كوكايين

الحلقة السبعون

🔸️حلقة 70
🔸️فهد_يحكي:
قعدت و قمت أكثر من مرة...نحس في أعصابي تلفت غير العادة...منعرفش من وين طاحت البلوة هاذي على راسي...و لا حتى شنعمل هوني...كبست عالقضبان بيديا زوز...نستنى في شكون يتعدى...نفخت بالقاوي منعرفش كيفاش تنجم تكون حالتها توا..و لا حتى فاش تخمم...وخرت لتالي و ترميت عالكرسي مرة أخرى كبست على راسي بيديا زوز...شكون عندو مصلحة يعمل هكا ؟ هارون ؟ هو المرشح الوحيد...فرد وقت يعرف أنو كان نطيح هو باش يطيح زادة...تعدا الوقت ورا بعضو...ساعة بعد ساعة...لين تعدات ليلة كاملة...ليلة كاملة منجمتش نسكر عينيا فيها...هزيت راسي على صوت الباب لي تحل...غزرلي يحكي
هو:تفضل سي فهد
هزيت روحي وقفت...قحرتلو و خرجت...منعرفش على روحي...كيفاش وصلت للبيرو متاعو...جبدت الكرسي و ترميت عليه...نحكي
أنا:تنجم توضحلي اللي صار توا ؟
هو:ثقتك هاذي ماهيش باش تفيدك هوني
أنا:غااالط...لي عملتو من أمس لتوا...باش تخلص حقو الدوبل...في الأخير أنا فهد الصياد و مدامني هددتك توا...معناها باش نفذ تهديدي
هو:أنت في المركز...مش في بيروك...حط هذا في حسابك
أنا:حساباتي أهم ببرشا من إني نحطك فيها
هو:هذا باش يكلفك برشا
أنا:ليلة أخرى ؟ ليلتين ؟ ثلاثة...مصيري باش نخرج من هوني...نصيحة مني وفر تهديدك لحد غيري
هو:شنية تقول في التهمة لي موجهة ليك ؟
أنا:تهمة ؟ مثبت أنت ؟ صدقني أنا عندي أكثر من تهمة أما لا أنت و لا غيرك باش يثبت منها شي
هو:إعترافك هذا باش يضرك
أنا:متخممش فيا...حتى شي في دنيا ماهو باش يضرني و توا نحبك ترجعلي تليفوني
هو:قضية التهريب مرتبطة بإسمك
أنا:عندك دليل يثبت ؟
هو:تصرفاتك تثبت
انا:شي ماهو باش يثبت...تنجم تحطلي تليفوني توا
هو:عندك حق في مكالمة وحدة...تكلم المحامي متاعك
أنا:نحل أموري وحدي
هو:كيما تحب ملا
هزيت راسي على حلة الباب...جات عيني في عينها تكيت لتالي نغزرلها...قربت مني تحكي
بلقيس:فهدد...لباس ماهو ؟
هو:تفضل ؟
بلقيس:أنا بلقيس...محامية فهد الصياد
هو:مش على أساس تحل أمورك وحدك ؟
بلقيس:لتوضيح...فهد راجلي زادة
هو:تفضل مدام
بلقيس:أنا باش ندفع كفالة فهد...و بقية الإجراءات نكملها مبعد
هو:في حالتو هاذي مفما حتى كفالة تخرجو من هوني
بلقيس:سامحني مسيو...أنا معايا وثائق خروجو...أنت جيست باش توقع عليها...من غير ما نخليو الوزير يجي بنفسو لهوني
غزرلي ندرا كيف...تبسمت على جنب...و هزيت روحي وقفت...سكرت الفاست متاعي...نحكي
أنا:تليفوني
حل القجر و حطو عالبيرو مع أوراقي....هزيتهم في يدي...و غزرتلو نحكي
أنا:نتلقاو في فرصة أخرى...ماكش باش تخلص مني بالطريقة هاذي
عطيتو بظهري...و هزيت روحي خرجت...حليت تليفوني نطلب فيها ورا بعضو...من غير شي تفكيري كان فيها هي و كهو...خلطت عليا بلقيس تحكي
بلقيس:فهد لحظة
أنا:شفما زاادة ؟
بلقيس:بربي ؟ هذا لي نستهلو منك أنا ؟
أنا:متستناش مني العكس...لي صار مدبر منكم
بلقيس:فاش تقول ياخي ؟
أنا:ماكش باش تعديها عليا...صدقني كان نعرف لي روجين صارتلها حاجة في غيابي
بلقيس:من غير ما تكمل تهديدك...روجين في الكلينيك عالاغلب صار معاها نزيف
بقيت نغزرلها من غير حتى كلمة...للحظة حسيت الارض تحركت تحتي...كبست على يدها و جبدتها عندي نحكي
أنا:حكيت معاها انتي ؟
بلقيس:مفماا حتى شي نحكيه معاها...مش ذنبي لي حب حياتك فراجيل...سيبلي يدي وجعتني
