كوكايين

الحلقة السادسة و الخمسون

🔸️حلقة 56
جبدت روحي شوية...كبس عليا بالوقت...و كبش فيا أكثر...غزرلي ندرا كيف يحكي
ياسين:منحبكش تسامحني...مش بعد لي عملتو الكل...أما
مد يدو شوية...عدا صوابعو على خدي على قطرات المطر لي قوات عليه...و كمل كلامو يحكي
ياسين:خليك معايا...و إلا باش نضيع أكثر
رخفت يدي عليه بالوقت...و وخرت خطوة لتالي مستحيل لي سمعتو يكون صحيح...خذيت نفس طويل نحكي
انا:مستحيل...تسمع فيا مستحيل يكون فما شي بيناتنا مرة أخرى
قربت منو شوية...و مديت يدي نضرب فيه ورا بعضو و نحكي فرد وقت
انا:و معااااادش تبوسني مرة أخررى زااادة
ياسين:منجمش نوعدك
أنا:روح بيا توا...و إلا باش نكلم نبيل يرجعني
جبدت روحي منو...و رجعت للكرهبة بالزربة...حتى منعرفش على روحي كيفاش وصلت...خلط عليا بالوقت دورني عندو قبل ما نركب و غزرلي يحكي
ياسين:آخر مرة تجبد سيرتو قدامي و إلا
انا:شنوة ؟
ياسين:ماهوش باش يعجبك لي باش يصير...نعرف رووحي غلطت صحيح أما باش ناخو فرصتي معاك مرة أخرى...بالسياسة و لا بالغصب...إنتي باش ترجع تحبني يا فتوووون
انا:و بعدها أنت تلقى stagiaire أخرى تحبها...و نولي أنا حمل ثقيل عليك...مش هكا
ياسين:يزززي...نعرف لي مااااكش باش تسااامحني عاللي صااار...أما مستحيل...نخلييييه يقرب منك و لا يبعدك عليا
أنا:و كيفااش تمنعو ؟ باش تعااود لي عملتو اليوم...و لا باش تصيح عليا بالطريقة هاذي ؟
قرب مني بالوقت...حصرني مع الكرهبة...و نزل راسو شوية...غزرلي ندرا كيف يحكي
ياسين:تنجم تقوول لي تحب عليه...و باش يكون عندك الحق فيه...اما تذكر في الاول و الاخير باش تكون ليا انا و كهووو
انا:بالتهديد ؟
ياسين:أنا نحب على فرصة أخرى منك
أنا:و خطيبتك...شنية ذنبها ؟
ياسين:انا المذنب الوحيد في اللي صار الكل...أما مستحيل نسلم فيك مرة أخرى...نوعدك باش ناخو فرصتي معااك...و باش تكون ليااا زادة...و كان صار و نعرف لهو مزال باش يدور بيك...نقضي عليه
انا:منستغربش...في الأخير أنت من عيلة الصياد...و لي تحبو عليه...يولي بالنسبة ليكم أملااك موقوفة
جبدت روحي منو شوية...و هزيت راسي قحرتلو و كملت كلامي نحكي
انا:و أنا مانيش من أملاكك...تكسبني الوقت لي تحب عليه و ترميني كي تحس روحك فديت مني...حط هذا في بالك...أنا سامحتك على خاطرك بو ولدي...أما متستناش مني أكثر...لا تهديدك و لا نفوذك...باش يجبروني إني نرضخلك...حياتي باش نعيشها بالطريقة لي نحبها أنا و كهو
حليت الباب و ركبت من غير ما نسمع كلمة اخرى منو...مديت يديا زوز مسحت دموعي...و تكيت لتالي مهما كان ضعفي قدامو و قدام قلبي...و رغم صدمتي باللي سمعتو الكل...مستحييل نسمحلو يدخل لحياتي مرة اخرى

🔸️ياسين_يحكي:
عديت يدي على وجهي...و خلطت عليها...حليت الباب ركبت و دورت راسي نغزرلها...حالتها داخلة بعضها...شي من اللي صار...و شي من دبشها لي تبلل...نحيت كبوطي و قربت منها شوية...باش نحطو عليها...دارت عندي بالوقت...و ضربتني بيدها تحكي
فتون:ما نحب حتى شي منك...أبعد عليا و كهو
خذيت نفس...كبست على يدها جبدتها عندي...و حطيتو عليها...كبست عليه...و لزيتها ليا أكثر...هزت راسها غزرتلي ندرا كيف...كبست عليه من شيرتين و جبدتها عندي أكثر...عديت عينيا على وجها...نحكي
