كوكايين

الحلقة السابعة و الستون

🔸️حلقة 67
هزيت راسي على صوت الباب...وقفت قبل ما تفيق منعرفش على روحي كيفاش وصلت...حليت الباب..نغزر للمربية لي محملاتو بين يديها...أول ما غزرلي ضحك هزيتو من عندها و قربتو ليا نبوس فيه و نحكي
أنا:جيت يااا رووح بابتك
هي:هذا الصاك متاعو سي ياسين
أنا:عيشك
هي:تصبحو على خير
أنا:و إنتي بخير
شديتها عليها...و سكرت الباب...حطيتها من يدي و دخلتو معايا للكوجينة نحكي
أنا:توحشت بابا ياخي ؟
مد يدو يمس فيا...عضيتو منها عضة خفيفة...ضحك بالوقت...لزيتو ليا نحكي
أنا:جيت في وقتك...مدامها الفرخة أمك راقدة أنت باش تعاوني
حط راسو على صدري...من غير ما ينزل يديه من وجهي...ضحكت نحكي
أنا:باهي باهي...فهمت...حتى أنت تاعب كيفها
كبست عليه في حضني...و كملت نحرك في الماكلة فرد وقت...بالرسمي منحبش نفرط في اللحظات هذوما...و في كل ثانية تخليني نكون في وسطهم مرة اخرى.

🔸️فتون_تحكي:
حليت عينيا شوية شوية...نحس في راسي باش يطرشق...منعرفش على روحي كيفاش غفيت...نزلت الفاست متاعو من فوقي و تقعدت...لتوا مش مصدقة لي صار...و لي أنا حكيت معاه أكاكا...كبست عليها بيديا زوز...وين حسيت ريحتو دخلت خشمي...حطيتها بالوقت و هزيت روحي وقفت...توا بالظبط...ما نحب نخمم في حتى شي...حتى منعرفش كيفاش هزتني ساقيا للكوجينة...يمكن خاطرني بالرسمي جعت...و فيقتني الريحة البنينة لي جاية منها...هزيت راسي مستغربة و أنا نغزر لجواد في حملتو...عامل جو مش نورمال معاه...يمكن هاذي الحاجة الوحيدة لي تخليني مرتاحة لتوا...رغم كلشي تعدا علينا...منحبش جواد يحس بغياب بوه جملة...و نحبو يعيش لي تحرمت منو أنا الكل قبل...خذيت نفس و دخلت...نحكي
أنا:شكون جابو لهوني ؟
ياسين:صحة النوم
قحرتلو و قربت منو...فكيتو من عندو...و هزيتو في حملتي...نبوس فيه و نحكي فرد وقت
أنا:توحشتك يا روحي...مممم قداش بنين هو...ياخي عامل جو من غيري...يا روح ماماتك
ياسين:فتوون...برا لصالة عزيزتي
أنا:جعت و نحب ناكل
ياسين:باهي هوكا باش يحضر فيسع
أول ما تلفت بدا يبكي عليه...ضيقت عينيا مستغربة و تلفت لياسين...نغزر لجواد لي يمدلو في يدو...مش بالعادة يعمل هكا...قرب مني شوية يحكي
ياسين:هات عليك
أنا:أما باش يتعبك هكا
ياسين:لا ميسالش
انا:باهي
ياسين:خليك هوني إنتي زادة
أنا:نحب نمشي بعد العشا
ياسين:فتوون
أنا:غدوة نخدم...يلزمني نرتاح
ياسين:خليك ليلة هوني
أنا:منجمش
ياسين:باهي كيما تحب
هزيتلو براسي باهي...و خرجت من الكوجينة...منعرفش من وين جاتني الرغبة إني نكتشف الدار هاذي أكثر يمكن هاذي أكثر بلاصة كنت نحب نتعرف عليها...دخلت للبيت لي كنت فيها قبيل...غزرت لسوريتو لي مزالت عالفوتاي...عديت صوابعي عالكوافوز...نثبت في لي بارفان متاعو...حبست عند آخر وحدة...هزيتها في يدي و خذيت نفس منها...كنت نعشق ريحتو هاذي بصفة غريبة...خاصة وقت حبالتي بجواد...أما لا كنت نجم نقربلو و لا نقول حرف واحد...زعمة شنية كان باش يصير...لو حكيت وقتها...و خبرتو كلشي نحس فيه...و رفضت طلاقي منو...كان باش يفيق على روحو ؟ و يكبش فيا بالطريقة هاذي ؟ ياسين بطبيعتو ميحبش الخنقة...و ميحبش لي يفرض رايو عليه...يمكن هذا أكثر شي خلاه يحقد على علاقتنا و يدمرها...خذيت نفس منها...حطيتها من يدي...و خرجت من بيتو منعرفش كيفاش لقيت روحي في البيرو متاعو...هزيت راسي شوية نعدي في عينيا على كل تركينة فيه..غريبة كمية الهدوء فيه...قربت شوية و درت ورا البيرو...نغزر لتصاورو من أيام الفاك...لأصحابو لي معاه...بالطبيعة حتى حد ما معروف منهم...خاطرو قرا برا...حاجات صغيرة على تفاصيل حياتو كنت نعرفها من روجين و خالتي في سياق حديثهم عليهم...حتى شهادات متاعو أول مرة نشوفهم...غريبة أنو خصوصياتو الكل هوني...و ما عندو حتى شي في الفيلا...دورت راسي شوية نغزر لتصويرة جواد...تبسمت بالوقت و هزيتها في يدي...تي هوكا طلع قدامها أكثر من وحدة...من أول ما ولد لتوا تنهدت براحة و حطيتها من يدي...هزيت روحي خرجت نزلت اللوطة...لقيتو ديجا حضر الطاولة...من غير ما يحطو من يدو...أصلا باهيلو...خليه يتعذب شوية..قربت منو نحكي
أنا:نعاونك في حاجة ؟
ياسين:تفضل أقعد
قربت منو شوية...جبدلي الكرسي بيدو...قعدت و تكيت لتالي...قعد مقابلني...و وقفو في حملتو يحكي
ياسين:ماهوش كيما العشا لي كنت باش تحضرو ليلة أما يعدي روحو
انا:من غير ما تشد صحيح في الموضوع
ياسين:فتوون يا روحي...منحبش نتعبك معايا...أما هو بالظبط نحبك تبقى بعيدة عليه...فكرة قربك منو قاعدة تحرق فيا...أكثر من أي شي آخر...و حط في بالك مستحيل نتخلى عليك مرة اخرى..مهما كان قرارك..إنتي متاعي أنا و باش تكون ليا ديما
عديت عينيا على وجهو...أصلا و لا مرة توقعت باش نسمع الكلام هذا منو...لدرجة لقيت روحي ساكتة منحبش نحكي في الموضوع أكثر...رغم إني مفكرتش في نبيل بطريقة أخرى...كيما مفكرتش إني نرجع لياسين زادة...حتى نحس في روحي باش نضيع مرة أخرى..نزلت راسي نغزر لطاولة...هزيت حاجبي مستغربة و عاودت غزرتلو نحكي
أنا:مكنتش نعرف لأنت تنجم تحضر هذا الكل وحدك
ياسين:إنتي لتوا ما تعرف شي
انا:على أساس أنت تعرفني
ياسين:عالاقل نعرف لإنتي تحب المقرونة و السلاطة بالطريقة هاذي
نزلت عينيا مرة أخرى لطاولة...و كبست عالمغرفة في يدي...ضيقت عينيا و أنا نذوق فيها...كلامو صحيح أنا نحبها بالطريقة هاذي...خذيت نفس نحكي
أنا:تعدي روحها
ياسين:صحة و بالشفا ملا
أنا:عيشك
قعد جواد في حملتو و تكى لتالي...دوب خلاه ياكل لقمتين ورا بعضهم...نزلو يدو من الطاولة يحكي
ياسين:يززي عيش ولدي
أنا:أعطيهولي
ياسين:لا خليه مرتاح هكا
أنا:بالله ؟
ياسين:كمل صحنك...كان تشدو معادش تسيبو و إنتي تبوس فيه
أنا:ملا تحبني نبوسك انت ؟
هز راسو غزرلي ندرا كيف...حتى انا منعرفش كيفاش خرج معايا الكلام...لدرجة حسيت بدني فور...نزلت عينيا من وجهو نحكي
أنا:منقصدش لي قلتو
ياسين:والله أنا معنديش مانع جملة
أنا:يزززي من البلادة توا...نحب نروح توا
ياسين:كمل صحنك عزيزتي
ضحك و هو يغزرلي...وين حسيت روحي باش نطرشق من الفازة...كبس عليه و وقفو في حملتو يحكي
ياسين:ملا أمك تحب تبوسني ؟
أنا:ياااسيين يزززي
ياسين:باهي باهي...كمل صحنك و حضر روحك نروح بيك
