كوكايين

الحلقة مئة و ثلاثة و أربعون

🔸️حلقة 143
🔸️لجين_تحكي:
غمضت عينيا بالقاوي و عاودت حليتهم نغزر لروحي مش مصدقة كيفاش تعدا الوقت بالسرعة هاذي...حتى انو الايامات اللي تعدات بعد الحنة محسيتش بيها مع تحضيرات...نزلت بيديا زوز لكرشي و تبسمت...للحظة تفكرت الصغير لي كان داخلي و تمنيت نرجع بالوقت لتالي..باش نعمل جهدي اني نحافظ عليه...اليوم عرسي و كلشي قاعد يصير بالنسبة ليا حلمة...متوقعتش انها باش تتحقق جملة...هزيت راسي نغزر للباب لي تحلت وقفو زوز قدام بعض تبسمت بالوقت و قربت منهم حضنتهم الزوز مع بعضهم...أصلا هوما احلى شي عندي في الدنيا...جبدت روحي شوية نحكي
أنا:أحسن شي أنكم هوني
ياسين:فما أميرة ضايعة بروبة العرس
فهد:يعني كان اميرتنا احتاجت مساعدة احنا هوني
أنا:أنا بحاجتكم نتوما زوز
فهد:شوف شعندي هوني
هزيت راسي شوية...نغزر للكوليي في يدو...عديت صوابعي عليها مصدومة من دقة التصميم لي فيها و غزرتلو نحكي
انا:محلاااها فهد
فهد:ماهيش أحلى منك يا روحي
دورها على رقبتي فوق الكوليي متاع يحيى...عنقتو بالوقت و جبدت روحي نغزر لياسين...تبسم يحكي
ياسين:الكادو متاعي مختلف شوية
نزلت راسي نغزر لورقة في يدو...شديتها عليه...نحكي
انا:شنية هاذي ؟
ياسين:الأرض هاذي ولات متاعك...كيما باش يكون عندك وثائق رسمية و حجة باش تحل الكلينيك الخاصة بيك بعد ما تكمل قرايتك و السطاج براتيك متاعك عندي...ممم حاجة اخرى الارض ورا الكلينيك متاعي يعني مش تولي تنافس فيا
حطيت يدي على فمي مصدومة...متوقعتش باش يعمل هذا الكل على خاطري...عنقتو بالوقت نحكي
انا:ياااااسو مش مصدقة لي نسمع فيه والله...اما انا منحبش كلينيك وحدي....خلينا نكبرو متاعك و نعملو قسم جديد فيها...نحب نكون ديما معاك و بجنبك
ياسين:اللي تحب عليه صغرونتي باش يصير
فهد:أنا موجوود هوني
ياسين:إيجا هوني تراه...حتى أنت لازمك سطاج براتيك عالأقل تنقص الكوارث متاعك
فهد:والله منقولش لا
ضحكت و انا نغزرلهم...و عاودت عنقتهم مرة اخرى نحكي
أنا:محلاااكم...قداش نحبكم أنا
هارون:ان شاء الله منكونش قصيت عليكم
أنا:تفضل عمي
هارون:محلاك يا روحي
انا:عيشك
هارون:ايجا هوني تراه
غزرت لياسين و فهد لي بعدو شوية و قربت منو..وقفت قدامو...شدني من يدي و لبسني براصلي يحكي
هارون:هاذي هدية كمال ليك انتي...خاطرها من تصميمو صنع يديه...و متأكد انو كان باش يفرح برشا في النهار هذا
عديت صوابعي عليها...وين حسيت دموعي باش تنزل كبس على وجهي بيديه زوز و باسني من جبيني يحكي
هارون:ششش اليوم مفماش دموع...فما فرحة و كهو باهي
هزيتلو براسي باهي و غزرت لأمي لي دخلت...أصلا من بكري نحس فيها مش قد بعضها...قربت منها...عنقتها بالوقت نحكي
انا:سامحني على كلشي صار قبل
سلطانة:ما تخمم في حتى شي صار قبل...اللي يهمني انو بنتي فرحانة...و معادش باش نشوف دموعها مرة اخرى نحبك برشا يا روحي...انتي كنت احلى هدية بالنسبة ليا
انا:و انا نحبك برشااا أمي
كبست عليها و بستها من خدها...جبدت روحي شوية نمنع في دموعي...خرجت من الجو كي قربو مني مرة اخرى نزلتلي الفوال و هزتلي براسها باهي...تبسمت و خرجت مع فهد و ياسين...هزيت راسي نغزرلو...واقف جنب العدول تبسيمتو خلاتني نحس براحة داخلي دورت راسي شوية نغزر لبابا في وسط الحضور...كيما كان يجيني في كل حلمة...تبسمت و كملت ثنيتي..مدلي يدو بالوقت...حطيت يدي فوقها و عديت عينيا على ملامح وجهو...كلشي عشتو معاه قبل تعدا قدامي للحظة هاذي بالظبط وين كان كلشي حلمة و ولى حقيقة محلاها...كبست على يدو و قربت عندو أكثر غزرلي ندرا كيف...غزرة حسيت فيها برشا حب و خلات قلبي يطمن أكثر...تبسم يحكي
