كوكايين

الحلقة الثالثة و التسعون

🔸️حلقة 93
🔸️روجين_تحكي:
كبست بيديا زوز عالفولون...و غمضت عينيا بالقاوي..كل كلمة سمعتها منها وجعتني...و خلاتني نستحضر كل لحظة عديتها من غيرهم...و اللي صار معاها صار معايا منعرفش اذا غلطت باللي عملتو...أما حتى كان جيت بيه الصغير هذا لدنيا...كنت باش نتحمل مسؤوليتو لآخر لحظة في عمري...بابا لي طول عمري تمنيت نقابلو لحظة وحدة طلع حتى هو ماهوش قابل بيا...أكا لي خلاها ترفضني السنين هذوما الكل...مديت يدي مسحت أول دمعة و خدمت الكرهبة...أصلا معادش فما شي يستهل باش نبكي عليه بعد توا...لا هو و لا هي باش يرجعولي لي خسرتو من سنين طويل...و الحصرة لي كبرت بيها...عيلتي الوحيدة تعتمد على فهد...كل مرحلة من حياتي شهدتها معاه هو و كهو...و منجمش نستخايل هو ماهوش فيها...غريبة احداث الماضي لي دارت قدام عينيا...و غريبة طفولتي كيفاش عشتها أصلا لتوا مش مصدقة لي هي خلاتني ندخل لبيتها و نقعد على سريرها...ساعة بعد اللي سمعتو منها فهمت كمية القهرة لي تحس فيها ناحيتو...و لي خلاتني نعذر كرها ليا...و كلامها كان دليل واضح انها لتوا تحب تتخلص مني و من كلشي يربطني بيها...الأغرب انو معادش يأثر فيا خاطرني عديت حياتي من غير أب و أم نعتمد عليهم و لا نلقاهم بجنبي...تعودت نفرح مع فهد و نبكي عندو...هو الوحيد لي كان يسمعني و يخرجني من اي مشكلة تعرضني...فقت من حرب افكاري...كي حسيت روحي ضيعت الحرس متاعي...هزيت راسي نغزر للمرايا...كرهبتهم قعدت محصورة بين زوز كراهب...و لين وقفوهم...دقات قلبي قوات...لي خلاتني نكبس عالفيتاس أكثر...أول حد جا في بالي هو هارون...أصلا مفماش غيرو...كمية الخوف لي حسيتها ساعتها خلاتني عاجزة باش نتصرف و لا نجبد تليفوني...شديت الفران بالقاوي عالكرهبة لي قصت ثنيتي و شعرة لا دخلت فيها...حاولت نوخر لتالي...لقيت زوز ورايا بالظبط سلمت أمري لربي...و هزيت راسي نغزر لواحد من رجال لي حلي الباب يحكي
هو:تفضل
هزيت حاجبي مستغربة...و نزلت من غير حتى كلمة نمشي وراه للكرهبة لي قطعت ثنيتي...حلي الباب من تالي...جات عيني في عينو...اصلا متوقعتش غيرو هزيت روحي ركبت و تكيت لتالي نحكي
أنا:تفضل...شنية تحب من المرة هاذي
هارون:هاك كبرت...و وليت تعرف تتكلم و متحترمش الأكبر منك
أنا:قصدك قطاع الطرق لي كيفك ؟
هارون:هدي روحك...مانيش باش ناخو من وقتك برشا
أنا:صااار في بالي باش تقتلني المرة هاذي
هارون:تهنى مزال حاجتي بيك
أنا:شنية تحب المرة هاذي ؟
هارون:مدام خلفت اتفاقنا متاع قبل...مظطرين لاتفاق جديد
أنا:و شنية المطلوب المرة هاذي
هارون:شقولك نوريك المقابل...قبل ما نقلك المطلوب
أنا:متوقعة منك
مد يدو للفاست متاعو جبد تليفونو...حلو و حطو في يدي...قلبي خض بالقاوي و أنا نغزر لتصاور فتون و جواد مع بعضهم...تبسم يحكي
هارون:واحد من رجالي يسكن فوقها بالظبط...يعني كلمة وحدة معادش تسمع بيهم في حياتك جملة
هزيت راسي غزرتلو مصدومة...كبست على تليفون نحكي
أنا:تعرف كان ياسين يسمع باللي تعمل فيه ؟
هارون:و شكون باش يخبرو إنتي ؟
أنا:اكيد باش نخبرو...و متأكدة لي هو باش يصدقني و مش بعيد يقتلك زادة
هارون:و يعدي بقية عمرو بين أربع حيوط...منظنش لي هو باش يهون عليك
