كوكايين

الحلقة مئة و سبعة عشر

🔸️حلقة 117
🔸️فتون_تحكي:
هزيت راسي شوية...نثبت في البيت مرة أخرى...وين حسيت روحي بديت نتخنق أكثر...من أمس منعرفش وين انا...و لا شنية لي قاعد يصير معايا بالظبط...غزرت لشباك لي مسكر جملة...كيما حاولت نحلو منجمتش أصلا منعرفش وين جابني بالظبط و لا وين البلاصة لي احنا فيها...هزيت روحي وقفت...دخلت لبيت البانو...و شيعت راسي نغزر لشباك لي بعيد عليا برشا...رجعت للبيت بالزربة و هزيت الكرسي لداخل...حطيتو و طلعت فيه...محاولة مني باش نشوف شنية لي قاعد يصير برا أما وصلتش...رجعت شعري بيديا زوز...لازمني نلقى حل و لا باش نموت هوني...جبت مخدة حطيتها و طلعت فوقها...دوب وصلت ليه...حليتو شوية نثبت في اللي نشوف فيه...من غير كرهبتو و شوية حطب محطوط على جنب...ما نجمت نلمح شي آخر حتى إني فهمت اللي البلاصة هاذي بعيدة برشا و ما تخطر على بال حد تهزيت و تحطيت مع صوتو لدرجة فقدت توازني و جيت بين يديه...كبس عليا و حطني عالأرض يحكي
نبيل:تنجم تفهمني فااش تعمل ياخي ؟
كبست على يديا زوز و دزيتو بكل قوتي لتالي...نحكي
أنا:ابععععد علياااا...هاااذي آخر مرة تحااول تمسني
نبيل:هدي روحك عزيزتي...ميجيش لي تعمل فيه
أنا:ميمشيش في بااالك باش تحبسني هوني..متأكدة لي ياسين باش يلقاني و باش يخليك تندم على كلشي تعمل فيه يااا واطي
بعدتو بيدي و خرجت...خلط عليا بالوقت و سكر باب البيت بيدو يحكي
نبيل:مزال بكري...ياخي في بالك باش نسمحلك تمشي بالسهولة هاذي...براا شد فرشك توا
قرب من الكوافوز...هز الصينية في يدو و غزرلي يحكي
نبيل:لازمك تاكوول توا
قربت منو بالزربة...ضربت الصينية بكل قوتي...طاحت منو يدو بالوقت...هديت عليه نضرب فيه ورا بضعو و نصيح فرد وقت
أنا:أخررررج علياااا...اااخرج من هوووني...الله لا تربحك يا نبيل...انااااا كاان نموت مااانيش باش ناكل من يدك
كبس على اكتافي بالوقت...و دورني لتالي...لين حسيت بقوة الحيط على ظهري...نزل عليا شوية...غمضت عينيا متقززة من انفاسو لي قوات في رقبتي...دقات قلبي قوات و خلاتني عاجزة قدام قوتو هو...بدني رعش مع ملمس لحيتو على وجهي...و هو يحكي
نبيل:إنتي متعرفش الحرب لي حليتها داخلي يا فتوون متنجمش تخليني بعد ما خليتني نحب نعيش مرة أخرى...أنا منجمش نستخايل حياتي من غيرك...و منجمش نخليك ورايا و نكمل ثنيتي و انتي مش موجودة فيها
حاوط وجهي في لحظة...حليت عينيا بالوقت نغزرلو مش فاهمة اللي يعمل فيه و لا وين يحب يوصل...حتى غزرتو مش مفهومة...كبس عليا أكثر يحكي
نبيل:أنا حبيتك و مزلت نحبك فتوون
كبست على يديا زوز...كي حسيتو قرب أكثر باش يبوسني...دورت وجهي بالوقت و جبدت روحي منو بالسيف نحكي
أنا:ابعععد عليااااا...رد بااالك تخمم تمسني مرة أخرى و أخرررج من هوني...أخرررج عليااا
تلفت نكسر في كلشي جاا على يدي...معادش نجم نتحكم في اعصابي أكثر من هكا...قرب مني باش يشدني...جبدت روحي لتالي بالوقت و قعدت عالأرض حطيت راسي بين ساقيا...لا نحب نشوفو و لا نسمعو زادة...هز روحو خرج من غير حتى كلمة أخرى...عديت يديا زوز على وجهي نحكي
أنا:يااا ربي عااوني عااوني...معادش نجم نتحمل أكثر من هكا
تكيت راسي لتالي...نخمم فيهم...زعمة استفقدني ؟ نعرف لي ماهوش باش يسكت...خاصة بعد آخر فترة أصلا بالسيف باش ستانس يرقد وحدو...حتى ياسين و كلامو متنحاوش من مخي...يا ريتني صارحتو باللي صار و خبرتو لي هو رجع...أكيد راهي برشا حاجات تبدلت توا...تلكمت على روحي أكثر لدرجة منعرفش كيفاش غفيت...حليت عينيا كي حسبت بالباب تحل مرة اخرى...دخل عندي بصينية جديدة...حطها على جنب و قرب مني...نزل قعد بجنبي...و غزرلي ندرا كيف يحكي
نبيل:باش تعدي بقية وقتك الكل قاعدة هكا
أنا:نحب نمشي من هووني...أنا عندي صغير يستنى فيا نبيل...منجمش نخليه ورايا
مد يدو شوية...بعدلي خصلات شعري...وخرت لتالي اكثر...تبسم يحكي
نبيل:كان هذا لي مقلقك...نجيبهولك توا
أنا:لاااا...رد بااالك تقرب من ولدي و لا حتى تحط يدك عليه
نبيل:ملا باش تظطر تنساه من توا
أنا:انت شنية تحب مني ؟
نبيل:نحبك إنتي...نحبك تفسخ كلشي من مخك و تعيش معايا أنا و كهو
أنا:مستحييل...تسمع فياااا...مستحيل يكوون فما شي بيني و بينك...أنا نحب ياااسين...ياسين و كهو و مانيش باش نحب غيرو في حياتي
سكت على كف قوي كليتو منو...لدرجة معادش حسيت بخدي...مديت يدي مروهجة...نمسح في دم لي نزل من شفايفي...دورت راسي غزرتلو مصدومة...هاذي آخر حاجة توقعت أنو يعملها...جيت باش نحكي كبس على شعري بالوقت...يحكي
