كوكايين

الحلقة السابعة و الخمسون

🔸️الحلقة 57
🔸️فتون_تحكي:
دورت راسي شوية...غزرتلو...شد الفران على جنب...و هز عينيه في وجهي...غزرلي ندرا كيف...حليت الباب بالوقت...ما نحب نسمع حتى كلمة اخرى منو...كبس على يدي...يحكي
ياسين:استنى لحظة
أنا:تأخرت برشا...تصبح على خير
أول ما نزلت...خلط عليا بالوقت...منعرفش على روحي كيفاش لقيتو في وجهي...شاورلي بيدو يحكي
ياسين:خليني نرافقك للداخل
نزلت راسي من غير حتى كلمة...أصلا معادش عندي جهد...و مفماش علاش نحكيو أكثر في اللي صار...من غير شي الجو بارد عاللخر...مديت الخطوة بالسيف...من شيرة  فما أكثر من حاجة نحب نقولها...و لتوا نحس بوجيعتها في قلبي...و من شيرة أخرى...عقلي يقولي مفماش علاش تحاسبو يا فتون...اللي فات ماهوش باش يرجع...و إنتي بديت ثنية جديدة من غيرو...من غير وجيعة...ثنية حتى حد ماهو باش يظلمك فيها وسط الصراع لي بين قلبي و عقلي...لقيت روحي وصلت للأصونصير...مديت يديا زوز...كبست على كبوطو لي فوق اكتافي...نحيتو...و حطيتو بين يديه كبس عليه و غزرلي ندرا كيف...من غير ما يقول حرف آخر...دقايق تعدات بيناتنا سيطر عليها الصمت...و لقيت أحسن حل إني ننسحب...و منضيعش معاه أكثر...وخرت خطوة لتالي..كبست عالزر...لحظات و تحل الباب..دخلت و تلفت عندو نغزرلو...مديت يدي كبست عالزر مرة أخرى...من غير ما نزل عينيا من وجهو...حتى هو بقى واقف من غير حتى حركة...أول ما تسكر الباب...هبطت دمعتي معاه...مديت يدي مسحتها و تنهدت بالقاوي منحبش نضعف أكثر من هكا...يمكن المرة هاذي باش نكون ضحية مرة أخرى...و لعبة يتسلى بيها...بعدها يرجعلها ليها...و يعفس عليا كأنو ما عمل شي...حتى بالرسمي معادش نعرف شكون الغالط فينا...أنا و لا هو...و لا خالتي سلطانة و أمي...لي وعدو بعضهم ساعات الحب و الرغبة تكون أهم من الوعد...كان وقتها نجمت نقنعهم...مكنتش باش نتربط بيه..و مكنتش باش نذوق العذاب من الشيرتين...حب من طرف واحد...و اللي نحبو...يكره حتى إسمي...مش حتى يتحمل وجودي معاه...أكا علاش هذا الكل...مستحيل يتبدل بين ليلة و نهار...مدامو محبنيش الوقت هذا الكل ماهوش باش يحبني توا...أول ما تحل الباب...هزيت روحي خرجت...منعرفش كيفاش وصلت...عديت عينيا عالرجال لي واقفين بحذا بابي...قربت من غير حتى حرف...ندق ورا بعضو...لحظات و حلتلي...غزرتلي مصدومة...تحكي
روجين:فتوون ؟
مديت يدي شوية كبست على حرف الباب...و دخلت معادش عندي قوة باش ناقف اكثر من هكا...قربت مني بالوقت...شدتني من يدي...و سكرت الباب تحكي
روجين:فتوون...شبي حااالتك هكا ؟ شنية لي صار ؟
هزيت راسي شوية غزرتلها...و كبست عليها...نحكي
انا:ب..بردانة عاللخر
روجين:باهي...إيجا معاياا
كبست على يدي...و عاونتني دخلت معاها لصالة...نحيت كبوطي و الكعب فرد وقت...ترميت عالفوتاي...حطت الملحفة فوقي...تحكي
روجين:لباس توا ؟
هزيتلها براسي لا...منعرفش شبيني بردت لهدرجة حطت يدها على شعري تحكي
روجين:باهي...هدي روحك...هاني باش نحضرلك كاسة حليب و نرجع
انا:ج..جواد ؟
روجين:طمن...رضعتو قبيل و رقد بالوقت...ماهوش باش يفيق توا