أنا:أنت مستحيل تجي عبد...صدقني باش نخبرو كلشي و مانيش بش نسكت عاللي تعمل فيه
هارون:نسيت مقتلكش...مانيش باش نخليه وحدو غديكا...سي فهد متاعك باش يلحق عليه
أنا:وين تحب توصل ؟
هارون:حبيت نفهمك أنو فهد لي قاعدة تتحمى بيه
دليل واحد ينجم ينهي حياتو جملة
عديت عينيا على وجهو...فهمت لي هو يحكي على الدليل لي فهد يفركس عليه...و مش بعيد يعملها كان يحس لي هو بالرسمي خسرو...أصلا مش من مصلحتي و لا مصلحتو  باش نحاربوه توا...خاصة و الدليل مزال عندو خذيت نفس نحكي
أنا:المطلوب توا ؟
هارون:لحظة كهو
فك تليفونو من يدي...و طلب شكون...حط المكبر باش نجم نسمع أنا زادة...و غزرلي يحكي
هارون:وينك توا ؟
هو:كيما طلبت سي هارون
أنا:ملا باش تنفذ لي قتلك عليه
ضيقت عينيا كي سمعت صوت الباب...و دقات قلبي قوات أكثر مع صوت فتون و هي تحكي
فتون:تفضل ؟
هو:فما بريد للعنوان هذا...إنتي فتون عبد الله
فتون:إي تفضل
أنا:رد بااالك تعمللها شي...رد باالك
هارون:تاخو قرارك توا...و إلا باش تخسر الكل فرد مرة فتون و ولدها تحت التراب و الخاوة الزوز بين أربع حيوط...نسيت مقتلكش الأميرة الصغيرة تحب ولد حومة شعبية طلعت لأمك و خوها مينجموش برشا للمستويات العالية...أيا شقولك ؟
أنا:باهي موافقة...اللي تطلبو باش يصير
هارون:ريت كان يعرف فهد بالإتفاق هذا ؟ صدقني حتى بعد موتي نخليكم تتمنوها نتوما زادة...في الأخير فما برشا شكون ينجم يكمل خدمتي ورايا
أنا:قتلللك باهي...خليه يبعد عليها
هارون:سلمها الطرد و أبعد عليها
هو:باهي سي هارون
علق عليه و تكى لتالي...مد كارت من مكتوبو...شديتها عليه نحكي
أنا:شنية هاذي ؟
هارون:باش نعلمك تقرا زادة ؟
نزلت راسي نقرا في الإسم...دقات قلبي قوات أكثر خذيت نفس نحكي
أنا:شنية تحب مني توا ؟
هارون:تكلمها توا...و تفهمها لإنتي وافقت باش تعرس بولدها...على حد علمي تحب تناسب عيلة الصياد و تخليك كنة عندها...شكون كيفك ؟ دكتور معروف و صاحب ولد خالك زادة
أنا:مستحيل...تعرف خطوة كيما هاذي...تخلي فهد يهبل و مش بعيد يقتل السيد
هارون:كان إنتي عرفت كيفاش توجعو...صدقني ما عندو ما يعمل
أنا:كيفاش تنجم تعمل فينا هذا الكل...فاش ضريتك أنا باش تبعدني عليه
هارون:طول ما إنتي معاه...الموت باش تبقى وراه...أنا قاعد ننقذ فيه منك
أنا:باهي باش نطلبها
هارون:توا
أنا:تليفوني في الكرهبة
هارون:برا جيب تليفون المدموزال
غزرت لشوفور لي نزل...منعرفش كيفاش نجم نعمل هكا و لا حتى كيفاش نجم نخلي فهد يتقبل الحقيقة...أصلا حتى كان حاولت نخبرو و نخليه يسمعني..يعمل لي في راسو و مش بعيد حتى يقتلو...مخي تحرق من تفكير فقت من سرحتي كي تحل الباب و حط تليفون في يدي...كتبت الرقم مترددة...دقايق قليلة و هزت عليا تحكي
بية:تفضل
غزرت لهارون...و كبست على تليفوني اكثر...خذيت نفس طويل نحكي
أنا:مدام بية...أنا روجين...خذيت رقمك من عند أمي
بية:روجين...أهلا عزيزتي شحالك ؟
أنا:لباس عيشك...صراحة أمي شدت الصحيح باش نكلمك أنا
بية:إن شاء الله باش تفرحني
أنا:ا..أنا موافقة...أما يا ريت ما تخبر غسان بشي توا نحبو يعرف مني
بية:متتوقعش قداش فرحتني بالخبر هذا يا بنتي...كنت نعرف لي صوفيا ماهيش باش تخيبني...ساعة باش نبدا نحضر لخطبتكم من توا
أنا:عيشك مدام بية
بية:نشوفك على قريب عزيزتي...رد بالك على روحك