يحيى:محلااك يا روحي
باسني من يدي و قرب عندي أكثر...هزيت راسي نغزر للكل و نسمع في كاتب العدل فرد وقت
هو:لجين الصياد...توافق على يحيى سالمي زوجا لكي
كبست على يدو...و هزيتلو براسي ايه...نحكي
انا:موااافقة
هو:و انت يحيى سالمي
يحيى:موااافق
جاوبو قبل ما يكمل كلامو...لي خلاني نضحك بالوقت حتى منو تبسم يحكي
هو:باهي سي يحيى...تفضل وقع هوني
كبس على الستيلو...وقع بالزربة...و حطو في يدي وقعت و غزرت لياسين و عم ابراهيم...خاطرهم الشهود تبسملي و كمل التوقيع...شديت الدفتر على كاتب العدل و تلفت عندو نضحك...كبس على يدي و باسني من جبيني يحكي
يحيى:مبروك يا روحي
انا:انت وليت راجلي أنا
يحيى:صحة ليا عزيزتي
انا:نحبك برشا يا روحي
يحيى:و أنا نموت عليك
قربت من ياسين لي كان واقف قدامي أول واحد عنقني يحكي
ياسين:مبروك صغرونتي و مبروك ليك انت زادة
يحيى:عيشك ياسين
هزيت راسي نغزر لفهد لي محمل جواد...السوسات في فمو و البيبرون في يد فهد...ضحك يحكي
فهد:مبروك سي يحيى...آخرتها باش توحل بفرخ كيما هذا
ياسين:ايجاا يا روح باباتك...ولى الكل يخاف من الصغار جرايرك
جواد:جااا بابااا
فهد:انت لي جيت مش هو
ضحكو و قربت منو شوية...بستو من خدو...ضحك يحكي
جواد:لولو
انا:يااا روحي
ياسين:عجبوه أحجار الروبة الفرخ هذا
تبسمت كي خلط الباقي...أصلا كي شاف فتون...نسانا الكل  خذيت نفس طويل...نحب نعيش تفاصيل عرسي الكل و ما نضيع منو حتى لحظة...خاطرني الفرحة لي نعيش فيها توا...مسبقش و جربتها من قبل...وجودهم معايا الكل و فرحتهم...خلاتني نحس براحة غريبة..أصلا يكفيني انو احلامي قاعدة تتحقق توا و معاد حاجتي بحتى شي آخر من الدنيا...هزيت راسي شوية...عديت عينيا على وجهو...محسيتش بالوقت كيفاش تعدا..حتى اني تعبت من الرقص...حتى لبنات استسلمو من غير سحر...عدا يدو على ظهري يحكي
يحيى:متعبش روحك أكثر
أنا:مانيش تاعبة يا روحي
يحيى:متحبش نمشيو ؟
أنا:علاش نمشيو من توا ؟
يحيى:خاطر احنا لي عرسنا عزيزتي...كان منمشيوش توا ترصالهم معانا هوني لصباح
جيت باش نحكي اما سكت كي قرب منا عم ابراهيم باسني من جبيني و سلم على يحيى يحكي
إبراهيم:فرحت برشا...خاطركم اجتمعتو من جديد..حتى انو عندي ثقة في يحيى لي هو باش يسعدك لآخر لحظة
هزيت راسي غزرتلو...تبسمت و كبست على يدو فرد وقت كمل كلامو يحكي
ابراهيم:اكا علاش قبل ما نمشي...قررت باش نعطيكم هديتكم توا
عطى ظرف ليحيى...كبس عليه و غزرلو...يحكي
يحيى:شنية هذا ؟
ابراهيم:انت طول المدة هاذي...خليتني نتأكد انو السوسيتي بحاجة حد كيفك انت ياقف عليها...اكا علاش فما نسبة من الأسهم ليك انت...كيما اني باش نعطيك وكالة تتصرف بيها في غيابي
يحيى:سامحني سي ابراهيم...اما انا مستحيل نقبل هذا الكل...نقدر معروفك...اما منحبش ناخو حاجة من غير ما نتعب عليها
ابراهيم:والله انت مزلت باش تتعب برشا و صراحة انا نحب نرتاح من الخدمة شوية...خاطرني حتى باش نرجع مرتي و ناوي اني نقضي بقية وقتي معاها
تبسمت و قربت منو شوية عنقتو...عدا يدو على ظهري يحكي
إبراهيم:رد باالك عليها
يحيى:من غير ما توصيني...مرسي برشا على كلشي عملتو معايا لتوا سي إبراهيم
قرب عندو و عنقو هو زادة...تبسم و ضربو لظهرو يحكي
ابراهيم:انت بعد توا يدي اليمين...قبل ما ننسى هديتي الاساسية...تلقاوها في الظرف هذا...اما على شرط اول ما ترجع تشد الخدمة
تبسم و مشى قبل ما يستنى نجاوبوه...غزرتلو نحكي
انا:زعمة شنية يقصد ؟
يحيى:عالأغلب احنا باش نسافرو
