كوكايين

الحلقة الثامنة

🔸️حلقة 8
🔸️فتون_تحكي:
حطيتو من يدي...بعد ما رضعتو...هزيت تليفوني و خرجت من بيتي...نطلب فيها...اصلا منعرفش كيفاش طلع عليا النهار...عديت ليلة كاملة على اعصابي...من حالتها...إحساسي يقلي لي هي مخبية عليا حاجة خاطر هاذي اول مرة توصل للحالة هاذي...و نفسيتها تتعب لهدرجة...اكثر من نص ساعة و انا نمشي و نجي...يمكن طلبتها عشرة مرات...المهم اني نسمع صوتها و نطمن عليها...و منجمتش نطلب فهد في الحالة هاذي خاطرني لتوا مفهمتش شبيها...و منحبش نحطها في موقف خايب قدامو...صوت الباب فيقني على وضعي...خذيت نفس و قربت بالزربة...حليتها نحكي
أنا:وينك ياخي...من بكري
سكت كي جات عيني في عينو...بقيت نغزرلو من غير حتى كلمة...متوقعتش لي باش يجي الوقت هذا..دقايق تعدات و انا نغزرلو...يدي ترخفت عالبواني مع غزرتو هزني و حطني يحكي
ياسين:لباس ماهو ؟
جبدت يدي من البواني...و هزيتلو براسي ايه...نحكي
انا:لباس
ياسين:تستنى في شكون ؟
انا:روجين
عدا يدو على شعرو...و نزل عينيه من وجهي...يحكي
ياسين:نحب نطمن على جواد و نمشي
هزيتلو براسي باهي...و وخرت خطوة لتالي...تنهد بقوة و دخل...وقف قدامي بالظبط يحكي
ياسين:متنساش روحك...عايشة في عمارة هوني...و أي حد يتعدا علينا توا...ينجم يشوفك في الحالة هاذي
دوب عاود غزر لوجهي...و دخل...وجهي لي حمار...و أنفاسي لي حسيتها تسكرت خلاتني نفيق على وضعي و على الحالة لي حليت بيها الباب...أصلا متوقعتوش يجي بكري...و إلا كنت بدلت الهم متاع نويزات لي خرجتلو بيها...خذيت نفس طويل و خلطت عليه...لقيتو خارج من بيت جواد...غزرلي يحكي
ياسين:ماهوش في بيتو
انا:يرقد معايا في البيت...منجمش نخليه وحدو...هاني باش نجيبهولك توا
هزلي براسو ايه...من غير حتى كلمة...كبست على تليفوني في يدي...و دخلت للبيتي...لبست الكاب متاعي سكرتو...و حطيت يديا زوز على وجهي....نبرد في روحي..رغم كلشي مزال حضورو قدامي يدخلني بعضي مزلت نحس انو دقات قلبي باش تفضحني و انا بجنبو نعرف لي كلشي وفا...نعرف لي خذا حريتو و انا عملت نفس الشي...اما نحب نتقوا على روحي...و ننسى كلشي كان يربطني بيه قبل...تبسمت و انا نغزرلو...دوب يحرك في يديه...نزلت عليه شوية...هزيتو بين يديا...نحكي
انا:باباتك هوني يا روحي...هاني باش نخليك بحذاه لين نبدل دبشي باهي
بستو من خدو...و خرجت بيه لعندو...قرب مني بالوقت هزو من حملتي..و قربو لعندو يشم في ريحتو...وخرت خطوة لتالي...و رجعت لبيتي وقفت بحذا الباب و تلفت نغزرلهم...يبوس فيه و يحكي فرد وقت
ياسين:يا روح باباتك...توحشتك...و توحشت ريحتك زعمة شنية عامل البطل متاعي في غيابي
دخلت من غير ما نسمع كلمة اخرى منو...سكرت الباب و تكيت عليها...عديت يديا زوز على وجهي...غايضتني حالة ولدي...لي ماهوش باش يربى بين أسرة مستقلة و لي صار معايا قبل...قاعد يتعاود معاه هو...مهما كانت الحالة لي وصلنا ليها...مانيش باش نحرمو من بوه...و من انو يعيش معاه كلشي تحرمت منو...كيما كل مرة لقيت روحي...نحارب في دموعي...كانو ما صار شي كيما كل مرة...نخلي احساسي داخلي يحرقني...و ميظهرنيش عاجزة قدام اي حد...خذيت نفس طويل...و حليت القارد روب...بدلت دبشي كيما جا...و لميت شعري من قدامو...صوت بكاه خلاني نخرج من البيت مرة اخرى...هزيت راسي نغزرلو...و هو يحاول يسكت فيه غزرلي يحكي
