كوكايين

الحلقة الثالثة و الثلاثون

🔸️حلقة 33
🔸️روجين تحكي:
طيشت المنشفة من يدي...و لبست حوايجي كيما جا منعرفش كيفاش قبلت دعوتو مرة اخرى...من نهارت لي مشينا فيه للميتم...لا كلمتو و لا رديت على الاتصالات متاعو...يمكن هذا لي خلاني نحس روحي غلطت برشا في حقو...حطيت شعري على جنب...لتوا نحس فيه مبلول شوية...نفخت بالقاوي...و حليت القجر...نختار في بوني...معينيش باش نشيحو مرة اخرى...هزيت راسي على صوت الباب لي تحل على غفلة...ضيقت عينيا نغزرلو مستغربة...سكرها و نزل عالزر...قربت من شوية نحكي
انا:فهد شفما ؟
هزني و حطني من غير حتى كلمة...منعرفش علاش حسيت الحكاية اكبر من اللي توقعت...مدامو وصل لهوني...معناها الحكاية كبيرة برشا...حتى الغزرة لي في عينيه منعرفهاش قبل و مش مستانسة بيها... وين قلبي تكمش في بقعتو...جيت باش نحكي...اما ملقيتش كلام نقولو...خاطرني لتوا منعرفش أصل الحكاية شنوة...مد يدو لمكتوب الفاست...جبد ظرف صغير منو...و حلو يحكي
فهد:الدكتور غساان الميساوي
كبست على يدي بالوقت...اسمو لي تذكر على لسانو دخلني بعضي...و خلاني ساكتة من غير حتى كلمة أصلا منجمتش نجاوبو و انا منعرفش شنية وراه...و لا علاش جا لهوني...غزرلي ندرا كيف و كمل كلامو يحكي
فهد:في الاخير طلع غسان هو العريس لي اختارتهولك أمك
أنا:ف..فاش قام الكلام هذا توا ؟
قرب مني اكثر...وين أنفاسي ضاقت اكثر...من غزرتو و من كلامو فرد وقت...نزلت راسي من وجهو..نغزر لظرف لي في يدو...جبد تصاور منو...يحكي
فهد:شنية قتلك انا ؟
غمضت عينيا بالقاوي...و عاودت حليتهم...نعرف لي نجم نجاوبو...أما فرد وقت نعرف لي كلامو هذا مزال وراه برشا...مد يدو كبس على وجهي...و طلعلي راسي يحكي
فهد:اغزرلي هوني و جاوبني
انا:س..سيبني فهد
فهد:مش قتلك كان نحس مجرد إحساس لي فما شكون يحوم بيك و لا قلبك دق لغيري...شنية نعمل فيك ؟
انا:ي..ياخي هبلت انت و لا شنية حكايتك...فاش قام حتى تحاسبني ؟
كبس على وجهي اكثر...و رجع بيا لتالي...ضربت في القارد روب بالوقت...قحرتلو نحكي
انا:س..سيبني فهد
فهد:مش قتلك كان حسيت بريحة ذكر دور بيك نحرقك يا روجين...راني قلت برشا حاجات و إنتي عفست على كلامي...و عملت لي في راسك
مديت يديا زوز حطيتهم على صدرو...دزيتو لتالي...و جبدت روحي منو نحكي
أنا:شنننية عملت...ياخي شنية لي قاعد يصير...شبيك تحاسب فيا من غير ما نعرف لي صار
كبس عالظرف اكثر...و طيشو على وجهي...نزلت راسي نغزر لتصاوري مع غسان...مستغربة من تصرف متاعو...و من تصاور لي منعرفش من وين جابهم...هزيت عينيا في وجهو نحكي
انا:تراقب فيا ؟
فهد:أنا وثقت فيك...وثقت لإنتي ماااكش باش تعمل خطوة هكا...أما في الاخير طلع كلام أمك أههههم مني مش هكا
انا:ما عملت حتى شي غالط...و ما عندك حق تحاسبني على حتى شي
خذيت نفس و هزيت روحي باش نمشي...حط يدو على رقبتي و رجعني لتالي بالوقت...كبس عليا و عاود دزني عالقاردروب مرة اخرى يحكي
فهد:عللللى أساااااس شنوة قابلتو ليلتها...ياااخي مش نبهت عليك انااا
مديت يديا زوز...حطيتها على يدو...محاولة مني باش نفك صوابعو لي تغرست في رقبتي...وين كبس عليا اكثر...و جبدني عندو يحكي
