كوكايين

الحلقة الثامنة و الثمانون

🔸️حلقة 88
🔸️يحيى_يحكي:
خذيت نفس و دقيت الباب...دخلت مع صوتو...شاورلي بيدو...يحكي
يوسف:تفضل يحيى
أنا:عيشك شي يوسف...مانيش باش ناخو من وقتك برشا 
يوسف:قبل هذا...عندي طلب صغير منك
أنا:اكيد تفضل
يوسف:الأيامات هذوما نحبك تمشي لشونطي مرة على مرة...و تراقب الخدمة...زادة تتأكد أنو الخدامين ما ناقصهم شي
أنا:تهنى سي يوسف...كلشي باش يصير كيما تحب أنت
يوسف:نعرف لي أنت قدها...أكا علاش مطمن
أنا:كان معندكش مانع لازمني نخرج ضروري...حكاية ساعتين و نرجع
يوسف:فهمت عليك...أكيد تنجم
أنا:عيشك
أول ما وصلت للباب...وقفني مرة أخرى...تلفت عندو نسمع فيه يحكي
يوسف:تنجم تاخو كرهبة متاع سوسيتي باش متتعطلش
أنا:مرسي برشا سي يوسف
هزلي براسو باهي...تبسمت و خرجت من عندو...و لا مرة توقعت إني باش نطيح في عرف هكا..طلبت مفاتح الكرهبة و مشيت للبركينغ...وين تقابلت معاها بالوقت نزلت من كرهبتها تحكي
سيليا:صباح الخير
انا:صباح النور
سيليا:باش تمشي لشونطي ؟
أنا:لا...عندي موعد توا...حكاية ساعتين...ثلاثة و نرجع
سيليا:باهي نشوفك مبعد
دوب تبسمت...و هزيت روحي ركبت...خدمت الكرهبة و شديت الثنية...توا بالظبط نحب إني نشوفها و نطمن عليها كهو...من غير شي توحشتها برشا الفرخة...حتى منعرفش كيفاش وصلت...شديت الفران على جنب...و غزرت لساعة...أكيد تكون خرجت توا...دقايق و أنا نستنى فيها...قبل ما نلمحها و هي جاية من غير سحر تبسمت و هزيت روحي نزلت من الكرهبة...قربت مني بالزربة...و ترمات في حضني بالوقت...دورت يديها زوز على ظهري...و كبست عليا تحكي
لجين:متوقعتش لأنت باش تجي بللرسمي
عديت يدي على ظهرها...كبست عليها...و تنهدت بالقاوي نحكي
أنا:شبي صغرونتي ؟
لجين:شي...أما توحشتك يحيى
أنا:باهي...قولي شعندك توا ؟
لجين:كور و بطبيعتي مكنتش باش ندخل
أنا:باهي إيجا معايا توا
لجين:متخدمش أنت ؟
أنا:خذيت ساعتين من الإدارة
لجين:باهي برشا ملا
جبدتها من عندي شوية..و عديت صوابعي على خدودها نحكي
أنا:هيا إيجا يا روحي
حليتلها الباب ركبت و خلطت عليها...خدمت الكرهبة نحكي
أنا:صارت حاجة ياخي ؟
لجين:ل..لا...جيست نحس في روحي تاعبة شوية...و خايفة من الإمتحانات برشا
أنا:ساعة توقعت لإنتي أشطر من هكا
لجين:بالله...باش تفركهم عليا أنت زادة
أنا:حقك عليا...إيجا عندي تراه
قربت مني أكثر...حطت راسها على صدري...غرست يدي في شعرها...نحكي
أنا:نعرف روحي هملتك برشا الفترة هاذي...أما صدقني دوب نريقل أموري...معادش نغفل عليك جملة
لجين:بالعكس يحيى...أنا مرتاحة بوجودك معايا
أنا:إسمعني يا روحي...نعرف لي فما شي متحبش تخبرني بيه...أما باش نعرفو مع الوقت...وقتها حسابك معايا
لجين:يحيى معاادش تحكي معايا بالطريقة هاذي أماانك...ياخي الكل باش ياخو فيا بايو و يحاسبني بالطريقة لي يحب عليها...حتى أنت كيفهم ؟
شديت الفران على جنب مع دموعها لي هبطو متوقعتش لي حالتها تاعبة لهدرجة...جبدت من عندي و حاوطت وجها بيديا زوز نحكي