نبيل:آخرر مرة تقول الكلااام هذا في وجهي و الا وقتها منكتفيش بيك و كهووو...إنتي باش تظطرني نقتلو قدام عينيك زادة
انا:وقتها باش تكون مظطر تقتلني معاه
كبس على وجهي زادة...وين حسيت انفاسي تقطعت من كبسة يديه...هزيت عينيا في وجهو...يمكن هاذي اول مرة بعد اللي تعدا علينا الكل...يغزرلي بالطريقة هاذي لدرجة خفت من اللي قاعد يدور في راسو و من اللي باش يعملو بعد توا...حتى اكثر حاجة تأكدت منها من تصرفاتو توا...انو ينجم يضرني من غير ما يخمم مرتين...غمضت عينيا بالقاوي...صورة ياسين كانت حاضرة بيناتنا و خلاتني نخاف أكثر من فكرة إني نخسر كلشي في لحظة...خاطرني نعرف كان نبيل يطبق جزء صغير من اللي يخمم فيه توا...يكون قضى عليا و على ياسين فرد وقت...يكون قضى على حياتي لي ستخايلت انها ولات كاملة مع ولدي و الراجل لي حبيتو حياة مثالية...إحتمال متشوفش النور مرة أخرى و تكون نهايتها هوني...حليت عينيا شوية شوية و خذيت نفس طويل...مديت يدي بالسيف حطيتها على يدو نحكي
انا:ن..نبيل سيبني وجعتني
غزرلي ندرا كيف و رخف يديه بالوقت...جبد روحو مروهج يحكي
نبيل:ف..فتون ؟
مد يدو شوية وخرت لتالي مصدومة...خايفة يمد يدو عليا مرة أخرى...عدا صوابعو على شفايفي يحكي
نبيل:منقصدش...منقصدش نحط يدي عليك...منعرفش كيفاش عملت هكا والله
عديت عينيا على وجهو...مستغربة من تصرفاتو...وين تقريبا بديت نستوعب اللي قاعد يصير و لي قوتي معاه ماهيش باش تجيب نتيجة جملة...خذيت نفس نحكي
انا:ب..باش تعدي حياتك الكل تضرب فيا هكا ؟
نبيل:لااا...لا انا مستحيل نضرك...منعرفش كيفاش صار هكا يا روحي
انا:ب..باهي ميسالش...أنا نحب ناكول شوية و نرتاح تعبت برشا
نبيل:باهي إيجا معايا
كبس على يدي و وقفني معاه..دوب نجمت نمد الخطوة معاه...غزرتلو نحكي
أنا:منحبش نقعد في البيت هاذي وحدي
هزلي براسو باهي...كبس على صينية و خرجني معاه هزيت راسي نغزر لصالة عالأغلب الدار هاذي في الجبل و بعيدة برشا عالمدينة...قعدت عالفوتاي من غير حتى كلمة...حطها عالطاولة يحكي
نبيل:تحب حاجة أخرى ؟
هزيتلو براسي لا...مديت يدي بالسيف...كبست عالشوكة نحط في اللقمة بالقدرة...منعرفش كيفاش نجمت نعديها دقايق و رجع بجنبي يحكي
نبيل:حط هاذي على شفايفك
شديت عليه رزمة القلاص الصغيرة و حطيتها فوق الجرح...غمضت عينيا موجوعة عاللخر...عدا صوابعو على خدي يحكي
نبيل:منقصدش باش نوجعك سامحني يا روحي
أنا:ميسالش...المهم منعديش حياتي محبوسة هوني
نبيل:لا متخافش...باسبوراتنا باش تحضر اليومين هذوما...وقتها نمشيو من هوني جملة
أنا:شنوووة ؟
نبيل:نمشيو لبلاصة أحسن من هاذي...بلاصة ما فيها حتى حد غيرنا يا روحي
هزيتلو براسي باهي...منجمش نعاندو توا و لا حتى ناخو و نعطي معاه في الكلام...لازمني نلقى حل باش نخرج من هوني...و لا حتى نحاول نوصل لياسين حطيت الشوكة من يدي و خذيت رشفة من كاسة العصير نحكي
أنا:نجم نرتاح هوني
هزلي براسو باهي و جبد روحو مني...تسطحت لتالي من غير حتى كلمة أخرى...حط الملحفة فوقي و بقى يدور مرة يحضر في الماكلة...مرة يبربش في تليفونو غزرت ل cheminée لقيتها من غير حطب...عديت يدي على خدي نحكي
أنا:ب..بردت برشا
نبيل:نزيدك غطا ؟
انا:لا...شبيها cheminée طافية...ياسر برد هوني
نبيل:باهي عزيزتي..إرتاح إنتي...هاني باش نحاول نشعلها
أنا:باهي
بقيت نغزرلو...نفخ بالقاوي كي ملقاش حطب...قرب من كنتوار باش يهز تليفونو...كبست على كرشي موجوعة نحكي
أنا:ن..نبيييل...اجرييلي أمانك
قرب مني بالزربة...قعدني و قعد بجنبي مصدوم يحكي
نبيل:شبيك ؟
أنا:منعرفش موجوعة عاللخر
نبيل:شد أشرب شوية
أنا:ت..تصرف نبيل...لا يزي مرضت هوني و دنيا باردة عاللخر معاادش نجم نتحمل أكثر من هكا
نبيل:باهي هدي روحك تو نرجعلك
هز روحو خرج من غير ما يخمم...وقفت بالزربة...هزيت تليفونو نحل فيه...دخلت بعضي كي لقيتو بكلمة السر عديت يدي على شعري...رجعتو لبلاصتو و عاودت تسطحت قبل ما يدخل...غمضت عينيا و عملت روحي راقدة...خاطرني بالرسمي منحبوش يحكي معايا و لا حتى نشوف وجهو...دوب ريتو و هو يحط في الحطب باش يشعل cheminée دقات قلبي قوات كي حسيت بيه يقربلي...كبست على طرف المخدة...مع صوابعو لي تمشي و تجي على خدي...منجمتش نحل عينيا و لا حتى نبعد عليه...خوفي كبر اكثر مع صوتو و هو يحكي
نبيل:ماانيش باش نخليك تبعد عليا مرة أخرى مستحيل نسمحلك تمشي...انا تعبت برشا باش لقيتك...تعبت من غيابك...هاذي اول مرة نحس انو نور رجعتلي و ماهيش باش تخليني حتى مانيش باش نخليك تتغشش مني مرة اخرى يا روحي
