كوكايين

الحلقة الرابعة و التسعون

🔸️حلقة 94
🔸️فتون_تحكي:
خذيت نفس طويل و دخلت...منعرفش كيفاش نجمت نجي لهوني بعد اللي صار آخر مرة...كل خطوة نعملها دقات قلبي تقوا أكثر...خاصة إني ما خبرت ياسين بشي...قربت من البيرو نحكي
أنا:نحب نشوف سي نبيل توا
إكرام:أكيد فتون...هاني باش نعطيه خبر
أنا:لا...يكفي أنو ما عندو حد توا
إكرام:باهي تفضل ملا
هزيتلها براسي باهي...و طلعت عندو...دقيت الباب و دخلت مترددة...هزيت عينيا في وجهو...آثار الضرب لتوا موجودة...كبست على صاكي نحكي
أنا:نجم ندخل
شاورلي بيدو للكرسي...تنهدت بالقاوي و قربت قعدت عاودت غزرتلو نحكي
أنا:شحالك ؟
نبيل:أحسن
أنا:نحب نعتذر منك عاللي صار آخر مرة
نبيل:أنا لي لازم نعتذر منك
أنا:أنا جيت لهوني خاطر فما أمانة لازمني نرجعها
مديت يدي جبدت بوات البراصلي و الخاتم...حطيتهم فوق البيرو...نحكي
أنا:إحنا حكينا في الموضوع هذا من الأول...و ما خبيت عليك حتى شي..أما أنت استغليت كل حرف حكيتهولك ضدي...و حاولت توجعني بيه...و اللي صار آخر مرة كوم وحدو...أنا منجمش نكمل نخدم هوني
نبيل:نعرف روحي غلطت...أما مش لدرجة أنك تقص عالخدمة...متخلطش بين الأمور
أنا:هاك أنت خلطت...و لي صار الكل كان داخل إطار الخدمة
نبيل:ملا هو لي قرر في بلاصتك ؟
أنا:مجيتش باش نحكي عليه
نبيل:معناها تحب تستقيل
أنا:أكيد
تبسم على جنب...هز ورقتين في يدو و وقف...قرب مني قعد مقابلني...حطهم زوز عالطاولة يحكي
نبيل:إنتي باش تختار وحدة منهم
أنا:شنية هذوما ؟
نبيل:العقد لي وقعت عليه و ورقة إستقالتك...أما نصيحة مني تقرا شروط العقد مرة أخرى
عديت عينيا على وجهو و مديت يدي هزيت العقد...نقرا فيه...تبسم يحكي
نبيل:بقية الشروط في الورقة لأخرى
قلبت الورقة بالوقت...عينيا وساعو من اللي نقرا فيه هزيت راسي مصدومة...نحكي
أنا:شنية هذا ؟
نبيل:شروط العقد لي وقعت عليه
أنا:نبيل أنا موقعتش على عقد هكا
نبيل:ثبت أكثر عزيزتي
غزرت لتوقيعي وين حسيت روحي تصدمت أكثر قحرتلو نحكي
أنا:المبلغ هذااا كبير برشااا و مكانش موجود في العقد الأول
نبيل:الأمور ترجعلك...المبلغ ماهوش كبير على عيلة الصياد
أنا:أنت مستحيل تعمل فيا هكا
نبيل:تنجم تاخو وقتك و تخمم بالقدا
أنا:شنية مقابل هذا ؟
نبيل:تبقى في خدمتك...مانيش باش نطلب منك أكثر تهنى...واللي صار ماهوش باش يتعاود
أنا:تحبني نبقى بالسيف عليا ؟
نبيل:تنجم تمشي على روحك بعد ما تدفع المبلغ...تنجم تاخو وقتك في التفكير...نستأذن منك توا...ماك تعرف الخدمة متستناش
كبست على صاكي و هزيت روحي خرجت من غير حتى كلمة...مش مستوعبة المبلغ لي قريتو و لي يحبني ندفعو...خاطر يعرف لأنا مستحيل نجم نطلبو لا من ياسين و لا غيرو...فرد وقت منجمش نستقيل على خمس سنين..شديت طاكسي و رجعت للفيلا محسيتش بالثنية كيفاش وصلت...حتى منجمتش نفكر في اللي صار...أول ما وصلت تحل الباب في وجهي...هزيت راسي نغزرلو...خارج هايج غير العادة...عدا عينيه على وجهي و قحرلي يحكي
ياسين:وين كنت ؟