أنا:و إنتي زادة
علقت عليها...و هزيت راسي غزرتلو...خذيت نفس نحكي
أنا:عندك طلب آخر ؟
هارون:أكيد مدام فما شكون ينفذهم
أنا:نهايتك باش تكون على يدي صدقني
هارون:و تهدد زادة ؟
كبس على وجهي في غفلة مني...و غزرلي ندرا كيف يحكي
هارون:المرة هاذي نجمت تمنعهم...أقسم بالله كان فهد يعرف حاجة من اللي تحكات هوني...هو أول واحد باش نضحي بيه...بعدها باش نخليك تحضر على نهايتهم واحد واحد...اتفاقنا الصغير باش يقعد بيناتنا...مدام القطوسة ما تحب تضر حد
جبدت روحي منو...رجعت شعري لتالي و قحرتلو نحكي
أنا:أنت نسيت حاجة
هارون:نورني
أنا:نسيت لأنا بنت ابراهيم صاحبك...كيما نسيت لي فهد يموت من غيري...أنا باش نوافق على العرس و حتى كان ظطريت باش نعرس زادة...أما أنت باش تبقى خايف مني...من وجودي بحذاكم...حاولت تقتلني و ماكش باش تحاول مرة أخرى...خاطر فهد نهايتو معايا
هارون:وين تحب توصل ؟
أنا:نحب نقلك لأنت ما تنجم تنفذ حتى تهديد من هذوما خاطرك واحد جبان...خواف...متنجمش تمشي من غير رجالك...حتى في نومك تخاف من فهد و من ياسين...و بوهم زادة
هارون:متحاولش تجربني
أنا:هاني جربتك...ما تنجم تواجه حتى حد...متنجمش تاقف في وجه ياسين و تقولو لأنا باش نقتل مرتك و ولدك...و متنجمش تقول لفهد لانا حاولت نقتل روجين المرة هاذي باش نلتزم باتفاقك على شرط
هارون:بالله ؟
أنا:أنت باش تثبت لي بابا ما عندو حتى علاقة بمقتل خالي كمال...و أنو الكلام لي حاولت تقنع بيه أمي و فهد مش صحيح زادة...خاطر كان فما قاتل بيناتنا هو أنت
هارون:لا حلو برشا
أنا:أنت حر...خاطرني كان نعاود الكلام هذا لفهد يصدقني حتى من غير دليل
هارون:شيهمك إنتي في راجل طيشك إنتي و أمك ؟
أنا:حرام يهز ذنب معندوش فيه...في الأخير يبقى بابا
هارون:عندك أوامر أخرى ؟
أنا:أنت باش تتنازل على حقوقك الكل في الفيرما و في أراضي البور وين ورشة خالي كمال...لأولادو الثلاثة
هارون:معينيش باش نضحك
أنا:و باش تخرج من الفيلا زادة و تتنازل على حقوقك فيها بعد ما أنا نخرج منها و إلا باش نبطل كلشي و وقتها فضيحتك ماهيش باش تكون محصورة بين العيلة...أنا باش نخلي كل حد في البلاد هاذي يسمع بيها حضرة الوزير...القرار يرجع ليك
حليت الباب و نزلت...من غير ما نسمع كلمة أخرى...مدامو يحب يلعب أنا زادة باش نستغل الوضع في مصلحة الكل...و قبل ما يلقى فهد الدليل مستحيل نخاطر بيه و لا نخبرو عاللي قاعد يصير...و مستحيل زادة نخلي العرس هذا يكمل و غسان باش يفهمني أكيد...أصلا هو السبيل الوحيد توا...شديت الفران بالقاوي و نزلت...منعرفش على روحي كيفاش وصلت لهوني...قربت من الطفلة لي تخدم عندو نحكي
انا:خبر غسان لانا نستنى فيه توا
هي:عندو شكون توا...تنجم تستنى
هزيتلها براسي باهي و كبست على يدي نحس في راسي باش يطرشق...منعرفش شنية لي باش يصير اكثر من هكا و لا حتى كيفاش نتعامل مع فهد...و نخليه رايض من غير حتى مشكلة...دقايق حسيتهم ساعات أول ما خرجت المرا لي عندو...دخلت من غير ما نسمع الطفلة لي تنادي فيا...أول ما هز راسو وقف و شاورلها باش تخرج...قرب مني وقف قدامي بالظبط...يحكي
غسان:رووجين لبااس ماهو ؟ شبي حالتك هكا ؟
أنا:غساان أنا عملت حاجة من غير ما نسألك...والله مكانش عندي حل آخر.