فهد:تسسمع في كلام امك ؟ أمممك لي تحب ترتاح منك في أول فرصة...يااااخي في شننوووة قصرت معاااك باش تقااابلو هو
كبست على يدو اكثر...نجبد في النفس بالسيف...و نحكي فرد وقت
انا:س..سيبني...س..سيبني ف..فهد
غمضت عينيا على ضربة راسي في القارد روب...أصلا هاذي اول مرة يفقد أعصابو معايا لهدرجة...اول مرة يمد يدو عليا...و يتصرف معايا هكا...لدرجة معرفتش شنوة لازمني نعمل...بين خوفي منو و تمردي عليه...بين قوتو و ضعف غزرتو...منعرفش علاش يحسس فيا لانا خنتو...في الوقت لي هو الغالط الأول في كلشي صار حليتهم على صوتو يحكي
فهد:مش مرة و مش إثنين...انتي قابلتو اكثر من مرة ورا ظهري...في الوقت لأنا كنت متأكد لي مااااكش باش دور في كلمتك...و ماكش باش تتصرف ورا ظهري...اللي عملتو ماهوش باش يتعدااالك يااا روجين...و رحمة بابا باش تخلص حقو دوبل انتي و الساقط هذاكا
انا:غ..غسان م..ما عندو حتى ذنب..م..مستحيل نخ..ليك ت..تقربلو
كبس عليا اكثر وين انفاسي تقطعت جملة...كبست على يدو...محاولة مني باش نفك روحي...دوب نجمت نلم الحروف في لساني باش نحكي
انا:س..سيبني ف..فهد
رخف يدو عليا...و دزني لتالي...حطيت يديا زوز على رقبتي...نكح بالقاوي...للحظة حسيتو باش يقتلني قعدت عالارض نرد في النفس ورا بعضو...بقى واقف في بلاصتو...منجمتش حتى نهز راسي و نغزرلو...أكثر شي خفت منو...يوصل لحكاية الصغير و يعرف بيها نتوقع منو باش يعمل هكا...وخر خطوة لتالي...و عفس على تصاوري يحكي
فهد:انتي لي اخترت يا رووجين...و إنتي لي باش تتحمل نتيجة قرارك زادة
هز صاكي من الفوتاي...فرغو عالسرير...بقيت نغزرلو من حتى كلمة...فك لي كارت متاعي بالوحدة...و مفاتح الكرهبة يحكي
فهد:بعد توا تاخو مصروفك من عندي...و جمال هو لي يوصلك و يجيبك...والله كان نعرف لي حطيت ساقك في بلاصة أخرى غير الفاك...و لا تقابل شكون...موتك باش تكون على يدي...و بالنسبة لصوفيا لأول مرة خليتني عاجز باش ناقف في وجها...مدامك تبعتها المرة هاذي...اتحمل لي مزال يجيك منها
قرب من الكوافوز...هز تليفوني زادة...دور راسو شوية غزرلي ندرا كيف و خرج من البيت...كبست على رقبتي اكثر...اللي عملو توا...مستحيل يتعدا بالساهل...مديت يدي مسحت دمعتي لي نزلت و هزيت راسي شوية نغزرلها...وقفت بحذا الباب تغزرلي...تبسمت على جنب و قربت مني شوية قعدت على طرف السرير...تحكي
صوفيا:صراحة متوقعتش لي باش يجي نهار هذا...أما تعرفشي حاجة تستهل لي صار فيك الكل...خاطرك رغم أنو عرس...أما بقيت ترمي في روحك عليه...و منجمتش تتقبل فكرة أنك تتحمل مسؤوليتك...تي حتى هو مسلمش من الشؤم متاعك
نزلت شوية...هزت التصويرة من الارض...و تبسمت على جنب تحكي
صوفيا:معناها هذا سبب لي خلاه يصيح بالطريقة هذيكا...هيا باهي برشا كي قبلت تقابلو...عالاقل تمشي من هوني على قريب برشا
خذيت نفس و هزيت روحي وقفت...قحرتلها...نحكي
انا:أخرج من بيتي
صوفيا:يزيك من دلال...اللي عشتو إنتي هوني...غيرك يتمنى يعيش لحظة منو...ملا من غير ما تمثل دور المظلومة...ماكش باش تستفاد حتى شي
