كوكايين

الحلقة الثالثة عشر

🔸️حلقة 13
🔸️روجين_تحكي:
هزيت راسي نغزر لروحي...و مديت يديا زوز حطيتهم على كرشي...دموعي تحصرت مرة اخرى و لقيت روحي رافضة الافكار لي قاعدة تدور في مخي...هاربة منها هاربة من الواقع المر لي قاعدة نعيش فيه...و لا نحاول نتعايشو...مكبشة في طرف الخيط لي مزال يربط بين ضعفي و قوتي...خذيت نفس طويل...و تلفت على صوت الباب...جات عيني في عينو...تبسمت على جنب مكنتش نتوقع العكس...حطيت الشكال من يدي...و قربت منو...وقفت قدامو نحكي
انا:يا ريت تتعلم دق الباب مرة اخرى
هزني و حطني...من غير حتى كلمة...حطيت شعري على جنب...مديت يديا نحي في الكوليي...و نحكي فرد وقت
انا:تاعبة و نحب نرقد...و في رايي مفما حتى شي نحكيو فيه بعد توا
هزيت راسي...غزرتلو...باقي واقف في بلاصتو...من غير حتى كلمة...قربت منو شوية...وقفت قدامو بالظبط تبسمت على جنب نحكي
انا:لااا عاااد...لهدرجة منجمتش تبعد عليا...حتى في ليلة عرسك
جبدني من يدي في لحظة...دورني و لصقني عالباب غمضت عينيا بالقاوي...من الوجيعة لي حسيتها في كرشي...و حليتهم على صوتو يحكي
فهد:شنية تستخايل في روحك تعمل ؟
انا:نفس الشي لي عملتو انت
فهد:من وين تعرفو ؟
انا:يهمك برشا تعرف ؟
فهد:روجييييين ؟
انا:زعمة نعرفو من قبل ؟ و نطلع خاينة كيفك بالظبط ؟
قص عليا ضحكتي...كي كبس على يديا زوز...نزل عليا أكثر...عدا خشمو على رقبتي...غمضت عينيا بالوقت محاولة مني باش نسيطر عاللي نحس فيه...نسيطر على ضعفي من قربو...من ريحتو لي تخلي الحرب لي داخلي تهدا...اما توا بالظبط...معادش عندي الحق فيه معادش عندي الحق في نفس واحد منو...هو بيدو خلق اكبر حاجز بيناتنا مستحيل يجي نهار و يسقط...حليت عينيا على شفايفو لي تحطت جنب وذني...يحكي
فهد:متحاولش تلعب معايا...على خاطرك باش تطلع خاسرة في الاخير...صدقني يا روجين...كان نحس مجرد احساس كهو...انو فما شكون يحوم بيك...و لا قلبك دق لشكون غيري...وقتها...مانيش باش نظطر نحكي معاك و نوضحلك الامور...على خاطرك تعرف بالقدا شنية لي باش يصير صغرونتي
تبسمت بالوقت...اصلا كنت متوقعة منو هذا الكل...كيما نعرف وين يحب يوصل بالظبط...خذيت نفس نحكي
أنا:شنية مزلت تحب عندي ؟
جبد روحو شوية...من غير ما يرخف يديه عليا...غزرلي ندرا كيف...غزرة منجمتش نوصل للمعنى لي وراها...هكا هو ديما...من غزرة يخليك في دنيا لخرى...و من غزرة تلقى روحك في جحيم...من غزرة تفهم قداش هو يحبك و نفس الغزرة توصلك الف معنى آخر...حتى منعرفش علاش سألتو...و لا شنية نستنى من جوابو خاطرني نعرف لي ماهوش باش يبدل حتى شي...اما الصمت متاعو كان واضح منو...انو مينجم يقول حتى حرف...اصلا معندوش عذر باش يبرأ روحو من اللي صار...غزرت لعينيه...نحكي
انا:شبيك سكت ؟ تحبني نجاوب في بلاصتك فهد ؟
فهد:معطيتكش الحق باش تحكي
انا:معندكش حق من أصلو...انت توا بالظبط...تحب تضرب عصفورين بحجر...تكون معاها و معايا فرد وقت...مرة في سريرها و مرة في سريري
فهد:رووجين
انا:شنوة مش صحيح ؟ حتى تكون عطيت صورة باهية للعالم لي برا...فرد وقت تكون رضيت روحك
فهد:مش صحيح...على خاطرك تعرف بالقدا شكونك انتي بالنسبة ليا
