كوكايين

الحلقة مئة و إثنان و عشرون

🔸️حلقة 122
🔸️فهد_يحكي:
خذيت نفس طويل...نغزر للباب لي تحلت قبل ما نكبس عالزناد...نزلت الفرد و تنهدت براحة...نغزرلها واقفة بالكاب دو بان...قحرتلي تحكي
روجين:شنية تحب زادة
عديت يدي على وجهي...للحظة حسيت راسي باش يطرشق...غزرتلو نحكي
انا:دور وجهك انت زادة
ياسين:الصبر يا ربي
روجين:شفمااا ياااخي ؟
قربت منها بالزربة...كبست على زندها و دخلتها..قحرتلها نحكي
أنا:لبااااس ماهوووو ؟ كيفاااش تحل ●●●● الباااب و إنتي في الحالة هاااذي...ياااخي ناوية تجلطني باش ترتاح...حل ●●● فمك
روجين:سيييبني...شمدخلك فيااا أنت...نحلها كيما نحب
كبست عليها اكثر و جبدتها معايا للبيت...دزيتها بعيد عليا شوية...و نزلت راسي نغزر لدبشها لي محطوط عالسرير...قحرتلها نحكي
أنا:البس فيييسع...باش تمشي معااايااا
روجين:منحبش...أنا باش نرجع للجاكوزي متاعي توا...أخرج و سكر الباب وراااك
أنا:روووجين...متركبهاااليش أكثر...تلبس دبشك و تخرج قداااامي...أحسن ما نعمل فيك شي توااا
روجين:شبيييك تصيييح علياااا ؟ أصلا شمدخلك فيااااا أنت...برااا التهى بأمورك و أخطاااني
أنا:متخلينيش نعاااود كلامي مرة أخرى
روجين:و الا شنوة باش تعمل ؟ تضربني ؟
خذيت نفس طويل و قربت منها...حطيت يدي على راسها من تالي و يدي لأخرى على خدها...عديت عينيا على تفاصيل وجها...قد ما لقيت روحي خايف عليها توحشتها بنفس الطريقة و اكثر...كبست عليها نحكي
أنا:روجين يا روحي...يزي من الأفكار الخايبة لي قاعدة تدور في مخك...خاطر مش وقتها جملة
روجين:شنية لي مش وقتو ؟
جبدت روحي منها و عديت يدي على وجهي...نحكي
أنا:شنية تحب مني توا ؟
روجين:حتى شي...أنا معاد نحب منك حتى شي فهد
أنا:البس دبشك خلينا نمشيو
روجين:مانيش جاية معاك...تنجم تكمل لي جيت عليه و اعتبرني مانيش موجودة هوني...خاطرني باش نعمل نفس الشي
كبست على يدي...خايف من روحي عليها...خايف نفقد أعصابي عليها و نخسرها اكثر من هكا...قربت منها شوية...نحكي
أنا:أعصابي توا متتحملش عنادك جملة...ملا باش تلبس و تخرج قدامي توااا...مدااامك خلطت عليا...ملا باش تمشي على أوامري أنا
روجين:اجبرني ملا
بعدتها بيدي...و هزيت الفاست متاعها من الفوتاي...و قربتلها...كبست عليها نلبسلها فيها...وين بقات تجبد في روحها بالوقت...جبدتها عندي و سكرتها من فوق للوطة قحرتلي تحكي
روجين:فااااش تعمل ياااخي ؟
كبست على يدها و خرجتها معاياا...وين بقات تجبد في روحها...منعرفش على روحي كيفاش وصلت لسويت كبست عالكارت و حليت الباب...دزيتها الداخل و خلطت عليه...دخل ياسين قبل ما نسكر الباب...غزرلها مصدوم يحكي
ياسين:شنية عملت فيييهااا ؟
روجين:يثبت في روحو مش أكثر...أصلا ينجم عليا أنا و كهو
قربتلي شوية...غزرتلي ندرا كيف...و كملت كلامها تحكي
روجين:أما الحقيقة أنت مجرد لعبة عند هارون...باش ينفذ أعمالو و الدليل هذا ماهوش باش ينظفك من الوسخ لي غطست فيه
مديت يدي ضربتها بالوقت...حطت يدها على خدها و هزت راسها...غزرتلي ندرا كيف...دزني بيدو و قرب منها...يحكي
ياسين:فهههههد...لباااااس ماااهو ؟
عديت يديا زوز على وجهي...نحس في روحي باش نفقد أعصابي أكثر...في الوقت لي قعدت تغزرلي من غير حتى كلمة...عدا صوابعو على شفايفها...يمسحلها في دمها و يحكي فرد وقت
ياسين:خلينا نمشيو من هوني
انا:ماهيش باااش تخرج
ياسين:مش على كيفك
انا:و مش على كيفك زااادة
ياسين:فههههد...مش وقت هبااالك جملة...خاااطرنا في مشكلة حقيقية توا
انا:برااااا ادخل للبيت أنتي
