كوكايين

الحلقة الثامنة و السبعون

🔸️حلقة 78
فقت من سرحتي كي شد الفران...دورت راسي شوية غزرتلو مستغربة...فك الحزام متاعو و غزرلي ندرا كيف قحرتلو نحكي
أنا:علاش وقفت الكرهبة ؟
أمين:شنية لي صار ؟
أنا:حتى شي...وصلني و كهو
أمين:مش قبل ما تفهمني لي صار ؟
أنا:وااجهت بابااا بالكلام لي سمعتووو منك...و منكرش لي صار...حتى حبسني خاطرني عصبت عليه...و خاطرو خااايف مني إني نرجعلك...ارررتححت توااا...ارررتحت يااااخي بااااش نبقى نعاااااني جرااايرك طوول عمررري شنييية مزززلت تحب مننني...تكللللم
مديت يديا زوز...باش نضربو...شدني بالوقت...و جبدني عندو...يحكي
أمين:إيجا هوني
غرس يدو في شعري...و هزلي راسي شوية...يحكي
أمين:ششش يزززي يا روحي...صدقني مستحيل نضرك مرة أخرى...و لا حتى نخليك تعيش نفس الشي
هزيتلو براسي لا...و كبست على صدرو بيديا زوز نحكي
أنا:أنت مشيت قبل توا...و باش تمشي مرة أخرى زادة أكاا علااش أبعد عليا أمين
عدا صوابعو على خدي...و هزلي براسو لا...يحكي
أمين:مستحيل نتخلى عليك بعد توا...يمكن لي عملتو غالط و ميتغفرش...أما منجمش نكمل حياتي من غيرك منجمش حتى تحاول صدقني...كنت و باش تبقى الحاجة الوحيدة لي خلاتني نقاوم لتوا...الخوف لي عشتو في السنين هذوما من مجرد أنك وليت لحد آخر منحبش نعيشو مرة أخرى
أنا:اما أنت اخترت حياتك بالفعل
أمين:كلشي يخصني خليتو معاك إنتي...و قاعد نسترجع فيه توا
أنا:أنت ما خليت عندي شي...أنت خذذذيت مني كلشي كلللشي...أنت قتلتني مرة...ماكش باش تعاودها
أمين:قتلت روحي معاك هالة...إنتي استحوذت عليا...و مكنتش نعرف نعيش من غير ما نخمم فيك صدقني حتى ولا مرة خممت إني نحب غيرك
كبست على صدرو أكثر...أصلا ملقيتش جهد باش نلومو و لا حتى باش نفرغ غشي فيه...كبس على شعري أكثر يحكي
أمين:يززي كهو...ياخي كل مرة نحكي معاك...تبكي بالطريقة هاذي...لتوا لا قطعتها العادة
أنا:شمدخلك فيياااا ياخي
أمين:باهي...أبكي كيما تحب
عديت يدي على خدي و قحرتلو...قرصني بالوقت يحكي
أمين:شنية هذا ؟
أنا:ش..شنوة ؟
أمين:هوني...شوف تراه
باقي يشاور بصبعو لوجهي...مديت يدي نمسح فيه و نحكي
أنا:شفما ياخي؟
أمين:شي...أما كي تبكي تولي أحلى
مديت يدي ضربتو لصدرو...ضحك بالوقت...وين لقيت روحي نضحك لنفس السبب...و لا يمكن على خاطر هذا لي كان يعملو معايا كل مرة باش يضحكني...عديت عينيا على وجهو...و قربتلو أكثر...دورت يديا زوز على رقبتو...و حضنتو بكل قوتي... منعرفش علاش عملت هكا...و لا حتى في شنوة نفكر....يديه لي دارت على ظهري...خلاتني نكبس عليه أكثر...عالأقل توا...خاطرني نعرف لي مستحيل نجم نسامحو عاللي عملو معايا...و لا حتى نعاود نفس الغلطة لي عملتها مع ياسين...في الأخير باش يرجع لمرتو هو زادة...جرد فكرة خلاتني نجبد روحي منو...هزيت راسي غزرتلو نحكي
أنا:رجعني لدار