أنا:لجين...أغزرلي هوني...خبرني كلشي و من غير ما تخبي عليا المرة هاذي باهي
هزتلي براسها لا...وين دموعها قوات أكثر...نزلت عليها بصوابعي نمسح فيهم و نحكي فرد وقت
أنا:أمك مرة أخرى ؟
هزتلي براسها إي...تنهدت بالقاوي و كبست عليها أكثر نحكي
أنا:باهي و من شنية خايفة إنتي ؟
لجين:منك
أنا:مني ؟
لجين:و..ولات تعرف إني نحبك...و قاعدة تهدد فيا زادة يحيى أنا خايفة أنك تبعد عليا جرايرها...معادش نجم نركز في حتى شي آخر...و لا نعمل حاجة من التفكير صدقني أنا منجمش نعيش من غيرك
أنا:باهي هدي روحك الساعة
رجعتلها خصلات شعرها لتالي...و مسحت دموعها نحكي
يحيى:متعرفش لإنتي تقهرني بالطريقة هاذي ؟
لجين:ي..يحيى
أنا:روح يحيى
لجين:أنت تحبني...و ماكش باش تخليني مش هكا
أنا:أغزرلي هوني...أنا كلشي نعمل فيه لتوا..خاطرك إنتي موجودة معايا...معناها رأي أمك ماهوش باش يهمني برشا...أنا باش نبقى معاك و بجنبك لآخر نهار في عمري
غزرتلي ندرا كيف و ترمات في حملتي مرة أخرى كبست عليها بيديا زوز...أصلا من أول مرة عرفت لهي تنتمي لعيلة الصياد...فهمت أنو ثنيتي أصعب من اللي توقعت...أما في الحالتين منجمش نتخلى عليها منجمش نعيش من غيرها...نزلت عليها أكثر...خذيت نفس من ريحتها البنينة و بوسة خفيفة من رقبتها...و جبدت روحي شوية...نحكي
أنا:فما حاجة حلوة تستنى فيك
لجين:بالرسمي
تبسمت و مديت يدي لمكتوب الفاست...جبدت البوات و حطيتها في يدها...غزرتلي مستغربة تحكي
لجين:شنية هذا ؟
أنا:شوف وحدك
عدات يدها على خدها و حلتها...تبسمت عالفازة...فرد وقت نحارب في روحي...خاطر وجودها بجنبي ينسيني في روحي جملة...هزت راسها مصدومة تحكي
لجين:يحيى
أنا:معجبكش ؟
لجين:بالعكس...أحلى كوليي ريتو...أما هذا غالي برشا يا روحي
أنا:حتى شي ما يغلى عليك يا عمري
لجين:يحيى...علاش عملت هكا...كنت تنجم تاخو شكولاطة في بلاصتو...أنت تخدم الدوبل...باش تخلط تكمل الدار...و تزيد تتحمل تكاليف أخرى باش تفرحني
غزرتلي تستنى فيا باش نجاوبها...تبسمت و نزلت على شفايفها بالوقت..أصلا منجمتش نركز معاها و هي تتكلم بالطريقة هاذي...كبسة يديها على صدري خلاتني نغطس فيها أكثر و أكثر...كأني أول مرة نبوسها...جبدت روحي شوية نحكي
أنا:أسكت شوية
هزتلي براسها باهي..مديت يدي شوية هزيتو من البوات و غزرتلها...أنفاسها لي باقية تطلع و تهبط بمجهود شيختني أكثر...حطيت شعرها على جنب و عديت عينيا على وجها...حاوطتو على رقبتها...سكرتو و عديت صوابعي عليه نحكي
أنا:توا ولات عندو قيمة
لجين:حبيتو برشا
أنا:رد بالك تنحيه من رقبتك...مهما كان لي باش يصير بيناتنا
لجين:وعد
مديت يدي لخدها و قربتها ليا أكثر..دوب عاودت بستها و جبدتها في حضني...أصلا حياتي الكل ولات عندها قيمة أكثر بوجودها معايا...هزت راسها شوية تحكي
لجين:يحيى
أنا:روحي
لجين:أنت باش تتحمل عيلتي على خاطري ؟