ياسين:رضعتو ؟
انا:إي
ياسين:غريبة...ملا شبيه يبكي ؟
انا:منعرفش...يمكن متقلق من الكوش
ياسين:إنتي لباس ؟
انا:سافا...نحب نسألك على روجين ؟ من بارح نكلم فيها متحبش تجاوب
ياسين:آخر مرة ريتها كانت باش تطلع لبيتها...تلقاها راقدة لتوا أكا علاش...مهزتش عليك
انا:إن شاء الله هكا
ياسين:صارت حاجة ؟
انا:لاا...جيست تحيرت عليها...خاطرها كانت تاعبة شوية
غزرلي ندرا كيف و نزل راسو لجواد مرة اخرى...تبسم يحكي
ياسين:شبيه صغروني...من شنية متقلق هو ؟
عديت عينيا على وجهو...هاذي من المرات القليلة لي ريتو يضحك فيها...و في كل مرة الضحكة كانت لغيري مش ليا...غريبة قداش ضيعت روحي...و ضيعت سنين قداش استنيت حاجات...كان ماشي في بالي...هوما اهم حاجة باش نعيش حياتي...طلعت غالطة...جنب الحب الكبير...فما حاجات كنت غافلة عليهم...فما حب الذات حب الناس لي دايرة بيك...فقدت عيلتي صحيح...اما عيلتو هي كانت السند متاعي...منعرفش شنية حقيقة الرابط لي بيناتنا...يمكن ياسين كان غلطة عملتها في حق روحي...غلطة مانيش باش نجم نصلحها...و لا ننتزعها مني...اما نجم نكمل من غيرها...نجم نمشي في ثنية جديدة...يمكن نلاقي حد اقل منو و لا أكثر منو أما ماهوش هو...نعرف لي طريقي طويلة..نعرف أنو طلاقي من ياسين...هو بداية جديدة ليا...اما زعمة نجم نتخلص من بقايا متاعو داخلي...نجم نتهنى من الهاجس متاعو في حياتي...نتخلص من كل ذرة احساس ليه...و من كل دقة مزالت تضرب على خاطرو...فقت من سرحتي...كي قرب مني يحكي
ياسين:لازمني نمشي توا...عندي عملية...رد بالك عليه و على روحك
هزيتلو براسي ايه...و مديت يديا زوز شديتو عليه قربتو ليا شوية...بستو من خدو...نحكي
انا:ششش...اهدا يا روحي
هزيت عينيا في وجهو...مزال واقف في بلاصتو يغزرلنا...تبسمت نحكي
انا:باش يكون مليح...تهنى
ياسين:نعرف...مدامو معاك...مستحيل نتقلق عليه
كبست عليه في حضني اكثر...يمكن هاذي زادة أول مرة...نسمع منو كلام في حقي...مش ضدي...أول مرة ميحقرنيش بكلامو...خذيت نفس نحكي
انا:عيشك
ياسين:كان ستحقيت حاجة...كلمني
انا:باهي
غزر لجواد مرة أخرى...عدا صوابعو على خدو و عطاني بظهرو...خلطت عليه للباب...اول ما خرج...تنهدت بقوة معادش نعرف شنية لي قاعد يصير معايا بالظبط رجعت لبيت جواد...محاولة مني...باش نلهي روحي بيه...منحبش نخمم في حتى شي آخر غير ولدي...و حالة روجين...بدلتلو الكوش و دبشو فرد وقت...رجعت بستو مرة اخرى...اصلا من غيرو...مكنتش نعرف شنية نعمل بالظبط...هو السبب الوحيد لي خلاني قوية لتوا تبسمت و انا نغزرلو كيفاه عاود غفى في يدي...حطيتو في وسط سريرو...هزيت appareil لي نجم نسمعو بيها كي يبكي...ورجعت لبيتي...طلبتها مرة اخرى...هزت عليا بالوقت...تحكي