غسان:باهي هدي روحك الساعة و إيجا اقعد
هزيتلو براسي باهي و قعدت عالفوتاي بجنبو...عبا كاسة الما و حطها في يدي يحكي
غسان:لباس توا ؟
هزيتلو براسي إي...خذيت نفس طويل...و غزرتلو نحكي
أنا:نحب نحكي معاك
غسان:نسمع فيك
أنا:قبل ما نجيك لهوني كلمت مدام بية
غسان:أمي ؟
أنا:مممم
غسان:علاش شنية لي صار ؟
أنا:أمك شدت الصحيح في حكاية الخطبة
غسان:شبيني معنديش علم بالموضوع...كان إنتي هكا على خاطر الموضوع هذا تو نكلمها...صدقني معنديش علم
مديت يدي حطيتها على يدو...قبل ما يقوم و غزرتلو نحكي
أنا:لحظة غسان...ص..صراحة أنا وافقت
غسان:شنية ؟
أنا:متفهمنيش بالغالط...مكنتش باش نحطك في موقف هكا...أما والله معنديش حل آخر
غسان:روجينا تنجم تهدي روحك و تفهمني بالشوية ؟
هزيتلو براسي باهي...خذيت نفس و هزيت راسي شوية نحكي
أنا:أمي ظغطت عليا برشا...و ملقيتش حل آخر...يعني كان مقبلتش الأمور كانت باش تدخل بعضها أكثر...أنت كان تحب تنجم ترفض...اما عالأقل مش توا...أماانك والله معنديش حل آخر غيرك
بقيت نغزرلو...خايفة من ردة فعلو...خايفة يرفض بعد ما عطيت كلمتي لهارون...عالأقل فترة صغيرة لين نسحب منو اللي حاجتي بيه...كبست على يدو نحكي
أنا:تنجم تبطل الخطبة وقت ما تحب...يعني حتى أنت باش تتهنى من ظغط أمك
غسان:ترشي فيا معناها ؟
أنا:أمااانك...والله آخر طلب...نعرف كثرت عليك...أما شنعمل ؟
غسان:باهي يا فرخة...لي تحب عليه باش يصير
انا:معناها معندكش مشكلة ؟
غسان:لا حتى انا باش تفيدني برشا الحكاية و تنقص عليا ظغط بية
أنا:سااامحني غسااان والله مش مني
غسان:تدلل...مدامهم حضرو لكلشي من ورانا...خليهم يكملو امور الخطبة وحدهم
تبسمت بالوقت و جبدت يدي منو...خذيت نفس طويل نحكي
أنا:مانيش باش نعطلك أكثر من هكا...كي تفضى كلمني
غسان:باهي رد بالك على روحك
أنا:عيشك
خرجت من عندو...و تنهدت براحة...أول ما وصلت للكرهبة...هزيت تليفوني...استغربت من المكلامات لي جاتني منو...و قبل ما نعاود نطلبو...طلبني مرة أخرى هزيت عليه نسمع فيه يحكي
فهد:رووووجين...وييينك يااااخي من بكري نطلب فيك...شنية لي صاااار ؟
أنا:هدي رووحك...لباس عليا
فهد:شوووو كي تقوولي هدي رووحك...تحب تهبلني ●●● رجاال ضيعووك في ثنية...وينك توااا ؟
أنا:نستنى فيك في الدار
فهد:خلي ●●●● تليفون يمشي...لين توصل...رد بالك تسكر
أنا:باهي يزززي من الكفر
حطيت تليفون على جنب و خدمت الكرهبة...منعرفش على روحي كيفاش وصلت لدار...هزيت روحي طلعت كبست عالكارت في يدي...حليت الباب...و دخلت عديت عينيا على كل تركينة جمعتني بيه...الدار هاذي عشت فيها أحلى أيامي و أسوء يوم زادة...و منستخايلش تدخلها وحدة أخرى غيري...فقت من سرحتي على دخلتو كي الثور الهايج...وجهو أحمر باش يطرشق...هد عليا في لحظة جبدني من زندي يحكي
فهد:نااااوية تهبلني ●●●●●●● تحبني نخرج من ●●● عقلي...كيفاااش تضيع عليهم...كااان صارتلك حاااجة شنية كنت باش نعمل وقتها ؟ علااااش هكااا ؟
غمضت عينيا بالقاوي...و عااودت حليتهم...نحكي
أنا:واافقت على خطبتي من غسااان
منعرفش كيفاش تكلمت...و لا حتى كيفاش خرجت من فمي...أما كان لازمني نتصرف و الا مستحيل ننطقها سكت في لحظة...باقي يغزرلي من غير حتى كلمة ضيق عينيه يحكي
فهد:تضربت في مخك ؟
أنا:لااا...أما هذا لي صاار...و قبل ما نجي لهوني كنت معااه
رخف يدو على زندي...تبسم على جنب...و غزرلي ندرا كيف يحكي
فهد:تحب تحضر لجنازتو معناها ؟
أنا:ماااكش باش تقرب منو و لا حتى تمسو...رد باالك