خذيت نفس بالسيف...حسيت روحي تخنقت لدرجة منجمتش حتى نتنفس...معناها يعمل في هذا الكل جيست خاطرو يستخايل فيا مرتو مش أكثر...تقريبا بديت نفهم تصرفاتو من اول مرة قابلتو فيها...خوفو عليا و ليلة لي ضرب فيها سرفور زادة...جيست خاطرو طيح عليا صينية من غير قصد...برشا فازات لقيت روحي نعاود فيهم و وقفت على كلام ياسين لي حذرني منو اكثر من مرة...مديت يدي بالسيف...حطيتها على رقبتي...نتحسس في الكوليي متاعي...كاني نستنجد بيه و هو بعيد عليا...اصلا معنديش أمل آخر غيرو هو نحبو يلقاني و يخرجني من هوني كهو...حليت عينيا اول ما حسيت بأنفاسو في وجهي...جبدت روحي بالوقت و كبست عالكوليي أكثر...نحكي
أنا:فاااش تعمل ياخي ؟
نبيل:أنا بحاجتك فتون...بحاجة قربك ديما
أنا:يزززي كهو أماانك...أعصابي معاادش تتحمل أكثر من هكا..كبست على شعري بيديا زوز لتالي و رجعتو لتالي وين حسيت غزرتو تبدلت فرد مرة...ضيقت عينيا مستغربة نحكي
أنا:ش..شبيك ؟
كبس على وجهي بالوقت لدرجة حسيت بالجرح وجعني مرة اخرة قحرلي يحكي
نبيل:هوكا مقصرش و خلى تراص ملكيتو عليك
نطرتلو يدو بالوقت و رجعت شعري على رقبتي نحكي
انا:نحي يدددك عليااا
جبد الكوليي من رقبتي في لحظة لي خلاني ندزو بالوقت...فاازة خلاتني نهبل و منجمش نتحكم في أعصابي أكثر من هكا...مستحيل نعدي ليلة أخرى معاه تحت سقف واحد...هزيت الكاس من طاولة ضربتو بيها نحكي
أنا:قتلك معااادش تحط يدك عليااا...أنااا فتوون مش نووور...مررتك مااتت و تهنااات من واااحد مريض كيفك
هد عليا مع آخر كلمة...كبس على رقبتي و رجع بيا لتالي...طحت و طاح فوقي بالظبط...لحظة وحدة كانت كافية باش تخليني بين يديه و بين مجهول يفصلني عليه دقايق و كهو...غمضت عينيا بالقاوي و عاودت حليتهم...مديت يديا زوز حطيتهم على صدرو نبعد فيه عليا...منجمتش نتحمل قربو أكثر من هكا و لا حتى انفاسو لي تضرب في وجهي...دوب خذيت نفس نحكي
أنا:س..سيبني يااا وااطي...ابععد عليا
فقدت قوتي مع يدو لي كبست على يديا زوز...حصرني لدرجة منجمتش حتى نتحرك تحتو و تخنقت أكثر مع صوتو يحكي
نبيل:انتي تلز فيااا باااش نضرررك...انتي تعمل في هذاااا الكل باش تخرج الوحش لي فيااا
أنا:سيييبني نبييل...أنااا ما عملت شي...أنت لي متحبش تفهم أنك غااالط و انو اللي قاااعد يصيير ميجيش...انااا ولا مرة كذبت عليك قبل...من الأول كنت تعرف لانااا نحب ياااسين
نبيل:معاااادش تقووول اسمووو قدااامي...معااادش تجبد سيرتو مررة أخرى
انا:ب..باهي...بااهي سيبني
فشلت من مقاومتو و من الحديث معاه...و غصتي تحولت لدموع...هبطو من غير ما نحس بيهم...جبد روحو مني وقف و وققني معاه يحكي
نبيل:قوووم
هزيت روحي بالسيف...نغزرلو مزهبلة و خايفة فرد وقت...خفت حتى من غزرتو ليا...هاذي أول مرة تصير معايا حاجة هكا...اول مرة نلقى روحي في مواجهة شكون و بين اني نستسلم و لا نقااوم...كبست على يدي كي قربلي شوية...عدا صوابعو على خدي يحكي
نبيل:نعتبر رووحي ما سمعت شي و بعد توا تقتنع بفكرة لانتي متاعي...و باش تكمل معايا حياتك الكل
انا:م..منجمش...لاازمك انت تقتنع لأنا عندي عيلة تستنى فيا  يا نبيل
نبيل:عيلة ؟
ضحك على جنب و قربلي اكثر...نزل عليا شوية و غزرلي ندرا كيف يحكي
نبيل:تسمي هاذيكا عيلة ؟ إنتي معندكش عيلة فتون إنتي مجرد لعبة في عيلة الصياد...لعبة ولدهم الكبير يرميك وقت يشبع منك و يرجعلك كي يتوحش بدنك خااطرو يعرف لإنتي رخيصة قدامو و متنجمش تقاوم قربو منك
مديت يدي بالوقت...ضربتو كف بكل قوتي...بكل غل حسيتو ناحيتو لدرجة منعرفش من وين استمديت قوتي هاذي...قحرتلو نحكي
انا:كااان فماااا شكوون الرخيص هوني...هو أنت...تعرف علاااش ؟ خاااطرك تحاول تمد يدك لمرت راجل و تجبرها تعيش معاك...حتى منستغربش أنو مررتك مااتت جرايرك...جرااير تفكيرك المسخ حتى انها ارتاااحت منك و من كلشي يتعلق بيك
سكت كي تهجم عليا مرة أخرى...أما المرة هاذي أقوى من قبل...المرة هاذي منجمتش ندافع على روحي و لا حتى نمنعو...أصلا اول مرة يضربني حد و بالطريقة هاذي...كبست بيدي عالارض...محاولة مني باش نهز روحي شوية...نزل عندي بالوقت...شدني من شعري يحكي
نبيل:أناا مقتلتهاااش...مش بلعاااني تسمع فيااا...كااان حااادث مجرد حااادث أماااا هي لي تخلااات عليااا...هي لي هزت صغيري معاهااا و مشااات...خلااتني من غير ما تخمم تعطيني فرصة أخرى و إنتي زااادة عملت كيفها إنتي زااادة محبيتش تعطيني فرصة و اخترتو هو...بعد اللي عملو فيك الكل...بعد ما طلقك و طيشك و حب غييرك...فااااش خير مني هو انططططق ■■■■ انطططق
