كوكايين

الحلقة الواحدة و الثمانون

🔸️حلقة 81
🔸️روجين_تحكي:
خذيت نفس طويل و هزيت روحي نزلت من السرير خلطت عليه...وقفت وراه نغزرلو...متوقعتش باش نسمع هذا الكل منو...حتى متأكدة لي هو ما عندوش ذنب في اللي صار...و مستحيل يكون مجرم...قربت منو من غير ما نخمم مرتين...مديت يديا زوز...دورتهم على كرشو...و حطيت راسي على ظهرو...غمضت عينيا على كبسة يدو منجمش نستخايل لي فما إحتمال يخليني نخسرو حسيت بيه كي تنهد بالقاوي...كبس على يدي...و دورني عندو...هزيت راسي نغزرلو...نزل بصوابعو على خدي يحكي
فهد:شبيك خرجت هكا...تو تاخو برد جرايري أنا زادة
أنا:فهد
فهد:يا روحي
أنا:مهما كان لي صار قبل...مستحيل تتبدل غزرتي ليك نعرف لأنت متعملش حاجة هكا...أكا علاش متحملش روحك الذنب هذا أكثر من هكا
فهد:سكر الموضوع توا
مديت يديا زوز...كبست على يديه...و قربتلو أكثر نحكي
أنا:لااا...الموضوع هذا وقتو توا...المستندات لي تخص هارون معروفين عند شكون...أما دليل برائتك مفقود و هذا لي لازم تفركس عليه
فهد:شقصدك ؟
أنا:قصدي واضح...أنت باش تفركس على دليل هذا قبل كلشي...هاذي أول خطوة تخليك تقلب الطرح على هارون...و بالنسبة لبلقيس...أكيد فما حل...مدامها تحبك باش تسلمهملك في الاخير
غزرلي ندرا كيف...و حط يدو على خدي...تبسم يحكي
فهد:علاش تغزرلي هكا ؟
انا:شنوة ؟ مش صحيح ؟
فهد:منعرفش...لي يهمني إنتي..أكا علاش نحبك جاوبني توا
انا:على شنوة ؟
فهد:مزلت تحبني ؟
عديت عينيا على وجهو...و خذيت نفس طويل...نحكي
أنا:نحببك...أما متستناش مني نرجعلك
فهد:علاش إنتي إمتى بعدت عليا ؟
أنا:أنت باش تكون أحسن من غيري...عالأقل بالنسبة لهارون...و في الوقت هذا زادة
فهد:شنية لي صار نهارتها في الكلينيك...شنية لي خلاك ترفضني بالطريقة هذيكا ؟
أنا:ليلتها فكرت لأنت عديت ليلة معاها...كهو الحكاية
فهد:شنية لي يخليك تخمم بالطريقة هذيكا
أنا:خاطرها حاولت تثبت لأنت كنت معاها...من غير ما تجبرني نحكي في تفاصيل توا
فهد:بلقيس تحاول تستغل النقطة هاذي لصالحها و إنتي تعرفني بالقدا كي نحب نعمل حاجة...ما نخاف من حتى حد
أنا:بالله فهد...معناها تنجم تكون معاها عادي
فهد:الصبر يا ربي...تو أنا قلت هكا ؟
أنا:قلت...هاني نسمع فيك
حطيت يدي على كرشي...قربلي بالوقت...كبس على يدي مفجوع...و يحكي فرد وقت
فهد:شبيك ؟
أنا:شي...أنت تقلق فيا
فهد:باهي يا روحي...منقصدش
هزيت راسي شوية نغزرلو...منعرفش علاش حسيت روحي توحشتو غير العادة...جيت باش نحكي...أما سكت كي نزل على شفايفي...مديت يدي بالوقت حطيتها على رقبتو...حتى أنا نحب منو أكثر...كلشي عملتو و قلتو...لقى مصيرو في البوسة متاعو...كبس بيديه على أجنابي و جبد روحو شوية يحكي
فهد:توحشتك
عديت عينيا على وجهو...و حطيت راسي على صدرو حتى انا توحشتو...و توحشت حضنو...حط يدو على ظهري يحكي
فهد:هيا إيجا يا روحي
أنا:أنت باش تعمل لي قتلك عليه ؟
هزلي براسو باهي...كبس على يدي...و دخلني معاه قعدت بجنبو...مد يديه زوز...حل الملحفة و حطها فوقي...يحكي