فهد:لا حلو و تزيد تهددني زادة ؟
أنا:مجبووور تتقبلها الحكاية
فهد:نتقبل شنوووة ●●●●●● نتقبل شنوووة لي إنتي تخمم تكون لحد آخر...و لا فما شكون حط عينو عليك و يمسك...تحبني نستجرم قدااام عينك باااش تبررد ؟
جيت باش نحكي أما سكت...كي بدا يكسر...كلشي جا على يدو نزل بيه للارض...لدرجة ما خلى شي في بلاصتو...بقيت واقفة في بقعتي...مش بالعادة يهبل بالطريقة هاذي...رجعلي في لحظة...شدني من رقبتي يحكي
فهد:نقتتللك...و رحمممة بابااااا نقتلك يااا روووجين على تفكيرك هذاااا...خاااطر لي في مخك مستحيل يصير...و إنتي مستحيل تخمم برك تكووون لحد غيري
مديت يديا زوز حطيتهم على يدو...وين حسيت روحي باش نتخنق...رخف يدو شوية...دزيتو بالوقت نحكي
أنا:مجنووون و مستحيل تتبدل...هذا الحل لي لقيتو قدامك...أنك تقتلني و ترتاح ؟
حاوط وجهي بيديه زوز...و نزل عليا أكثر...لين حسيت بأنفاسو ماشية و تقوا...يحكي ورا بعضو
فهد:ماااكش باش تعملها فياااا...إنتي مستحيل تغزر لحد آخر غيري...و مستحيل تخمم بالطريقة هاذي زادة
أنا:ك..كان تهدي رووحك...نجمو نحكيو
فهد:روووجين...على شنوة تحبني نهدي روحي...و إنتي تحكي بالطريقة هاذي
أنا:فهههد...إسمعني
فهد:كان لي قلتو صحيح...و يطلع بالرسمي قابلتو يا روجين...والله معااادش تسمع بسيرتو في حيااتك
أنا:ماااكش باش تقرب منو...و تفكير المجرمين هذااا تنحيه من مخك
فهد:تزيد ●●●● و دبر عليا كيفاااش نفكر...اقسم بالله يااا أنا يا هو اليوم
تلفت باش يخرج...قربت منو بالزربة...وقفت في وجهو...و كبست على صدرو نحكي
أنا:قتللك يززززي...مااا عندك وين تمشي....غساااان ما عندو حتى ذنب
فهد:إنتي مخبية عليا حاااجة...و هاني باش نعرفها منو...يومين لتالي تحكي على حيااتنا كيفاش تحبها تكوون...توا تحب تتخطب لحد آخر...و تقولي فيها عيني عينك ●●●●● عليا
أنا:مفما حتى شي...أنااا وااافقت على خاااطرك
كبس على شعري في لحظة...وخر بيا لتالي...و شدلي وجهي بيدو لأخرى يحكي
فهد:تتخطب لسي الكلب و تقولي على خاااطرك...تحب تحرقني و أنا حي
أنا:هاااك أنت عرست فرد مرة شكووون حاسبك
فهد:●●●●● النهار لي قبلت فيه باللعبة هاذي و عرست بيها...و كلااامي مااانيش باش نترااجع فيه
أنا:مجبوووور باش تقبل
فهد:سكككررر فمك...أحسن ما نبدا بييك توااا
غمضت عينيا بالقاوي و عاودت حليتهم...نعرف لي مستحيل يسمعني و هو في الحالة هاذي...عديت يديا زوز على صدرو و دورتهم على ظهرو...رخف يدو على وجهي بالوقت...قربتلو أكثر...حضنتو نحكي
انا:باااهي يا روحي...حاول تسمعني مرة وحدة...يرضيك هكا تتهدد عليا و تضرني...مش على أساس معادش تمد يدك عليا
فهد:أبعععد عليااا
أنا:منحبش...مش قبل ما تسمعني
فهد:رووجين قتلك أبعععدني
هزيت يدي شوية حطيتها على خدو...و غزرت لعينيه نحكي
أنا:فههد إسمعني
فهد:إنتي معاادش تحبني ؟
أنا:بالله هذا سؤال توا ؟ إسمعني أنا حكيت مع غسان و هو زادة وافق باش يكون كلشي شكلي بيناتنا...يعني الخطبة هاذي باش تخلي الكل بعيد علينا...أنا مستحيل نتخلى عليك و لا نكون لحد آخر غيرك
فهد:على شنوووة باش يواافق على ●●●● هذا...كان معينوش فيك
أنا:فهههد متعقدش الحكاية أكثر من هكا امااانك غسااان ما عندو حتى ذنب...و أنت معااادش تتصرف كيما هارون و تقتل العباد...و إلا والله العظيم وقتها...ما نخليك تشوف وجهي مرة أخرى
فهد:بالله تهدد فيا خاطر سيادتو