خذيت نفس طويل...في بالي ماهوش باش يرجع قبل العشية من الكلينيك...خذيت نفس نحكي
أنا:في السوسيتي
ياسين:بالله ؟
أنا:نجم ندخل ؟ نحب نهز جواد و نرجع لدار
جبدت روحي منو و دخلت...هاربة من غزرة عينيه و من أسئلتو الجاية...أول ما وصلت لدروج...جبدني من يدي رجعني عندو يحكي
ياسين:مزاااال مكملتش كلااامي
أنا:يااسين...هدي روحك مش وقتو توا
ياسين:شنييية لي مش وقتو ؟ كيفااااش تمشي لعندو بساااقيك...ياااخي نورمااال في مخك...مخممتش كان عاااود خدم مخو معاااك...مشفعتش من اللي صار ؟
هزيت راسي نغزرلهم...الكل خلط مع صياحو...حتى فهد زادة...خذيت نفس نحكي
أنا:سيبني ياسين
ياسين:مش قبل ما تحل ●●● فمممك و تتكلم
فهد:ياسين شفماا ؟
جبدت يدي منو بالوقت...و وخرت خطوة لتالي...نحكي
أنا:مفمااا حتى شي...أما سي ياااسين ميحبنيش نخدم كهو الحكاية
ياسين:بالله...وليييت أنا الغاااالط تواااا ؟
أنا:معااادش تصيح عليا...يزززي كهو
سلطانة:ياااسين شبيك عالطفلة ياااخي
ياسين:إنتتتي بالذااات متدخلش...حد ما يدخل فيها الحكاااية
خذيت نفس طويل و هزيت روحي باش نطلع...هاربة منو و من صياحو...خاطر بيدي معنديش تفسير و كان يعرف باللي صار...يهبل أكثر من هكا...كيما متأكدة لي نبيل يستنى فيه و لا مكانش عمل هكا من الأول رجعني لعندو بالوقت و كبس على يدي أكثر...يحكي
ياسين:مكملتش كلااامي بااش تمشي
أنا:ياااسين...يزززي أمااانك
ياسين:أغزرلي هوووني ●●●●● السوسيتي متاعو معاااادش تحط فيها سااقك مرة أخرى...و إلا مااهوش باش يعجبك اللي باش يصيير جملة
أنا:متهددنيييش...معندكش حق بااااش تدخل في حياااتي...نعمل لي نحب عليه و نمشي وين نحب زااادة و خدمتي باش نكملها حبيت و لا كرهت
ياسين:ولييينااا هكاااا معناها...مشفعتش من اللي صاااار...و تحب ترجع ●●●●● هذاكاا
أنا:أمووووري...نعمل لي نحب عليه...سيبني تواااا سيبني
ياسين:أغزرلي هووووني...كاااان تحب ترجع للخدمة متاااعك...ولدي ماااهوش باش يخرج من هووني تسمع فياااا...معنديش إستعداد نخاااطر بيه...خااااطر سياااادتك تحب تخدم مع واااحد psychopathe كيفووو
عديت عينيا على وجهو...مصدومة من الكلام لي قالو آخر حاجة توقعتها يدخل جواد في الحكاية...لا يزي الصدمة لي خذيتها صباااح...يحب يكمل عليا هو..مديت يدي ضربتو لصدرو...نحكي
أنا:رررد باااالك تعاااود الكلااام هذاااا...و لااا حتى تحاااول دخل جواااد في الحكاية
ياسين:لي عندي قلتو و إنتي حرررة...الخدمة هذيكاااا معااادش تحط ساااقك فيها...و إلا ماهوش باش يصير خير...هذااا كااان متحبش موتو تكون على يدي
أنا:زاااايد متحشمش...برااا أتلهى في أموورك...في خطيبتك...في حياااتك...معااادش دور بيااا جملة...و لا حتى تخمم تبعد جوااااد من حضني...نكرررهك
هد عليا في لحظة...وخرت لتالي مروهجة و دموعي غلبتني...شدو فهد بالوقت يحكي
فهد:يزززي كهوو...مش هكا تتحل المشكلة
ياسين:و ماااهيش باش تتحل مدامها تحب تبقى معاااه
أنا:أموووري
هز يدو في وجهي...و شاااورلي بصبعو...يهدد فيا و يحكي فرد وقت
