كوكايين

الحلقة الثانية عشر

🔸️حلقة 12
🔸️روجين_تحكي:
غمضت عينيا بالقاوي...و خذيت نفس طويل...و لا مرة توقعت اني نتحط في الموقف هذا...و لا حتى باش يجي نهار اني ناقف قدامو و نباركلو على عرسو...لاول مرة في حياتي نلقى روحي ضايعة...اول مرة نكره حد من غير ما نعرفو...و هذا لي صار اول ما ريتها...اول ما حكيت معاها...معادش نعرف شكون نلوم فيهم...فهد لي خلاني نعيش الضياع هذا و لا هي لي فكت بلاصتي...و لا نلوم روحي...خاطرني اخترت الثنية هاذي...رغم الظلام لي كان فيها...اما استمريت و مرجعتش لتالي...لهدرجة كنت واثقة منو ؟ لهدرجة مجاش في بالي حتى لحظة...امو ممكن يفلت يدي...و يختار ثنيتو وحدو...الغصة لي حسيتها و انا نغزرلهم من بعيد...كانت قد الوجيعة لي في قلبي...وجيعة حتى كلمة ماهي باش تعبر عليها...و حتى ردة قعل منو باش تعوضني عاللي عشتو في الايامات هذوما...مستحيل نجم نسامحو بعد توا...و لا حتى نغفرلو لي صار...اصلا ولا مرة توقعت...انو يوصل يوجعني بالطريقة هاذي...و يخليني نخلص ثمن العلاقة هاذي وحدي...تنهدت بالقاوي...و هزيت راسي مرة اخرى...بطريقة و لا اخرى باش نتغلب على روحي...على الماضي...و على كلشي عشتو لتوا...الوجيعة لي شدتني مرة اخرى...دخلتني بعضي اكثر...كبست على سطوشتي...و قربت من الطاولة....عبيت كاسة ما...كبست عليها في يدي...و تلفت باش نمشي...دخلت في شكون بالوقت...شطر الكاسة جات عليه...هزيت راسي نحكي
انا:سامحني...سامحني...منقصد...ش
سكت كي جات عيني في عينو...آخر حد توقعت اني نشوفو هوني...للحظة حسيت روحي باش ندوخ..كبست على الكأس أكثر...و وخرت خطوة لتالي...عطيتو بظهري دقات قلبي قوات بصفة غريبة...خفت اني نتحط تحت امر الواقع...و يعرف الكل بالحكاية...حطيت الكاسة من يدي...و كبست على الدبوزة مع صوتو
هو:روجين
غمضت عينيا بالوقت...و عاودت حليتهم...منعرفش شنوة باش نعمل بالظبط...و لا حتى كيفاه باش نواجهو خذيت نفس و تلفت عندو نحكي
انا:د..دكتور...ص..صراحة انا
هو:هدي روحك مدموزال
جيت باش نحكي...أما سكت على صوت ياسين لي قرب منا يحكي
ياسين:غسان
غسان:أهلا ياسين
كبست بيدي على طرف الطاولة...متوقعتش لي هوما يطلعو أصحاب...بقيت ندور في عينيا بيناتهم...غزرلي يحكي
ياسين:تعرفو بعضكم ؟
هزيت راسي شوية غزرتلو...محاولة مني باش نقولو ما يحكي شي...دخلت بعضي و انا نسمع فيه يحكي
غسان:إي...تقريبا
عينيا وساعو بالوقت...وجيعة كرشي قوات...و معرفتش شنية لازمني نعمل بالظبط...كان ياسين عرف باللي صار مستحيل يعديها بالساهل...بلعت ريقي مع غزرتو...ضيق عينيه يحكي
ياسين:من وين تعرفو ؟
انا:ي..ياسين...ص..صراحة أنا و سي غسان...نقصد احنا
غسان:مدموزال روجين قبل شهر من توا...دخلت فيا بالكرهبة
ضيقت عينيا مستغربة...و رجعت بذاكرتي لتالي قبل شهر من توا...وقت شديت الفران على غفلة خاطرني منتبهتش للاشارة...طلع هو لي ضربت فيه...يمكن الحالة لي كنت فيها ليلة البارح...خلاتني ننسى وين ريتو..أصلا نهارتها من ربثتي معرفتش نتصرف معاه...لين وليت نطلب في سماح ورا بعضو...حتى متوقعتش لي باش يتذكرني...و لا حتى الصدفة باش تلعب دورها و تجمعنا بالطريقة هاذي...بقيت نغزرلو مستغربة...تبسم يحكي
