كوكايين

الحلقة الثالثة

🔸️حلقة 3
🔸️فهد يحكي:
هزيت روحي وقفت...سكرت الفاست متاعي...و عديت عينيا عليهم آخر مرة...منعرفش كيفاش وفى الاجتماع هذا...أصلا كي يبدا الموضوع متعلق بأكبر صفقة مينجمش يهدا كان ما يتهنى لي كلشي لباس...جبدت تليفوني ضيقت عينيا كي ملقيتش أبال من عندها بالعادة تطلب بين كل ساعة و ساعة...و الأسوء حسيتها مش قد بعضها الصباح...و منجمتش نحكي معاها قبل ما نخرج...خذيت نفس و طلبتها...هزت عليا تحكي
روجين:فهدوشي
أنا:شنية قلنا عالكلمة هاذي
روجين:باهي يا روحي...مش لازم تتغشش مني
أنا:فاش قاعدة تعمل حبي توا ؟
روجين:حتى شي...صارت مشكلة قبيل
انا:شفما ؟
روجين:ياسين قرر يطلق فتون
أنا:صاار...نجم ياخو قرار ملا
روجين:شنية ذنبها باش يعمل فيها هكا
انا:روجين...من غير ما تدخل في قرارتهم...باهي عزيزتي
روجين:منجمش...فتون كيما اختي بالظبط...مستحيل نخليها وحدها
انا:باهي صغرونتي...رد بالك على روحك
روجين:باش طول ليلة زادة ؟
انا:منعرفش عزيزتي...نكلمك مبعد
روجين:باهي يا روحي
علقت عليها...و دخلت للبيرو متاعي...هزيت حاجبي و انا نغزرلو قاعد في بلاصتي...توقعت لي باش نلقاه هوني...سكرت الباب ورايا نحكي
انا:الوضع تحت السيطرة
هارون:نعرف لي انت باش تخليه تحت سيطرة...اما عندنا ما اهم توا
انا:شفما زادة ؟
دورلي البيسي بالوقت...ضيقت عينيا مستغرب...غزرلي ندرا كيف يحكي
هارون:شقولك ؟
انا:في شنوة ؟
هارون:بلقيس عبيدي
انا:و في شنوة يفيد رايي ؟
هارون:كملت قرايتها العام الماضي...و على قريب باش تولي محامية معروفة
انا:باش تعطيني cv متاع حياتها توا ؟
هارون:نظن باش تكون كنة مناسبة لعيلة الصياد
ضحكت على جنب...فرد وقت نحاول نستوعب كلامو...قربت من البيرو شوية نحكي
انا:شقصدك ؟
هارون:نقصد لي ماكش باش تلقى احسن منها
انا:اسمعني عمي...كلشي كوم و اني نوحل بالعرس هذا كوم آخر
هارون:مفماش حل آخر...يخلي نائل تحت يدنا...سمعة بنتو باش تولي من سمعتنا...عالاقل لين ناخو السندات و نربح الانتخابات...وقتها تنجم طلقها
أنا:أكيد مانيش باش نستغل طفلة ما عندها حتى ذنب في حكاية كيما هاذي
هارون:أنت أكثر حد...تعرف لي نخدمو بلاش ضمير..ملا من غير ما تحاول تستغل نقطة هاذي...باش ترفض العرس
انا:هوكا ياسين باش يطلق...عرسلو بيها
هارون:فههد...الحكاية مفيهاش لعب...الطفلة هاذي لازم تكون مرتك في اقل من شهر...مفهوم كلامي
هز روحو...و قرب مني...وقف قدامي بالظبط...حط يدو على كتفي يحكي
هارون:كلشي نعمل فيه...باش يبقى اسم عيلتنا مرفوع...و أكثر شي على خاطرك انت و كهو
عديت عينيا على وجهو...من غير حتى كلمة...دوب تبسملي و خرج..نزلت راسي نغزرلها مرة أخرى منعرفش وين ريتها قبل...و الأسوء الحكاية محبتش تدخل في راسي من اصلو...سكرت البيسي بالوقت منعرفش من وين خرجلي بيها الحكاية هاذي توا...كان نستعمل ضميري...نضيع تعب سنين...و كان نوافق على قرارو نكون ضحيت بروجين أول وحدة...مقابل اني نشد الوزير و الرخ مع بعضهم...و إحتمال خسارتي ليها مستحيل...منجمش نضحي بيها هي...وقتها بالرسمي باش نضيع ثنيتي...عديت يدي على شعري...و شيعت راسي لتالي...منعرفش شنية نعمل بالظبط...كان فما فرصة صغيرة تخليني ناخو السندات من عندو مستحيل نرضى بالعرض هذا...هزيت مفاتحي و خرجت...شديت ثنية للفيلا...منعرفش اصلا علاش رجعت و لا فاش نعمل هوني...هزيت تليفوني و طلبتها مرة اخرى...هزت عليا بصوت نوم...لحقت ترقد الفرخة