مديت يدي بالسيف...نمسح في الدم لي هابط من خشمي...وجيعة قوية شدتني في كرشي و في بدني الكل من الضرب متاعو...منجمتش نجاوبو و لا حتى نرد عليه...أصلا دوخة قوية شدتني و منجمتش نهز راسي من الارض...حتى دموعي شاحو على خدي...و ملقيتش قوة باش نبكي عاللي قاعد يصير فيا...مديت يدي بالسيف...حطيتها عالكوليي لي طاحت من يدو و هو يضرب فيا...كبست عليها و غمضت عينيا...للحظة فقدت الأمل و خفت أكثر من اللي باش يعملو فيا أكثر من هكا هزيت عينيا في وجهو...مع لمسة يدو لي تبدلت...كأنو بدا يفيق على وضعو و برد فرد مرة...يحكي
نبيل:ف..فتون...منقصدش لي عملتو...منعرفش كيفاش ضربتك...أنا مستحيل نعمل حاجة هكا يا روحي
نزل عليا بالوقت...هزني بين يديه حطني عالفوتاي يمسح على وجهي و يحكي فرد وقت
نبيل:فتوون ساامحني يااا روحي...سامحني أمانك
دورت وجهي بالوقت...منحبش نغزرلو أكثر من هكا..بعد عليا...كأنو يفركس على حاجة...جاب البوات فرماسي في يدو و رجع عندي يحكي
نبيل:متخاافش...إنتي باش تكون لباس
مد يدو بالوقت...يمسح في الدم بالقطن...أصلا معادش نحس بالوجيعة من بدني لي تخدر...جبد روحو مني على صوت تليفونو...كبس عليه و خرج من صالة يحكي هزيت روحي بالسيف...قربت من ال cheminée هزيت حطبة من اللي حطهم عالارض...كبست عليها بكل قوتي...و أنا نسمع فيه يحكي
نبيل:فااش تعمل غادي ؟
خذيت نفس طويل و كبست عليها اكثر...أول ما قربلي مديت يديا زوز و ضربتو بيها لراسو...وخر لتالي مروهج قربتلو بالزربة و ضربتو مرة أخرى...طاح عالفوتاي مروهج لي خلاني نزيدو ضربة اخرى لراسو...طاحت من يدي كي حسيتو داخ...جبدت روحي منو و قربت من الكنتوار بالزربة...هزيت تليفونو و مفاتحو...حليت الباب بالسيف و خرجت...برودة قوية ضربت في وجهي كبست عالمفاتح أكثر و حليت كرهبتو...ركبت نفركس على تليفوني بالزربة...حسيت روحي إرتحت كي لقيتو حليتو بالوقت مصدومة من كمية الميساجات و المكالمات لي وصلتني...خذيت نفس طويل و طلبتو جيت باش نحكي...خرج بالوقت..سكرت الباب من داخل و نزلت تليفون من يدي باش ميشلقش بيه...رميتو في وسط الكرهبة...و كبست على تليفونو...خاطر تليفوني مربوط بتليفون ياسين و عالأغلب ينجم يلقاني بيه أصلا هذا الامل الوحيد لي بقالي توا...ضرب يديه الزوز عالبلار...وجهو بالدم...نسمع في يحكي
نبيل:انزززل
خذيت نفس طويل و حليت الباب خاطر مقاومتي معاه توا ماهيش باش تجيب نتيجة جملة...حطيت تليفونو في يدو...قربلي أكثر...سكر الباب و كبس على يدي يمشي فيا وراه...وين طاوعتو من غير حتى كلمة أخرى
دخلت وراه مترددة...خايفة من انو يعاود لي عملو بكري أصلا لتوا نحس في خشمي ينزف...خذيت نفس طويل نحكي
أنا:ش..شنوة باش تعمل توا ؟ تعاود تضربني ؟
نبيل:إيجاا أقعد
قربت شوية...نمد في الخطوة بالسيف...قعدت عالفوتاي و تكيت لتالي نحكي
انا:ي..يدي توجع فيا
نبيل:مزلت باش نصدقك أنا توا
أنا:مانيش نكذب...أنت لي ضربتني بكري...شنية كنت تحبني نعمل...نخليك تقتلني ؟
نبيل:مانيش باش نقتلك...حتى منعرفش كيفاش مديت يدي عليك
أنا:نبيل أنا موجوعة بالحق
قرب مني شوية...كبس على يدي و هزلي مريولي شوية حتى انا استغربت من الزروقية لي ريتها...غزرلي ندرا كيف يحكي
نبيل:رد باالك تتحرك...مكاانش حساابك باش يكون أقوى من هكا
هزيتلو براسي باهي...رجع بالقلاص في يدو...شديتو عليه نحكي
أنا:نحطو وحدي
نبيل:هيا فيسع...تدخل للبيت و معادش تخرج منها
أنا:ماااكش باااش تحبسني فيهااا
نبيل:هيااا قوووم
جبدني من يدي لأخرى يكركر فيا...دخلني للبيت لأخرى و سكر الباب...ضربت يدي عليها نحكي
انا:نبيل حل البااااب...حل امااانك
نبيل:اناا مانيش مجرم فتوون...مقتلتهاش كيما الكل متوقع
سكت بالوقت و حطيت راسي عالباب...نسمع فيه يحكي
نبيل:حتى معرفتش نحب غيرها طول السنين هذوما لين جيت إنتي...لأول مرة نحس نور مزالت عايشة و لا أنا نجم نعيش حياتي عادي كيما الناس الكل..كان عندي أمل لهذا الكل باش يصير...أما حتى إنتي رفضتني و عملت كيفها...ياخي لهدرجة طلعت خايب في نظركم
أنا:نبيل أنا مرفضتكش...و بالعكس أنت مش خاايب كيما قاعد تقول توا...بااهي نعرف روحي غلطت كي حكيت معاك أكاكا...أما لازمك تستوعب أنو اللي قااعد يصير غاالط...حياتك متاقفش عند نور و لا عندي...حتى انت تستحق شكون تحبك و تكمل حياتك معاها صدقني باللي تعمل فيه أنت باش تخسر برشا...باش تضرني و تضر روحك معايا
