كوكايين

الحلقة التاسعة و الخمسون

🔸️حلقة_59:
🔸️فتون_تحكي:
نزلت راسي شوية نغزرلو...يمد في ساقيه...باش يشدها تبسمت بالوقت...كأني نفركس على سبب يهدي الأفكار لي قاعدة تدور في مخي...يومين تعدات عاللي صار آخر مرة...و لتوا ما قابلت حتى حد فيهم...أصلا لتوا مش متقبلة لي صار...و ما عيني باش نقابل حد...من غير شي نحس في روحي ضايعة...و اللي عملو هو خلاني ندور في دوامة من غير مخرج...مديت يدي شوية...عديت صوابعي على خدو...طلع لبوه في كلشي و كل يوم قاعد يكبر فيه...ملامحو تبان أكثر...هزيت راسي شوية على صوت تليفوني...نغزر لإسمو من غير ردة فعل...منعرفش شنوة لي قاعد يصير معايا بالظبط نحب نحكي معاه و نفهم منو اكثر لي صار...فرد وقت جزء مني يقولي بعد شنوة تحب تفهم ؟ مزلت باش تضيع وقتك أكثر من هكا...مزلت تحب تغوص وسط الإحتمالات هذوما...متعبتش من اللي تعديت بيه...وسط هذا الكل منعرفش كيفاش مديت يدي و هزيت عليه نسمع فيه يحكي
ياسين:حل الباب
هزيت روحي وقفت من أول كلمة...للحظة حسيت روحي دخلت بعضي...منعرفش أصلا كيفاش باش نقابلو بعد اللي صار...خذيت نفس نحكي
أنا:مانيش في الدار
ياسين:فتوون...حل الباب
جيت باش نحكي...بدا جواد يبكي...و في لحظة فحم كأنو حس بيه هوني...نزلت تليفوني علقت عليه...رجعت شعري لتالي...خذيت نفس طويل...و حليت الباب..هزيت راسي شوية...عديت عينيا على وجهو...و وخرت خطوة لتالي...دخل من غير ما يقول كلمة أخرى..قرب من جواد هزو في حملتو...يبوس فيه...و يحكي فرد وقت
ياسين:ششش...شبي صغروني ؟
دقايق و سكت في يدو...قربت منو شوية...نلم في ألعابو من الفوتاي...شدني من يدي بالوقت..هزيت راسي شوية...جات عيني في عينو...غزرلي ندرا كيف يحكي
ياسين:لباس ؟
هزيتلو براسي إيه...و جبدت روحي منو...خذيت نفس نحكي
أنا:منقصدتش لي قلتو قبيل...نعرف ميجيش هكا
ياسين:نعرف لي إنتي متحبش تشوفني
أنا:و منحبش نسمعك زادة
ياسين:نعرف هذا زادة
أنا:أنت جيت باش تشوف جواد...هاني باش نخليك معاه
ياسين:فتوون...منحبكش تتهرب مني
أنا:مانيش نتهرب...اما مفما حتى شي نحكيو فيه مع بعضنا
ياسين:أقعد
أنا:منحبش
ياسين:فتوون...عندي عملية بعد ساعتين...لازمني نلحق عليها
أنا:أمورك...ياخي باش تلومني أنا توا
شدني من يدي و جبدني عندو...قعدني و قعد بجنبي لي خلى جواد باش يبدا يبكي مرة اخرى...مديت يدي حطيتها على خدو نحكي
أنا:ششش...ماما هوني...ايجا عندي
ياسين:خليه عندي...تو يسكت
هزيت راسي قحرتلو...و تكيت لتالي من غير حتى كلمة تنهد بالقاوي يحكي
ياسين:منقصدش لي صار فتون...نعرف روحي غلطت باللي عملتو أما
قصيت عليه...كي هزيت عينيا في وجهو...نحكي
أنا:أنت غالط في كلشي
ياسين:صحيح...حتى معنديش حق باش نواجهك جملة أما رغم هكا نحبك تسمعني
انا:مش توا
ضيق عينيه مستغرب...حتى أنا منعرفش علاش قلت هكا و لا فاش قاعدة نخمم بالظبط...خذيت نفس و كملت كلامي نحكي
أنا:ما نحب نخمم في حتى شي توا...أفكاري داخلة بعضها...نحس في روحي ضايعة ياسين...أكا علاش ما نحبك تقول حتى شي توا...بلكشي مبعد نجم نسمعك
تبسم بالوقت...هزلي براسو باهي...و عدا عينيه على وجهي يحكي