رخفت يدي و بعدتها عليا...هزيت روحي خرجت من غير ما نخمم مرتين...شديت طاكسي و عطيتو إسم الكلينيك...ثنية كاملة عديتها نطلب فيها و في ياسين و لجين زادة...أما حد فيهم ما جاوبني...وين حسيت روحي باش نتخنق أكثر...منعرفش على روحي كيفاش وصلت...خلصتو و نزلت ساقي أعلى من راسي...دخلت نسأل على إسمها...دوب عرفت بيتها وين..طلعت الدروج من غير ما نخمم مرتين...جات عيني في عينو...خارج من بيتها...قربت منو بالزربة...و قبل ما نحكي...سكتني بضربة على وجهي...مديت يدي بالوقت نتحسس في الدم لي خرج من فمي..و هزيت عينيا في وجهو..غزرتلو مصدوم نحكي
أنا:فاش تعمل ياخي ؟
ياسين:أخرج من هوني
كبست على يدي بالوقت...و مديتها في وجهو...أما منجمتش نعملها...منجمتش نحطها عليه...شنوة لي منعني منعرفش...تبسم يحكي
ياسين:فاااش تستنى ؟ شنية لي يمنع فيك توااا ؟
أنا:متجبرنيييش نغلط معاااك و أبعد من وجهي توااا
ياسين:أنت أصلاااا غارق في الغلط من ساااسك لرااسك...خسااارة تربية بابااا ليك
هزيت راسي مصدوم من كلامو تالي...لدرجة منعرفش كيفااش فقدت أعصابي و لا حتى كيفاش هديت عليه كبست على مريولو بيديا زوز...و غزرت لعينيه نحكي
أنا:رررد باااالك...رررد بااالك يااااسين...رد بااالك تحكي على بابااا مرة أخرررى...رد بااالك تجبدد سييرتو صدقني باااش ننسى لأنت خوويااا...تسممممع فياااا بابااا لااااا
كبس على يديا زوز...و غزرلي بنفس غزرة بابا...يحكي
ياسين:أنت مستحيل تكوون عبد...ضيعت رووحك و ضيعت حياااة أخرى معاااك...حتى متأكد كان بابا عايش توا...مستحيل يغزر لوجهك
أنا:يززززي...اسسسكت
كبست عليه أكثر...وين جات العين في العين أكثر من قبل...منحبش نكرهو...منحبش نغزر لخويا بحقد...و إلا باش نخسر جزء آخر من عيلتي...جزء من وصية بابا..أنا مانيش سيء لهدرجة...و عمري ما حبيت لي نعمل فيه و لا حبيت نضر حد فيهم...لا هوما و لا روجين زادة منحبش نكون بالطريقة هاذي...أما حد منهم ما حضر للي صار...حد ما شاف بابا و هو يتحرق...حد ما حضر لكلماتو الأخيرة...حد ما شاف وجهو لي تشوه...و لا سمعو و هو يتوجع...أكا علاش معندوش حق يحكي معايا بالطريقة هاذي...نعرف لي بابا مستحيل يكرهني أصلا عشت شطر حياتي و أنا نجري ورا الحقيقة لي خذاتو مني...فقت من سرحتي...على أمي لي وقفت بيناتنا...تحكي
سلطانة:ياااسين...فههههد...شنية هذا لي تعملووو فيه ؟
عديت عينيا على وجهو...و رخفت يديا زوز عليه نحكي
أنا:ظنيت لأنا باش يكون عندي أخ...أما حتى هاذي طلعت غالط فيها...أصلا عندك حق...بابا باش يكون فخور بيك أنت و كهو
وخرت خطوة لتالي...و عطيتو بظهري...أصلا ملقيتش جهد باش ندخل عندها و لا حتى نطمن عليها...وجيعة قوية عصرتني...خلات أنفاسي تخنقني...دوب عملت الدورة..كبست عالحيط لي بجنبي...و غمضت عينيا بالقاوي...محاولة مني باش نلم قوتي لي حسيتها استنزفت مني...عديت يدي على وجهي...نمنع في دموعي...مانيش سيء...و نعرف لي بابا مستحيل يكرهني...مديت يدي شوية...حليت فلس سوريتي...و خذيت نفس طويل...و شيعت راسي لتالي...نرد في النفس ورا بعضو...أصلا مستحيل نجم نقابلها و أنا في الحالة هاذي...منجمش نزيد على حالتها أكثر من هكا من غير شي...أجزاء من الماضي...خلات راسي يوجع بصفة غريبة...لدرجة حستيو باش يطرشق...زربت في خطواتي أكثر...منعرفش على روحي كيفاش وصلت لوطة...ترميت على أول كرسي عرضني...و شيعت راسي لتالي...غمضت عينيا نسترجع في أنفاسي...و نلم في قوتي فرد وقت...باش نرجع بحذاها و نفهم منها لي صار في غيابي...و شنية اللي خلاها ترجع لهوني مرة أخرى...أصلا أنا خسرت كلشي في حياتي...من غيرها هي و كهو...و معنديش استعداد باش نخسرها مهما كان اللي باش يكلفني...و مهما كانت الثنية صعيبة قدامي و إلا حياتي باش توفى مع نهاية علاقتي بيها.