هزيتلها براسي باهي...أصلا معنديش جهد باش نقوم توا...دقايق و رجعت بالكاسة في يدها...حطتها عالطاولة و قعدت بجنبي تحكي
روجين:شنية لي صار ؟ تعاركت مع شكون ؟ صارت حاجة خايبة في الحفلة ؟
انا:ي..ياسين
روجين:شبيه ياسين ؟ تحبني نطلبو ؟
هزيتلها براسي لا...و خذيت نفس طويل...نلم في قوتي معاه و نحكي فرد وقت
انا:ي..ياسين...خرب كلشي
روجين:خلط عليك للحفلة ؟
انا:ل..لا أما مشيت مع نبيل لريسترون قريب ص..صدفة جا هو و خطيبتو
روجين:و بعدها ؟
انا:م..منعرفش...كلشي دخل بعضو...ضرب نبيل و خرجني من غادي
بقات تغزرلي من غير حتى كلمة...حتى هي حسيتها إستغربت من اللي صار...كبست عالملحفة بيديا زوز و كملت كلامي نحكي
أنا:شنية يحب من عندي...علاش يعمل في هذا الكل ؟
روجين:فتون يا روحي هدي روحك توا
أنا:علااش توا ؟
روجين:حاول ترتاح توا...و ما تخمم في حتى شي..أكيد فما تفسير للحكاية
مديت يدي بالسيف....مسحت دموعي...و غزرتلها نحكي
انا:مفماش تفسير...أصلا مفماش حاجة اسمها أنا و ياسين
روجين:شنية طلب منك ؟
انا:ب..باسني
غزرتلي ندرا كيف...كبست عالملحفة اكثر...و خذيت نفس نحكي
أنا:م..منعرفش كيفاش صار هذا الكل...و لا حتى علاش عمل هكا...أنا لتوا عملت كلشي طلبو مني...عذرت خوفو من إني نكون حاجز في حياتو و بعدت و لا مرة حسيت أنو حاجتو بيا...السنين لي عديتها معاه...كان رد دين مش أكثر
روجين:شقصدك ؟
أنا:من أول ليلة...عرفت أنو ثنيتنا مسكرة...عرفت لي هو ميحبنيش و مستحيل يحبني مع الوقت...و تفهمت موقفو...حتى كان خايف من أنو يزيد يضيع نهار آخر معايا
روجين:فتوون يا روحي
أنا:كنت نعرف لي هو معاها...كنت نحس بيه كي يبدا فرحان على خاطرها...من ميساج...من مكالمة...هو عمرو ما كان موجود معايا يا روجين
روجين:يمكن لازم تحكيو مع بعضكم أكثر
أنا:بعد شنوة ؟ هو كان مصر على الطلاق...أكثر من أي شي...و إنتي حضرت على هذا الكل...حتى دوب بديت نقنع روحي...أنو اللي يربطني بيه هو جواد كهو...كيما كان يقول هو...و إقتنعت بفكرة أنو خطب و باش يعرس...علاش يحب يرجعني للصفر توا...علاش يحب يعلقني بيه مرة أخرى...بعد اللي عملو فيا الكل
قربت مني شوية...دورت يديها زوز عليا...و حضنتني تحكي
روجين:كنت نعرف لي هو باش يندم...الكل كان يعرف أنو الخاسر الوحيد هو ياسين...معاادش تبكي عليه مرة أخرى...إنتي بعد توا باش تعمل لي تحب عليه و كهو
أنا:نحب ننساه...نحبو يخرج من حياتي جملة...و معاد نحس معاه بحتى شي
لزيت ليها اكثر...حطيت راسي على صدرها وين دموعي نزلو أكثر...أصلا معادش عندي جهد لحتى شي...كان إني نبكي و نخرج كلشي داخلي...صوت جواد رجعني للواقع...جبدت روحي منها بالوقت...نحكي
أنا:لازمني نطمن عليه
روجين:إنتي باش تدخل تبدل دبشك توا...هاني باش نسكتو و نجيبهولك باهي ؟
أنا:إنتي باش تعدي ليلة هوني مش هكا...منحبش نقعد وحدي
روجين:أكيد يا روحي...هيا فيسع
هزيت روحي وقفت...نمد في الخطوة بالسيف..منعرفش على روحي كيفاش وصلت لبيتي...حطيت الملحفة على جنب...و نحيت الروبة...لبست دبشي كيما جا...أصلا ما عيني في حتى شي آخر...هزيت راسي نغزرلو...أول ما جات عيني عليه...ضحك بالوقت...مديت يديا زوز هزيتو في حضني...و قربتو ليا نشم في ريحتو...هو الحاجة الوحيدة لي تخليني نقاوم رغم كل الظروف تبسمت تحكي