انا:طلعت منعرفش...بعد لي ريتو منك...و بعد لي خليتني نعيشو...طلعت منعرفكش يا فهد...أما للأسف طلعت نعرف روحي...حتى تعرف شنية اكتشفت ؟
بقى يغزرلي من غير حتى كلمة...تبسمت على جنب و قربتلو اكثر...حطيت شفايفي على وذنو نحكي
أنا:أنا طلعت نسخة منك
جبدت روحي شوية...و عديت عينيا على ملامح وجهو لي تبدلت...خذيت نفس نحكي
أنا:طلع عندي...نفس الغرور...نفس التكبر...و نفس الكبرياء زادة...لدرجة نجم نتخلى على كلشي في لحظة من غير ما نخمم مرتين...كيفك بالظبط...على هذاكا كلامك و أفعالك...ماهي باش تبدل حتى شي بعد لي صار...و اقل حاجة تنجم تعملها على خاطري توا...انك تخرج من حياتي جملة
فهد:تحلم...ريت انتي بديت معايا ثنية هاذي و باش تكملها للأخير يا روجين...من اول ليلة جمعتنا قتلك اني قاعد نمشي في طريق نار...اما كبشت في يدي...على هذاكا مستحيل تنجم تسيبني توا
انا:كبشت فيك خاطرني ستخايلت لأنت باش تكون قد كلمتك...و توفي بوعدك...على كل مانيش باش نحاسبك على اللي عملتو و لا حتى على لي باش تعملو بعد توا على خاطر...لي خسرتو جرايرك...مستحيل يتعوض سيبني توا و أرجع لمرتك
مد يدو لاخرى باش يحطها على خدي...دورت وجهي بالوقت نحكي
انا:اخرج من هوني فهد
نزل عليا شوية...حط جبينو على راسي...صوت أنفاسو قوا على خدي مع كل كلمة...قاعد تخرج من شفايفو
فهد:مانيش باش نفلت يدك...و مانيش باش نسمح لحد يدخل لحياتك...تو يجي نهار و تعرف الحقيقة الكل تعرف شبيني اخترت الثنية هاذي و علاش...اسئلتك باش تاخو جوابها في الوقت المناسب يا روحي...اما نحبك تحط حاجة في مخك...طول ما انا عايش جنبي ماهوش باش يجي على جنبها و كلامي لي قلتو اول مرة مانيش باش ندور عليه و مانيش باش نعاودو..حط في مخك لانا مستحيل نمس وحدة غيرك...حتى مرتي
غمضت عينيا على آخر كلمة...كبست على صدرو بيديا زوز و دزيتو لتالي نحكي
انا:ماااكش باش ترضيني من زوز حروف...أصلا مستحيل نصدقك بعد توا...و صدقني باش نخرجك من حياتي...و نعيش بالطريقة لي نحب عليها زادة...حتى لو كلفني الامر اني نخرج من الفيلا هاذي جملة...و امورك الشخصية مع مرتك ماهيش باش تهمني و معادش نحب نسمعها
عديت يديا زوز على وجهي...محاولة مني باش نتحكم في اعصابي لي حسيتها باش تتلف...حتى دموعي منحبهاش تنزل قدامو مرة اخرى...خذيت نفس طويل و تلفت عندو نحكي
انا:أكيد الجماعة اللوطة تحيرو عليك...من غير ما تدخل لعندي بعد توا...انت برا شوف حياتك و خليني انا نختار ثنيتي
كبس عالبونية متاعو...و ضربها عالحيط بجنبو...يحكي
فهد:معاااادش تقولي برا شوف ■■■■■ حياااتك اغزرلي هوني
جبدني من يدي...ضربت فيه بالوقت...نزل بيدو لاخرى على ظهري من تالي...متعمد باش يشل كل حركة فيا قحرلي يحكي
فهد:اعتبرها أول مرة و آخر مرة نلقى شكون بجنبك...و آخر مرة
كبس يدي بالوقت...لين خلاني نسكر عينيا من قوة الوجيعة...نزل عليا اكثر يحكي
فهد:و آخر مرة تحط يدك في يد شكون و الا متنجمش تتوقع شنية نجم نعملو...حتى حرام دكتور كيفو يموت جرايرك
حليت عينيا نغزرلو...عرفت منو لي تأكد من هويتو قبل ما يطلع عندي...قحرتلو نحكي
