحساب في سويسرا
روجين:سويسرااا ؟
أنا:هذا لي صار...الحساب متاعو يتضمن أوراق العقارات و الملكيات لي عندو...فرد وقت أوراق تخصو هو..متأكد أنو الدليل لي يخصني موجود معاهم
روجين:معناها باش نسافرو لسويسرا
غزرتلها مستغرب...يمكن جات حكاية في مخي...أما ماهيش بالبساطة هاذي...غزرتلها نحكي
أنا:الحساب هذا ما يحلو حتى حد من غير هارون
روجين:إلا إذا كنت أنت نفسو هارون
أنا:شقصدك ؟
روجين:فهد هارون ياثق فيك برشا...معناها لازمك تاخو منو وكالة عامة قانونيا...باش تحل الكونت متاعو
أنا:من إمتى تخمم بالطريقة هاذي إنتي ؟
روجين:بالله...أنا قاعدة نحاول باش نلقاو حل مع بعضنا
أنا:هارون ما يوقع حتى ورقة قبل ما يقراها
روجين:حتى منك ؟
أنا:حتى مني
روجين:أكيد فما طريقة أخرى
أنا:ماهيش باش تعجبك برشا
روجين:جربني
أنا:متأكدة ؟
هزتلي براسها باهي...عديت عينيا على و خذيت نفس نحكي
أنا:شيرين هي الحل
روجين:شكون شيرين ؟
أنا:خطيبتو
روجين:شمدخلها هي و كيفاش تعاونك في حاجة هكا ؟ فهد ياخي أنت
أنا:لي في مخك صحيح
روجين:يعني
أنا:شيرين تابعة ليا
روجين:شنوووة ؟ شقصدك لي هي تابعة ليك
أنا:تخدم مع الشرطة الفدرالية...يعني أنا لي حطيتها في ثنيتو
روجين:كيفاش تنجم تاثق فيها ؟ مدامها تعرف لأنت متورط مع هارون ؟
أنا:متخافش...عندي ثقة فيها
روجين:باللاهي بالله...تنجم تفهمني سر الثقة هاذي سي فهد
جبدت يديها زوز مني و قحرتلي...تستنى فيا نجاوبها خذيت نفس نحكي
أنا:خاطرني نخدم معاها
روجين:فهد...ضعت وسط كلامك...كيفاش تخدم معاها مش هي سكرتيرة متاعو ؟
أنا:صحيح...بعد ما زادت أعمال هارون الاجرامية...كان لازم يكون فما تدخلات و إلا كان باش يعمل أكثر
روجين:كيفاش ؟
أنا:مكانش عندي حل آخر نظميت ليهم مؤقتا...عالأقل كي تبدا حياة حد في خطر
روجين:فما مقابل جراير الحكاية هاذي ؟
أنا:لا...لتوا مفما حتى شي
روجين:أنت تخدم معاهم ؟
أنا:يعني تقريبا...قاعد نقدم في مساعدات تنجم تخرجنا من دوامات هارون و من العباد اللي معاه
روجين:اللي تعمل فيه خطير برشا
أنا:مفما حتى دليل ضدي من غير لي يملكو هو...وقتها نجم نقدم لي عندي من غير تهديد منو
روجين:و كيفاش تنجم تعاونك شيرين هاذي ؟
أنا:تخليه يوقع عالاوراق بطريقتها
روجين:بلقيس ماهيش باش تخبرو لأنت تفركس وراه ؟
أنا:لا...بالمعنى الصحيح أنا سالتها عالأدلة لي معاها...و هي حكات كلشي عندها...يعني فما برشا حاجات أنا منعرفش عليها بخلاف الأدلة لي عند نائل...عالأغلب الحساب متاعو في سويسرا هو طوق النجاة...في حال خسر كلشي هوني
روجين:شيرين هاذي...تعرفها من قبل؟
أنا:ماكش باش تتغشش
روجين:عالأغلب
أنا:باهي...قرات معايا بكري
روجين:كهو
عديت يدي على شعري...غزرتلي ندرا كيف...خذيت نفس نحكي
أنا:باش نحكيو على حاجة عندها سنين توا
روجين:معناها كانت صحبتك...كيفها كيف الباقي لي كانو قبل ؟
أنا:كانت حكاية وقت و وفات على روحها...مفما حتى شي يربطني بيها توا
روجين:خطيبة عمك...صحبتك القديمة ؟
أنا:جيست تستدرج فيه...أكيد ماهيش باش تعرس بيه
روجين:بالله و أنت فرحان خاطر لي قاعد يصير مجرد لعبة و كهو...و لي هي ماهيش باش تعرس بيه
أنا:شيهمني فيها تعرس و لا تقعد...ياخي أنا باش ندخل في خدمتها
روجين:توا قلت لي ماهيش باش تعرس بيه
أنا:روجين يا عمري...علاقتي معاها كانت عابرة كيما برشا غيرها...أصلا وقتها إنتي صغيرة
روجين:ماهوش مبرر...انت تخدم معاها سنين و من غير ما نعرف زادة...ميكفيش بلقيس لي كنت معاها و أنت معايا فرد وقت...ياخي أنا باش نعاني من مرتك و صحبتك زادة ؟
قربت منها أكثر...حاوطت وجها بيديا زوز و غزرت لعينيها...نحكي
أنا:أغزرلي هوني...تتذكر شنية قتلك من قبل...أنا متاعك إنتي كيما إنتي متاعي أنا و كهو...أي علاقة كنت فيها قبل...هي قبل ما تبدا علاقتي معاك...وقتها إنتي كنت صغيرة...غير هكا مستحيل نخونك...حياتي ملكك إنتي و كهو