بقى ساكت من غير حتى كلمة...حطيت يدي على الباب نستنى فيه يحكي...اما قال حتى حرف آخر...خذيت نفس نحكي
أنا:ن..نبيل انت تسمع فياا يااخي
ضربت يدي على الباب مرة اخرى...دموعي نزلو بالوقت و منجمتش نتحمل اكثر من هكا...أصلا معادش عندي طاقة باش ناقف على ساقيا...فرد وقت خايفة من انو يرجع للكرهبة و يسكر التليفون مرة اخرى...خاطر مستحيل يلقاني حد و أنا في البقعة هاذي...كبست على القلاص و قعدت على طرف السرير...يدي نتفخت اكثر و زراقت فرد وقت...تكيت راسي على حرف السرير...و رجعت بذكرياتي سنين لتالي...منعرفش علاش اصلا لقبت روحي نستحضر في حاجات فات عليها برشا وقت...هاذي ثاني مرة نخاف من المجهول لهدرجة حتى حسيتها ليلة باردة عاللخر...تشبه لليلة لي توفات فيها امي و خلاتني هي زادة...ليلة لي بقيت فيها وحدي...من غير ما يكون معايا حد...لتوا نتذكر حضنها الدافي لي رقدت فيه آخر مرة...حياتي تقلبت اكثر بعد ما مشات منها هي...و طول السنين هذوما متوقعتش اني نفرح مرة اخرى...و لا تكون عندي عيلة...حتى ياسين متوقعتش يرجع لحياتي بعد ما خرج منها برضايتو هو و لا حتى يجي نهار و يحبني بالطريقة لي حبيتو بيها جبدت الكوليي من مكتوبي...كبست عالقلب لي خلاها تتحل...عديت صوابعي على أسمائنا لي محفورة فيها و اسم جواد توا...لي منعرفش حالتو...زعمة رضع ؟ قاعد يبكي توا...بلكشي مرض...اصلا وقت يبدا يمرض حد ما يفيق بيه غيري...رغم نهرف لي هو في أمان مدام بوه معاه...تهزيت و تحطيت في لحظة...من فكرة انو يكون ضرو حتى هو...جرد فكرة خلاتني نهبل اكثر من قبل حاولت نحل الباب اكثر من مرة...عيطت...بكيت أما شي كأنو مش هوني جملة...وخرت لتالي كي حل الباب قحرلي يحكي
نبيل:ميزيتش توا ؟
أنا:نحب نخررج من هووني...معااادش نجم نتحمل أكثرر من هكااا...معااادش نجم نبقى هوووني أكثر ياااخي متحسش انت...متفهمش...مااانيش باش نحبك و مستحيل يجي نهااار و نحبك فيه
نبيل:هيااا ايجا
أنا:وين ؟
نبيل:مش تحب ترجع لعيلتك ؟
بقيت نغزرلو من غير حتى كلمة...منعرفش علاش مصدقتوش...و لا علاش استغربت من كلامو...هزيتلو براسي إيه نحكي
أنا:ا..انت بالرسمي باش تخليني نمشي ؟
نبيل:اما إنتي باش تعطيني حاجة مقابل هذا
انا:ش..شقصدك ؟
قربلي شوية و مد يدو بالوقت...عدا صوابعو على خصلات شعري يحكي
نبيل:إنتي باش تعطيني ليلة وحدة...ليلة وحدة تكفيني باش نكمل حياتي و انتي ترجع لحياتك
وخرت خطوة لتالي بالوقت...متوقعتش جرأتو توصل لهوني و لا حتى يطلب مني حاجة كيما هاذي...خذيت نفس نحكي
انا:انت أحقر من اللي توقعت
نبيل:خمم بالقدا هي ليلة وحدة كهو و تنجم ترجع لحياتك كأنو ما صار شي
أنا:مستحيل نخليك تحط يدك عليا و لا حتى تنفذ لي في مخك يا وااطي
نبيل:ملا باش تظطر تكون ليا بالسيف عليك و لآخر نهار في حياتك
قربلي خطوة أخرى لين عدم المسافة لي تفصلني عليه وقف قدامي بالظبط و غزرلي ندرا كيف يحكي
نبيل:القرار بيدك إنتي و قدامك وقت كافي باش تختار كان تحب ارتاح من الجروح لي في بدنك قبل
مديت يدي بالوقت...ضربتو كف آخر...تبسم على جنب و عاود غزرلي يحكي
نبيل:خمم بالقدا عزيزتي...ليلة وحدة نحبك تعطيني فيها كلشي...قلبك...حبك و بدنك...ليلة سرها يبقى بيني و بينك كهو و نوعدك معاادش تشوف وجهي مرة اخرى في حياتك جملة
بقيت واقفة نغزرلو من غير حتى كلمة كاني نسمع و مانيش نسمع...كرشي وجعتني من الخوف لي حسيتو من كلامو و من اللي يخمم فيه...خاطر هاذي آخر حاجة نخمم نعملها في حقي و حق ياسين زادة...حليت عينيا شوية شوية...نحس في بدني مدقدق مش نورمال منعرفش كيفاش تعدات ليلة هاذي...عديت صوابعي على يدي لي منجمتش نحركها جملة...هزيت راسي نغزر لنور لي دوب داخل من شباك لي مسكر...عديت يديا زوز على وجهي...توقعت انو باش يلقاني بعد ما حليت التليفون...اما ظاهر فيه سكرو مرة اخرى...باقي الوقت يتعدا رزين...لدرجة استغربت كي مدخلش عندي..هزيت روحي بالسيف...حطيت وذني عالباب...ما سمعت حتى حس...بديت نضرب فيها و نعيط عليه فرد وقت أما نفس الشي...لي خلاني نمشي لبيت البانو بالزربة..كبست عالمخدة و طلعت عالكرسي مرة أخرى...دخلت بعضي اكثر كي مريتش كرهبتو...معناها ماهوش هوني...نزلت بالزربة...نفركس في البيت على اي حاجة تخليني نحل الباب هذا...و لا حتى الشباك...أما كأنو متعمد يخليها فارغة من كلشي...فقدت أعصابي مرة أخرى...لدرجة وليت نصيح مع روحي من غير ما نحس...هزيت راسي على حلة الباب...قربت منو بالزربة...دزيتو بالقاوي نحكي