ياسين:باهي...اللي تحب عليه باش يصير
أنا:نحب نكمل خدمتي زادة...و من غير ما يصير مشكل آخر مع نبيل
ياسين:تنجم تخدم في سوسيتي أخرى
أنا:مرتاحة معاهم...منحبش نخدم في بلاصة أخرى
بقى يغزرلي من غير حتى كلمة...هز روحو وقف...وقفت في جرتو...قرب جواد لحضنو باسو مرة أخرى و حطو في حملتي يحكي
ياسين:خليك بعيدة عليه فتون
أنا:متهددنيش ياسين
ياسين:ماهوش تهديد...أما مجرد نصيحة
هزيتلو براسي باهي...أصلا منحبش ندخل معاه في نقاش آخر...قرب مني شوية...باسني من جبيني و جبد روحو يحكي
ياسين:رد بالك على روحك
أنا:باش تكون عملية ناجحة كي العادة
تبسم و هزلي براسو إيه...خلطت عليه للباب...مد يدو لجواد...يحكي
ياسين:نشوفك مبعد...سكر الباب و أدخل توا
أنا:باهي
أول ما مشى سكرت الباب...و كبست على جواد في يدي...و دورتو عندي نحكي
أنا:بالرسمي منعرفش كيفاش حبيتو السخطة...رد بالك تطلع كيفو باهي
ضحك و مد يدو باش يمس وجهي...قربتو ليا بستو لحق باش يخلي ريحتو عليه زادة...ياخي أنا ناقصة توا...ترميت عالفوتاي...و كبست عليه نحكي
أنا:شنوة باش يصير...كان بقينا عيلة وحدة...و متخلاش علينا قبل...كان جات هاذي دارنا إحنا الثلاثة...هو إختار حياتو بعيد علينا...علاش يحب يرجع توا ؟
تنهدت بالقاوي...أصلا منعرفش علاش نحكي مع جواد توا بالظبط نحب نحكي و كهو...و إلا باش نطرشق من الأسئلة لي دور في مخي...صوت تليفوني فيقني من سرحتي مرة أخرى...مديت يدي...و هزيت عليه مترددة نحكي
أنا:صباح الخير
نبيل:صباح النور...شحالك ؟
أنا:ل..لباس عيشك...أنت شحالك ؟
نبيل:لباس...مش على أساس الويكاند وفى
كبست على جواد بالوقت...أصلا بعد اللي صار..منعرفش كيفاش نواجهو...و لا باش يقبلني مرة أخرى...خذيت نفس نحكي
أنا:صحيح
نبيل:ملا شبيك مجيتش ؟
أنا:معناها ماكش متغشش مني ؟
نبيل:فتوون...إنتي معندكش ذنب في اللي صار...حتى خدمتك تستنى فيك...هيا مطولش
أنا:و جواد ؟ نقصد معملتش حسابي
نبيل:جيبو معاك...ماهيش مشكلة
أنا:باهي عيشك
علقت عليه...و هزيت روحي بالزربة...بدلت دبشي كيما جا و بدلت لجواد فرد وقت...لبست كبوطي و حطيت ال porte_bébé...حطيت جواد في حملتي و خرجت شديت طاكسي لسوسيتي...بالرسمي منحبش نخسر خدمتي جراير لي صار...أول ما وصلت خلصتو و نزلت منعرفش كيفاش وصلت للبيرو سوسن أول وحدة قربت مني...هزت جواد من حملتي...حطيت porte_bébé على جنب و نحيت كبوطي...تلفت على صوت إكرام لي دخلت تحكي
إكرام:فتون...سي نبيل يستنى فيك
هزيتلها براسي باهي...وصيت سوسن على جواد و خرجت...باش نمشي لبيروه...وقفتني تحكي
إكرام:تفضل من هوني...تو يخلط عليك
غزرتلها مستغربة..و خلطت عليها...شاورتلي بيدها للبيرو حليتو و دخلت من غير حتى كلمة..سكرت الباب وراها دورت عينيا عليه...و قربت من البيرو نغزر للورد لي محطوط...و بجنبو نفس الهدية لي كان باش يعطيهالي ليلتها...تلفت على صوت الباب لي تحل...جات عيني في عينو...بقيت نغزرلو من غير حتى كلمة..قرب مني شوية يحكي
نبيل:أكيد مكنتش تخمم أنك تتخلى علينا
انا:ص..صراحة...نبيل انا
