كوكايين

الحلقة مئة

🔸️حلقة 100
🔸️يحيى_يحكي:
حطيت تليفون من يدي و تكيت لتالي...من غير شي نحس في راسي باش يطرشق...على أساس خذيت قراري و معادش ندور بيها...أما منجمتش...و ما لقيت حتى فرصة باش نحكي معاها مرة أخرى...منعرفش علاش سكرت كلشي في وجهي...و بعدت عليا لهدرجة رغم تعرف انو مهما كان لي قاعد يصير...مستحيل نتخلى عليها...لتوا مصدوم من تصرفها و من ردة الفعل متاعها...و لتوا منجمتش نتقبل حياتي من غيرها...و فكرة أنها ماهيش باش تكون موجودة معايا في كل خطوة نعملها...و لا مرة توقعت إني باش نوصل لهدرجة من تساؤولات على علاقتنا...فرد وقت معرفتش شنية نعمل أكثر من هكا...مدامها بعدت عليا بالطريقة...فقت من سرحتي على صوت سيليا لي دخلت...و حطت الدوسي تحكي
سيليا:يحيى وقعلي هوني
حليت الدوسي...قريت الورقة وقعتها و رجعتهالها ضيقت عينيها تحكي
سيليا:لباس ماهو ؟ صارت حاجة ؟
أنا:لباس سيليا...خليتلك الخدمة في ايمايل نحبك تعمل طلة عليها...و بعد ناقشوها مع بعضنا
سيليا:باهي طمن
هزت روحها خرجت...غزرت لساعة و سكرت الدوسيات لي على يدي...عاودت طلبتها مرة أخرى...أما نفس الشي طلع مسكر كي العادة...خذيت نفس و هزيت روحي خرجت...منعرفش على روحي كيفاش وصلت اللوطة حليت الباب ركبت...و شديت الثنية لدار...أصلا مخي مش فوقي...كلشس نحب عليه إني نحط راسي و نرتاح شوية من الخدمة و التفكير...أول ما حليت الباب لقيتها في وجهي...بستها من راسها نحكي
أنا:شحالك ثريا ؟
ثريا:تاااعبة كي العادة...كيفاش تحبني نكون و أنت متحبش تسمع كلامي
أنا:مش على أساس سكرنا عليه الموضوع هذا
ثريا:ماني أمك...أسمع كلامي و أخرجو تعشاو مع بعضكم ليلة
أنا:مع شكون ؟
ثريا:أحلااام...شكون غيرها...ياخي باش تلقى أحسن منها أنت ؟
أنا:أمي مش على أسااااس سكرنا عليها الحكاية هاذي...ياخي كل شوية تطلعلي بحاجة
ثريا:مجبوور باش تسمعني المرة هاذي...و لا وجهي ماهوش باش يجي في وجهك ليوم الدين
أنا:تو هذااا كلاام تقول فيه ؟ بأنو صفة باش نخرج الطفلة تتعشى معايا برا ؟ ياخي معندهاش عيلة تتحكم فيها ؟
ثريا:أما مع لجين ميفرقش الوقت معاك
أنا:علاش تجبد في سيرتها توا...و حط في بالك أنو أحلام متاعك ماهيش باش تفك بلاصة لجين مهما صااار
ثريا:و تعااارك فيا على خاطرها ؟ حتى بعد لي عملوه فينا و مزلت تحبها ؟
أنا:ما عندها حتى ذنب...قداش من مرة لااازمني نعاود الكلام هذا
ثريا:يزززي كهو يزززي...أصلا نحس في روحي مش قد بعضي
أنا:شبيك ؟
كبست على يدي بالوقت...شعرة لا طاحت لتالي...كبست عليها و دخلتها لصالة...قعدتها و قعدت بجنبها نحكي
أنا:لباس ماهو امي ؟ من غير ما تفجعني عليك توا ؟
هزيت راسي نغزر لبابا و سحر لي دخلو مصدومين غزرلي يحكي
يونس:شبيها ؟ شنية صار ؟
أنا:منعرفش
سحر:أكيد طلع ظغطك كي العادة...هاني باش نعطيها دواها لحظة
بقيت نستنى فيها لين رجعت شربتها دواها...خذيت نفس نحكي
أنا:لباس توا ؟
ثريا:مانيش لباس...مدامك تعمل لي في راسك...زيد أنا عطيت كلمة لطفلة و وعدتها لانت باش تخرج معاها هكا تسودلي في وجهي مع الجماعة ؟