روجين:أنا تعبت برشا...معادش نجم نتحمل أكثر من هكا...معادش نجم نتحمل قرب بلقيس منك...و لا حتى وحدة غيرها
غرست يدي في شعرها...و جبدتها عندي...كبست عليها في حضني نحكي
أنا:معادش تخمم بالطريقة هاذي...نعرف روحي غلطت برشا...أما مش لدرجة إني نتخلى عليك...و لا حتى نبني حياتي مع غيرك...صدقني هذا الكل باش يوفى
روجين:معادش تخبي عليا أي شي يصير معاك...إحنا باش نلقاو حل مع بعضنا...باش تعرف الحقيقة لي تحب عليها...و هارون ماهوش باش يكون في حياتك مرة أخرى 
جبدتها من عندي شوية...عديت عينيا على وجها..نحكي
أنا:إنتي باش تكون معايا في هذا الكل...باش تبقى تحبني بالطريقة هاذي ديما...مهما كان لي باش يصير معانا ؟
حسيت بيدها لي تحطت على خدي...إرتحت بغزرتها و هي تحكي
روجين:مانيش باش نخليك فهد...أنا باش نكون معاك ديما و في أي وقت...باهي
هزيتلها براسي باهي...و نزلت على شفايفها بالوقت كأني ناخو في جرعة أمل منها...كبست على خدي أكثر جبدت روحي منها شوية...نحكي
أنا:رد بالك تكرهني...تعرف بالقدا لأنا معنديش حد غيرك نعيش على خاطرو
روجين:قاعد تتصرف...كيما جواد كي يبكي على فتون
ضحكت بالوقت...بعدت خصلات شعرها...و نزلت على رقبتها...دوب بستها نحكي
أنا:منفرقش عليه برشا...كي نبدا في حضنك
روجين:نعرف هذا بالقدا
عديت صوابعي على رقبتها...و هزيت راسي شوية غزرتلها نحكي
أنا:متحبش تسترجع الكوليي متاعك ؟
روجين:مش توا
أنا:إمتى ؟
روجين:منعرفش...تو كي يجي وقتو أنت باش ترجعهولي
أنا:تعرف لأنا نحبك ؟
روجين:فهد الصياد...ميعترفش بمشاعرو ديما...شنية لي صار ؟
أنا:منعرفش...كلشي نحب عليه توا...إني نبقى بجنبك من غير ما نخمم في حتى شي آخر
روجين:ملا متخممش يكفي لي حكينا فيه لتوا...شقولك تعدي ليلة بجنبي ؟
أنا:على أساس عندي قوة باش نقوم توا
روجين:باهي إيجا هوني تراه
هزيت روحي شوية ترميت بجنبها...قربت مني أكثر حطت راسها على صدري...غرست يدي في شعرها و عديت يدي لأخرى فوق الجرح بالظبط...نحكي
أنا:كيفاش تحس في روحك توا ؟
روجين:أحسن من قبل...جيست مزالت البلاصة توجعني
أنا:باش يولي عندك كنترول كل أسبوعين...أما كان حسيت روحك تعبت برشا...خبرني
روجين:لباس عليا متخافش...اليوم فما راجل كبير...جا عند مدام حنان...قابلتو في الكلينيك قبل
أنا:شبيني منعرفش بيها الحكاية
روجين:هدي روحك...بنتو كانت مريضة وقتها...و عالأغلب حالتها كانت تاعبة...بالصدقة جا باش يختارلها روبة لعيد ميلادها...و كلفني أنا باش نعاونو...حتى حب التصاميم متاعي برشا...و قال لي هو باش يكون أول زبون...إذا الحكاية نجحت
أنا:باش تنجح أكيد...أما مش وصيتك معادش تحكي مع حد غريب عليك
روجين:محسيتوش غريب...منعرفش للحظة حبيت يكون عندي أب كيفو...حبيت نقابل بابا مرة وحدة كهو تي حتى صورتو منعرفهاش...صوفيا منعتني على كلشي يخصو...أنت تعرف هذا من قبل
أنا:حاولت نلقى تصاورو من قبل...أما كلشي كان يجمعو مع بابا تحرق في الورشة ليلتها
روجين:تعرف حاجة...أنا نحس روحي محظوظة بيك حتى محزنتش كي عرفت لي هو مات..عالأقل منلومش لي هو مفركسش عليا لتوا و يبقى إحتمال أنو متخلاش عليا كيما ماشي في بالي...و رغم كلشي صار بيناتنا...و لي باش يصير مبعد...مستحيل ننسى لأنت كنت و باش تبقى عيلتي الوحيدة
غرست يدي في شعرها و نزلت عليها شوية...بستها من جبينها نحكي
أنا:صدقني باش نعمل كلشي نجم عليه...في سبيل إني نعوضك لي عشتو جرايري...نوعدك باش تكون عندنا حياتنا الخاصة خارج العيلة هاذي...حياة ما فيها حتى حد غيرنا...إحنا و كهو
روجين:أما رد بالك تشتكي من حاجة مبعد...تعرف لأنا مانيش شاطرة كيفك في الطبخ
أنا:نعلم حبي و كان لزم أنا نطيب وحدي إرتحت توا ؟
روجين:عرض مغري الصراحة...أكيد مانيش باش نرفضو
ضحكت بالوقت و كبست عليها في حضني أكثر...تعب النهار الكل حسيتو تلاشى و هي بين يديا...لدرجة معادش نحب نخمم في حتى شي آخر...توا بالظبط نحب نعيش في حلمتها هي و كهو
#روجين_فهد 💙