نبيل:ماكش مظطرة تفسرلي فتون...نعرف لولد خالتك هو نفسو طليقك...و ردة فعلو كانت متوقعة...أما رغم هكا حياتنا الشخصية تبقى بعيدة عالخدمة...سواء كان المشكل متاعك و لا بيناتنا إحنا باهي
أنا:بالرسمي منقصدش لي صار
نبيل:متعتذرش على حاجة مغلطتش فيها
هزيتلو براسي باهي...و عاودت تلفت نثبت في البيرو و لا بالمعنى الصحيح نبعد في عينيا منو...تبسم يحكي
نبيل:شقولك في بيروك ؟
دورت راسي بالوقت...غزرتلو مصدومة من اللي سمعتو لدرجة معرفتش شنية نقول بالظبط...و لا كيفاش ممكن يولي عندي بيرو هكا...ضيقت عينيا نحكي
أنا:كيفاش هكا ؟
نبيل:توقعت إجابة مش سؤال
انا:منقصدش نبيل...أما كيفاش هكا ؟
نبيل:هدي روحك الساعة
أنا:باهي
نبيل:أول مرة دخلت فيها لهوني..كنت متأكد لانتي باش تقدم كلشي تنجم عليه...و بالفعل هذا لي صار و اللي حققتو انتي يخليك تكون في المنصب هذا ماهوش هدية مني أما إنتي استحقيتو فتون
مديت يدي حطيتها على رقبتي...منعرفش كيفاش باش نتقبل هذا الكل...صحيح عملت لي نجم عليه...أما مش لدرجة إني نتلقى الترقية هاذي في شهور قليلة...فرد وقت منجمش نرفض...منحبش نخلي خدمتي...لازمني نخمم في جواد قبل أي خطوة نعملها...خذيت نفس نحكي
أنا:على شنوة تعتمد وظيفتي بعد توا ؟
نبيل:للأسف خدمتك باش تكون أكثر من قبل...و مهمتك باش تكون صعيبة...زعمة حاضرة لهذا الكل ؟
خذيت نفس طويل و هزيتلو براسي باهي...نحكي
أنا:حاضرة
نبيل:مبروك عليك مرة أخرى
أنا:عيشك
مدلي يدو بالوقت...صافحتو و جبدت روحي لتالي تبسم يحكي
نبيل:نخليك أنا توا...رد بالك على روحك
هزيتلو براسي باهي...و تلفت نغزر للبيرو مرة أخرى ملقيتش فرصة باش نحكي معاه على الهدية...أصلا مستحيل نقبل حاجة غالية هكا...خذيت نفس و خرجت من البيرو...منجمش نخلي جواد وحدو أكثر من هكا أول ما دخلت...ضيقت عينيا و أنا نغزر لسوسن تحكي
سوسن:شنية هذا ؟
بلال:منعرفش
أنا:شفما ؟
سوسن:منعرفش انا زادة...نظن لي هي منحة من سي نبيل
أنا:منحة ؟
بلال:عالأغلب
رجعت بذاكرتي يومين لتالي...معناها عمل بكلامي و خصص للكل منحة...متوقعتش لي هو باش يتصرف بالسرعة هاذي...أما الفرحة لي حسيتها ظهرت عليهم كانت كافية بالنسبة ليا و إرتحت أكثر...كي لقيت الظرف الخاص بيا...أحسن شي أنو اعتبرني منهم...هزيت جواد بين يديا...حتى هو حسيتو ضايع بيناتهم...بستو...نحكي
أنا:سوسن...بلال...انا بعد توا باش نكون في البيرو لي بجنبكم...أما رغم علاقتنا باش تبقى كيما هي...و طبيعة الخدمة زادة باهي
سوسن:فتون إنتي ستحقيت المركز هذا...المهم إنتي موجودة بيناتنا
بلال:صراحة كنا بحاجة لوحدة كيفك معانا...مرسي برشا فتون
أنا:عيشك بلال...و إنتي زادة سوسن...حتى أنا حبيت الخدمة معاكم...و حبيت نبقى هوني زادة..أما منجمتش نرفض عرض سي نبيل
سوسن:المهم انتي مرتاحة
تبسمت و هزيتلها براسي باهي...منعرفش إذا نفرح بالمنصب الجديد و لا لا..أصلا من يوم دخلت فيه لهوني مكانش عندي هدف آخر...كلشي نحب عليه...إني نكون ناجحة في حياتي بعد اللي تعديت بيه...بعد الوعود لي عطيتها لروحي من سنين...أما الواقع صدمني بالأسوء أكا علاش مستحيل نخلي شي ياقف في طريقي..كلشي نعمل فيه توا على خاطر روحي و على خاطر ولدي كهو
#فتون_ياسين 💕💕💕