انا:امتى ؟
يحيى:بعد ما نمشيو لدارنا
أنا:خلينا نمشيو ملا
يحيى:متأكدة
هزيتلو براسي ايه...كبس على يدي و باسني منها اصلا منعرفش كيفاش ودعناهم و لا كيفاش وصلنا للكرهبة حليت الظرف في الكرهبة...لقيتهم تذاكر لاسبانيا...أما وسط هذا الكل حسيت اني بديت ندخل بعضي...كل ما قربنا لدار...شد الفران على جنب يحكي
يحيى:وصلنا
خذيت نفس طويل و هزيت روحي نزلت...خلط عليا و كبس على يدي..تبسمت و قربت معاه...حل الباب يحكي
يحيى:نورت دارك يا عروستي
خذيت نفس طويل و دخلت بإحساس جديد...دورت عينيا على الورد لي منتشر في وسط الشموع...جيت باش نحكي قص عليا كي هزني في حملتو...دورت يديا على رقبتو نحكي
أنا:فاش تعمل ياخي ؟
يحيى:نختصر في الوقت
ضحكت كي ريتو قرب من الدروج...فرد وقت دقات قلبي ماشية و تقوا...حطني في وسط البيت و حاوط وجهي بيديه زوز يحكي
يحيى:أغزرلي هوني...قبل أي حاجة انا نحب نعتذر منك على كلشي خليتك تعيشو داخل البيت هاذي...و كلشي تعديت بيه جرايري...وجيعتك في غيابي و صغيرنا لي ملحقتش باش نحميه...فرد وقت انا مانيش باش نمسك الا اذا انتي سامحتني من قلبك و تكوني راضية على علاقتنا يكفيني انك معايا توا و نوعدك باش نحاول نصلح كلشي صار معانا و نعوضك عليه يا روحي
حطيت يدي على خدو و قربتلو اكثر...بستو من شفايفو و جبدت روحي شوية نحكي
انا:خليك هوني...تو نرجع
هزيت الفاليز متاعي و دخلت لبيت البانو...خذيت نفس طويل...غزرت لروحي و نحيت الروبة...عملت دوش خفيف و لبست الكاب فوق النويزات و خرجت عندو لقيتو يدور في البيت...تبسمت نحكي
انا:فاش تعمل
يحيى:حتى شي انااا
سكت كي جات عينو عليا...بقى واقف من غير حتى كلمة كبست على الكاب بيديا زوز...نحكي
أنا:حبيت نقلك انو عجبني كلشي هوني...حبيت الديكور متاع الصالة و بيتنا و حتى بيت البانو محلاها
سكت كي قرب مني من غير ما يقول شي...حبيت نطلب منو يخليني نشوف بقية الدار أما الحروف ضاعت مع صوابعو لي تعدات على خدي...هزلي راسي شوية يحكي
يحيى:برشا عليا هذا الكل يا روحي
انا:ي..يحيى انا جيست...نقصد اناا
يحيى:شنوة ؟
انا:منعرفش...دخلت بعضي...متغزرليش هكا
يحيى:كان تحب نخرج شوية عزيزتي...هكا تاخو راحتك أكثر
انا:لااا...خليك معايا...انا نرتاح بوجودك...زيد انا نحب نعيش فرحتي معاك الليلة
مد يدو لحزام الكاب وين دقات قلبي قوات أكثر...حلو و طلع بيديه لكتافي...طيحو عالارض...و نزل عليا شوية باسني من خدي و قرب يحكي في وذني
يحيى:حط في بالك لانا نحبك و نموت عليك...و مستحيل نضرك مرة اخرى...اكا علاش نحبك تسلملي روحك من غير خوف و كان حسيت لي إنتي مش مستعدة تنجم توقفني باهي
انا:و انا نحبك و نموت عليك يحيى
يحيى:ساعة مكنتش نعرف لي مرتي مزيانة لهدرجة
انا:يحيى
يحيى:بااهي هاني باش نسكت
قحرتلو...تبسم و نزل على شفايفي بالوقت...حطيت يدي على خدو و غرقت معاه أكثر..وين سلمت لمشاعري معاه...لدرجة منعرفش كيفاش لقيت روحي في وسط سريرنا...كل كلمة و لمسة منو تعمد أنو يمحي بيها تفاصيل اكا الليلة...حتى خلاني نحس انو هاذي اول مرة يمسني فيها...اكا علاش قررت اني نعيش معاه كلشي توا من غير ما نخمم في اللي صار قبل...غمضت عينيا مع الوجيعة لي حسيتها...باسني جنب وذني يحكي
يحيى:إنتي أحلى هدية صادفتني في حياتي...نحبك يا روحي
حطيت راسي على صدرو و كبيت عليه من غير حتى كلمة اصلا معنديش جهد باش نحكي...كلشي نحب عليه توا اني نبقى بين يديه و كهو...خاطر الليلة كانت جزء من أحلامي و عشتها بالطريقة لي حلمت بيها و حبيت عليها مع روحي و حب حياتي.
#لجين_يحيى❤