انا:هذااا لي يهمك انتي...باااهي مدام سي فهد خذا كلشي...انتي زادة اعمل نفس الشي
حليت القارد الروب...و طيشت الدبش لي فيها الكل عليها هي...و قربت من الكوافوز...رميت كلشي فيها عالارض...من البرفانات...للصياغة...لكل قطعة شراها هو...و لا هي باش تظهر لهي من طبقة راقية...دورت راسي نحكي
انا:هزززز معااااك كلشييي...معااادش حاجتي بحتى شي منكم...لاا إنتي و لا هو...حتى باش يجي نهار مستحيل نخليك تشوف وجهي مرة اخرى
صوفيا:باهي برشا...خليني نشوف كيفاش باش تتحمل مسؤوليتك...أما مدام عندك شكون آخر من غير فهد مانيش باش نخمم عليك جملة
فكيت التصويرة من يدها...و جبدتها من زندها...خرجتها و سكرت الباب من داخل...منعرفش كيفاش عملت هكا أما منجمتش نتحمل كلامها اكثر...عديت يديا زوز على وجهي...نمنع في دموعي باش تنزل...بعد اللي عملو معايا...مستحيل مزلت نغفرلو...خاطرو غالط كيفي و اكثر...هو السبب في اللي صار معانا الكل...مهما كانت مصلحتو من حكاية العرس...معندوش حق يعرس بغيري...خاطرني مكنتش باش نعملها كان جيت في بلاصتو...و لا طحت في الموقف متاعو...عديت يدي على رقبتي...نتحسس في تراص صوابعو لي خلفت الوجيعة...قربت من المرايا شوية نغزر لروحي...نغزر لكل بقعة زرقا خلاها على وجهي و رقبتي...عديت صوابعي عليهم...و غمضت عينيا بالوقت...يمكن مستغربتش لي عملو برشا...خاطرني الصدمات لي كليتها منو...ما تجي شي قدام لي عملو توا...دمعة أخرى غلبتني و نزلت على خدي...مسحتها بكف يدي...ناقمة على روحي...نقمت خاطرني قبل يومين لتالي..كنت باش نضعف و نسامحو على كلشي...اما انانيتو مستحيل تشفعلو...رغم كلشي عملو معايا قبل...اما أنانيتو كانت ديما غالبة...و باللي صار معايا اليوم...عرفت لأنا ما عندي شي...كان هو و أمي جردوني من اللي نملكو...و لي بالأصل يرجع ليهم لا انا من عيلة الصياد...و لا حد باش يتقبلني هوني مهما كان الوقت لي تعدا...دقايق عديتهم نتأمل في روحي نفركس على حل داخل مخي...حل يحررني من هوني جملة...خاطر بعد اللي عملو قبيل...كانت رسالة واضحة منو...يحاول يثبتلي فيها لانا من غيرو ما نملك حتى شي...يمكن هذا الصحيح...طول السنين لي تعدات فهد عطاني كلشي...أما توا قاعد يسلب فيا كلشي من غير ما يحس...في الأول أحلامي لي خلاني بنيتها معاه...و توا قاعد يسلب في قوتي...باش يخليني نضعف...و نذل روحي ليه...أما لي مزال ميعرفوش...انو كرامتي و كبريائي...ماهمش باش يخلوه يوصل للي يحب عليه مستحيل مزلت ناخو منو حاجة بعد توا...و لا حتى نرضى لروحي...أني نستنجد بيه...مهما كان لي باش يعرضني في حياتي...مستحيل نرجعلو...و لا ننسى نهار اليوم زادة...صحيح بعد اللي عملو...ما بقى عندي حتى شي...لا فلوس لا كرهبة...و لا حتى نفوذ زادة...خاطرني نعرف بالخطوة لي عملها باش يخلي الكل في صفو...من هارون لامي...لسلطانة زادة...حتى ياسين و فتون منحبش ندخلهم في مشاكلي...يمكن وقيت باش ناقف على ساقيا من جديد...من غير فهد...من غير أمي و من غير عيلة الصياد جملة...لازمني نعمل على روحي و نخرج من هوني في اقرب فرصة...من غير ما نخسر روحي اكثر من هكا