غزرلي ندرا كيف و هزلي براسو باهي...حط الفاست متاعو عليا و خدم الكرهبة من غير حتى كلمة...حطيت راسي عالبلار...و رجعت بذاكرتي سنين لتالي...لكل لحظة عشتها...من أول مرة قابلتو فيها...متوقعتش علاقتي بيه باش تخليني نعيش أكبر وجيعة في حياتي و متوقعش لي القدر ينجم يحطو في طريقي مرة أخرى بعد اللي تعديت بيه الكل...فما شي داخلي...شي من الماضي...صعيب برشا إني نتخلص منو...رغم كلشي عملو معايا...اما أمين كان ديما أول حاجة في حياتي أول حب...أول راجل...أول دقات كانت ليه هو...و أول حلمة زادة...حاجات مهما هربت منها...تحتويني و تكبش فيا أكثر...مهما نقول نسيت...بيني و بين روحي نعرف لهذا مستحيل يصير...حبيتو بطريقة خاصة...بطريقتي أنا...لدرجة مخممتش إني ممكن نعيش من غيرو...و لا حتى يصير معانا الكل...الصدمة لي عشتها في بعدو لتوا مزلت نحس بوجيعتها...و منظنش فما شي يمكن يخليني ننسى لي تعديت بيه...فقت من سرحتي على صوتو يحكي
أمين:وصلنا
أنا:أنت باش تعاوني ندخل لبيتي...كيما خرجتني منها
أمين:وليت أنا سبب توا ؟
انا:يا ريتني معرفتكش جملة...و إلا مستحيل كنت باش نعيش بالطريقة هاذي...أنت أسوء كابوس في حياتي بالرسمي نتمنى منشوفكش مرة أخرى...نكررهك
حليت الباب و نزلت...منعرفش علاش قلت الكلام هذاكا و لا حتى علاش تصرفت هكا...يمكن هاذي الطريقة الوحيدة لي تخليني نفرغ غشي منو...من غير ما نلومو عاللي عملو..منعرفش كيفاش وصلت لشباك بيتي طلعت في الحجرة لي كان واقف عليها بكري...دوب نجمت نمد يدي...حسيت بيديه لي دارو عليا في لحظة...حط راسو على رقبتي يحكي
أمين:مدام تعرف روحك ماكش باش توصل...علاش تعذب في رووحك يا فرخة ؟
حطيت يديا زوز على يديه...محاولة مني باش نفك روحي و نحكي فرد وقت
أنا:سيييبني أمين...سيبني و لا باش نصيح
أمين:وقتها بوك يعرف بحكاية شباك...و يتسكر حتى هو...و هكا متنجمش تشوفني يا روحي
أنا:يكووون احسن ملا...سييبني
كبس على أجنابي أكثر...و جبدني عندو...يحكي
أمين:مانيش باش نسيبك...إلا بعد ما تسامحني...و ترجعلي مرة أخرى
أنا:نحب نرجع لبيتي قبل ما يفيق بيا بابا...سيبني و كهههو
أمين:كان نسيبك توا...مستحيل تنجم ترجع لبيتك
دورت راسي شوية قحرتلو...ضحك بالوقت...يحكي
أمين:هيا حبي...شد روحك
أنا:مانيش حبك...و رد بالك طيحني
أمين:متخاافش
مديت يديا زوز...كبشت بيهم...هزني شوية لين نجمت نطلع...طلع عالحجرة يحكي
أمين:لباس ؟
أنا:رد بالك تفلتني لين نجم ندخل
أمين:باهي متخافش
حليتو شوية و دخلت...تنهدت بالقاوي...و تلفت نغزرلو...شدني من يدي بالوقت...و غزرلي ندرا كيف يحكي
أمين:نحبك تعطيني فرصة أخرى...فما برشا حاجات محكيناش فيها
أنا:خاطرها مولاتش مهمة
مد يدو لأخرى...عدا صوابعو على خدي...و تبسملي يحكي
أمين:إنتي الحاجة الوحيدة لي تهمني...قبل و توا و لآخر نهار في حياتي
أنا:كنت باش نصدقك...أما كلامك هذا معادش يفيد توا