غسان:متوقعتش لي باش نشوفك مرة أخرى
ياسين:روجينا بنت عمتي...و هذا غسان صاحبي
غسان:متشرفين
هزيتلو براسي باهي...من غير حتى كلمة...لتوا مصدومة من اللي قاعد يصير معايا...فرد وقت منجمتش نزل عينيا من وجهو...فقت من سرحتي على صوت ياسين مرة اخرى
ياسين:سامحوني توا...نرجعلك مبعد
غسان:على راحتك
دور راسو شوية و عاود غزرلي...تبسم بالوقت...يحكي
غسان:لباس ماهو ؟
انا:لباس...مرسي برشا...خاطرك ما قتلو شي
غسان:علاش شنية لي صار ؟
انا:نقصد لي صار البارح
غسان:علاش إحنا تلاقينا البارح ؟
ضيقت عينيا مستغربة...دوب استوعبت شنية يقصد بكلامو...تبسمت نحكي
انا:عيشك دكتور
غسان:على فكرة أنا غسان
مدلي يدو بالوقت...خذيت نفس و حطيت يدي في يدو...نحكي
انا:روجين
غسان:تشرفت بمعرفتك روجينا
انا:و انا أكثر
جبدت يدي منو...و تبسمت...قربت من الطاولة...و هزيت بابيي حطيتو في يدو...نحكي
انا:منقصدش لي صار...سامحني مرة اخرى
غسان:ما صار حتى شي
هزيتلو براسي باهي...و حطيت يدي على كرشي...نرد في النفس...الوجيعة لي حسيتها خلاتني دوب نجم ناقف على ساقيا...قرب مني و جبدلي الكرسي يحكي
غسان:تفضل اقعد
انا:عيشك
خذيت نفس و قعدت...حط كاسة الما قدامي...و قعد بجنبي....يحكي
غسان:مكنتش باش نحكي...اما نحب نعرف شبيك خاطرت بروحك و جيت لهوني ؟
انا:مجبورة...و مكنتش نعرف لي باش تزيد الوجيعة هكا
غسان:اسمعني...هاني باش نحكي معاك بصفتي طبيبك لاول و لآخر مرة...لي تعمل فيه غالط...تنجم تضر روحك...اللي عملتو توا ميجيش...عالاقل ترتاح يومين ورا بعضهم
انا:الله غالب...كهو لي صار
غسان:مانيش نعاتب فيك...اما هكا قاعدة تخاطر بروحك...متنساش لانتي ضيعت صغيرك
هزيت راسي شوية...جات عيني في عينو...واقف من بعيد...يغزرلي...للحظة تمنيت انو كلشي صار مجرد حلمة...حلمة خايبة و باش نفيق منها...رغم لي صار الكل...لتوا منجمتش نستوعب انو فهد باش يعمل فيا هكا...زعمة شنية كان باش يصير...لو عشنا عكس هذا الكل...كان هو عرف بالصغير لي في كرشي و فرح بيه...كان صغيرنا بقى و عاش في وسطنا...شنية كان باش يصير ؟ لو علاقتنا ولات مكشوفة لناس الكل...و عطاني فرصة اني نحكي على حبي لاي حد يعرضني و نعيش فرحة كاملة...خسارتي لفهد...خلاتني نحس اني خسرت بابا للمرة الثانية...نخسر سند...و نبني آخر بمبادىء جديدة...اني نسلك ثنية غير لي كنت فيها..ثنية مفيهاش فهد...ثنية باش نتعلم منها كيفاش نعمل على روحي...و كيفاش ناخو قرارتي بعد توا...امتى نوافق و امتى نرفض...بعد توا...باش نتعلم نختار الصحيح من الغالط...من غير ما نشاور حد..حتى باش ناخو الحاجات لي نحبها و لي حرمت روحي منها قبل...يمكن خاطرني صدقت انو فهد يغنيني على كلشي في دنيا...فقت من سرحتي على صوتو يحكي
غسان:بعد الليلة...ترتاح ايامات اخرى...بعدها ترجعلي...و تعمل كنترول...واضح ؟
