كوكايين

الحلقة مئة و إثنان و أربعون

🔸️حلقة 142
خذيت نفس طويل و جبدت روحي منها...كبست على يديها زوز و غزرت لعينيها نحكي
انا:أمي أنا مانيش ضد في أنكم ترجعو لبعضكم..بالعكس انا تفهمت لي تعديت بيه قبل و الظروف لي كنت مجبورة تعيشها...منحبكش تضيع حياتك أكثر من هكا...أما فرد وقت لازمك تعذرني...خاطرك إنتي تخليت عليا في أهم مراحل حياتي...و كنت قاسية معايا في أصعب أوقاتي وين كنت بحاجة شكون يحميني...رجوع بابا خلى عندي ثقة مشى في بالي اني فقدتها جملة
بعد سنين لقيت سند آخر من غير فهد...أكا علاش منحبش نتحرم منو...منحبش كي تصير مشكلة بيناتكم تحملني أنا الذنب و تبعدني عليكم أكثر من هكا
صوفيا:مستحيل يا روحي...أنا مستحيل نبعدك عليا مرة أخرى
كبست على يدي...باستني منها...و عاودت غزرتلي تحكي
صوفيا:خاصة و صغرونتي باش تولي أم
أنا:خايفة برشا بخصوص البيبي
صوفيا:علاش ؟
أنا:ما نحب يصير حتى شي يخليني نخسرو
صوفيا:متخممش بالطريقة هاذي...نعرف لإنتي قوية و باش تعطيه من وقتك و جهدك يا روحي
أنا:بلكشي منجمتش نحافظ عليه كيما يلزم
صوفيا:متخممش بالطريقة هاذي...و كلشي باش يكون مليح يا روحي
أنا:إن شاء الله أمي
عنقتها مرة أخرى...و غمضت عينيا نستحلى في قربها فقت من سرحتي على صوت فهد لي قرب مني يحكي
فهد:روجينتي لباس ياخي ؟
هزيتلو براسي إيه...نزل عندي بالوقت...عدا يدو على خدي يحكي
فهد:استفقدتك
انا:معدتي تحيرت عليا و قعدت نحكي أنا و أمي شوية اكا علاش طولت
فهد:هيا توا...هارون يستنى في جواب صوفيا
أنا:أكيد باش تكون موافقة
ضحكت و انا نغزرلها...كبس على يدي و وقفني معاه يحكي
فهد:متعبش روحك
باسني من خدي و حط يدو على جنبي...اول ما رجعنا حسيت بابا داخل بعضو...تبسمت نحكي
انا:شفما بابا ؟
ابراهيم:تحيرت عليكم
انا:تهنى احنا كنا نحكيو شوية...هكا أم و بنتها
ابراهيم:صااار ناويين عليا من تواا
ضحكت و عنقتو مى اخرى...جبدت روحي كي قرب منا هارون...هاذي اول مرة نشوفهم قراب لبعضهم...صافحو يحكي
هارون:مفما حتى حد باش يحافظ على صوفيا قدك انت
ابراهيم:انت نجحت في انك تحافظ عليها و على عيلتك سنين طويلة
هارون:رد بالك عليهم
هزلو براسو باهي و كبس على يدو أكثر...حضنو بالوقت غزرت لفهد و ياسين لي واقفين جنب بعضهم...لسلطانة لي تسأل في فتون على حبالتها و لجواد لي يلعب مع لجين و شايخ...غريبة برشا كيفاش تبدل الوضع و ولا فما روح داخل الفيلا هاذي...ولات فما فرحة كانت غايبة قبل...فقت من سرحتي على هارون لي شاورلنا لطاولة آخر مرة قعدت عليها كانت العواقب سيئة برشا...و من وقتها متوقعتش اني نقعد معاهم فرد طاولة...قربت معاه لبلاصتي متاع العادة...جبدلي الكرسي قعدت تبسمت بالوقت...خاطر أكثر بلاصة كنا نتعاركو فيها و نطلع أنا الرابحة...وين يسكت و يسلم...كيما هوني شهدت على أكثر من حاجة خايبة...منهم بلقيس..خذيت نفس طويل محاولة مني باش نطرد الأفكار الكل من راسي و تبسمت نحكي
انا:شقولكم نعديو الليلة هوني كلنا
سلطانة:فكرة حلوة عزيزتي
لجين:شقولك إنتي و فتون تعديو ليلة في بيتي...مع جواد
أنا:حبيت الفكرة
فتون:و أنا زااادة
ضحكت بالوقت..وين حسيت الزوز تكبسو و قعدو ساكتين من غير حتى كلمة...دورت راسي نسمع في فتون تحكي
فتون:خلي جواد مع ياسين أحسن...هكا نقعدو مرتاحين
ياسين:بالله على أساس مستانس يرقد عندي
فتون:يعاونك فيه فهد...أحسن ما تعديو السهرة من غير ما تعملو شي
فهد:عندي فكرة أحسن...جواد تهتم بيه سلطانة و إحنا نخرجو نسهرو برا...عندنا برشا على قعدة مع بعضنا
ياسين:ماهيش فكرة خايبة...عالأقل نبدلو جو
مديت يدي قرصتو من جنبو...غزرلي بالوقت...قحرتلو نحكي
أنا:سهرة شنية لي تحكي عليها ؟
فهد:ياخي أنا سألتك على السهرة متاعكم
أنا:ماكش باش تمشي لحتى بلاصة...تسهرو هوني و هوكا جواد معاكم
فتون:خالتي تاعبة شوية...متنجمش تهتم بجواد وحدها
ياسين:هاني باش نهتم بيه أنا...باهيشي هكا
فتون:عيشك يا روحي
تبسمت و انا نغزرلها و تلفت لفهد لي قاعد يقحرلو قربتلو أكثر نحكي
انا:أنت زادة لازمك تبقى هوني باش تهتم بالبيبي متاعك
عدا يدو على كرشي و تبسم...أصلا حسيتو تفرهد شوية غزرلي يحكي
فهد:تعبت روحك برشا اليوم
انا:أنت بجنبي و الكل معانا...متخافش عليا
فهد:و رغم هكا نحبك تهتم بروحك أكثر...وضع البيبي مليح أما التعب الزايد يضرك إنتي
أنا:باش ناخو حذري أكثر نوعدك يا روحي
فهد:عيش صغرونتي
أنا:عبيلي صحني أكثر
تبسم و هزو من قدامي يعبي فيه...حتى انا حسيت شاهيتي تحلت و منحبش نفوت الفرصة خاصة في الجو هذا...محسيتش بالوقت كيفاش تعدا...هزيت روحي و طلعت لبيتي..مزال كلشي كيما خليتو قبل بدلت دبشي بالزربة...قبل ما يخلط عليا و يفسد مخططنا...أصلا صار لي توقعتو...حل الباب و دخل عندي...دور يدو على ظهري و جبدني عندو...بستو قبل ما يقول حرف و دزيتو لتالي على غفلة نحكي
انا:تصبح على خير يا روحي
حليت الباب و خرجت نجري...منعرفش على روحي كيفاش وصلت لبيت لجين حليت الباب و دخلت...شوية و خلطت علينا فتون...عدينا السهرية نحكيو شوية في أمور العرس و شوية على الحبالة...أصلا كنت بحاجة لقعدة هكا بعد الأحداث لي تعدات علينا...فرد وقت استغربت لي حد فيهم ما جا و لا حتى هو استفقدني بميساج...الله أعلم فاش غاطسين توا...محبيتش نحيرهم بأفكاري و إكتفيت إني نتمتع بسهرتي و جو اللمة معاهم و كهو.