انا:باااااش تخرجني من هووووني تواااا...تسمع فياااا نحب نخرج من هوني تواااا
كبس على يدي بالوقت...وين حسيت أنفاسي تقطعت من الوجيعة لي حسيتها...رجعني لتالي في لحظة...و طيش الأكياس لي في يدو على وجهي يحكي
نبيل:معندكش برشا وقت...نحبك تحضرلي روحك...و بعد ليلة هاذي تمشي وين تحب...و رد باالك تخدم مخك معايا و الا باش تندم برشا المرة هاذي
خرج و سكر الباب وراه...نزلت حليتهم بالوقت...و هزيت الروبة في يدي...تقريبا نفس الروبة لي اختارها ياسين في عرسنا...دقات قلبي قوات اكثر و مفهمتش وين يحب يوصل بالفازة...عينيا وساعت مع نويزات لي جابها معاها...حطيت يدي على فمي مروهجة...حطيتهم و وخرت لتالي...نخمم في اي طريقة نخرج بيها مستحيل نخليه يعمل لي في راسي...حتى و نعرف روحي باش نموت على يدو...الوقت قاعد يتعدا و انا طاقتي قاعدة تنفذ مني...لدرجة حسيت اني باش نموت بالعرق هوني...حتى افكاري تعدمت و ما نجمت نخمم في حتى شي...و هو معادش رجع عندي مرة اخرى...الا بعد ما تعدا وقت كبير..أول ما تحل الباب...كبست عليهم في يدي و رميتهم على وجهو نحكي
أنا:زااايد متحشمش على رووحك
قربلي من غير حتى كلمة...وقف قدامي بالظبط...و كبس على وجهي في لحظة...دزني لتالي و نزل عليا شوية يحكي
نبيل:أغزرلي هوني...مانيش باش نضيع وقتي معاك أكثر من هكا...في يدك ساااعة وحدة...تحضر فيها روحك...و كيما أنا نحب...حتى نحبك تغطي الجروح لي على وجهك عزيزتي
أنا:مااانيش باش نحضر روووحي...و مستحيل نلبس هذوما كاان نعرف لانت باش تقتلني
كبس عليا أكثر...لدرجة حسيت روحي عاجزة على الكلام...هزلي راسي شوية يحكي
نبيل:باش تلبسهم...حتى نظن روبة باش تناسبك برشا...هاك لبست كيفها قبل مش هكا
أنا:س..سيبني
نبيل:تلبسها و تعطيني كلشي برضايتك و الا وقتها ناخو اللي نحب عليه بطريقتي انا يا روحي
قربلي أكثر لين حسيت بأنفاسو ضربت في وجهي...عدا خدو على خدي يحكي
نبيل:تبطى عليا شوية على الوقت المحدد...صدقني باش نعمل اللي ميجيش في مخك جملة...و مش راجلك كهو لي باش يعرف...إنتي باش تكون فضيحة عيلة الصياد...مدامك اخترتو هو لازمك تتحمل نتائج اختيارك
باسني من جبيني...و جبد روحو مني...غمضت عينيا بالقاوي..وين حسيت دموعي هبطت تجري على خدودي منجمتش حتى نستوعب لي سمعتو منو مستحيل نجم نعمل حاجة هكا...و لا حتى نوافق على لي يقول فيه خذيت نفس طويل...لازمني نلقى حل فيسع...مدامو مكبش في قرارو...لازمني انا زادة نكبش في في اللي نخمم فيه...لازمني نستغلو و نخرج من هوني مهما صاار...هزيتها في يدي و دخلت لبيت البانو...نلبس فيها بالسيف...فرد وقت نطلب في ربي يجي حد و يخرجني من هوني...مدامو مجبدش تليفون معناها ملقاهش و هذا اللي خلى عندي أمل انو فما احتمال انو ياسين ينجم يلقاني...غسلت وجهي اكثر من مرة و رجعت شعري لتالي...محسيتش بالوقت كيفاش تعدا محاولتش حتى نمس المكياج لي جابو...حل عليا الباب بعد ساعة بالظبط...هزني و حطني...و قربلي شوية يحكي
نبيل:مش قتلك لازمك تكمل قبل الوقت ؟
انا:حااضرة...ماانيش باش نعمل حاجة اخرى...كان رجعت في قرارك سيبني توا
عدا صوابعو على خدي...لي خلاني نكبس على الروبة بالوقت..باش نجم نتحمل اللي قاعد يصير معايا..جبدت روحي شوية نحكي
انا:شنوة المطلوب مني توا
نبيل:إيجا معايا
خذيت نفس طويل و خلطت عليه...هزيت راسي شوية نغزر لطاولة لي حضرها و لشموع لي مشعولة...كأنو تعمد يحضر الجو هذا بلعاني...وقف ورايا بالظبط...و نزل عليا شوية يحكي
نبيل:نظن عشت معاه كيما ليلة هاذي بالظبط...و انا نحبك منك نفس الشي...و بعدها تنجم تخرج من الباب هذا من غير ما يوقفك حد
هزيت راسي شوية نغزر للباب...باش نخرج منو أكيد أما مش بالطريقة لي يحب عليها هو...خاطر مستحيل نخليه يحط يدو عليا..و لا حتى يعمل لي في مخو...إما نتغلب عليه و نخرج من هوني...و لا يتغلب عليا هو و معادش فما مخرج من القبر هذا...و هوني باش تكون نهايتي...قربت من الطاولة من غير حتى كلمة...قعدت و نزلت راسي نغزر لصحن...اصلا معادش نحب ندخل معاه في صراع اكثر من هكا...لازمني نخمم و كهو خاطر معااادش عندي وقت باش نضيعو معاه اكثر من هكا...مديت يدي شوية...حطيتها و كبست عليها...قرب مني شوية قعد بجنبي...وين بدا ياكول من غير ما يقول حتى كلمة...في بالو وصل للي يحب عليه...اما ميعرفش اني مستحيل نستسلم مهما كان اللي باش يصير...كيما لازمو يفهم انو بدني و روحي ملك ياسين و كهو.
