كوكايين

الحلقة السابعة و العشرون

🔸️حلقة 27
🔸️فتون_تحكي:
حليت عينيا على صوت جواد...خذيت نفس و مديت يدي حطيتها عليه نهدي فيه...قربتو ليا اكثر...بستو من خدو و عطيتو يرضع...أول ما شد صدري سكت..عاودت سكرت عينيا...نحس في روحي تاعبة عاللخر...الأسبوع الثاني في الخدمة هدني...مصدقتش لي البارح و اليوم عطلة...عالأقل نرتاح شوية...و نهتم بولدي لي حسيت روحي هملتو...تبسمت كي حسيت بيدو تحطت على خدي...و صوتو لي قوا في البيت...عامل جو مع روحو هزيت روحي شوية...و جبدتو عندي نحكي
أنا:صباح النور...ياخي ماكش ناوي ترجع ترقد...و ماكش باش تخلي ماماتك تنني حتى هي
كبس على شعري...و ضحك بالوقت...نزلت عليه أكثر شبعت بوس من خديداتو المكنفرين...حتى هو باش يعمل أربع شهور على قريب...قاعد يكبر بسرعة..غطست فيه أكثر نحكي
أنا:مبن ريحتو يا ربي...باش ناكلك انا توا
هزيت راسي شوية...نسمع في ضحكتو المزيانة...هزيتو في حملتي نحكي
أنا:شووو كيفاه يغزرلي...شنوة نعمل فيك أنا توا
كبست عليه...و هزيت روحي...دخلت للكوجينة نحضر في فطوري...فرد وقت تفكيري في روجين...لي من بارح مكلمتنيش و لا حتى جاوبت على لي ميساج متاعي يديه لي قاعدة تتعدا على وجهي...فرهدتني...حضرت قهوتي كيما جا...خاطرني نعرف كان نحطو...ماهوش باش يسكت...اصلا توحشتو الفرخ...فقت من سرحتي على صوت الباب...كبست عليه نحكي
أنا:شكون باش يجينا عالصباح ؟
كبست عليه...و خرجت من الكوجينة...حليت الباب من غير ما نفكر مرتين...تبسمت و انا نغزرلها...حلت يديها تحكي
روجين:يااا رووح خاالتو...يااخي إمتى قمت أنت
حطيتو في حملتها...و وخرت خطوة لتالي...خليتها تدخل...خذيت نفس نحكي
أنا:وينك لتوا ؟
روجين:شي...هاني جيت
انا:صارت حاجة ؟
روجين:لا يا روحي...مفما شي
انا:باهي...عملت قهوة...هاني باش نحضرلك كاسة معايا
هزتلي براسها باهي...تبسمت ورجعت للكوجينة...نحضر في القهوة...منعرفش علاش احساسي يقول لي فما حاجة صارت...و متحبش تحكيلي...اصلا وليت خايفة من عمايل فهد بعد توا...و منحبهاش تعيش نفس الوجيعة مرة أخرى...كبست عالصينية و هزيت روحي خرجت...حطت جواد عالفوتاي...و وقفت تحكي
روجين:منجمتش نسكت أكثر من هكا يا فتون
أنا:شفما روجين ؟
روجين:إيجا اقعد ساعة
انا:باهي شد قهوتك الساعة
فكت الصينية من يدي حطتها عالطاولة...و جبدتني معاها...قعدت بجنبها نحكي
أنا:يااا بنتي شنية لي صار ؟ فهد عملك حاجة ؟
روجين:لاا...الحكاية تتعلق بياسين
عديت عينيا على وجها...أكثر من أسبوع مسمعتش أخبارو...و لا حتى حاولت نقابلو و لا نحكي معاه...أما مع ذكر إسمو توا...قلبي خض بالقاوي...منعرفش علاش يمكن خاطر روجين مش مستانسة تحكي عليه قبل خذيت نفس نحكي
أنا:شبيه ؟ لباس ماهو ؟
روجين:لباس...أما ليلة أمس...ياسين...نقصد إحنا
أنا:يا روجين دخلتني بعضي...شنية لي صار ليلة أمس
روجين:خطبة...نقصد ياسين خطب الطفلة لي ريتو إنتي يبوس فيها...هالة...والله مكنتش باش نحضر أما أمي جبرتني كي العادة
