كوكايين

الحلقة مئة و إحدى عشر

🔸️حلقة 111
🔸️روجين_تحكي:
نزلت اللوطة...نغزرلهم الكل حاضرين عالطاولة...الغريبة فهد مجاش لتوا...منعرفش فاش غاطس لهدرجة...حتى هارون نحسو يظغط عليه في الخدمة بلعاني باش يتأكد من اخلاصو ليه...اول ما قعدت...خلطت عليا هي و بنت خالتها...نفخت بالقاوي و دورت وجهي...منحبش نغزرلها و لا حتى نشوفها هوني...غزرلها يحكي
هارون:وينك لتوا عزيزتي ؟
بلقيس:هاني جيت...سارة تحب تمشي...حاولتها باش تبقى معايا اكثر...كان مفماش مانع
هارون:اكيد تنجم...انتي فرد منا توا و تتنجم تطلب لي تحب عليه
بلقيس:عيشك عمي
هارون:و انتي روجين ؟
انا:شنوة ؟
هارون:معادش سمعنا اخبار على سي غسان...ان شاء الله لباس ؟
انا:لباس
هارون:ملا خليه يشرفنا في اقرب فرصة
انا:منظنش باش يوافق
هارون:والسبب ؟
انا:خاطر اي حد يدخل لهوني ماهوش باش يحس بالراحة
صوفيا:روجيين
انا:قلت حاجة غالطة ياخي ؟ على عينك العيلة هاذي قاعدة تكبر بطريقة غالطة...خاصة بوجود عباد من غير قيمة
هارون:قوووم من الطااولة
انا:شكونك انت باش تقيمني ؟
هارون:رووووجين
انا:نظن لانا قاعدة في حق أمي...مش في حقك أنت كان اذا هي زادة باعت روحها ليك
هارون:صوفيااا...تصرف معاها احسن ما نعمل شي تندم عليه
دورت راسي شوية غزرتلها...نستنى فيه تجاوبو...جات باش تحكي...قصيت عليها كي هزيت روحي وقفت و غزرتلو نحكي
انا:كيما توقعت...خاطرها حتى هي تحب تتخلص مني
هارون:صوفيا ماهيش مسؤولة عالوسخ لي خلفو بوك سنين لتالي
نزلت راسي غزرتلها...بالمعنى الصحيح غزرت لعينيها للحظة توقعت انها بدات تتبدل...أما لي نسيتو انو المرا لي تخلات عليا سنين لتالي...مستحيل تاقف معايا توا خذيت نفس نحكي
انا:كان يطلع كلامك صحيح على بابا...نطمنك لانت متختلفش عليه برشااا...عالاقل يمكن هو مكانش قتال ارواح و موصلش للمنصب لانت فيه توا بالاحتيال و النصب...اكا علاش رد بالك تقول كلمة اخرى في حقو و الا هذا الكل باش يتعاود لفهد و ياسين...وقتها نشوفو شكون فينا اللي باش يبقى عليها الطاولة هاذي
خذيت نفس و هزيت روحي طلعت...منعرفش كيفاش وصلت لبيتي...نطرت الباب بالقاوي...و عديت يديا زوز على وجهي...نحس في روحي باش نطرشق من كلامو و المنطق لي تكلم بيه...قربت نكسر في كلشي جا على يدي مفماش نبرد شوية من اللي صار...اصلا مستحيل نبقى هوني بعد توا...حتى كان لزم نعيش وحدي...هزيت راسي على حلة الباب...قحرتلها نحكي
انا:شتعمل هوووني انتي زااادة ؟
بلقيس:هدي روحك عزيزتي...انا و انتي مزال بيناتنا برشا حديث
انا:اااخرج من بيتي...اخرج توا و لا باش تندم اكثر
بلقيس:على شنوة مزلت معتمدة ؟ على فهد و لا ياسين ؟
انا:ااااخرج من هووني
بلقيس:زعمة فهد كي يعرف لانتي طيحت صغير منو للمرة الثانية شنية باش يعمل ؟
هزيت عينيا في وجها...مصدومة من اللي سمعتو منها كيفاش لحقت تعرف هذا الكل...اصلا كيفاش تعرف لانا طيحت صغير من قبل...من غير غسان و فتون لي يعرفو كلشي من الاول و فهد في آخر فترة...قربت مني شوية و تبسمت تحكي
بلقيس:شبيك سكت...مممم باهي عندك حق تسأل كيفاش عرفت...بالنسبة لصغرون الأول...فهد حكالي كلشي