🔸️ياسين_يحكي:
كبست على تليفوني مرة اخرى...منحبش نطلبها اكثر من هكا...باش ميتسكرش تليفون و لا تصير حاجة عكس توقعاتي...اصلا مش مصدق اني نجمت نشد اشارة منها...رغم انها ضعيفة برشا و من أمس منجمتش نحدد الموقع بالظبط...كأنو الوقت قاعد يمشي ضدي حتى انو نهار ماشي و يطوال أكثر...حتى الرجال لي جابهم هارون منجموش يحددو الموقع بالظبط...كبست على جواد في يدي...أصلا من بكري مكبش فيا...لا حب يقعد عند حد و لا وحدو...كأنو حس باللي قاعد يصير و لي أمو ضايعة....قربت منهم شوية نحكي
انا:مزااال برشا ؟
هو:الإشارة ضعيفة برشا...فوق هكا قاعدة تتحرك في أكثر من بلاصة...هاني باش نحاول نوصل لأخر بلاصة هو فيها توا
أنا:منجمش نخليها ليلة اخرى معااااه...خليني ناخو البلايص لي ممكن اني نلقاها فيهم
فهد:ياااسين أنت متنجمش تاااخو خطوة هكا...تنجم تكون لعبة منو و رمى تليفون في اي بلاصة باش يشتت انتباهنا
أنا:فهههد...معااادش نجم نصبر عليها اكثر و أنا منعرفش وين هي و شنية لي باش يصير فيها
هو:سي ياااسين...نظن وصلنا لبلاصة محددة...عالاغلب عندو فترة متحركش من هوني
حطيت جواد في يد فهد...و قربت منو بالزربة...نحكي
انا:نجم ناااخو العنوان
كبست عالستيلو في يدي و كتبت العنوان بالزربة...مدلي تليفوني يحكي
هو:أنا باش نكون على تواصل معاك في حالة تبدل الموقع
هزيتلو براسي باهي و خرجت من غير ما نسمع فهد لي ينادي عليا...منعرفش على روحي كيفاش وصلت للكرهبة و طرت بيها...تقريبا خرج من المدينة جملة...و منعرفش اذا بالرسمي هوما في البلاصة هذيكا و لا لا أما هذا آخر أمل بالنسبة ليا...اصلا نحس في روحي مش قد بعضي...خاصة و اني فشلت اني نحميها و لا نلقاها في اقرب فرصة...ثنية طوالت برشا بالنسبة ليا لتوا ضحكتها متاع آخر مرة بين عينيا...حليت تليفوني وين حسيت روحي قربت برشا...استغربت في كل مرة نلقى روحي داخل لبلاصة مجهولة...كأني داخل لغابة قوات الإشارة عندي...لي خلاني ننزل عالفيتاس أكثر المهم عندي اني نوصل لتليفونها و كهو...شديت الفران بالقاوي...كي لمحت كرهبتو...نزلت من غير ما نخمم مرتين...نغزر لدار لي مقابلتني...كبست عالفرد في يدي و قربت من الباب من غير حس...الشبابك الكل مسكرين لدرجة ما نجمت نلمح حتى شي من برا لي خلاني نوجه الفرد للباب...خلعت البواني و دزيتها بالقاوي هزيت راسي مصدوم من المنظر لي قدامي...لدرجة حسيت روحي باش ندوخ...عديت عينيا من الشموع لي عالأرض...لغاية ما وصلت ليها...لوجها لي مدمدم...و الروبة لي لابستها...قلبي خض بالقاوي من ضحكتها كأنها كانت تستنى في شكون باش تستنجد بيه...جات باش تقوم حط الفرد في رقبتها و هز راسو غزرلي تبسم يحكي
نبيل:نورت سي ياسين...حتى أنا كنت نستنى فيك
نزل راسو شوية غزرلها و عدا الفرد على رقبتها يحكي
نبيل:في بالك منعرفش لإنتي حليت تليفونك ؟
هزت راسها مصدومة...دور راسو شوية و عاود غزرلي يحكي
نبيل:جيت في وقتك سي ياسين...حتى انا من بكري نستنى فيك...أما توقعت انك باش طول شوية...عالاقل بعدما نعديو ليلة لي وعدتني بيها مرتك
كبست عالفرد في يدي...مصدوم من الكلام لي يقول فيه...وين حسيت دمي يغلي و معادش عندي صبر باش ناخو روحو الطحان...هزلها راسها شوية بالفرد يحكي
نبيل:متحبش تقولو لانتي وافقت تعدي ليلة هاذي معايا ؟
دورت راسي بالوقت جات عيني في عينها..بقات تغزرلي من غير حتى كلمة..نعرف و متأكد أنها مستحيل توافق على حاجة هكا...و مستحيل نخليه يأثر عليا بكلامو من غير شي قلبي وجعني على الحالة لي هي فيها...و من غزرتها زادة...كيفاش نجم يمد يدو عليها و يضربها بالطريقة هاذي...أصلا كيفاش نجمت تتحمل الضرب هذا الكل...ضعت فيها و في الحالة لي وصلت ليها...لدرجة حسيت روحي المذنب الأول في هذا الكل...توا بالظبط نحب ناخوها في حضني و نوعدها انو آخر مرة نخليها تعيش هذا الكل و لا حتى نخلي حد يمسها...بعدها باش نصفي حسابي معاه...خذيت نفس نحكي
أنا:مدامك جبتني لهوني يعني تحب عليا انا...ملا واجهني من غير سلاح...هذا كان تنجم
جبد الفرد منها و هز روحو وقف...قرب مني بالظبط و طيش الفرد من يدو...لي خلاني نرميه من يدي أنا زادة و دخلت فيه بكل قوتي...لدرجة معاادش نسمع في حتى شي لا صياحها...لا كلامو...و لا حتى الضرب لي كليتو منو...فرغت فيه قهرة الايام اللي خلاني نعيشهم في غيابها و لي عملو فيها و من كلامو تالي زادة...يمكن هاذي أول مرة نضرب حد بالطريقة هاذي...حتى أكثر من المرة لي فااتت...أصلا معاااد نجم نخمم في حتى شي...كل مرة تجي عيني عليها...نهبل عليه أكثر و أكثر لدرجة منعرفش من وين جبت القوة هاذي الكل...رغم إني كليت منو نفس الضرب...يمكن خاطرو حاقد عليا حتى هو...دورت راسي بالوقت...نغزرلو كيفاش جبد الفرد بيدو...لي خلاني نكبس عليه أكثر...