أنا:منقصدش لي صار الكل...و منحبكش تتغشش بالطريقة هاذي زادة
فتون:و منحبش نحكي معاك زادة
أنا:عندك حق...في كلشي...و في أي قرار انتي تحب عليه...أنا ظلمتك بطريقة خايبة برشا...خاطرني كنت نجهل قيمة لي نملكو
فتون:أنت لي اخترت هذا الكل...و متنجمش تتراجع عليه
أنا:فرصة صغيرة منك كافية...باش تخليني نعوضك على كلشي عشتو جرايري
فتون:أنت جيت مأخر برشا...أنا موليتش نستناك كيما قبل
أنا:نعرف...نعرف هذا الكل...نعرف لانتي ستنيت برشا...و لي عطيتني برشا زادة...و لي قاعد نطلب فيه مستحيل قدام لي عملتو فيك الكل...أما ميسالش كان حاولت مرة أخرى...و كل مرة نعرف فيها لي إنتي باش تغفرلي و ترجعلي زادة
عديت عينيا على وجها...يمكن سكوتها في اللحظة هاذي...كان أحسن شي...أحسن من أي كلمة رفض...و لا ردة فعل متوقعة..قربتلها أكثر...خذيت نفس من ريحتها نفس الريحة لي كانت تهديني كل ليلة...و لي كانت تخليني نحب قربها في الوقت لي كنت هارب من كلشي نعرف إني منجمش نتعدا حدودي أكثر من هكا...و الا باش نضيع في قربها أكثر من أي شي آخر...لأول مرة نسمح لروحي إني نعيش كل احساس دفنتو داخلي قبل...حتى مستعد باش ندفع عمري الكل...و نعيش نفس الإحساس البنين لي حرمت روحي منو...في كل لحظة...هزيت راسي شوية...بستها من جبينها...و رخفت يديا على الفاست...جبدت روحها بالوقت...تكات لتالي تحكي
فتون:أنت توا عندك شكون في حياتك...و متأكدة لهي تحبك برشا...و أنت نفس الشي...حتى عندكم نفس المستوى لي كنت تحكي عليه ديما...و تنجم تقابل بيها الناس الكل...أنا معادش نحب نكون فرد منكم...مرتاحة في حياتي مع صغيري...و أنت بالظبط ياسين..مستحيل نخمم فيك مرة أخرى
هزيتلها براسي باهي...و تكيت لتالي...منحبش نتعبها أكثر...دقايق عديتهم من غير حتى كلمة...دورت راسها شوية...تحكي
فتون:باش نبقاو برشا هوني ؟
انا:شبيك مستعجلة ؟
فتون:عندي صغير يستنى فيا
انا:صااار...شبيك مخممتش فيه...و إنتي قاعدة عالطاولة معاه
فتون:ياخي باش نتعاركو مرة أخرى ؟
انا:يمشيش في بالك عديتها الحكاية
فتون:أمورك متهمنيش
كبست بيدي عالفولون و قربتلها شوية...عديت عينيا عليها...نزلت بيهم لساقيها...و عاودت غزرتلها نحكي
انا:من إمتى تلبس هكا انتي ؟
فتون:و أنت من إمتى تدخل فيا ؟
انا:نستنى فيك جاوبني
فتون:و أنا نفس الشي
انا:ماكش باش تقابلو مرة أخرى
فتون:باش نقابلو مرة أخرى
أنا:ماكش باش تعملها
فتون:نعملها
أنا:و ماكش باش تخدم عندو مرة اخرى
فتون:ماهوش باش يتخلى عليا
انا:في الأخير باش يتخلى
فتون:ماهوش كيفك
انا:و مستحيل يكون كيفي...حتى مستحيل تنجم تحبو
فتون:تتوقع مني باش نحبك أنت ؟
انا:مش هذا لي تعمل فيه توا ؟
فتون:كنت نحبك...متنجمش تفرق بين الافعال زادة الماضي و الحاضر ؟
انا:لا...أما نجم نعرف المستقبل
فتون:واضح برشا
أنا:مش هذا لي حسيتو أنا قبيل ؟
فتون:حسيت بشنوة ؟
تبسمت على جنب...و خدمت الكرهبة...وقفتني...تحكي
فتون:شنية تقصد بكلامك ؟
انا:فاش يهمك ؟
فتون:على خاطرك تحكي عليا حضرتك
أنا:مش قلت معادش تدخل في أموري ؟