عديت عينيا على وجها...خايفة من دقات قلبي لي قوات تفضحني قدامها أكثر من هكا...فرد وقت منجمتش نستوعب أنو فهد يحكيلها حاجة كيما هاذي حاجة تخصنا إحنا زوز و كهو...تبسمت تحكي
بلقيس:قتلك من قبل...أنو فهد مش كيما كنت تتوقعو على خاطر مصلحتو يعمل كلشي و مستعد يرميك أكثر من مرة في النار باش يمنع هو
أنا:شنية تحب مني توا ؟
بلقيس:سؤال هذا كان باش ينفعك قبل...أما توا باش نشوفو عرض آخر...مثلا فهد كي يقرا الورقة هاذي كيفاش باش تكون ردة فعلو
جيت باش نحكي أما سكت...كي دخل لبيتي على غفلة أصلا منعرفش إمتى وصل...غزرلها و عاود غزرلي يحكي
فهد:شنية لي قااعد يصيير هوني ؟
بلقيس:شقولك تسألها هي ؟
فهد:إنتي شتعمل هوني ؟
سألها و قرب مني شوية...عدا عينيه عالبيت...و حط يدو على خدي يحكي
فهد:لباس ماهو ؟
عديت عينيا على وجهو من غير حتى كلمة...أصلا ملقيتش شنية نقول في الوضع هذا...تلفت عندها يحكي
فهد:أخرج من هوني
بلقيس:باش نخرج...أما خليني نسلمك هاذي ساعة
هزيتلها براسي لا...ضيق عينيه و شدها عليها...قلبي خض بالقاوي في اللحظة لي حلها...كبس عليها يقرا فيها بالساكت...وين حسيت روحي باش ندوخ من الفازة و الخوف اللي تملكني...هز راسو بالوقت...غزرلي ندرا كيف...ملامح وجهو لي تبدلت في لحظة...خلاتني عاجزة باش ننطق و لا حتى باش نبرر لي صار..منجمش نفضح لجين و منجمش ننكر الدليل لي بين يديه زادة أصلا متوقعتش باش نتحط في الموقف هذا جملة و لا حتى نظطر نواجهو بيه...فكرة إني طيحت صغير للمرة الثانية مستحيل يتقبلها و مستحيل ننجم ننكرها و نخلي لجين في وسط الحرب هاذي...خاصة معاه هو قرب مني شوية يحكي
فهد:شنية هذا ؟
دورت راسي شوية...غزرت لبلقيس لي تبسمت على جنب...تستنى فيا باش نجاوبو...كان لازمني نعمل حساب أنو هي باش توقعني بالطريقة هاذي و تخليني بين نارين...إما نفضح كلشي و هذا مستحيل يصير و لا نكمل في اللي بديتو و نكون خسرت كلشي فرد مرة خذيت نفس طويل...نحكي
أنا:خ..خلينا نحكيو وحدنا
فهد:اللي نقراا فيييه توااا صحيح ؟
أنا:فههد...أسمعني أماانك
مديت يدي باش نمسو...جبد روحو بالوقت...فازة رعبتني أكثر و خلات أكثر من احتمال يجي لمخي
تلفت لبلقيس يحكي
فهد:أخررج من هووني إنتي
بلقيس:ساعة لتالي تمدح في خطيبها لوطة...و متحبش تجيب منك صغار زادة...حتى فرطت فيهم من غير ما تشاورك
فهد:أخررررج من هوووني...الأمووور هاااذي متهمكش أخرج و لا باش يكون عندي تصرف آخر معاك
غزرتلي ندرا كيف و خرجت...تلفت عندي بالوقت..طيش الورقة عليا يحكي
فهد:مزلت نستنى في تبرير منك
أنا:م..معنديش تبرير
فهد:معندكش تبرير...تحب تفهمني أنك عااودت صنعتك من غيير ماااا تخممم فيااا
أنا:ف..فهد...يزززي أمااانك
عدا يدو على وجهو...بدا يخرج من سينتو من ملامحو لي تبدلت...بعد شوية و عاود رجعلي في لحظة...شدني من شعري يحكي
فهد:كيفاااش تعمل فيااا هكااا...كيفاااش تتصرف في حاااجة كيما هااااذي وحدك...لهدرجة هااان عليك مرة أخرى...لهدرجة محنش قلبك عليه
أنا:سيبني وجعتني
كبس عليا أكثر...كأنو يقاوم في روحو باش ميمدش يدو لأخرى عليا...غزرلي ندرا كيف يحكي