بقيت نغزرلها من غير حتى كلمة...أصلا كلامها تعاود في وذني أكثر من مرة...حسيت بالارض تحركت تحتي و انا في بلاصتي...منعرفش علاش منجمتش نصدق كلامها رغم نعرف من الأول هذا لي باش يصير...نعرف باش يكمل حياتو مع غيري...أما الحالة لي لقيت روحي فيها خلاتني في عالم آخر...هزيتلها براسي لا...نحكي
أنا:م..مستحيل...إنتي قاعدة تكذب عليا روجين...ياسين ماهوش باش يعملها
حطيت يديا زوز على وجهي...رجعت شعري لتالي نحس في بدني يرعش بصفة غريبة...أنفاسي تقطعت و حسيتها باش تخنقني...حطت يدها على خدي تحكي
روجين:فتوون لباس ماهو ؟
أنا:م..معناها ليلة أمس...ارتبط بوحدة أخرى...بالسرعة هاذي ؟
روجين:فتوون...هدي روحك ساعة...و أنا باش نحكيلك كلشي نوعدك..أصلا منجمتش نقلك عاللي صار خاطرني خفت عليك والله
جبدت روحي منها و هزيت روحي وقفت...حطيت يدي على صدري نرد في النفس...و نحكي فرد وقت
أنا:حبيتو و مزلت نحبو...قولي شنية ذنبي باش يعمل فيا هكا...شنوة فيها زايد باش يحبها هي...علااش هي يا رووجين...لهدرجة منجمش يصبر عليها...لهدرجة مزرووب باش يعاود حياتو
كبست على صدري أكثر...حتى الكلام لي نقول فيه تقطع مع شهقاتي...و مرة أخرى لقيت روحي نبكي عليه نبكي على روحي و على الوضع لي تحطيت فيه...وقفت في جرتي...و قربت مني...تبعدلي في شعري لتالي و تحكي
روجين:فتوون...يزي يا روحي...ياخي مش قلت معادش تبكي عليه
أنا:راهو صارحني بعلاقتو بيها قبل ما يطلقني...أما متوقعتش لي هو يحبها لهدرجة يا روجين...أنا ستنيتو برشا...حتى بعد ما خلاها بيا...منجمتش نخرجو من حياتي...حتى وليت نتجنب وجودي معاه في نفس البقعة...باش معادش نتوجع جرايرو...أما حتى في غيابو قاعد يوجع فيا
قربت مني باش تحضني...وخرت لتالي...و حليت الشباك...نرد في النفس لي حسيتو تقطع عليا و باش يختقني...عديت يديا زوز على رقبتي...معادش نجم نسمع حتى كلمة...و لا ننطق بحرف...دموعي قوات اكثر...و حضنها كان الملجأ الوحيد بعد اللي حسيتو حضنتني بيديها زوز...و كبست عليا تحكي
روجين:مكنتش نعرف لي باش يصير فيك هذا الكل...أما لازمك تكون أقوى يا روحي...لازمك تتعدا هذا زادة حتى أنا عشت نفس الشي...أما معندكش حل آخر صدقني ياسين هو الخاسر الوحيد في الحكاية...هو لي خسر الحب هذا الكل...و ماهوش باش يلقاه  عند حتى وحدة أخرى
خذيت نفس طويل و جبدت روحي منها...نحس في روحي تاعبة بصفة غريبة...تلفت نغزر لجواد لي بدا يبكي...كبست على يدي تحكي
روجين:إيجا عزيزتي
تنهدت بقوة...و قربت معاها...قعدت عالفوتاي و تكيت لتالي...منجمتش نستوعب فكرة وجود مرا أخرى في حياتو...منحبش نصدق لي هو باش يخليها تعيش لي حرمني منو قبل...علاش منجمتش نتخلص منو و من حبو منعرفش...علاش لتوا مزلت نقبل في الوجيعة على روحي...حتى جواد لي فحم بالبكا...منجمتش نهزو و لا حتى نسكتو...باقي نتبع في روجين...كيفاش حطاتو في حضنها...تسكت فيه...للحظة غاضني ولدي...ولدي لي أول ما جا لدنيا و هو يعاني جرايري...و باقي يعاني لتوا...عديت يدي على خدي...مسحت دموعي...و خذيت نفس نحكي
أنا:ه..هات عليك
روجين:متأكدة