أنا:منحبكش تخاف مني...أنا مستحيل نتخلى عليك...و لا حتى نحب غيرك...يمكن طريقنا تعقدت اكثر..و كلشي يعرضنا باش يكون صعيب...أما ماهوش مستحيل..باهي
لجين:أمي ماهيش باش تخلينا
أنا:أمك ماهيش أقوى من حبي ليك
عدات صوابعها على خدي...و غزرتلي ندرا كيف...تحكي
لجين:سامحني...خاطرك مزلت باش تتعب جرايري
كبست على يدها بستها منها...و تنهدت بالقاوي...نحكي
أنا:مفما حتى شي نسامحك عليه..إنتي باش تبقى أحلى هدية ليا...و مستحيل نفرط فيك
لجين:نحبك
تبسمت بالوقت...أكثر شي نحبو إني نسمع الكلمة هاذي من شفايفها...خذيت نفس طويل...نحكي
أنا:لازمني نوصلك توا...و نرجع لسوسيتي...ميجيش نتطرد مبعد
لجين:رجعني للفاك...مزال عندي كور مهم
خدمت الكرهبة لأقرب ريستو...شديت الفران...نحكي
أنا:باهي...أستناني هوني تو نرجع
لجين:وين ماشي ؟
بستها من خدها و هزيت روحي نزلت...خذيتلهم فطورهم و رجعت...حطيتو في يدها نحكي
أنا:فطورك إنتي و سحر...مرة جاية نعوضك على خرجة أحسن منها...باهي يا روحي
لجين:يحيى يا روحي...يكفي أنك جيت على خاطري مستحيل نتقلق منك...خاطرني نعرف قداش قاعد تتعب...أكا علاش أنت باش تسامحني خاطر ديما تاعب جرايري
أنا:كلشي يهون على خاطرك...أما نحبك توعدني أنو هاذي آخر مرة نشوفك هكا
لجين:باهي وعد
أنا:إيجا عندي تراه
ضحكت و قربت مني بالوقت...عديت يدي  على ظهرها كبست عليها و بستها من راسها...فاهم اللي قاعد يدور في راسها...خاطرني نخمم فيه أنا زادة..و منعرفش وين باش تهزنا ثنيتنا و لا وين باش نرسي معاها في آخر الرحلة...و لا شنوة باش يعرضنا أكثر من هكا...أما رغم العقبات هذوما الكل...معنديش إستعداد إني نتخلى عليها...و لا حتى نتراجع خطوة لتالي...منجمش نحرمها من الأمان لي خلاها تكون بجنبي...و لا نحرم روحي منها...خاطرني بالرسمي نعتبرها أحلى هدية جاتني في الوقت لي حسيت روحي إني مستحيل نجم نقدم خطوة في البلاد هاذي...هي مصدر الطاقة الوحيد بالنسبة ليا...و منعرفش نكمل خطوة اخرى من غيرها محسيتش بالثنية كيفاش وصلت...ركيت على جنب جبدت روحها شوية تحكي
لجين:باش نتوحشك برشا
أنا:أول ما نكمل نطلبك...باهيشي هكا
لجين:أكيد باش تطلبني معندكش حل آخر
أنا:تدلل صغرونتي
قربت مني أكثر...باستني من خدي...و هزت روحها نزلت...بقيت نتبع فيها بعينيا لين دخلت...تنهدت بالقاوي و خدمت الكرهبة...دريكسيون لسوسيتي...أصلا لازمني نهز روحي فيسع و نكمل شطر الدار الشهور هذوما...فرد وقت لازمني نقابل واحد من خاوتها و نحط النقاط على الحروف باش هي ترتاح من الخوف لي داخلها و نرتاح أنا من الشكوك لي قاعدة دةر في راسي...من ناحية الفرق لي بين العيلتين...في الأخير تبقى بنت الصياد بنت أكبر عيلة موجودة هوني..و لي باش تخلي الحكاية تولي صعيبة نهار بعد نهار...عديت يدي على وجهي محاولة مني باش ما نخمم في حتى شي توا...من غير علاقتنا...و منحبهاش تدخل بعضها جراير لي قاعد يصير و هي على أبواب إمتحاناتها...أصلا كلشي يتحل مع الوقت و لكل كل حادث حديث وقتها.