انا:ما تنجم تعمل حتى شي يا فهد...على خاطر وقتها انا لي باش نحطمك...من غير حتى ما نشفق عليك...انا خسرت 5 سنين من عمري و مانيش مستعدة نعطيك اكثر...من توا انا باش نعيش لروحي و كهو
جبدت روحي منو و كبست على يدي...عطيتو بظهري نحكي
انا:متخلينيش نكرهك اكثر...على خاطر المرة هاذي حتى الكره باش يولي خسارة فيك...اخرج من بيتي و حياتي فهد...بعد توا ماكش أكثر من ولد خالي
كبست على يدي أكثر...حسيت بدموعي لي هبطت تجري على خدودي...من القهرة لي حسيتها...لدرجة منجمتش نتلفت عندو و لا نغزر لوجهو...خرج من البيت من غير ما يقول كلمة اخرى...كبست على كرشي و هزيت روحي لبيت البانو...كبست بيديا زوز عالرخامة و حليت الما...نغسل في وجهي ورا بعضو...هزيت راسي شوية...نغزر لروحي...نغزر لحالتي قبل 5 سنين...لأول ليلة جمعتنا...اول ليلة سلمت فيها كلشي لفهد...من غير ما نخمم في اللي جاي...و لا في شنوة لي باش يصير غمضت عينيا نتذكر في كلامنا لي مزال محفور في ذاكرتي لتوا
فهد:ششش وفااات...هدي روحك يا عمري
أنا:ف..فهد...ماكش باش تخبر امي باللي صار...مش هكا
غرس يدو في شعري...و لزني ليه أكثر...باسني من جبيني يحكي
فهد:شبي حبي خايفة ؟
انا:خاطرني مانيش فاهمة لي قاعد يصير
عدا صوابعو على شفايفي و نزل بيهم لرقبتي...يحكي
فهد:منحبكش تخمم في اللي صار...أما تأكد أنو الليلة هاذي كافية باش تخليني نستغنى على كلشي عشتو قبل
هزيت روحي شوية تقعدت...و عديت عينيا على وجهو نحكي
انا:تقصد لأنت عملت هذا الكل مع غيري ؟
جبدني من يدي في لحظة...رجعني لحملتو و تبسم يحكي
فهد:مانيش باش نحكي عاللي عشتو قبل...أما نحبك تحط في مخك صغرون...مستحيل يجي نهار و نحط يدي على وحدة غيرك...فرد وقت ما نحب حتى حد يعرف بعلاقتنا...و ما نحب حتى حد يقربلك و لا يحوم بيك...يمكن لي صار توا غالط...أما مندمتش عليه...و مانيش باش نجبرك على حاجة إنتي متحبش عليها على خاطر ثنيتي صعيبة...طريقي كلها نار...و يمكن في أي لحظة تتحرق معايا يا روجين...كان إنتي
حطيت صوابعي على شفايفو و عديت عينيا على وجهو...نحكي
أنا:أنا معاك ديما يا فهد...مهما كانت ثنيتك...اللي يهمني انك تبقى معايا و بجنبي كيما كنت تعمل ديما...و مهما صار معاك...متفلتش يدي...خاطرني باش نضيع من بعدك
كبس على يدي...باسني منها...مرتين و غزرلي...يحكي
فهد:امتى فلتها انا ؟
انا:و لا مرة و ماكش باش تفلتها جملة...خاطرك تحبني كيما نحبك أنا بالظبط
فهد:هههههه باهي صغرون...ريض توا
أنا:باش تهزني كيما وعدتني ؟
فهد:هاك لقيت فرصة باش تاخو لي تحب عليه...باش نهز حبي...إنتي ريض كهو
حليت عينيا مروهجة و مديت يديا زوز...نزلت كلشي كان عالرخامة على الارض...هاربة من كل ذكرى تجمعني بيه...حتى تراص صوابعو لي على يدي...حاولت نغسلها باش تتنحى عليا...وقفت على الدم لي حسيتو نزل بين ساقيا...نزلت راسي نغزر لروبة الباج لي ولات حمرة كبست على كرشي بالوقت...مش مصدقة انو الغش خلى حالتي توصل لهوني...كبست بيديا زوز عالرخامة نوازن في روحي...باش منطيحش...حتى لقيت روحي بين نارين....كان يدخل اي حد توا...مانيش باش نسلك جملة...غمضت عينيا بالقاوي محاولة مني باش نلقى حل قبل ما نتحط تحت أمر الواقع.