روجين:صباح الخير يا روحي
انا:والله كنت باش تلزني نجي للفيلا على خاطرك
روجين:اهدا عزيزتي...لباس عليا
انا:مش على اساس باش ترجع عندي...خليتني على اعصابي ليلة كاملة
روجين:تعبت عاللخر...حتى محسيتش بروحي كيفاه رقدت
انا:شنية احوالك توا ؟
روجين:لباس فتون...جيست مزلت تاعبة شوية...هاني باش نعمل دوش...و نجيك فيسع...باهيشي هكا
انا:باهي عزيزتي رد بالك على روحك نستنى فيك
روجين:باهي...عيش زين
تبسمت و نزلت تليفون من يدي...متأكدة لي فما حاجة...مخبيتها عليا...و احساسي مستحيل يخيبني..أنا اكثر حد نعرف روجين...نعرف طبيعتها و تفكيرها...رغم انها تقريبا تفكير فهد مسيطر عليها...يمكن على خاطرها تربات على يدو...و لا دلالو ليها زايد...يخليها ما تخاف من حتى حد...اكا علاش اول مرة نحسها ضايعة و تتهرب من كلشي...حتى مني انا...ترميت عالفوتاي...و عديت يديا زوز على وجهي...معادش نجم نستوعب لي قاعد يصير معانا...و في الحالة لي وصللها كل حد فينا و رغم اني خرجت من الفيلا لتوا نحسهم عايشين معايا خاصة خالتي سلطانة...لي تطلب بين ساعة و ساعة تكيت لتالي...نحاول نخمم في حياتي كي العادة...في النقاط لي لازمني نوضحهم و نمشي عليهم...من غير ما نتعثر مرة اخرى...و لا نخسر من روحي اكثر...في دنيتي خسرت بابا اول شي...و بعدها امي...و آخرتها طلعت خاسرة في الحب...يمكن الحاجة الوحيدة لي خرجت بيها لدنيا هي جوادي...لي اول مرة هزيتو بين يديا حسيت بروح جديدة...حسيت روحي عايشة...و اني نجم نحارب اكثر...و نقاوم اكثر...يمكن بعد سنين طويلة من توا...ولدي هو الوحيد...لي ماهوش باش يخليها بيا...و لا حتى يبعد عليا...غمضت عينيا نتذكر في صغري لي تعدا في لحظة...صغري لي قد ما حاولت نفركس فيه على اوقات حلوة ملقيتش...يمكن وجود امي الحاجة الوحيدة الباهية فيه...اني نعاود نبدا من جديد...هي اصعب خطوة بالنسبة ليا...اما ماهيش مستحيلة...كيما تعديت كلشي قبل...نجم نتعدا لي صار معايا زادة...صوت جواد و هو يبكي فيقني من سرحتي كبست على ال appareil و هزيت روحي بالوقت رجعت للبيتو...وقفت بحذا السرير بالظبط...ملامحو لي بدات تظهر هي نفس ملامح بوه...و متأكدة لي باش يولي نسخة منو نهار آخر...مديت يدي...كبست على يدو...نحكي
انا:صغروني المزيان...بعد توا احنا باش نشقو طريقنا مع بعضنا...منعرفش كيفاش...و منعرفش شنية لازمني نعمل بالظبط...اما كل لي نعرفو...انو حياتنا باش تولي احسن من هكا...و مانيش باش نخلي حتى حد في دنيا يضرك...و حتى حد ماهو باش يدخل في حياتنا يا روحي
ضحكتو الصغرونة...خلاتني نتبسم بالوقت...خلات افكاري تهدا...و املي يقوا اكثر...تنهدت بالقاوي...و نزلت عليه شوية...بستو من يدو...أول حاجة نعملها إني نحاول نرتاح...و نسترجع عافيتي من اول و جديد...بعدها باش نعدل أوضاعي...و نعاود نبني روحي و حياتي من اول جديد...من غير ما نخلي ثغرة من الماضي تأثر عليا و لا تكون حاجز بيني و بين مستقبلي انا و صغيري....و هاذي باش حرب التحدي بيني و بين روحي.