أنا:باااهي أمي...هااني باش نخرج معاها تهنى
ثريا:تحكي بجدك ؟
أنا:إي مهم حاول ترتاح إنتي توا
ثريا:يرضى عليك ربي يا روحي
دوب تبسمت و جبدت روحي منها...طلعت لبيتي من غير حتى كلمة أخرى...سكرت الباب...و مديت يدي للكوافوز...طيحت كلشي موجود فوقها و نزلت عليها بيدي نحكي
أنا:علاااش هكااا يا ربي...شنية تحب مني أكثر يااا لجين...علاش توصل فينا لهوني
عديت يديا زوز على وجهي...نهدي في روحي و نرد في النفس فرد وقت...خذيت دوش بردت أعصابي بيه بدلت دبشي و نزلت اللوطة...عديت عينيا عليها...لحقت باش تجي في الوقت حتى هي...غزرتلي تحكي
أحلام:يحيى شنية أحوالك ؟
انا:لباس...هاني نستنى فيك برا
غزرت لامي لي قحرتلي و خرجت...خلط عليا بابا بالوقت...وقفني يحكي
يونس:يحيى أستنى عيش ولدي
أنا:صارت حاجة أخرى بابا ؟
يونس:ماكش مجبور على هذا الكل...أمك تعمل هكا باش تظغط عليك...نعرف لي بنتي لجين معندهاش ذنب في الحكاية...زيد احكي معاها و افهم الموضوع منها
أنا:نعرف بابا...نعرف هذا الكل...أما هاك ريت حالتها كيفاش...أصلا الايامات هذوما معندهاش سيرة أخرى من غير أحلام...و شعرة لا مشات فيها قبيل
يونس:متظغطش على روحك أنت زادة...و حط في بالك أمك و خايفة على مستقبلك
أنا:عيشك بابا...برا ادخل توا متعبش روحك أكثر
حط يدو على كتفي و هز روحو دخل...خرجت بالوقت حليت الباب ركبت...و استنيتها لين خلطت عليا..خدمت الكرهبة من غير حتى كلمة...أصلا منعرفش وين باش نمشي و لا وين باش نهزها معايا...حاجة محطيتهاش في الحساب و خرجتلي بيها...فقت من سرحتي على صوتها تحكي
أحلام:شنية أحوال الخدمة ؟
أنا:سافا تعدي روحها
أحلام:ستانست بيها ؟
أنا:مممم
أحلام:مزلت متغشش مني ؟
أنا:مفما حتى شي يخليني نتغشش منك...تهنى
أحلام:باهي برشا ملا
غزرت لتليفوني مرة أخرى...على أمل أنها باش تطلبني في أي لحظة...غزرتلي تحكي
أحلام:محلاها كرهبتك جديدة
أنا:ماهيش ملكي...متاع سوسيتي
أحلام:تنجم تاخو وحدة كيفها بالقرض زادة
دورت وجهي غزرتلها و عاودت تلفت لثنية...أنا وين و هي وين...أصلا شنية كنت مستني منها الخرجة هاذي ربي يصلحها ثريا على الورطة هاذي...منعرفش على روحي كيفاش وصلت...شديت الفران...نحكي
أنا:وصلنا
هزتلي براسها باهي و نزلت...خذيت نفس طويل و خلطت عليها...دخلت معاها...نحكي
أنا:القعدة برا خير من هوني
أحلام:الدنيا باردة برا...خلينا هوني أحسن
تبسمت على جنب و هزيتلها براسي باهي...في بالي مع الفرخة متاعي...خاطرني ستانست بهابلها و طلعاتها لي مش في وقتهم...جبدت الكرسي قعدت...و تكيت لتالي مخي مش فوقي...شاورت لسرفور...و غزرتلها نحكي
أنا:تنجم تختار إنتي
أحلام:نختارلك معايا ؟
انا:مممم
قرات ال minu و طلبت منو...أول ما بعد حسيت بيدها لي تحطت على يدي...كبست عليا تحكي
أحلام:يحيى...منعرفش إذا الوقت مناسب توا...أما نحب نعتذرلك عاللي صار آخر مرة...صدقني تصرفت من غيرتي عليك و من غير تفكير زادة