هز روحو يضحك...ساعة منعرفش على شنوة منجمش يشد روحو...أول ما عطاني بظهرو حطيت يديا زوز على وجهي...حتى أنا منعرفش كيفاش قلت الكلام هذا خذيت نفس و خلطت عليهم...وين لقيت جواد بدا يبكي...دوب شافني فحم أكثر...ضيق عينيه يحكي
ياسين:شبيه ؟
أنا:جاع اكا علاش يبكي
ياسين:باهي شد رضعو قبل ملا
هزيتو في حملتي...و وخرت خطوة لتالي...غزرتلو نحكي
أنا:نجم نبقى وحدي
هزلي براسو باهي و خرج من صالة...ترميت عالفوتاي نرضع فيه...كبش فيا أكثر...عرفتو جاع الفرخ...أصلا صابر على كرشو باش ميبعدش عليه...رقد في حملتي فرد وقت نسمع في ياسين يحكي
ياسين:باهي...أعمل لي قتلك عليه...راقب ظغطو كل شوية...فرد وقت حضرو للعملية...أنا باش نكون في الوقت...ما نحب حتى غلطة
غطيت صدري قبل ما يدخل...نزل راسو و غزرلنا يحكي
ياسين:لحق باش يرقد ؟
مديت يدي و شاورتلو باش يسكت...هزلي براسو باهي كبست عليه في حملتي نحكي
أنا:كان يفيق توا...ماهوش باش يسكت
ياسين:باهي...تحب نروح بيك توا ؟
أنا:لا...مدامو رقد و أنت تفيق بكري...وصلني الصباح
ياسين:باهي لي تحب عليه باش يصير
أنا:دلني عالبيت ملا
ياسين:تنجم تبقى في بيتي
أنا:لا ميسالش
ياسين:باهي ايجا معايا
خلطت عليه من غير حتى كلمة...حل باب البيت لي مقابلة بيتو...يحكي
ياسين:تنجم ترتاح هوني
خذيت نفس و دخلت...حطيتو في وسط السرير...و تلفت لياسين نحكي
أنا:نحب الصاك متاعو
هزلي براسو باهي و خرج...مديت يديا زوز حطيت شعري على جنب...و تنهدت بالقاوي...أصلا منعرفش علاش تنازلت...يمكن على حالتو متسمحلوش يسوق توا...دقايق و رجع عندي...حط الصاك عالفوتاي يحكي
ياسين:تستحق حاجة اخرى ؟
أنا:لا عيشك
ياسين:تصبح على خير
أنا:و أنت بخير
قعدت على طرف السرير...و مديت يدي شوية...عديت صوابعي على خدو..طالع نسخة عليه في كلشي غمضت عينيا و عاودت حليتهم نحكي
أنا:يا ريت كنت نجم نصلح شي من اللي تكسر...منحبش نظلمك معايا يا روحي...أصلا كلشي نعمل فيه لتوا..على خاطرك أنت و كهو...أنت الحاجة الوحيدة لي ثابتة في حياتي...يا ريت نجم نصدق انو هو باش يحبني بالطريقة لي حبيتو بيها...صدقني منعرفش شنية نعمل بالظبط...الماضي واقف بيني و بينو...أنا منذكرش عشت معاه حاجات باهية و حلوة كيما توا...حتى منعرفش علاش جا مأخر برشا...بعد ما وفات حكايتنا
تمديت بجنبو...و حطيت راسي عالمخدة...معادش نحب نبكي عاللي تعدا بعد توا...فرد وقت منحبش نخمم في اللي صار اليوم...و إلا باش نضيع في نفس الدوامة مرة اخرى...عديت صوابعي على شفايفي...لتوا نحس في كبسة العضة متاعو...زايد معاه...منعرفش وين يلقى فيهم تصرفات هذوما...و لا من امتى يتصرف بالطريقة هاذي...بطبيعتو كان ممل برشا...و تقريبا ميحكيش جملة...توا ظهرلو يعمل كلشي فرد مرة...اما الحق عليا خاطرني ما نجمت نعمل حتى شي...غمضت عينيا بالقاوي نحب ننسى كلشي و نرقد كهو...عالأقل نرتاح شوية من الاحداث لي قاعدة تصير ورا بعضها و الله أعلم شنية مزال مخبي اكثر من هكا...لكل حد فينا ياسين...فهد...روجين و لجين...و أنا زادة...ربي يعلم اللي مخبي لينا بعد توا...و شنية لي باش نعيشوه و كيفاش باش تكون نهاية حكايتنا.