أنا:على خاطرك أنت...أنا منحبكش تكون مجرم و لا تهز الفرد في وجه حد بعد توا...أنت ماااكش مجرم و مااكش باش تكون بعد توااا...كان أنت باش تقتل أي حد مرة أخرى...مظطر باش تنساني
غزرلي ندرا كيف...و مد يدو كبس على زندي بعدني من قدامو و حل الباب خرج...رجعت شعري لتالي بيديا زوز حتى كان نخلط عليه توا مستحيل يسمعني...تلفت نغزر للكارثة لي خلفها وراه...فرد وقت منعرفش شنية باش يعمل أكثر من هكا...أصلا مستحيل يعديها الحكاية خذيت نفس طويل...و ترميت عالكرسي لي بجنبي...لي تعديت بيه اليوم أصعب ببرشا من اللي توقعت...تكيت لتالي و غمضت عينيا نرد في النفس ورا بعضو مستحيل نجم نستخايل حياتي من غيرو و لا نخلي هارون يحرمني منو...كيما متأكدة لي هو إختار الخطبة هاذي باش ينزل عالوتر الحساس لفهد و يخليه عبد آخر كيما لي ريتو قبيل...هو يحب يخرج الوحش لي فيه باش ينجم يستغلو...بالطريقة لي يحب عليها...أصلا توا لازمو يركز على الدليل متاعو و كهو...و اللي صار اليوم باش يخليه يرجع لتالي...أكا علاش ياسين هو الوحيد باش يحلها الحكاية و يخليه يقدم أكثر...و هو الوحيد لي ينجم يوقف العاصفة هاذي قبل ما تبدا...نزلت هزيت مفاتحي من الأرض...و خرجت من الدار...دريكسيون للكلينيك...عالأقل نجم نطمن عليه و نرتاح قبل ما يتلز يعمل أي حاجة يندم عليها مبعد...ياسين هو السبيل الوحيد توا و الوحيد لي باش يسمعلو فهد في الحالة هاذي زادة.
#روجين_فهد 💔
#كوكايين🎭
#سمر💛
🔸️ياسين_يحكي:
مديت يدي نحيت الشارلوت من راسي...طمنت عيلة المريض...و مشيت للبيرو متاعي...أول ما حليت الباب لقيتها تمشي و تجي...وجها أصفر مش نورمال...لدرجة ألف إحتمال جا في مخي...قربت منها و ضيقت عينيا نحكي
انا:روووجين لباااس ماهو ؟
شدتني من يديا زوز...و هزت راسها غزرتلي ندرا كيف تحكي
روجين:فهههد...ياسين نحبك تمشي ورا فهد
أنا:هدي روحك ساعة و فهمني شبيه فهد ؟
روجين:تعاركت معاه...و مش بعيد يعمل حاجة يبلبز بيها الدنيا...أمااانك
أنا:علاش شنية لي صار ؟
روجين:أنا وافقت على خطبتي من غسان
ياسين:شكون غسان ؟
روجين:صاحبك
أنا:شنووووة ؟ روووجين فاااش تحكي يااخي هبلت ؟
روجين:أسمعني ياسين نعرف الحكاية مش ظابطة أما هذا الكل ميهمش توا...أنت لازمك تلقى فهد و تبقى معاه قبل ما يعمل حاجة نندمو عليها الكل مبعد
أنا:كي إنتي تعرف لي هو باش يهرد الدنيا علاش حتى تقبل بغسان و لا بغيرو ؟
روجين:عندك حق...أما والله كلشي شكلي بيناتنا معادش نجم نتحمل ظغط أي حد...و غسان وافق تكون خطبة مبدئية بيناتنا..لين نحلو المشكلة و كل حد يمشي في حالو...أنا نحب فهد و مستحيل نكون مع حد آخر
أنا:تو هاذي عملة تعملها يا روجين
روجين:ياااسين...أغزرلي هوني...فما حاجات أهم مني لازم يركز عليها فهد
أنا:شقصدك ؟
روجين:أنت لازمك تقنعو يلقى الدليل لي عند هارون في الوقت الحالي...يعني تحضيرات الخطبة و العرس تنجم تلهي هارون على فهد
أنا:هارون عندو علاقة بالخطبة ؟
روجين:هارون يحب يستغلني باش يخلي فهد يضعف أكا علاش أنت لازمك تكون معاه و متخليهش يعرف بحكاية هارون جملة...لين يلقى الدليل و إلا باش يمشي فيها بالرسمي
أنا:تعرف وينو توا ؟
روجين:منعرفش...من بكري نكلم فيه منجمتش نوصلو
أنا:تو نحاول نتبعو من تليفونو...و إنتي توا باش تمشي للفيلا و تبقى في بيتك مفهوم كلامي
روجين:باهي...قولو لأنا نحبو برشا...و مستحيل نعمل حاجة تضرو والله
أنا:أيا صغرون...أعمل لي قتلك عليه...و أستنى مني خبر...باهي صغرونة
روجين:نجم نمشي بحذا فتون ؟
أنا:أكيد...رد بالك على روحك