روجين:أنا باش نلم الكوجينة...حاول ترتاح شوية...تو نرجعلك
هزيتلها براسي باهي...أول ما خرجت كبست عليه...و قعدت على طرف السرير..حطيتو بجنبي نغزرلو مكنتش نعرف كيفاش نجم نعيش وحدي من غيرو...مديت يدي شوية...و عديت صوابعي على خدو...نفس ملامح بوه ساعات نستغرب من كمية الشبه لي بيناتهم...للحظة لقيت روحي سرحت في الماضي مرة أخرى...في الأيامات الأولى لي حبلت فيها...و لي كانت بين الفرحة لي حسيتها بوجود قطعة منو فيا...و لي ممكن تبدل برشا حاجات...و بين الخوف من أنو يرفضها...كيما رفضني بالظبط و الإحتمال الثاني فرض روحو..متقبلش فكرة أنو فما شي يربطنا ديما...و لقيت روحي وحدي كي العادة...و وليت مجبورة إني نتحمل مسؤولية الصغير لي في كرشي...مهما كان القرار لي يحكم بيه..ما ستنيت منو حتى شي...أما نتوقع كانت أصعب فترة عديتها في حياتي...و أكثر فترة حسيت روحي بحاجة قربو...و وجودو بجنبي...و لي كانت نفس الفترة لي بعد فيها عليا أكثر من قبل...رغم إني كنت بحاجة كلمة منو تخليني نقاوم أكثر...مديت يدي شوية...حطيتها على شفايفي...منعرفش شنية لي صار معايا بالظبط...لتوا نحس في طعم شفايفو...و بوستو...رغم إني رافضة فكرة لي صار...اما متوقعتش اني نعيشها بتفاصيلها الكل...لحظات محضيتش بيهم و أنا مرتو و على إسمو صارو معايا و انا طليقتو..حتى و الظروف تحكم العكس قلبي واقف ضدي...ضد إني نتعدا كلشي عشتو مع ياسين...قبل و توا...قلبي لي منجمتش نغلبو طول السنين هذوما...من وقت أنا صغيرة...من وقت كنت نشوفو من بعيد...و منلحقش حتى نحكي معاه و نعرف أخبارو...أصلا مكنتش نعرف شكون نسأل...انا ديما كنت بيناتهم فرد دخيل...هو يعتقد نفس الشي زادة...طول الوقت لي تعدا ماشي في بالو...إني عملت هذا الكل باش نكون فرد من عيلتهم الكبيرة...و إني ستغليت خالتي باش توصل لي نحب عليه...هذا لي كان يقولو ديما...و متمسك بفكرة انو الطلاق باش يعطيه حريتو أما الحقيقة لي ريتها...أنو الحرية كانت من نصيبي طلاقي منو أثبتلي قوة نفسي لي كنت نجهلها...و خلاني نشوف دنيا جديدة...و عباد جديدة زادة...و إني مدام نحب نقدم باش نوصل أكيد...أكا علاش مستحيل نرجع لتالي...و مستحيل نكون أسيرتو بعد توا...حتى باش نحاول ننسى لي صار الليلة الكل...و نبدا من أول و جديد...على خاطري...و على خاطر صغيري كهو...باش نثبت روحي لنفسي...و نتعدا فكرة الحب و العرس مرة أخرى...بعد توا ماهوش باش يهمني القرارات لي باش ياخوها في حياتو...متخصش ولدي...نعرف صعيب نعرف الفعل أقوى من القول...أما باش نحاول و نحاول أما مستحيل نرجع لانانيتو و سيطرتو على الأمور بالطريقة لي تناسبو هو و كهو...و كيما قال قبل...3 سنين كانت كافية برشا...و من غير جواد مفما حتى شي آخر يربطنا...و مدامو قال الجملتين و هو مقتنع بيهم...لازمو يطبقهم...القول وحدو ميكفيش...و ماهوش باش يثبت قيمة الخسارة و الربح من غير الفعل...و هذا لي تعلمتو...كان فما شي يستحق اني نأمن بيه و نعطيه حقو...هو قيمة الفعل عند كل حد في حياتي.
#فتون_ياسين 💔💔💔