فهد:لازمك تاكول توا...بعدها ترتاح باهي
أنا:باش يحسو على غيابنا
فهد:ما تخمم في حتى حد توا
أنا:آخر مرة جينا لهوني...كان الوضع مختلف برشا
فهد:إيجا هوني
قربتلو أكثر...دخلت في حضنو...كبس عليا بالوقت يحكي
فهد:روجين...تذكر لي إنتي ديما قطعة مني...مهما كان لي باش يصير...مستحيل نبعد عليك...و لا نخليك لحد
أنا:تذكرت فازة صارت معايا و انا في المدرسة
فهد:نسمع فيك
أنا:مرة...البروف سألتني على إسم بابا...عطيتها إسمك بحكم كانت تعرفك...حاولت تفهمني الحكاية...وقتها
فهد:وقتها حليت منوحة...لين جيت أنا و روحت بيك و رفضت تحكي معايا أنا زادة
أنا:أنت كنت كلشي بالنسبة ليا...و كبرت بالطريقة هاذي زادة...ليلة عرسك من بلقيس...حسيت أنو فما شي تسلب مني بالقوة...للحظة حسيت روحي فقدت توازني و معرفتش ناقف على ساقيا...أنت عطيتني كلشي في السنين هذوما...أما إسمك كان ليها هي...حتى كان مجرد لعبة و كهو
غرس يدو في شعري...و باسني من راسي...يحكي
فهد:أنا عطيتك وعد قبل سنين من توا...و مستحيل نتراجع عليه...نعرف روحي ظلمتك...تعبتك معايا...و مزال باش تتعب جرايري...و كلشي نعمل فيه لتوا...هو على خاطرنا زوز...أنا نحب نعيش حياة مستقرة...نحب تكون عندي عيلة صغيرة معاك إنتي
انا:آخر مرة كنت باش طلقها
فهد:و مرجعتش على كلامي
أنا:شقصدك ؟
فهد:وقعت عالاوراق اللازمة...الباقي عليها هي
أنا:كيفاش هكا...شنية باش يصير في المستندات...باهي أنت خممت في ردة فعل هارون ؟
فهد:معادش يهمني...بطبيعتها الأمور باش تمشي وحدها و أكيد فما حل لكلشي يا روحي
كبست على يدو من غير حتى كلمة...منجمش نحكي لي صار مع هارون...و إلا باش يوفى كلشي قبل ما يبدا منحبوش يتحاسب عاللي عملو معايا و كهو...خاطر متأكدة لي عندو يد ورا موت خالي كمال و بابا زادة..أكا علاش قبل كلشي...لازم نعرفو شكون هارون...و علاش عمل فينا هذا الكل...هزيت راسي على صوتو يحكي
فهد:لازمك تاكول توا
أنا:إمتى حضرت هذا الكل ؟
فهد:في الوقت لي إنتي راقدة
أنا:مممم باهي
جبدت روحي منو...هزيت الصحن في يدي و غزرتلو نحكي
أنا:نحب نرجع لدار الأزياء
فهد:أنسى الموضوع توا...عالأقل لين ترتاح
أنا:فديت من دار...و مانيش نشاور فيك...أنا نخبر فيك
فهد:باللااهي ؟ و من إمتى تاخو قرارتك وحدك ؟
أنا:والله
فهد:مانيش باش نعاود كلامي
أنا:عاود تراه
فهد:متأكدة ؟
هزيتلو براسي باهي...طلع حاجبو مستغرب...يحكي
فهد:معادش تخاف معناها ؟
أنا:هكا و لا هكا متنجمش تضرني
فهد:هيا توا لازمك تاكول باش ترتاح
أنا:مجاوبتنيش
فهد:مش إنتي خذيت قرارك
أنا:معناها ماكش باش تعمل حتى مشكلة
فهد:باش يكون فما حد معاك كي العادة...غير هكا متحاولش تناقشني في الموضوع
قحرتلو و نزلت راسي لصحن...عدا صوابعو على خدي...و تبسم يحكي
فهد:أغزرلي هوني...معادش نحبك تبعد عليا مهما كان السبب باهي ؟
تكيت عليه من غير حتى كلمة...غرس يدو في شعري كملت صحني...و غزرتلو نحكي
انا:فهد
فهد:اشكي
أنا:باش نعديو ليلة هوني ؟
فهد:نحبك تبقى بجنبي