فتون:و أنت معادش تحكي معايا
انا:وين خليت جواد ؟
فتون:مع روجين
انا:شبيني منعرفش بيها الحفلة هاذي ؟
فتون:مانيش مجبورة باش نخبرك
انا:أما كنت مجبورة باش تخليها على خاطرو...و تمشي تتعشى معاه
فتون:أنت شاورتني كي جيت مع خطيبتك...أكيد لا معناها معادش تدخل في حياتي مرة اخرى
أنا:كان مزلت باش تتصرف بالطريقة هاذي...تلقاني في وجهك
جات باش تحكي...رخفت يدي عالفولون...دورت راسي غزرتلها...و كملت كلامي نحكي
أنا:و بالنسبة لهالة...باش نفسخ الخطبة على قريب برشا
فتون:أموركم متهمنيش...حتى تنجم تلقى وحدة أخرى تحبها
انا:فما...أما يظهرلي مزالت ثنية طويلة
فتون:ماكش باش توصل جملة
أنا:متخممش في الحكاية توا...ساعة مجعتش إنتي
فتون:لا
أنا:هاني قصيت عليك بكري
فتون:للأسف كنت باش نفرح بالعشا معاه
انا:و بالهدية متاعو زادة
فتون:ميسالش...ناخوها في وقت آخر
أنا:أغزرلي هوني يا فرخة...من غير ما تخليه يتعب برشا جرايرك...في الأخير باش يلقاني في وجهو
فتون:إسمعني أنت...معاادش تهددني أحسنلك
انا:باهي...هدي روحك توا
فتون:روح بيا توا
انا:متأكدة متحبش تاكول ؟
فتون:نحب...أما مش معاك
انا:باهي...على راحتك
فتون:بردت...و نحب نرجع توا
هزيتلها براسي باهي...و خدمت الكرهبة...من غير حتى كلمة أخرى...نعرف لي الثنية بعيدة من هوني...و منجمش نخليها معايا أكثر...حسيتها بدات تهدا على قبل...دورت راسي شوية غزرتلها...تمسح في الما لي نازل من شعرها على وجها...هزيت بابيي...و قربتو منها هزت راسها غزرتلي ندرا كيف...و شداتو عليا...تبسمت و دورت راسي نحكي
أنا:محلاك الليلة...أما هكا احلى
غزرتلي ندرا كيف...و نزلت عينيها من وجهي...تكيت لتالي...و كبست عالفولون...هاذي من المرات القليلة لي ريتها هكا...يمكن هذا لي خلى غيرتي تقوا أكثر...فكرة أنو حد غيري ينجم يطلع على مفاتنها خلاتني نهبل عليها في كل لحظة جات عيني في عينها...كبست عالبابيي في يدها...مسحت وجها و تكات لتالي...خذيت نفس طويل...و شديت الثنية لدارها...أصلا لتوا مش مستوعب لي تعدا على راسي الكل...و رغم انها مكانتش خطوة محسوبة..اما لقيت روحي كسرت الحاجز لي كان مقيدني...يمكن ظلمت هالة في وسط هذا الكل صحيح و مانيش باش ننكر اللي صار..حتى باش نحاول نصلح لي صار...من غير ما نظلمها معايا أكثر...خاطر لي عشتو معاها الكل لتوا...مكانش حب...قد ما كان حاجة...حاجة إني نتحرر من القيود لي كان ماشي في بالي مربوط بيها...و فرد وقت نعرف بعد اللي عملتو فيها الكل...و القرارات الظالمة لي جبرتها أنها تعيشهم...يخلي طريقي أصعب من أي وقت تعدا...البعد عليها كان كفيل باش يخليني نعرف لي حاجتي بيه...أما فرد وقت...كان أكبر حاجز بنيتو بيناتنا...حاجز صعيب إني نهدو...وسط هذا الكل...لأول مرة في حياتي...فهمت شنية كلمة عشق..لي رغم عديت سنين و أنا عايش في وسطو...اما خذا مني برشا وقت باش نفهم و نستوعب الكلمة هاذي...حتى بعد توا...معادش يهم شنية نخسر و شنية نكسب...أما كلشي نعرفو و متأكد منو...مستحيل نخسر الحرب هاذي...باش نرجع كلشي خسرتو...حب حياتي و عيلتي الصغيرة لي حرمت روحي منها 
#فتون_ياسين 💕💕💕