روجين:فهد...شفما ؟
انا:نستنى فيك لوطة
روجين:لباس ماهو ؟
انا:مطولش عليا
روجين:صارت حاجة ؟
انا:روجين...ايجاني توا و نقص أسئلتك
روجين:باهي يا روحي...هاني جاية
علقت عليها...و طيشت تليفون من يدي...تكيت راسي لتالي...و غمضت عينيا...رجعت بذاكرتي سنين لتالي نتذكر في كل حرف قالو في آخر حوار بيناتنا
أنا:بابا
بابا:شفما يا روحي ؟
انا:نعرف اني عملت مشكلة...اما منجمتش نعديلو لي عملو فيا
بابا:و شنية عمل ؟
انا:اللي يعملو كل مرة...في بالو منجمش ندافع على روحي في غياب ياسين
بابا:معناها منجمتش تتحكم في روحك
أنا:بالظبط
بابا:ايجا اقعد هوني
قعدت عالكرسي بجنبو...و هزيت راسي نغزرلو...تبسم يحكي
بابا:و تسمي لي عملتو صحيح ؟
انا:اكيد...مدامو حاول يتهجم عليا ضربتو...منجمش نتصرف كيما ياسين...و نحكي معاه كانو ما صار شي
بابا:معناها تصرف ياسين غالط بالنسبة ليك ؟
أنا:تحب تقولي إني غلطت كي ضربتو ؟
بابا:انت جاوبني ؟
انا:حتى هو غلط كي تهجم عليا يا بابا
بابا:ماكش احسن منو يا فهد
انا:علاش ؟
بابا:كنت تنجم تحل الحكاية بطريقة اخرى
انا:كيما يعمل ياسين ؟
بابا:ماكش مظطر تكون كيما هو...و ماكش مظطر تقلد حد...باش تكون احسن من الكل...اما فما اكثر من طريقة تخليك تكون انت...من غير ما تعمل هذا الكل
انا:كيما شنية ؟
بابا:عيش بضمير حي...و كي تحس روحك على حق...متخليش شكون يبدلك رايك...اما من غير ما تتصرف كيما بكري...و الاهم انك تتخلى على التكبر متاعك...و متخليش كبريائك يحرقك...خلي روحك نظيفة...و هكا تكون احسن منهم الكل
انا:حتى ياسين ؟
بابا:مش قلنا معادش تقارن روحك بحد ؟
انا:اما هو ديما عندو علامات عالية...و اكا لي يخليكم فرحانين بيه ديما
بابا:باهي...خليني نخبرك سر
انا:شنوة ؟
بابا:انا زادة كنت ناخو علامات كيفك
انا:بالرسمي ؟
بابا:يبقى سر بيناتنا
انا:وعد
بابا:كنت نستغل الفراغ لي عندي...و نعمل مجهود اكثر...و هكا علاماتي طلعو...و تغلبت على عمك هارون
انا:و انا زادة باش نعمل هكا...اما تخبر حد اني قاعد نقرا في سر...باهي بابا
بابا:بشرط انك معادش تعاود نفس التصرف مرة اخرى
انا:نوعدك بابا
بابا:و انا نوعدك زادة
حطيت راسي على صدرو...و غمضت عينيا...حليتهم على صوت الباب لي تحل...وقتها فقت اني غطست في الماضي...و في طفولتي...مكنتش و مانيش باش نكون الطفل لي يحب عليه هو...صوتها كان كافي باش يرجعني للواقع
روجين:فهد...شفما ياخي ؟ صارت حاجة اخرى ؟
دورت راسي شوية نغزرلها...عديت عينيا على تفاصيل وجها...لخصلات شعرها لي طايحين عليه...شعرها لي نحسو سبيسيال عاللخر...تفصيل خاصة فيها هي و كهو...هاذي ثاني مرة نتعلق بحد بعد بابا...و منجمش نخرجها من حياتي...مهما كان الثمن...رغم قوتي الكل...منعرفش نعيش من غيرها...ضيقت عينيها تحكي
روجين:لباس يا روحي ؟ شبيك طلبتني توا ؟ مش مستانس تجي بكري...شنية لي صار ؟