فهد:إنتي أسوء من اللي توقعت...حتى أسوء من أمك زااادة
أنا:متقوولش كلام تندم عليه مبعد
فهد:علااااش إنتي ندمت كي قتلتلي ولدي مرة أخررررى...خممت فياااا قبل ما تعمل هكا...و لا على خااااطر مزلت تشوفني منصلحش و ميجيش نولي أب
أنا:ياااا فهههد سيبني وجعتني
فهد:إنتي ما ريت منها شي الوجيعة...أصلا كان لازمني نتوقع هذا من أول مرة عرفت لإنتي قتلت ولدك من غير ما تخمم فيه...منستغربش إذا عاودتها...أما كااان أنا منصلحش نكون أب..نطمنك أنو حتى في هاذي تشبهلي و وحدة كيفك ميجيش تكون أم زاادة و اللي عملتو باااش تخلص حقو الدوبل المرة هاااذي
رخف يدو على شعري و وخر خطوة لتالي...باقي متردد بين يخرج و لا يعاود يسألني...أصلا صياحو عبى البيت كيما آخر مرة و أكثر...فرد وقت ملقيتش بشنية ندافع على روحي...خاطر من شيرة عندو حق في إحساسو...و من شيرة أخرى معندوش حق خاطرو لتوا حابسني في الظلام معاه...مد يدو في وجهي مرة أخرى لي خلاني نوخر لتالي بالوقت...كبس عليها و نزلها...غزرلي ندرا كيف و عطاني بظهرو...عفس عالورقة...و هز روحو خرج...خلطت عليه بالوقت...على أمل إني نحاول نلقى مخرج من غير ما نجبد لجين في الموضوع...أما لقيتهم الكل في وجهي منهم هارون...جيت باش ننزل وراه شدتني من يدي تحكي
صوفيا:شفمااا ؟
أنا:سيبييني...حاجة متخصكش
بلقيس:خليني نحكيلهم أنا
دورت راسي غزرتلها مصدومة...أصلا ولا مرة توقعت نتفضح قدامهم بالطريقة هاذي...تبسمت تحكي
بلقيس:بنتك طيحت صغير من سي راجلي...على فكرة الصغير الثاني...خاطر الأول طاح في ليلة عرسنا
جيت باش نحكي...أما سكت على أقوى كف خذيتو منها...لين حسيت روحي نزفت...صدمتها خلاتها تزيدني كف آخر بالوقت...و دزتني لتالي تحكي
صوفيا:كيفاااش تعمل فينا هكا ؟ كيفااش تخليه يلعب بيك بالطريقة هاذي و تخون في خطيبك معاه...ياااخي مشفعتش من اللي عملو فيك
سلطانة:سيبهااا صوووفيااا...قبل ما تحاسبها...لازم يتحاسب معاها هو زادة
جبدت روحي منها بالوقت...لا نحب نبرر و لا نقول حرف...غزرتلي تحكي
بلقيس:خبرهم زادة لي نتوما...عايشين كيما أي زوز معرسين من سنين طويلة
عديت عينيا عليهم الكل...حتى من لجين حسيتها تصدمت...هارون كان فاهم كلشي من الأول و هذا واضح من غزرتو و الهدوء متاعو...تلفت باش ننزل شدتني من شعري بالوقت تحكي
صوفيا:في بااالك بااش تمنع بالساااهل
تلفت عندها باش نمنع روحي...غزرتلي بحقد كبير تحكي
صوفيا:طلعت بالرسمي الوسخ لي خلفو بوك وراه...توا فهمت شي اللي خلى سي فهد يكبش فيك هكا...صحيح فكك من الملجأ...أما ما تفرق شي على تربيتهم...يا ريتني خلصت منك قبل ما نوصل نعيش النهار هذا
بقيت نغزرلها من غير حتى كلمة...كلامها كان كافي باش يخليني نقطع صلتي بيها لآخر نهار في عمري...جبدت روحي منها...محاولة من باش نفك شعري من يديها دزتني بالوقت...وين فقدت توازني مع أول درجة..طيحة قوية خلاتني نفقد القدرة حتى باش نحرك روحي...و راسي رزن بصفة غريبة...لدرجة حسيت أنفاسي تسكرت و أفكاري ضاعت وين لقيت روحي في نفس الكابوس متاع شهور لتالي...لقيت روحي في القاع.
#روجين_فهد💔