كوكايين

الحلقة الثانية و العشرون

🔸️حلقة 22
🔸️روجين تحكي:
شد الفران بالقاوي...و نزل من غير ما يقول حرف واحد...أصلا ثنية كاملة خلاني نحكي وحدي...من غير ما يجاوبني و لا يغزرلي...نعرفو كي يبدا في الحالة هاذي...ماهوش باش يتلفت وراه...و من تصرف متاعو متأكدة باش يهلك الدنيا علينا...منعرفش شنية مزال يحب مني بعد اللي عملو الكل...حل الباب من جيهتي و نزل راسو غزرلي يحكي
فهد:أنزل
أنا:منحبش
فهد:رووجييين مانيش باش نطول بالي معاك أكثر...متكملش على ●●●● توا
انا:مانيييش باش ننزل...معناها مااانيش باش ننزل أخطاااني
حل الباب أكثر...و نزل عليا شوية...كبس على يدي...و جبدني...نزلني بالسيف عليا...و سكرها بالقاوي...يحكي
فهد:امشششي قداامي توا
أنا:سييبني فههههد...ياخي فاش تستخايل روحك تعمل
فهد:تمشي و لا نحملك ؟
أنا:زايد متفهمش بالكلام...رد بالك تقربلي
فهد:أمشي ملا
انا:منحبش نطلع معاك لدارك...كان عندك حاجة احكيها هوني
فهد:باهي...إنتي لي اخترت
أنا:شباش تعمل ؟
أول ما قربلي...وخرت لتالي أكثر...تكيت عالكرهبة نحكي
انا:باااهي بااهي...سيبني نمشي وحدي
فهد:ازرب روحك
قحرتلو و عطيتو بظهري...خلط عليا بالوقت...يمشي ورايا..اول ما وصلت لدخلة...تلفت باش نرجع..منجمتش ننسى لي تعدا عليا هوني...منجمتش ننسى الليلة لي خلاني نعيشها...و الكلام لي قالو...وقف في وجهي...و هزلي براسو باش نمشي...حاولت نتجاهلو...يدو كبست عليا...في لحظة...حتى رجال السكريتي لي واقفين مستغربين في تصرفاتو...هاذي أول مرة نتصرف معاه بالطريقة هاذي...بالعادة ديما مع بعضنا...خلطت عليه من غير ما نحاول نلفت الأنظار أكثر...حل الاصونصير و دخلني معاه...صوابعو لي تغرست في يدي...خلاتني عاجزة حتى باش نحكي معاه...و لا نفهم منو لي قاعد يصير...أصلا نحس في روحي باش نطرشق من كلام امي بكري...و من تصرفاتو توا...معادش نعرف قداش باش نستحمل اكثر من هكا...و لا شنوة لازمني نعمل بالظبط...اول ما تحل الباب...جرني معاه...و جبد الكارت متاعو من مكتوب الفاست...حل الباب و دزني الداخل نطرها بالقاوي...و قحرلي يحكي
فهد:هوكا بقينا وحدنااا...تنجم تخرج غشك فيا كيما تحب...أما مبعد هكا مجبورة باش تنحي صحة راسك و تسمعني
عديت عينيا على وجهو...و دورت راسي نثبت في كل بقعة من الدار...للسرير لي جمعنا أكثر من مرة...للحظة حسيت دقات قلبي قوات أكثر...متوقعتش باش نرجع لهوني مرة أخرى...و لا حتى ندخل لدار هذا مرة أخرى قحرتلو نحكي
أنا:علااش جبتني هوني ؟
باقي يغزرلي من غير حتى كلمة...مديت يدي شوية بعدت شعري لتالي نحكي
انا:نسأل فيك جاوبني ؟
غمضت عينيا بالقاوي و عاودت حليتهم...قربت من الباب باش نخرج...وقف في وجهي بالوقت...عديت يدي زوز على وجهي...نحكي
انا:أبعد خليني نخرج من هوني
فهد:ماكش باش تمشي لحتى بلاصة
انا:شنية تحب مني فهد ؟ علاااش جبتني لهوووني ؟ بشنوة تحب تذكرني أنت ؟
ضربتو بيديا زوز على صدرو...و هزيت راسي غزرتلو نحكي
انا:تكلم فهههد...بشنوة تحب تذكرني...بالليلة لي عطيتك فيها روحي...و لا الليلة لي عفست فيها عليا...شبييك ساااكت...شنية تحب مني أكثررر من هكا...لتوا تحب تذلني ؟ و لا حلال عليك تعمل لي تحب...و حرام عليا انا ؟