انا:باهي طمن...و مرسي برشا على كلشي عملتو معايا سي غسان
حط الكارت متاعو عالطاولة بجنبي...غزرتلها و عاودت غزرتلو...تبسم يحكي
غسان:غسان كهو
تبسمت بالوقت...و هزيت الكارت متاعو في يدي..غزرلي يحكي
غسان:كان حسيت روحك مش قد بعضك اطلبني...نجم نكون طبيبك...كيما نجم نكون صديق
انا:عيشك غسان...توا نعتذر منك...باش نطلع ناخو دوايا و نرتاح شوية
هزلي براسو باهي...و وقف...مدلي يدو...خذيت نفس و حطيت يدي في يدو...استندت عليها و وقفت...نحكي
انا:تصبح على خير
غسان:و انتي بخير
جبدت يدي منو...و وخرت لتالي...عطيتو بظهري و كبست على كرشي...توا بالظبط...ما عيني في حتى شي كان اني نطلع للبيتي و كهو...عالاقل نلقى حل للوجيعة هاذي...يدو رجعتني لتالي مع أول درجة...غمضت عينيا بالوقت...نعرف لمستو و قبضة يدو بالقدا...رجعني لتالي و دورني عندو...جات عيني في عينو...كبس عليا يحكي
فهد:ملقيتش طريقة أخرى ؟
تبسمت على جنب...و جبدت يدي منو...عديت عينيا على وجهو...نحكي
أنا:شفما فهد ؟
فهد:خليني انا نسألك المرة هاذي
أنا:علاش مزال عندك حق ؟
فهد:و باش يبقى عندي حق فيك ديما
انا:أسمعني فهد...مانيش ناقصتك توا...مرتك تستنى فيه...و هي أحق بيك توا...على هذاكا من غير ما تضيع وقتك معايا...خاطرك ماكش باش توصل لحتى شي
عدا عينيه عالكارت لي في يدي...و فكها مني في لحظة يحكي
فهد:شنية هاذي ؟
انا:الصبر يا ربي...ياخي انا مظطرة باش نجاوبك...اصلا انت علاش مزلت في جرتي لتوا ؟
فهد:ايجا معايا...لازمنا نحكيو
انا:اي بالطبيعة...ماك انت تقول و روجين تنفذ...ملا خليني نطمنك لي هذا الكل كان بكري...قبل اسبوع من توا...و روجين لي انت تعرفها بح...على هذاكا من غير ما تلفت الانتباه أكثر...و التهى بمرتك
خذيت نفس و عطيتو بظهري باش نطلع...و عاودت تلفت عندو...فكيت الكارت من يدو نحكي
انا:الكارت متاعي انا...و مبروك عليك مرة أخرى عزيزي
قربتلو أكثر...و عديت عينيا على وجهو...تبسمت على جنب نحكي
انا:تصبح على خير
كبست عليها في يدي...و عطيتو بظهري مرة اخرى...نرد في النفس ورا بعضو...عكس القوة لي كنت نمثل فيها قدامو...اول ما بعدت عليه...تكيت لتالي...و حطيت يدي على قلبي...نهدي في روحي...منعرفش كيفاش نجم نتحمل لي جاي...و لا حتى كيفاش نجم نعيش في الفيلا هاذي بعد توا...نعرف لي كل مرحلة داخلة ليها و كل خطوة نمشيها...اصعب من قبلها...نعرف لي حياتي ماهيش سهلة كيما كنت نستخايل...و لي عملو معايا خلاني نرجع سنين لتالي...لطفلة صغيرة تعمل في اول خطوة ليها...من غير ما تعتمد على حد و من غير ما تخاف من حد...نعرف انو الدنيا فيها حاجات أحلى يمكن منعرفهمش لتوا...و يمكن تخلي فهد عليا فيه خير ليا...اصلا هذا لي لازمني نقتنع بيه...و نقتنع انو طريقي صعيب...اما في الاخير باش ننقذ روحي...و نتخلص من حب فهد...متأكدة لانا نجم نبرا من الادمان هذا و نتغلب عليه...و نتحرر من كلشي مزال مقيدني لتوا...من الماضي...من فهد...و عيلة الصياد جملة.