هزتلي براسها باهي...أول ما خرجت بدلت دبشي..هزيت مفاتحي و خرجت...نعرف في وضعو هذا باش يهرد الدنيا...أصلا نعرفو قداش متعلق بيها...و شنية ينجم يعمل زادة...نفخت بالقاوي خاطرني دوب نجم نتبع بلاصتو...يظهرلي في بلاصة مفيهاش ريزو جملة..غزرت لساعة منعرفش كيفاش تعدا نهار في الكلينيك...ركيت على جنب...خاطرني فقدت الإتصال بيه جملة...حاولت نكلمو نفس الشي...منجمتش نوصلو...كبست بيديا زوز عالفولون...مفماش بلاصة أخرى يمشيلها من غير ورشة بابا...خدمت الكرهبة و شديت الثنية...منعرفش على روحي كيفاش وصلت...تنهدت بالقاوي كي لقيت كرهبتو خذيت نفس و نزلت...غمضت عينيا بالقاوي...نفس الإحساس تملكني مرة أخرى...صورة بابا حضرت بين عينيا و كلامو تالي تعاود في وذني بالحرف
كمال:أنت العمود لي نتكى عليه...متعرفش عالدنيا شنية مخبيتلنا...أكا علاش مهما صار...و مهما كان لي باش يصير...رد بالك تفرط في خوك...معندكمش غير بعضكم مهما عصفت بيكم الدنيا...متفلتوش و متخليهش يضيع منك...فما أمانة أخرى في الثنية لازمك تتلهى بيها...أنت الركيزة متاعهم...أكا علاش نحبك تحفظ كلامي بالقدا عيش ولدي
حليت عينيا مروهج...رغم السنين لي تعدات ريحة بابا مزالت موجودة لتوا...قربت بخطوات رزينة...البلاصة لي كانت جنة تحولت لرماد..دخلت نغزرلو...مرمي عالكرسي أصلا ظاهر فرغ غشو هوني زادة من دنيا لي زاد خربها قربت منو شوية...غزرلي و كمل يشرب...فكيت الدبوزة من يدو...حطيتها على جنب يمكن هاذي خامس وحدة جبدت الصندوق و قعدت مقابلو نحكي
أنا:إمتى تشرب بالطريقة هاذي أنت...ساعة مقصرتش و شريت هذوما الكل
فهد:ش..شنية تحب مني أنت زادة ؟
أنا:والله في بالي باش نحكي معاك...أما منعرفش كان مزلت متذكر إسمك من أصلو
فهد:ا..أنا تقولي نساني...و تحب تتخطب للكلب صاحبك و..والله موتو على يدي
أنا:فهههد...تعرف لي روجين تحبك...و مستحيل تتخلى عليك
فهد:تكذذذذب...ك..كرهتني من نهار لي عرست و خليتها
أنا:واضح برشا قداش كرهاتك...ياخي صغير أنت باش تشرب بالطريقة هاذي ؟ و فوق هكا وراك برشا حاجات لازمك تعملهم
فهد:ما نحب حتى شي...بطبيعتي مجرم و باش نبقى هكا
أنا:الصبر يا ربي...توا هذا كلام تقول فيه
فهد:أخطااني أنت زادة...نقول لي نحب عليه
أنا:فهههد نعرفك أقوى من هكا...و مفما حتى حد في دنيا ينجم يفكلك حاجتك
فهد:صاحبك يحب يفكلي مرتي
أنا:ماهوش باش يفكها منك...أما لازمك تكون أقوى من هكا...يزي ما خسرت لتوا...أنت ماااكش قاتل و ماكش مجرم...أنت اللي هارون يحبك تكونو...أغزر...دور راسك ريحة بابا مزالت موجودة...مزال موجود بيناتنا و ماهوش باش يرتاح و انتي في الحالة هاذي...يزي ما خسرت جراير الماضي...وقيت باش تخرج روحك منو و تعيش حياتك
فهد:منجمممتش...في باااالك محاااولتش...حاااولت و حاااولت...حاااولت ننسى...ننسى لي بابا كااان ممدود هوووني...حاااولت ننسى الحرووق لي غطاات وجهو أمااا منجمتش...منجمتش ننساه يااا ياسين...جاي في بالي باش نلقاه يستنى فياااا...جاي باش نخبرو لأنا عملت لي قالي عليه و حاولت نقعد من غير مشاكل...و لي مانيش باش نتعبك معايااا...أما ملقيتوش...لي لقيتو هوني الخربة هاااذي...لي لقيتو كانت ناس جديد طفي في النار و تحاول تهزو لبعييد...لي لقيتو كان عبارة عن كتلة محروقة...منجمتش ننسى و مااانيش باش ننساااه لين نموت و نخلط عليه
كبست على يدي مع دموعو لي هبطت...مع صياحو لي ماشي و يقوى...من سنين طويل مخرجش لي داخلو بالطريقة هاذي...هز روحو وقف بالسيف يحكي