أمين:تذكر ديما لي انتي باش تكون ليا و كهو
أنا:في أحلامك
أمين:إنتي أحلامي زادة
حاولت نجبد روحي منو...كبس عليا اكثر...خطف بوسة من شفايفي و جبد روحو لتالي...قبل ما نقول حرف غمزني يحكي
أمين:و أنا نحبك زادة
بقيت نغزرلو لين رجع لكرهبتو...شاورلي بيدو و ركب تنهدت بالقاوي...و نزلت الريدو...مديت يدي شوية عديت صوابعي على شفايفي...وين حسيت دقات قلبي قوات أكثر...كانو حاجات من الماضي قاعدة تتعاود معايا بتفاصيلها...حكاية الشباك و البوسة...و حتى آخر حاجة قالها كانت الجواب متاعو للكلمة لي كنت نقولها قبل ما يمشي...قعدت عالكرسي...حليت القجر و هزيتها بين يديا...منعرفش قداش عديت وقت و أنا نغزرلها...و عاودت لبستها مرة أخرى بعد 7 سنين...عديت صوابعي عليها...الكوليي هذا كانت هدية منو...تبسمت و أنا نتذكر في الأيامات لي عديتها معاه...كلشي عشتو وقتها كان صادق بالنسبة ليا...و متوقعتش أنها حلمة...باش توفى على يد بابا...و على يدو هو زادة...كان خبرني بالحقيقة وقتها برشا حاجات...كانت باش تتبدل...دموعي لي حسيتها باش تنزل مرة اخرى...خلاتني نحيها بالوقت رجعتها لبلاصتها...و مشيت لسريري...تسطحت لتالي...و غمضت عينيا..نحب ننسى لي صار الليلة الكل منحبوش يدخل لحياتي مرة أخرى...و لا حتى يستحوذ عليا بالطريقة هاذي...أنا نسيتو و نسيت كلشي عشتو معاه العالم متاعو غير متاعي توا...و حتى ثنية ماهي باش تجمعنا مع بعضنا مرة أخرى..هو إختار حياتو قبل سنين من توا...و أنا عملت نفس الشي...يمكن موصلتش للي نحب عليه و نستقر بالطريقة لي تمنيتها ديما...حتى يمكن الاخطاء لي عملتها متتغفرش...خاطر وجيعتي كانت غالبة عليا و ما نجمت نخمم في حتى حد غيري أما منحبش لي صار معايا يتعاود مرة أخرى...منحبش نعيش نفس الشي...حتى لي يعمل فيه أمين توا...ينجم يكون مجرد إحساس بالندم...يتخلى عليه وقت يعرف لانا سامحتو...الفكرة هاذي بالظبط...خلات دموعي تغلبني...رغم كلشي منحبش هذا يصير معايا...مش بعد اللي تعديت بيه...عديت يدي على خدي و تلفت...خذيت نفس طويل...محاولة مني باش ما نخمم في حتى شي من اللي صار...كلشي يهمني توا...اني نخلص من هذا الكل و نرجع لحياتي...و إلا باش نتخنق في البيت هاذي من غير خرجة و لا تليفون...ولا مرة توقعت لي بابا يخاف من علاقتي بأمين لهدرجة..لدرجة أنو مستعد يضرني على إني نكون معاه...عديت صوابعي على شفايفي مرة أخرى...بالرسمي منعرفش شنية لي قاعد يصير معايا...و لا حتى علااش قاعدة نخمم فيه بالطريقة هاذي...رغم اني متأكدة أنو مهما كان السبب لي باش يقولو المرة هاذي زادة...منجمش نكون معاه و لا حتى نسمح لروحي باش نكون في علاقة مع واحد معرس بعد توا...يكفي لي تعدا بيه ياسين جرايري و لي كان باش يخسرو...رغم اللي صار معايا الكل و لي قاعدة نعيش فيه...أما بالرسمي نحب حياة هادية من غير حتى مشكلة و لا وجيعة...نحب نكون انا و كهو.