دزيتو مرة أخرى...باقي واقف في بلاصتو من غير ما يتحرك...كبست على شعري بيديا زوز...نحكي
انا:أنت فقدت الحق عليا...بعد اللي عملتو فيا ليلتها...و حتى شي ماااهو باش يشفعلك عندي يااا فهد مستحيل نسامحك...أنت خليتني نخسر برشااا...و توا ابعععععد من قدامي خليني نخرج
مد يديه باش يشدني...دزيتو لتالي...نضرب فيه بكل قوتي...و نحكي فرد وقت
انا:في الأخييير طلعت أنت و امي نفس الشي...خااايف نعرس بغيرك ؟ و مخممتش شنية الموقف متاعي قدام العيلة كان رفضت...و قدام الراجل لي باش نقابلو مخممتش كيفاش نقابل الناس الكل و أنا عايشة زوز أدوار في حياتي جرايرك...دور المعرسة و مانيش معرسة...و دور الصبية لي يحبو يعرسولها و يفرحو بيها و مانيش صبية...نعرف روحي غلطت قبل...و مانيش نادمة عاللي عشتو معاااك...عالأقل ذكرى فهد القديم تستحق باش نعيش معاها...اما انت لا...مستحيل نسامحك...و لا حتى نخليك تكون في حياتي مرة أخرى
مديت يديا زوز من صدرو نمسح في دموعي...لي دوب نزلتهم باش نبعدو...لقيت روحي بين يديه...منعرفش كيفاش و علاش حضني...كبسة يديه القوية...خلاتني نرضخ رغم مقاومتي ليه...مهما بعدت و مهما عملت منجمش ننكر الحضن لي كبرت فيه...هوني كنت نلقى راحتي...هوني كنت نبكي كي تطردني أمي...و هوني كنت نحكي على عملة خايبة عملتها ورا ظهرو...لي تخليه يسكت و يسامحني...و هوني كنت نحكي على الحاجات لي تفرحني...غمضت عينيا بالوقت نستحضر في كل لحظة عشتها معاه...انا تعلمت خطواتي الاولى بجنبو...حتى الحاجات الصغيرة تعلمتها من عندو...يديا ترخفو و تحطو على ظهرو...هاربة من فكرة أنو ماهوش ملكي بعد توا...كبست عليه نحكي
أنا:علاش عملت فيا هذا الكل...علاش متحبش تبعد و تحررني منك
كبس عليا...لين معادش نحس بروحي بين يديه...حط راسو على كتفي يحكي
فهد:ماكش باش تكون لحتى حد غيري...متخلينيش نضيع أكثر من هكا...متخلينيش نخسر اللي بقالي في حياتي...كان في النهار من نهارات تفكر تكون لغيري نقتلك روجين...صدقني نعملها من غير ما نخمم مرتين
أنا:س..سيبني توا
رخف يديه شوية...و جبد روحو لتالي...مد يدو باش يحطها على وجهي وخرت خطوة لتالي نحكي
انا:معادش تحط يدك عليا
فهد:باش تسحب الكلام لي قلتو لأمك...ماكش باش تقابل حتى حد
انا:و أنت شبيك خايف ؟ شنوة مزلت تحب مني ؟
قرب من الكنتوار...يعبي في كاستو...حاولت نحل الباب...أما الكارت قعدت عندو...تكيت عليها نحكي
انا:نستنى فيك تجاوبني...علاش جبتني لهوني...و شنية تحب مني ؟ شنية مزال مخذيتوش مني ؟
كبس عالكاسة في يدو...شربها فرد مرة...و قرب مني يحكي
فهد:نعرف روحي غلطت معاك...و برشا زادة...يمكن خاطرني منجمتش نواجهك...و لا خفت من ردة فعلك هاذي
أنا:تعرفشي حاجة فهد ؟ أنت متحبنيش أنا...أنت تحب بدني و تعودت عليه...أكا علاش منجمتش تبعد عليا يعني بالمختصر تحبني نرضيك و كهو
فهد:روجين سكر فمك
أنا:نبقى عشيقتك هوني بالسر...و بلقيس مرتك قدام الناس
فهد:يزززي كهو متخلينيش نغلط معاك أكثر