فهد:أنا باش نحرق لي حرقو بيديا زوز...غير هكا مستحيل النار لي شعلت داخلي تطفى
تكى عالحيط و قعد عالأرض مرة أخرى...غزرلي يحكي
فهد:أنا حياتي ضاعت بعد الليلة هذيكا...و مانيش باش نكون الإبن لي تمناه ديما...أما أنت تنجم تكون...تنجم تحقق كلشي كان يتمناه بابا من قبل...و تنجم تحافظ على الكل زادة...أنا أمانتي وحدة...و أنت تعرفها
قربت منو قبل ما يكمل كلامو...حاوطت وجهو بيديا زوز نحكي
أنا:رررد بااالك...رد بااالك تقول حرف آخر...و لا تخمم بالطريقة هاذي خاطر معنديش إستعداد نتخلى عليك
فهد:هاني نشوف بالعلامة قاعد تبكي عليا توا
كبست عليه أكثر...و غمضت عينيا بالقاوي نمنع في دموعي لي هبطت عليه و على ضيعتو في السنين هذوما...نبكي على خويا لي معرفتش نحميه...اخترت نكمل حياتي و نسيت وعدي لبابا...الوعد لي منفذتوش و خليتو يضيع في غابة هارون...خذيت نفس نحكي
أنا:خووك معاك للموت
غزرلي ندرا كيف...غزرة مريتهاش فيه قبل...و تبسم يحكي
فهد:تحب تولي مجرم أنت زادة
أنا:ماهيش فكرة خايبة...أما بعد توا و مهما كان لي باش يعرضنا...ماكش باش تعمل حاجة ورا ظهري...بعد الليلة إحنا يد وحدة مفهوم كلامي
مديتلو يدي...غزرلي و حط يدو عليها...كبست عليه و جبدتو في حملتي...نحكي
أنا:حتى حد ماهو باش يضرك مرة أخرى...مدامني عايش
فهد:ن..نحبك تبعد صاحبك من ثنيتي
تبسمت بالوقت...أصلا مخو و تفكيرو الكل فيها...جبدت روحي شوية نحكي
أنا:أوعدني باش تصبر...و باش تعدي الحكاية هاذي من غير مشاكل
فهد:نغزرلو و هو يخطبلي في مرتي...طحاان أنا ؟
أنا:الصبر يا ربي...هاني قتلك لي ماهيش باش تعرس بيه
فهد:و أنا قلت لا...من غير ما نستجرم فيهم زوز...و أنت معاهم
أنا:بالله توا درت عليا سي شباب...أنت مجبور باش تعديها...و تاخو فرصة باش تجيب الهم متاع الدليل وقتها حد ماهو باش يمنعك عليها و لا ياقف في طريقكم
فهد:مفما كان ●●●● صاحبك
أنا:هيا قوم معايا تواا...خلينا نمشيو
فهد:أبعدني يااا ●●●● نحب نبقى هووني
أنا:فهههد يزززي تووا...مجبور باش تقوم معايا...لازمك ترتاح...و تخمم بالقدا...كان مش على خاطرك على خاطر الطفلة لي كانت باش تموت عليك قبيل
فهد:علاش مش هي سبب في اللي قاعد يصير
أنا:قوم عيش خوووياا...و راسك كلشي باش يكون كيما تحب عليه أنت و كهو
فهد:أنا تقولي نساني الفرخة...والله العظيم كان نلقاهم مع بعضهم نقتلهم الزوز
أنا:أنت معاادش فيك...هيااا قوووم
كبست عليه وقفتو معايا...يمد في الخطوة بالسيف ركبتو في الكرهبة...و طلبت شكون باش يجي يهز كرهبتو...تقاطعت معاهم في الثنية و سلمتهم المفتاح أصلا طريق كاملة...يعاود في عركتهم...أول ما وصلت لدار...غزرتلو  نحكي
أنا:هيا إيجا معايا توا
فهد:ه..هزني لداري...و قولها تجي عندي
أنا:لا حلوة هاذي...أنزل قدامي توا
فهد:معناها ماكش باش تكلمها...واقف مع صاحبك أنت
أنا:هاني واقف معاك...أما لازمك ترقد توا و ترتاح...هاك خليتنا نعديو شطر ليل برا
حليت الباب و دخلتو...ترمى عالفوتاي بالوقت...كبس عالمخدة و غرق في النوم...حطيت مفاتحي و طلعت الفوق...هزيت ملحفة و رجعتلو حطيتها فوقو...و خليت ميساج لروجين...لي طلعت مكلمتني أكثر من مرة...و ميساج آخر لفتون...خاطرني مريتهاش اليوم لا هي لا جواد...ترميت عالفوتاي لي مقابلو و تكيت راسي لتالي بعد توا ثنيتنا وحدة...و مصيرنا واحد...يا نعيشو مع بعضنا يا نموتو مع بعضنا...يا إحنا يا هارون باش يختم الحرب...باش يكون فما رابح واحد في الأخير.
#ياسين_فهد 💔
#كوكايين🎭
#سمر💛