نزلت بصوابعي لشفايفها...سكتها بالوقت...مدت يدها حطتها على خدي...و قربت مني اكثر...دورت يديها زوز على رقبتي...و عنقتني...صوابعها لي سرحو في شعري من تالي...خلاوني نرتاح من الحرب لي تحلت داخلي عديت يدي على طول ظهرها...نحكي
انا:خليك معايا اليوم
روجين:باهي يا عمري...هاني معاك
خذيت نفس من ريحتها...و جبدت روحي شوية...عديت عينيا عليها نحكي
انا:شبيك نزلت هكا ؟
روجين:كنت راقدة...و زيد أنت طلبتني على غفلة
انا:من إمتى ترقد الوقت هذا ؟
روجين:منعرفش...حسيت روحي تاعبة شوية...كهو الحكاية
عديت يدي على وجها...نتفقد في سخانتها و نحكي فرد وقت
أنا:معندكش سخانة
روجين:لا...جيست متقلقة شوية
انا:باهي...باش نتعداو للكلينيك ساعة
روجين:منحبش
انا:روجيناااا...ريت حالتك ياخي ؟
حطت راسها على كتفي...و عدات صوابعها على صدري تحكي
روجين:لباس عليا...و خاصة توا
انا:باهي...مدامك جيتني في الحالة هاذي...نمشيو لدارنا أحسن
روجين:باهي...حتى فتون رقدت و أمي مشات للجمعية
أنا:تكمل نومتك غديكا
روجين:مممم و تحضرلي حاجة ناكلها
أنا:مش جديدة عليك...ديما تخمم في كرشك
روجين:الحق عليا...قاعدة نطلب منك
انا:باهي يا روحي...و مدام دلالك قوا اليومين هذوما..رد بالك تستغلو بعد ما تخرج نتيجة باقي الكنترولات
نزلت على شفايفها شوية...و كبست على صدري...تحكي
روجين:أكيد باش ننجح نوعدك
أنا:صحيت...مشينا توا ؟
روجين:معندكش خدمة ياخي ؟
انا:لا...مدامك تاعبة باش تبقى عندي اليوم
روجين:و نخلي فتون وحدها ؟
أنا:سلطانة معاها...متخافش عليها
روجين:مخيبو ياسين في تصرفو معاها...ساعة كان تفكر تخليني كيما عمل هو...ما تلوم كان روحك
عديت عينيا على وجها...كلامها تالي...ذكرني في اللي صار ساعتين لتالي...تنهدت بالقاوي...نحكي
انا:أغزرلي هوني...تربيت على يدي راك...أكيد مانيش باش نسلم فيك...مهما كان سبب...يمكن نغلط...نبعد نوجعك أما مستحيل نسلم فيك...تذكر كلامي هذا بالقدا مهما كانت ظروفنا...نهايتنا باش تكون مع بعضنا روجين
روجين:تخوف فيا بكلامك فهد
أنا:متخافش يا روحي...أما ديما حط في بالك...مهما كانت الظروف لي باش تبعدني عليك...مستحيل نسلم فيك
لزت ليا اكثر...من غير حتى كلمة...كبست على ظهرها بالوقت...منجمش نقدم خطوة وحدة قبل ما ندرس الموضوع اكثر من مرة...عالاقل نحاول نلقى حل...غير لي اقتارحو هو...تنهدت بالقاوي نحكي
انا:نمشو لدارنا توا ؟
روجين:مممم...يكون احسن
انا:باهي يا عمري
خدمت الكرهبة من غير ما نخمم مرتين...اليوم بالظبط حاجتي بيها و بقربها...عالأقل باش نجم نرتاح و نفرغ مخي من كلشي...من هارون و من الخدمة..و من حكاية بنت نائل لي خرجلي بيها...و لي يمكن تكلفني الراحة لي نحس بيها توا...و هي بين يديا...مستحيل نجم نسلم فيها مهما كلفني...هزيتها و هي عمرها نهار...و حضرت على كل تفصيلة من حياتها لتوا...اكيد مانيش باش نخليه يحرمني منها...جراير عمايلو لي متوفاش...اما قبل كلشي...فما حساب طويل بيناتنا...و قبل ما نحط الاحجار الاربعة في بلاصتهم...مستحيل نسلم و لا ننسحب قبل ما توفى الحرب....لي زرعتها انا بيناتهم
#روجين_فهد ❣