أنا:شنية باش تكلفني الغلطة هاذي ؟ تاقف في صف أمي و تخرجني...ساعة نتوما زوز عملتو فيا مزية كبيرة برشا...و نظن خمس سنين ماهيش كافية باش نرد دين لي عليا...و أمي تحبني نعرس و نبعد باش تسامحني على شنوة منعرفش...قولي شنية مزال أكثر...في بالك تهديدك مزال باش يخوفني...يا حصرا وقت لي كنت نخاف منك و نخاف عليك زادة
هد عليا في لحظة...حصرني مع الحيط...و نزل راسو قحرلي يحكي
فهد:ياخي تضربت في مخك إنتي ؟ ناوية تهبل ●●●●● على بكري...كيفاش يجي في مخك الكلام هذاااا...كيفاش تتوقع مني ناقف مع المهبولة متاع امك...ياخي نورمال نخليك ليها...زيد لتوا مغلغل على ●●●●● من الكلام لي قلتو بكري...و بااقي تحل في فمك معااايا ؟
أنا:متصيحش عليا...و ابعد شوية...نحس في روحي باش نتخنق
فهد:الصبر يا ربي...شنية تحب توا تكلم ؟ تحبني نحكيلك كلشي ؟ تحب تعرف الماضي متاعي و تكرهني اكثر ؟
عديت عينيا على وجهو...كلامو تالي...خلى قلبي يخض بالقاوي...منجمش نستخايل انو فما اكثر من هكا...و اني كنت عايشة مع حد ما نعرف عليه حتى شي...رجعت خصلات شعري لتالي...و قحرتلو نحكي
أنا:ما نحب نعرف حتى شي...ابعد عليا و كهو...و كلامي مانيش باش نتراجع فيه...كان مانيش باش ناخو لي اختارتو امي...ناخو غيرو...أما مستحيل نرجعلك
فهد:مزاالت تعااود فيها...تحبني نستجرم في هالليلة الكلبة
أنا:شبيك هبلت عليا...كان تحبني نسامحك...مجبور تشوفني مع غيرك...مجبور تتقبل انو فما شكون في حياتي غيرك أنت...حد يستهل نكمل معاه ثنيتي...و نجيب منو صغار...عالأقل ماهوش باش يجبرني نشرب حرابش...و لا يرفض يكون بو...على خاطر متأكدة مهما كانت علاقتي بيه...ماهوش باش يكون ساقط كيفك أنت...حتى أحسن حاجة عملتها اني محبلتش منك خاطرك مستهلش تكون بو...و لا حتى صغير يقولك بابا...خاطرني بالرسمي كرهتك...و كرهت قربك مني
مد يدو باش يضربني...غطيت وجهي بالوقت...الخوف لي حسيتو من ردة الفعل متاعو خوفني...أول مرة يهز يدو في وجهي...و يحاول يضربني...البونية متاعو لي ضربت عالحيط جنب راسي اكثر من مرة...خلاتني نسكر وذنيا مع صياحو لي زاد قوا هو زادة
فهد:يزززززي كهههو....اسسكت...سكررررر فمك روووجين...اسكت
مديت خطوة باش نبعد رجعني بيدو لتالي..بدني تكبس و خفت يهبل عليا أكثر...الدم لي نزل من يدو...فيقني عالكلام لي كنت نقول فيه من غير وعي...يمكن نحب نلومو على ولدي...من غير ما نخليه يعرف الحقيقة مديت يدا زوز...كبست على يدو بالوقت...نحاول نوقف الجرح لي تحل...نزلت راسي مع دموعي لي هبطت...و كبست عليه اكثر...نحكي
انا:ب..باهي هدي روحك...ي..يدك قاعدة تنزف
هزيت راسي شوية...عديت عينيا على وجهو...على عينيه لي حمارو...منجمش ننكر انو فهد عطاني برشا عطاني لدرجة...غياب أمي و حضورها مكانش يفرق عندي برشا...اما في لحظة جبد البساط من تحتي...و خلاني نتخبط وحدي...و مدام وصل جابني هوني متأكدة يحب يخبرني بكلشي...و فرد وقت يحب يبقى ساكت على كلشي...يمكن هاذي احسن فرصة ليا تخليني نعرف حقيقة الدوامة لي ضعت فيها...و معادش نجم نخرج كان بعد ما نحط النقاط عالحروف و نكشف السر المدفون عند كل واحد منهم..نزلت عينيا من وجهو نغزر ليدو لي ولات كلها دم...اصلا الدم و ريحتو تذكرني باسوء ليلة تعديت بيها و منجمتش حتى نسعف روحي جيت باش نحكي...جبد يدو مني...و وخر خطوة لتالي عدا عينيه على وجهي...غزرلي ندرا كيف و عطاني بظهرو...بقيت نتبع فيه بعينيا لين دخل لبيت البانو خذيت نفس طويل...و خلطت عليه...حليت الباب وراه نغزرلو يغسل في يدو...قربت منو شوية نحكي