ياسين:والله يااا فتووون...و رحمة بابا...كااان نعرف لإنتي مخبية عليااا حاااجة...وقتها ما تلوم كااان روووحك...و حسااابك باش يكووون الدوبل على هكااا
فهد:يااااسين يزززي...إيجااا معايا توا
قحرتلو و هزيت روحي طلعت بالزربة...خلطت عليا روجين لبيت جواد...سكرتها تحكي
روجين:فتوون شنية لي صاار...مش على أساس باش تقدم إستقالتك
أنا:ما صااار حتى شي...ه..هاك سمعتو كيفااش يحكي معايا...من أول مشكلة يخمم باش يفكلي ولدي
قربت مني أكثر...حضنتني...كأني كنت مستحقة شكون باش يواسيني...كبست عليها بيديا زوز...و غرقت في دموعي...متوقعتش هذا الكل باش يصير معايا...و لي ياسين باش يتصرف بالطريقة هاذي...أصلا أول مرة يتهدد عليا هكا و قدام الكل زادة...لدرجة حسيتو باش يمد يدو عليا في أي لحظة...أصلا مستحيل نجم نخبرو بالمبلغ لي في العقد...خاصة في وضعنا هذا...حتى كان يدفع...باش يخسر برشا جرايري...و هذا لي يحاول يوصلو نبيل...كتعويض عاللي صار فيه...جبدت روحي منها و قعدت عالفوتاي نحكي
أنا:م..مستحيل نجم نعيش من غير ولدي...هو يعرف هذا بالقدا...يعرف لي مانيش باش نسلم في جوااد..ا..أنا تنازلت برشا جرايرو...قبلت بكلشي كان يطلبو قبل مكفااهش هذا الكل
قربت مني قعدت بجنبي...و كبست على يدي...تحكي
روجين:ياسين ميقصدش لي قالو...صدقني جيست خايف عليك و كهو...حتى أنا نظن كان ترجع هوني بحذانا خير
أنا:منحبش روجين...ستانست وحدي...و حتى هاكي دارو زادة...مش بعيد المرة الجاية يطردني منها
روجين:بالله فتوون...علاش مهبول باش يعملها...تعرف لي هو يحبك...و خايف يخسرك...كهو علاش تصرف هكا
أنا:هو يحب روحو و كهو
روجين:باهي نجم نعرف علاش بدلت راايك و علاش تحب تكمل الخدمة معاه ؟
أنا:حتى شي
روجين:باش تخبي عليا انا زادة...على أساس نحكيو كلشي لبعضنا
أنا:أكيد باش نحكيلك كلشي...أما مش توا
روجين:باهي كيما تحب يا روحي
تكيت لتالي نغزر لجواد لي غاطس في النوم...مستحيل نتصور يجي نهار و يبعد عليا...حتى روجين منجمش نخبرها...خاطر مستحيل تعدي الحكاية...أنا عمري ما دخلت للعيلة هاذي على طمع و لا باش ناخو فرنك منهم حتى من ياسين زادة..مدام الحكاية تخصني باش نحلها بطريقتي...حتى كان ظطريت نكمل الخدمة عندو...فرد وقت نحس في راسي باش يطرشق...من كلامو...و لا مرة توقعت باش يحكي معايا أكاكا...خاصة بعد اللي صار آخر فترة...لدرجة صدقت لي هو نادم على كلشي و يحب يكون معانا مرة أخرى...طلع خايف أكثر شي على ولدو...خذيت نفس نحكي
أنا:ميسالش توصلني إنتي ؟
روجين:أكيد...أما ساعة حاول ترتاح شوية
أنا:منحبش نشوفو مرة أخرى
روجين:باهي شقولك نعدي ليلة عندك
أنا:تحكي بجدك ؟ فهد باش يوافق ؟
روجين:شعندي فيه...أصلا ماهوش يحكي معايا اليومين هذوما
أنا:بسبب غسان ؟
روجين:للأسف...هيا حضر جواد...لين نجيب دبشي و مفاتحي و نجي
أنا:باهي عزيزتي
أول ما خرجت...قربت من جواد...هزيتو في حملتي ريحتو كانت كافية باش نطفي الحرب لي قايمة داخل عقلي و تخليني نهدا و منخممش في اللي جاي اللي جاي أكثر من هكا.
#ياسين_فتون💔