غمضت عينيا بالقاوي و عاودت حليتهم...نرد في نفس ورا بعضو...اصلا متوقعتش باش يصير هذا الكل...حتى تهديدو كان واضح...واضح لدرجة...نعرف انو حرب تحلت بيناتنا...و ماهيش باش تهدا الا بعد ما يسلم حد فينا للآخر...و لا حتى ينسحب من الوسط...بالنسبة ليا مفماش خسارة اكبر من ولدي لي ضحيت بيه...و بعد تصرفو الليلة تأكدت انو مستحيل ينجم يكون بو...و انو كلامو على روحو قبل طلع صحيح...كبست عالرخامة بيدي...و نحيت الكعب...و دخلت للبيت...سكرت الباب من داخل...و حليت الروبة...حتى هي حسيتها خنقتني قربت من القارد روب..نجبد في دبشي ورا بعضو..كلشي يهمني...اني نتخلص من الحالة لي حطيت روحي فيها خذيت نفس طويل...نظفت حالتي و بدلت دبشي كيما جا...حتى منعرفش اذا باش يقوى النزيف و لا ينقص أما كلشي يهمني توا اني نجم نصبر على هذا الكل عالاقل...لين تفرغ الفيلا...و نجم نخرج...ترميت في وسط سريري...و كبست على كرشي...يمكن نستهل الوجيعة هاذي...خاطرني سلمت في ولدي...كان فما احتمال يصير عكس هذا الكل...لاول مرة نتمنى انو الوقت يرجع لتالي...مكنتش باش نسلم فيه...لحظة وحدة كانت كافية باش تخليني نرجع في قراري...و نكبش في ولدي اكثر...مديت يدي نمسح في دموعي لي قوات أكثر...قوتي الكل طاحت في لحظة...و منجمتش نتحمل اكثر...حتى منعرفش كيفاش باش نواجه هذا الكل وحدي...و لا حتى شنوة باش نعمل بعد توا...اصلا معادش نصدق حتى كلمة منو...نعرف لي العرس ماهوش لعبة...و متأكدة لي باش يجمعهم نفس الفرش...اكيد ماهوش باش يفرط في ليلة عرسو...و لا حتى في الطفلة لي عندو شهور معاها...الاصوات اللوطة بدات تهدا مع صوت شهقاتي لي نقصت...مديت يدي نمسح في دموعي...و هزيت راسي شوية على صوت الباب لي تخبط في لحظة...كبست على كرشي...و تقعدت...منعرفش كيفاش هزيت روحي...و قربت من الشباك...هزيت الريدو شوية...نغزرلو...يحل في كرهبتو بقيت نغزرلو...لين مشى...منعرفش شنية لي حسيتو وقتها...و لا حتى علاش حسيت روحي هديت أكثر يمكن خاطرني لتوا ما تعودت على حتى وحدة تكون قريبة منو غيري انا و كهو...اصلا سنين هذوما الكل...و لا مرة حسيت بوجود مرا اخرى في حياتو...و لا حتى كان مهتم بغيري...لي صار آخر فترة قلب كلشي في لحظة...نزلت ريدو...و حطيت يدي على كرشي...خذيت نفس و قربت من الكوفوز جبد دوايا من سطوشتي شربت حربوشتين ورا بعضهم...و رجعت لفرشي...حليت القجر متاع تابل دونوي لي بجنبي...و جبدت اول و آخر ايكو...تنهدت بحصرة و حطيت راسي عالمخدة...للحظة تمنيت نحس بيه مرة أخرى...أما حتى هاذي أمنية مستحيلة...منعرفش قداش تعدا وقت بالظبط...و لا حتى فاش كنت نخمم...فقت من سرحتي على صوت تليفوني...مديت يدي شوية جبدتو من تابل دونوي ضيقت عينيا و أنا نغزر للميساج لي وصلني منو...جيت باش نرجعو...أما فضولي غلبني...و لقيت روحي نحل في أول ميساج منو...بعد أسبوع كامل...خذيت نفس و انا نقرا فيه <<مخليتكش و مانيش باش نخليك...تنجم ترقد توا و ما تخمم في حتى شي...إنتي متاعي كيما أنا متاعك إنتي و كهو >> كبست عالتليفون و طيشتو من يدي...نحكي
انا:مانيش متاعك يا ساقط...محسوب كي خليت مرتك وحدها...باش تخليني نشفق عليك...و نرجعلك...الله لا يردك يا فهد...مستحيل نسامحك بعد توا
حطيت راسي عالمخدة و كبست عالايكو في يدي غمضت عينيا...منحبش نخمم في حتى شي من اللي صار...اصلا الوجيعة لي في كرشي خدرتني...و خلاتني نغطس في النوم...من غير ما نخمم في حتى شي آخر.