أنا:ميجيش هكا...لازمك تعقمها
فهد:تنجم تمشي على روحك...عرس و جيب صغار مدامني حرمتك منهم
أنا:بالطبيعة باش نعمل هكا
فهد:ملا شبيك خلطت عليا لهوني ؟
أنا:يدك تنزف
فهد:تحب تفهمني لي خفت عليا ؟ تي هاك وليت تتمنى موتي في كل لحظة...عالأقل ترتاح مني
انا:فاش قام الكلام هذا توا
فهد:تضربت على راسك قبل ما تدخل لعندي ؟
أنا:فهههد يزززي...ما عندك حتى حق يخليك تتغشش مني
فهد:إي بالطبيعة...و معنديش حق يخليني نمنعك تعرس و تجيب صغار
أنا:أكيد
غزرلي ندرا كيف...و جبد المنشفة...حط عليها يدو و خرج...نفخت بالقاوي...جبدت البوات فرماسي و خلطت عليه...لقيتو ترمى في وسط السرير...كبست عليها في يدي نحكي
أنا:إيجا اقعد عالفوتاي
غمض عينيه من غير ما يرجعلي..أصلا منعرفش كيفاش نمد الخطوة لسرير هذا مرة اخرى...و لا حتى كيفاه باش نقرب منو...اما متأكدة ماهوش باش يسمعني مدامو كسح راسو و ميحبش يحكي معايا...تنهدت بالقاوي...و طلعت بجنبو...كبست على يدو و جبدتها عندي...نغزر للجرح لي في وسط يدو...متوقعتش الضربة قوية لهدرجة...كبست عليه أكثر...نعقم فيها و نحكي فرد وقت
أنا:منقصدش الكلام لي قلتو بكري...متأكدة باش تكون البو المثالي لصغارك...مدامك ربيتني أنت طول السنين هذوما...حتى مرتك ماهيش خايبة برشا...تعدي روحها
حل عينيه...غزرلي ندرا كيف...نزلت على شفايفي شوية نحكي
أنا:باهي...منقصدش لي هي خايبة خايبة...أما زادة متتحبش...يعني عالأقل كنت تختار وحدة أحسن منها
فهد:اختارلي إنتي
أنا:نحكي بجدي فهد...الكلام لي قلتو بكري...قلتو من غشي كهو...من غير ما تاخو عليه...إحنا من الأول علاقتنا واضحة و هوكا جا وقتها و وفات..حتى متأكدة كان تكبر عيلتك و يولي عند صغير منها...معادش تتذكر حتى شي من اللي عشتو معايا
فهد:كيفاش نجيب صغير منها ؟ بالبلوتوث ؟ و لا بدعاويك إنتي ؟
أنا:شقصدك ؟
فهد:توا وليت متفهمش قصدي ؟
كبست على يدو أكثر...غمض عينيه بالوقت...و عاود حلهم يحكي
فهد:شبييك ؟
أنا:متحكيش معايا بالالغاز متاعك...خاطرني مانيش باش نتحملك كيما قبل
قلب عليا الطرح في لحظة...كبس على يدي و جبدني عندو...طاح شطر بدني عليه...حط يدو لأخرى على آخر ظهري...ضربتو بيدي لصدرو نحكي
أنا:سييبني فاش تعمل ؟
فهد:نحب نوضحلك الأمور و إنتي في حملتي
أنا:توضح شنية ؟
فهد:نوضحلك كيفاش نجيب صغار
أنا:شيهمني فيك...ياخي باش تحكيلي على علاقتك مع مرتك توااا...سيبني فههد
كبس عليا أكثر...و مد يدو حطها على خدي...رجعلي شعري لتالي...و كبس عليه يحكي
فهد:مفماش علاقة حتى نحكي عليها
أنا:تحب تفهمني طول الشهور هذوما كنت تتفرج عليها و كهو
فهد:كان حبيت صغير في نهار من نهارات...نحبو يكون منك روجين...بلقيس مجرد صفقة بالنسبة ليا