هزيتلها براسي باهي...قربت مني و حطاتو بين يديا كبست عليه...و قربت ليا اكثر...نشم في ريحتو البنينة ريحتو لي تعطيني قوة غريبة في كل مرة نحس روحي ضعفت و باش نسلم...حتى هو حسيتو هدا بعد ما حملتو...مستحيل ننسى الحرقة لي حسيت بيها توا...و مستحيل نفشل بعد ما وصلت لهوني...وجود جواد كافي باش يعطيني القوة لي افتقرتها طول السنين لي تعدات...قوة مكنتش نعرفها و مكنتش نحس بيها قبل...غزرتلها نحكي
انا:م..منقصدش نتعبك معايا
روجين:حبيتك تسمع مني...خاطرني ما نحبك تضعف قدام حتى حد...سامحني فتون
أنا:إنتي ما عندك حتى ذنب روجين...صار لي صار توا ياسين إختار ثنيتو...من قبل مش من توا...جيست الخبر صدمني و كهو
روجين:ساعة حتى انا قتلو معادش تحكي معايا...كهو بعد توا معادش نحب حتى نغزرلو...و مانيش باش نحضر لأي شي يعملو...وهف يهزو هو و خوه
عديت عينيا على وجها...و ضحكت بالوقت...رغم اني نحس في روحي تاعبة عاللخر...أما حسيت قداش حاملة منهم من طريقة كلامها عليهم...رجعت شعرها لتالي...تحكي
روجين:مكفانيش اللفعة الروجية لي عندي في الفيلا باش تلحق عليها هاذي زادة
أنا:يا ريتني معادش نشوفو جملة
روجين:و أنا عندي نفس أمنيتك...صدقني فتون...ياسين هو الخاسر الوحيد...خاطرو ضيع عيلتو الصغيرة...و متأكدة باش يجي نهار و يفيق على روحو
أنا:معادش يهمني...أنا عطيتو من روحي برشا و مزلت نعطيه لتوا...معادش عندي طاقة اكبر يا روجين معادش نجم نعطي لياسين اكثر...و معادش نجم نستناه..بلكشي كنت نجم نتنازل مرة أخرى...أما مش بعد توا...مش بعد ما شد ثنيتو...ربي يهنيهم مع بعضهم...و يخليلي ولدي خاطرني كلشي نعملو بعد توا...باش يكون على خاطرو هو و كهو
قربت مني أكثر...حطيت راسي على كتفها...نغزر لجواد لعينيه ضايعة بيناتنا...نحس في أنفاسي رزينة باش تخنقني...أما كي العادة...نفضل نحصر وجيعتي...على أنها تخرج...و تخليني نضيع روحي و ولدي زادة...ولدي لي أول ما غزرتلو و هو يبكي...عرفت انو باش يكون بحاجتي ديما...حاجتو بيا قوية...و معاه في كل لحظة كيما نعرف بعد سنين من توا...باش يفهمني و يستوعب برشا حاجات...خاطر مهما كانت علاقتي مع بوه مستحيل نحرمو منو...و لا نخليه يكرهو في نهار من نهارات...رغم وضعيتنا نحب جوادي يعيش الاستقرار لي انا تحرمت منو في حياتي...من بابا لي خسرتو و ما نتذكر حتى شي معاه...و من امي لي خطفها مني المرض في لحظة...زدو خلاتني وحدي حايرة...نتخبط من بقعة لبقعة...لين لقيت روحي اسيرة في قصر الصياد...نعاني في حب من طرف واحد...لي خلاني عايشة في عالم وحدي...عالم بين الواقع المر...و الاحلام المزيفة لي يرسمها مخي...حتى جواد عطاني امل من وقت كان قطعة صغيرة داخل كرشي...امل انو هو ينجم يحبني حتى ثانية وحدة زمان...اما بعد اللي عرفتو توا...تأكدت انو ياسين...قطع آخر وتر في علاقتنا...مع بصمة وجيعة جديدة...صعيب باش تتمحى...و صعيب باش تتنسى زادة...حتى الضربة لي خذيتها منو اليوم باش تخليني نقدم اكثر في الثنية لي إخترتها و مانيش نرجع لتالي مهما كان السبب و مهمها كانت العوائق لي باش تعرضني اكثر من هكا.