روجين:صدقني باش تندم على اللحظة هاذي...أكثر من أي شي آخر في حيااتك
حطت صوابعها على شفايفها و دخلت...مديت يدي ضربتها عالحيط لي بجنبي...محبيتش نوصل معاها لهوني و لا حتى نمد يدي عليها...قرب مني بالوقت...دزني لتالي يحكي
ياسين:شنية تستخايل في روحك تعمل ؟ يااااخي نورمال تمد يدك عليها ؟
أنا:أنت زاااادة تخمم كيما هي بالظبط
ياسين:عصبيتك هااااذي ماااهيش باش تنفعك...بالعكس باش تخليك تخسر أكثر...حتى كان العالم هذا الكل ضدك...أنت لازمك تنقذ روحك و متغرقش أكثر...و متنساش روحك أنت لي غلطت معاها قبل...انت وصلتها لهوني...و خليتها تحضر على هبالك أمس...اكا علاش معندكش حق باش تمسها و مهما كان قرارها بخصوصك المرة هاذي...الكل باش يعطيها الحق
أنا:أنا بحاجة إني نبقى وحدي...من غير ما تخلط عليا خليك معاها
خذيت نفس طويل و هزيت روحي خرجت...كبست على يدي بالوقت...لتوا مصدوم في روحي كيفاش ضربتها...أما بعد الأحداث لي صارت...منجمتش نتحمل كلامها أكثر من هكا...خاطر مدامني وصلت نكون لعبة عند هارون...كانت هي الدافع الأول لي خلاني نسلم روحي ليه و للجريمة لي قعدت مربوط بيها طول السنين هذوما...هي أكثر وحدة معندهاش حق في الكلام لي قالتو...و لي مانيش باش نسامحها عليه زادة...توا بالظبط بحاجة اني نبقى وحدي من غير ما نخمم في حتى شي...خاطر نحس في روحي باش نهبل...و خايف من روحي نهرد الدنيا أكثر من هكا...وين لقيت روحي بين خيارين و بين قرارين...بين اني نسلم روحي للواقع و نرجع للحفرة لي احتوتني طول السنين هذوما و لا نسمع كلام ياسين...نآمن بروحي رغم اللي صار الكل...رغم اللي قالتو هي زادة...و ننقذ روحي من هذا الكل حتى اذا خسرتها و ماهيش باش ترجعلي مرة أخرى...دورت راسي شوية نغزرلو...قعد بجنبي...و مد يدو لدبوزة خذا رشفة منها و تكا لتالي يحكي
ياسين:باش تبقى برشا هوني ؟
أنا:علاش خليتها وحدها
ياسين:متخافش عليها
أنا:محبيتش نتصرف معاها بالطريقة هذيكا...منعرفش كيفاش مديت يدي عليها...اما هي لزتني...تعرف بالقدا قداش نفد منو الموضوع هذا
ياسين:الأمور ماهيش باش تتحل بالطريقة هاذي...نتوما زوز لازمكم تقعدو مع بعضكم...و تحكيو في كلشي من الأول
أنا:ماهيش باش تسمعني و لا حتى باش تعذرني المرة هاذي...خاطرني ضريتها برشا
ياسين:هيا قوم توا...الجو بارد و اللي تشرب فيه ماهوش باش يدفيك
أنا:وين باش نمشي ؟
ياسين:تمشي باش تعتذر منها و ترتاح شوية...خاطرك تعبت برشا اليوم و غدوة عندنا برشا خدمة...هيا فيسع
انا:ماهيش باش تسامحني مرة أخرى
ياسين:فهد كلشي باش يكون مليح...و كيما كنت تحلم ديما...انا عندي ثقة فيك
أنا:خليك معايا...أنا بحاجتك ديما ياسين
قرب مني شوية و حل يدو...نزلت راسي نغزر لحجرة لونها غريب برشا...تبسم يحكي
ياسين:مرة لقيتها في الورشة عند بابا...قالي أنو النوع هذا يجيب الحظ و من وقتها و هي عندي لتوا
أنا:الأوبال
ياسين:كنت باش ننسى لأنت خبرة فيهم
أنا:بابا كان يحبو برشا
ياسين:خليها عندك
هزيت راسي غزرتلو مستغرب...تبسم و هزلي براسو ايه...يحكي
ياسين:أنت بحاجتها أكثر مني
مديت يدي شديتها عليها...كبست عليها و عنقتو بالوقت...حط يدو على ظهري يحكي
ياسين:أيااا برا لسويت متاعك توا...و رد بالك تغششها مرة أخرى