أنا:صفقة تستغل فيها لصالحك...أصلا كيفاش تسمح لروحك تعمل حاجة هكا
فهد:بلقيس جزء منها
انا:شقصدك ؟
فهد:تعرف بكلشي من الأول...من غير ما تخمم فيها
بقيت نغزرلو من غير حتى كلمة...كبس عليا اكثر...و كمل كلامو...يحكي
فهد:وعدتك من قبل إني مانيش باش نمس غيرك...على هذاكا لا بلقيس و لا حتى وحدة غيرها تخليني نخلف وعدي ليك...نعرف روحي غلطت...نعرف صعيب تسامحني...أما مستحيل نسلم فيك روجين...أنا باش نعطيك كلشي تحب عليه...و كلشي حلمت بيه معايا عرس و صغار...أما نحبك تستناني...نحبك تبقى قريبة مني...و كهو
كبست على صدرو...و جبدت روحي منو في لحظة نحكي
انا:ما نحب حتى شي منك
عديت يدي على رقبتي...نرد في النفس...منحبش نتذكر لي عملتو بيديا شهور لتالي...خذيت نفس نحكي
انا:كان طلعت حبلة بالحق ليلتها ؟ كنت باش تختار الصفقة متاعك و تخليني ؟ و لا كنت تجبرني نطيح الصغير ؟
هز روحو تقعد شوية...غزرلي ندرا كيف...و هزلي براسو لا يحكي
فهد:في رايك كنت باش نعملها ؟ نقتل قطعة مني على خاطر صفقة ؟
كبست على يدي بالوقت...كلامو دخلني بعضي أكثر تعدل في قعدتو اكثر يحكي
فهد:روجين كنت حبلة ياخي ؟
هزيت عينيا في وجهو مروهجة...متوقعتش السؤال هذا منو...و خفت من دقات قلبي لي قوات انها تفضحني قدامو...سؤالو خرج مع ملامح وجهو لي تبدلت...خذيت نفس نحكي
انا:متخاافش...كنت عاملة حسابي كيما وصيتني...و اكيد مش أنا لي نربطك بصغير...حتى ليلة لي رميتني فيها مكانش هذا رد فعلك كي سألتك كان نطلع حبلة منك...اصلا جوابك ليلتها كان كافي باش نفهم علاش رفضت فكرة العرس و الصغار...خاطر فما في حياتك حاجات اهم مني و انا معادش نحب منك حتى شي من هذوما...خاطرني بديت نشوف الدنيا من غيرك انت
كبست على يدو مرة اخرى...نعقم في الجرح و تفكيري بعيد برشا...كان ليلتها جاوبني بطريقة اخرى...مكنتش باش نقدم على الخطوة هذيكا جملة...هو كان بيدو كلشي...اما توا فقد كلشي...و رغم حبي ليه...رغم انو كلامو رضى الغرور لي داخلي...فكرة انو لتوا مفما حتى علاقة بينهم...و فكرة انو ماهوش باش يمسها...خلاتني نفرح من داخلي...رغم كلشي حبي ليه و ادماني عليه...يخليني نفرض وجود اي وحدة اخرى في حياتو...هزيت راسي على صوتو يحكي
فهد:من اول نهار شديتك بين يديا...كنت بين قرارين ديما...الاول انك تكون كيما لجين...و الثاني تكون ملكي...حتى متوقعتش انو نخلي علاقتنا توصل لهوني...و حتى نهارت لي خذيت منك كلشي كيما قلت...مكنتش عامل حسابو...انتي بعد اول ليلة وليتلي ادمان...اما قدام الناس الكل كنت مظطر نخليك في بلاصة لجين...على خاطر العالم لانا فيه...منجمش نخرج منو...و يمكن نغرق فيه اكثر...كان كشفت علاقتي بيك
انا:عالم شنوة ؟
فهد:دخلت ليه في ليلة لانتي ولدت فيها...الغريبة انو الظلام لي ريتو فيه...كنت انتي النور الخافت لي ريتو اول شي...كبشت فيك باش نخرج منو...اما غرقتك معايا في الاخير...و ليلة المشومة بالنسبة ليك...كنت ضايع بين اني نخرجك من حياتي...و نعطيك حريتك...و لا نربطك بيا اكثر...اما صدقني بلقيس منعرفهاش قبل...و معنديش علاقة معاها جملة
انا:هوكا قصة حبكم...حكى عليها الاعلام...و الجرايد زادة