جبدت يدي منها...هزيت راسي شوية غزرتلها...و خذيت نفس نحكي
أنا:الموضوع هذا تسكر...و نظن مش أنا لي بحاجة إعتذارك
أحلام:نعرف...أما مدام قاعدين نحاولو مع بعضنا...نظن أنو كان لازمني نعتذر
أنا:أحلااام...إنتي أكثر وحدة تعرف قداش نحب لجين و متعلق بيها...أكا علاش متستناش مني أكثر...أنا خرجت معاك...على خاطر ثريا و كهو
أحلام:نعرف هذا الكل...أما مدام تخلات عليك...كارك تفهم أنو هي محبتكش...أكا علاش لازمك انت زادة تنحيها من مخك و تبدا من جديد
جيت باش نحكي أما سكت كي جا سرفور...عديت يدي على وجهي نهدي في روحي...منحبش نغلط معاها في الكلام اكثر...خاطرني نعرف لي كلشي يوصل لثريا مانيش ناقص وجيعة راس أكثر من اللي انا فيها توا غزرتلها نحكي
أنا:منحبكش توعد روحك بشي مدامني أنا موعدتكش أحلام...حط هذا في مخك
أحلام:باهي يحيى...أما توا حاول تنسى المشاكل لي عندك الكل و استمتع بالخرجة...انت بحاجة لقعدة تهديلك أعصابك...و نوعدك باش نبقى ساكتة باهيشي هكا
عديت عينيا على وجها...من غير حتى كلمة أخرى أصلا إستغربت من جوابها...تنهدت بالقاوي...و كبست على تليفوني مرة أخرى...و حليتو...نفس الشي مفما حتى خبر منها...و متأكد لي ماهوش باش يكون...هي إختارت عيلتها و ماهيش باش تتلفتلي مرة أخرى...و لا مرة توقعت أنها تنجم تتصرف بالطريقة هاذي...و لا حتى تنجم تبعد عليا...بعد اللي تعدينا بيه الكل...هزيت راسي على صوتها تحكي
أحلام:عطيك الصحة...البلاصة هوني مريحة برشا...و زيد الحوت بنتو سبيسيال برشا
أنا:صحة ليك
أحلام:عيشك
تكيت لتالي نغزرلها...بالرسمي منعرفش أمي شنية تحب مني بالظبط...رغم تعرف بالقدا إني مستحيل نتقبل أحلام في حياتي...خاصة بوجود لجين...فرد وقت لازمني ناخو قرار بخصوص اللي قاعد يصير...قرار باش ناخو من غيرها خاطرها إختارت أنها تبعد لهدرجة من غير حتى محاولة منها...و لا تفسير يخليني نحارب عالكل على خاطرها...مدامها إختارت عيلتها و كبشت فيها مستحيل نجم نتصرف عكس لي تحب عليه هي غزرتلي تحكي
أحلام:لباس ماهو ؟
أنا:لباس
أحلام:ملا شبيك متحبش تاكول ؟
أنا:معينيش
أحلام:على أساس باش تنسى كلشي و ترتاح بالقعدة
أنا:أحلام حتى شي ماهو باش يخليني نرتاح...كان كملت خلينا نمشيو توا
أحلام:أكيد
حطت من يدها و هزت روحها وقفت...حطيت الفلوس عالطاولة و خلطت عليها...خذيت نفس من النسمة الباردة...كأني نصبر في روحي...خاطرني نعرف و متأكد إني أول ما ندخل لدار باش تعاودلي نفس السيناريو مرة اخرى...و نفس الاسئلة لي منحبش نسمعها...و ماهيش باش توفى بالنسبة لأمي...قبل ما نوافق على أحلام و نحققلها لي في راسها...رغم تعرف أنها بالطريقة هاذي...باش تضر الكل...أكثر من أنها تصلح لي تكسر أصلا تعبت من إني نحاول نفهمها أنو اللي قاعد يصير غالط...و إني منجمش نبدا من جديد مع غيرها...و إلا باش نظطر نوجعها و نوجع روحي و أحلام فرد وقت حليت الباب ركبت...نزلت البلارو تنهدت بالقاوي..محاولة مني باش ما نخمم في حتى شي توا...كان إني نحط راسي و نرتاح...كهو.
#يحيى_أحلام🧡