أنا:من غير ما نحكيو في مشاكلنا أكثر من هكا...أنا باش نحاول ننسى لأنت معرس...و أنت أعمل نفس الشي
فهد:مانيش معرس...معاادش تقولها الكلمة هاذي
أنا:باهي...شبيك تكش عليا هكا
فهد:باهي...إيجا عندي
كبس عليا بيديه الزوز...و تكى لتالي...تنهدت بالقاوي نحكي
أنا:شنية صار في حكاية إيطاليا ؟
فهد:العرض مزال قايم لتوا
أنا:معناها تنجم تتخلى على كلشي و تجي معايا
فهد:معنديش وجهة أخرى
هزيت راسي شوية غزرتلو...نزل عليا بالوقت...باسني جنب شفايفي يحكي
فهد:الجو بارد هوني...و باش يضرك
أنا:كيفاش تنجم تعدي ليلة برا ملا ؟
فهد:معناها طرد فيا قبل ما نحكي
انا:مش قتلك حتى شي ماهو باش يرجع كيما قبل
فهد:بالله ؟
أنا:والله
نزل عليا بالوقت...يبوس فيا ورا بعضو...و يحكي فرد وقت
فهد:كيفااش باش تمنعني ملا...نسيت لإنتي متاعي ساعة شنية هذا ؟
أنا:شنووة ؟
فهد:إمتى حليت هكا إنتي ؟
نزل عليا أكثر...مديت يديا زوز...نحبس فيه...شدني ضحك من تصرفاتو...مش بالعادة يكون هكا...هاذي من المرات القليلة لي يعمل فيهم جو...عديت عينيا على وجهو نحكي
أنا:فهد يززي...الجرح وجعني
فهد:باهي حبي...إيجا هوني
انا:رد بالك...منحبش نرجع للكلينيك مرة أخرى
فهد:متخاافش
كبست عليه أكثر...هزني في حملتو...و دخل للبيت حطني عالسرير...و تمد بجنبي...حضني يحكي
فهد:بعد توا نحبك...تركز في قرايتك...و في الحاجات لي تحبها كهو...كلشي يخص هارون و المشاكل هذوما تبعد عليه...مفهوم كلامي
أنا:المشاكل هاذي...هي لي قاعدة تلحق فيا
فهد:كان إنتي بقيت بعيدة عليها...مانيش باش نخلي أي حد يقرب منك مرة أخرى
هزيتلو براسي باهي...خاطرني منحبش ندخل معاه في نقاش أطول من هكا...أما مستحيل نتراجع عاللي قاعد يدور في راسي...مانيش باش نخلي هارون يتحكم في حياتنا أكثر من هكا و الأهم حياتو هو...الدليل لي خايف عليه...هو اول خطوة لينا...اذا ماهوش باش يلقاه...أنا لي باش نتصرف...حتى كان ظطريت ندخل ياسين في الحكاية...خاطرو هو الوحيد لي ينجم يتحكم في الامور لي تخص فهد...و في علاقتو مع هارون...مديت يدي دورتها عليه..و غمضت عينيا نستحلى في لمسة صوابعو بين خصلات شعري...أصلا من ليلة الحادث...محسيتش روحي مرتاحة كيما الليلة...تنهد بالقاوي يحكي
فهد:كيفاش تحس في روحك ؟
أنا:منعرفش
هزيت راسي شوية...عديت عينيا على وجهو...و كملت كلامي نحكي
أنا:كل مرة نقول هاذي آخر مرة...أما نرجع لعندك رغم كلشي...بالرسمي معادش نعرف روحي نقرب و لا نبعد
فهد:مفماش آخر مرة بيناتنا...و مهما بعدت مصيرك باش ترجعلي
باسني من جبيني...و كبس عليا...كلامو صحيح مهما بعدت مصيري باش نرجعلو...بالرسمي منجمش نتخلص منو...فهد بالنسبة ليا كوكايين...تغلغلت داخلي...بدني و عقلي رافضين بعدو...و حتى هو كل مرة يقوي الدوزة أكثر...غمضت عينيا و كبست عليه...محاولة مني باش ما نخمم في حتى شي...ما نحب حتى حد يفسد علينا هدوء الليلة...يكفي لي تعدينا بيه لتوا...أكا علاش الليلة باش تكون خاصة بينا احنا و كهو.
#روجين_فهد ❤💛💙