فهد:تي هاك انتي تعرف قصة الحب لانا ملحقتش حتى باش نقراها
انا:مانيش باش نصدقك...معناها متعبش روحك اكثر
جيت باش نقوم...جبدني من اجنابي بالوقت...لين وليت تقريبا في حضنو...غزرلي ندرا كيف يحكي
فهد:مفما حتى مرة كذبت عليك...انا منعرفهاش بلقيس...و مانيش مستعد نعرفها...فما اوراق مهمة نحب عليها من عند نائل بوها...بعدها نوعدك باش نمشو من هوني جملة...من الفيلا و من كلشي يربطنا بيها
بقيت نغزرلو من غير حتى كلمة...مجرد فكرة صغيرة...تمنيت كان صارت قبل...تمنيت كان مشيت من هوني معاه...و بعدنا على كلشي...على الفيلا...و على العيلة زادة...انفاسو لي ضربت في وجهي...خلاتني نغمض عينيا بالوقت...جبدت روحي في اللحظة لي حسيتو باش يبوسني فيها...خذيت نفس نحكي
انا:فههد متجبرنيش امانك
هزلي براسو باهي...رخف يديه عليا...و تكى لتالي...يحكي
فهد:باهي هدي روحك...مانيش باش نمسك
انا:فههد
فهد:يا روح فهد
قحرتلو و جبدت روحي لتالي...رجعت شعري لتالي...نحكي
انا:انا نحب نعرف كلشي على بابا...علاش لتوا حد فيكم ما يحب يحكيلي عليه...نحب نعرف اذا حي و لا ميت...نحب نعرف علاش خلاني في الفيلا و مهزنيش معاه...مدام امي رفضتني...و مزالت رافضتني لتوا
فهد:علاش السؤال هذا توا
انا:نحب نعرف بابا...اليوم كنت باش نشوف تصويرتو...اما امي منعتني في آخر لحظة...انت وصلني لبابا فهد...نعرف لي تنجم تلقاه فيسع
قربت منو اكثر...و كبست على يدو...بيديا زوز...نحكي
انا:رجعلي بابا فهد...اماانك
فهد:باهي...باش نعمل لي نجم عليه...اما فرد وقت باش تعمل لي نقلك عليه
انا:ش..شقصدك ؟
فهد:متخاافش...مانيش باش نطلب منك حاجة انتي ماكش راضية عليها...اما آخر مرة نحبك تسمع كلام صوفيا...متخلينيش نعمل حاجات انا منحبش عليهم
انا:معناها...باش تفركس على بابا ؟
هزلي براسو ايه...تبسمت بالوقت...فكرة انو فما احتمال لي باش يجي نهار و نقابل بابا فرحتني...غزرتلو نحكي
انا:بااهي...موافقة
فهد:فيسع سلمت في عريس الغفلة
انا:زايد معاك والله...كان معندكش مانع خليني نمشي توا
فهد:باش تعدي ليلة في حضني
انا:في  احلامك
جيت باش نقوم...كبس على يدي...و جبدني عندو مرة اخرى...حصرني في حملتو يحكي
فهد:مانيش نسال فيك
انا:معناها تحبني نرقد عندك بالسيف ؟
فهد:بالظبط...عندي ايمات على الراحة هاذي...خليك عندي ليلة و من غدوة تنجم تمشي...بالرسمي توحشتك قربك روجين
انا:ش..شنية باش يقولو في الفيلا ؟
فهد:ميهمنيش...صدقني بعدك في شهور هذوما...علمني برشا حاجات...حتى باش يجي وقت و نحكيلك كلشي...و مهما كان رفضك ليا...مستحيل نخليك تبعد عليا مرة
غمضت عينيا بالوقت...و سكت...يمكن حتى انا بحاجة قربو...بحاجة جرعة من أنفاسو...لي تخليني في عالم اخر...نعرف انو حكايتنا وفات بالنسبة ليا و صعيب يتصلح لي تكسر...اما مدام نجم نسرق اللحظات هذوما لصالحي...من غير ما نخمم في حتى شي من اللي تعدا عليا...و لا اللي جاي...نحب نرقد عندو كيما كنت نعمل ديما طول السنين هذوما...و في كل مرة نحس روحي متغشة....نحب نرجع للملجأ متاعي الوحيد و كهو.
#روجين_فهد 💔💔
#كوكايين 🎭🎭🎭
#سمر 💙💙💙