جبدت روحي منو و هزيتلو براسي باهي...خذيت نفس طويل و هزيت روحي طلعت متردد...منعرفش على روحي كيفاش نقابلها بعد اللي صار...و لا حتى كيفاش نبرر اللي عملتو...كان لازمني نشد روحي و منخليش عصبيتي تغلبني...اصلا هاذي أول مرة نحسها معادش تنجم تفهمني كيما قبل...حليت الباب و دخلت...طيشت الفايت عالفوتاي و كبست عالحجرة في يدي...منعرفش علاش حسيت روحي قويت بيها أكثر...حليت الباب شوية نغزرلها...غاطسة في نوم...من غير ما تلبس دبشها...لتوا باقية بالكاب...خذيت نفس طويل و قربت منها...قعدت على طرف السرير نغزرلها...مديت يدي شوية و عديت صوابعي على الجرح لي فوق شفايفها على جنب...وين قلبي وجعني عليها بالوقت...منعرفش شبيني وليت هكا...طول عمري كنت نخاف من اي حد يضرها و لا يمد يدو عليها في غيابي حتى أمها..كيفاش نوصل نعمل هذا الكل فيها...كيفاش نخليها تخاف مني و نضرها لهدرجة نزلت عليها أكثر...دوب بستها من الجرح و نزلت بصوابعي على خدها نحكي
أنا:روجين فيق عزيزتي...هيا حل عينيك...فيق يا روحي
حلت عينيها شوية شوية...غزرتلي ندرا كيف...من غير حتى كلمة...قربتلها أكثر نحكي
أنا:منقصدش لي عملتو بكري يا روحي و مانيش باش نبرر عملتي زادة...أما الليلة نحبك تبقى معايا...خاطرني بحاجة قربك...تنجم تتغشش مني مبعد
روجين:شصار ؟
أنا:حتى شي...نحب نرتاح شوية و كهو
حطيت راسي بجنبها و عديت عينيا على تفاصيل وجها...نحكي
أنا:كان صار و منجمتش نخرج من المستنقع لأنا فيه نحبك تتخلى عليا روجين...في حالة إني منجمتش ننقذ روحي...أبعد عليا جملة...خاطرني أنا منجمش نعمل هذا الكل أما إنتي تنجم...توا ولات عندك عيلة كيما كنت تحلم ديما و عندك أب يحميك مني زادة
مدت يدها بالوقت حطتها على خدي...كأني كنت بحاجة الحركة هاذي منها...باش نحس بالأمان أكثر...كبست عليا تحكي
روجين:أنا ماني بحاجة حتى حد يحميني منك...أنا بحاجة فهد لي حليت عينيا عليه و كهو
أنا:و أنا بحاجة نحس اني مفقدتش بنتي و ما فكها مني حد
روجين:أنت كنت عيلتي الوحيدة...هاذي الحقيقة باش تبقى ثابتة مهما صار
انا:نجم نبقى معاك الليلة ؟
قربتلها أكثر من غير ما تجاوبني...وين حسيت بأنفاسها ضربت في وجهي...خذيت نفس من ريحتها...و مديت يدي شوية...دورتها على ظهرها و كبست عليها أكثر..لين عدمت المسافة لي تفصلني عليها...حطيت راسي على صدرها و غمضت عينيا بالوقت...هارب من الأفكار اللي قاعدة تدور في مخي...و من الماضي و اللي نحس فيه زادة...لتوا نحس في روحي مرعوب من فكرة اني باش نخسرها حتى مستنيتش انها تجاوبني...خاطرني توا بالظبط نحب نرتاح و كهو...عديت يدي على ظهرها مع يدها لي تغرست في شعري...ما نحب نتذكر حتى شي من اللي صار قبيل و لا اللي عملتو معاها... أصلا متوقعتش أنها باش ترضى تسمعني و لا تخليني معاها مرة اخرى...فقت من سرحتي على صوتها تحكي
روجين:حرارتك مرتفعة برشا...فهد تسمع فيا ؟
كبست عليها أكثر...خايف من فكرة انها باش تبعد عليا...خذيت نفس طويل نحكي
انا:خليك معايا و كهو
مدت يدها شوية...حطت الغطا فوقي...فرد وقت تعدي في يدها على وجهي و تحكي
روجين:لازم ياسين يشوفك توا
انا:منحبش
حليت عينيا شوية...دوب غزرتلها و عاودت سكرتهم نحس في راسي رزين برشا...و منجمتش نقاوم أكثر لدرجة منعرفش كيفاش غطست في النوم و لا بالمعنى الصحيح غطست في الكوابيس متاع العادة...من حادثة بابا...للحادثة لي خلاتني ندخل لعالم جديد ما نعرف عليه شي...عالم كانت معادلتو صعيبة برشا بالنسبة ليا معادلة ظطريت اني نسلم روحي فيها...باش نكسبها هي أما توا قاعد نخسر فيها و في روحي فرد وقت...و لأول مرة نلقى روحي خايف لهدرجة...خايف من فكرة إني نلقى روحي وحدي من غير دعم...من غيرها و من غير خويا زادة...خايف منجمش نخرج من الحفرة لي طحت فيها مرة أخرى.
#ياسين_فهد_روجين❤