و من عركة ولات محاولة مني باش نمنعو يظغط على الزناد...هزيت راسي شوية جات عيني في عينها وين حسيتها انهارت أكثر...حتى من صوتها تقص...منعرفش علاش حسيت أنو فما إحتمال تكون نهايتنا هوني...و آخر شي نحب نشوفو في حياتي هو وجها و كهو...غمضت عينيا بالقاوي على صوت الزناد...وين حسيت أنفاسي تقطعت و منجمتش حتى نعمل حركة أخرى...غزرتها و ضحكة جواد...هي آخر حاجة باش تغادر معايا...حبيت حياتي تكون أحسن من هكا و نجم نعوضها على كلشي خسراتو جرايري أما طلقة وحدة كانت كافية باش تحط نهاية لهذا الكل...خذيت نفس طويل...دزيتو لتالي و جبدت روحي منو...للحظة وحدة ستخايلت أنو الكرتوشة باش تكون فيا مش فيه...أصلا صوتها مزال في وذني لتوا دورت راسي بالوقت نغزرلها...غرست راسها بين ساقيها أكثر...حتى صوتها تقص ضربة وحدة...قربت منها بالزربة...هزيتلها راسها شوية...غزرتلي مصدومة...و نزلت عينيها شوية دوب غزرتلو و دورت يديها على رقبتي بالوقت...كبشت فيا بكل قوتها...عديت يديها ظهرها...كبست عليها...نبوس فيها و نحكي فرد وقت
أنا:وفااات...وفااات يااا روحي...متخاافش هاني معاك
جبدتها من عندي بالسيف...أصلا مرضاتش تخليني نشوف وجها...غرست يدي في شعرها نحكي
أنا:فتوون متخااافش...هااني معااك توا
فتون:ل..لا...لا...ماهوش باش يوفى...حتى هكا باش يفكك مني و يخليك تبعد عليا
أنا:فتوون...أغزرلي هوني يا روحي
كبست على وجها بيديا زوز...وين تصدمت أكثر من الجروح لي فيه...متوقعتش باش يعمل فيها هذا الكل مديت يدي بالسيف نتحسس فيهم...هذا غير غزرة الخوف لي في عينيها...جيت باش نحكي...داخت بين يديا...حاولت نفيقها أما شي...هزيت راسي شوية نغزر لفهد لي دخل بالزربة...غزر لنبيل و هز راسو غزرلي مصدوم...خذيت نفس نحكي
أنا:عالأغلب مزال عايش
نزل عليه شوية...يتحسس في النبض متاعو...و هزلي براسو باهي...هزيتها بين يديا و غزرتلو نحكي
أنا:نحبك تسعفو...نحبو عااايش
فهد:بالله في عوض تحطلو كرطوشة أخرى و تتهنى من منظرو
أنا:حسابي موفاش معاه لتوا...أكااا علااش نحبو عايش خاطرني باش نخليه يموت في كل لحظة...عاللي عملو فيا و في مرتي
فهد:فتووون لباس ؟
أنا:منعررفش...هاني باش نهزها للكلينيك توا...خاطر حالتها تاعبة برشا
فهد:رد بالك على روحك...هاني باش نهتم بيه السخطة هذا
هزيتلو براسي باهي و خرجت من غير حتى كلمة أخرى...نغزر لرجال لي لحقو وراه...واحد منهم حلي الباب...حطيتها و غطيتها بالفاست متاعي...و خلطت عليها...منعرفش على روحي كيفاش طرت بالكرهبة...يد عالفولون و يدي لاخرى عليها...نحاول فيها باش تقوم أصلا لتوا منجمتش نستوعب حالتها...دخلت بعضي أكثر من خشمها لي بدا ينزف...وين نزلت عالفيتاس اكثر...منعرفش اصلا كيفاش وصلت و دخلتها معايا خلطت عليا هالة و عامر بالوقت...حطيتها على السرير نحكي
أنا:هااالة...اعمل الفحوصات اللازمة تواا
هالة:شنية لي صاار ؟ شبيها ؟
أنا:تصرف هاالة...تعرف مبعد
هالة:باهي دكتور
بدلت دبشي بالزربة و رجعتلها...منعرفش كيفاش تعدا الوقت...و لا كيفاش استقر وضعها...فقت من سرحتي على صوت هالة تحكي
هالة:ياسين أنت زادة لازم تعقم الجروح لي على وجهك
أنا:ميسالش هالة...أنا لباس عيشك
هالة:باهي...هاني باش نخليك معاها...حمد الله على سلامتها مرة أخرى
أنا:عيشك
تبسمتلي و خرجت...هزيت روحي بالسيف...حليت الخزانة و جبدت الروبة متاع الكلينيك...خاطر مستحيل نجم نخليها و لا نشوفها في الحالة هاذي أكثر...هزيتها في حضني بالسيف نحيلها فيها...تصدمت أكثر من الزروقية لي في بدنها و من ضرب لي كلاتو منو...كبست عليها في حضني اكثر..وين حسيت بدموعي هبطو على كتفها...خذيت نفس طويل و كملت لبستها...ليلة كاملة عديتها نغزرلها...مش مصدق إني نجمت نوصللها...فرد وقت نحس في روحي مبردتش...و مخذيتش حقي منو كيما يلزم...فقت من سرحتي كي بدات تهتري باسمي و إسم جواد...لي خلاني نفيقها بالوقت...حلت عينيها تغزرلي مصدومة...عديت صوابعي على خدها و تبسمت نحكي
أنا:متخاافش...هاني معاك...كلشي صار مجرد كابوس و وفى على روحو...نعرف صغرونتي قوية و باش تعديها
فتون:ا..أنت لباس مش هكا ؟
أنا:لباس يا روحي
فتون:مااكش باش تخلينا مش هكا...ماهوش باش يشتكي بيك مرة أخرى
انا:لااا ماهوش باش يعملها...هيا إيجا عندي تراه
هزيت روحي شوية...قعدت بجنبها...حطت راسها على صدري تحكي
فتون:جواد...أنا نحب على ولدي
أنا:باهي...هاني باش نطلب منهم يجيبوه لعندك توا حتى هو توحش ماماتو برشااا
كبست على يدها بستها منها...هزت راسها شوية تحكي
فتون:ش..شنية باش يصير توا ؟
أنا:منعرفش و منحبش نخمم...يكفي أنك رجعتلي مرة أخرى...و مستحيل نخلي حد يضرك بعد توا
فتون:ي..ياسين
انا:يا روح ياسين
فتون:ا..أنا ضيعت الكوليي متاعي غديكا
أنا:تو نوصيلك على واحد كيفو
فتون:لااا...نحبو هو
انا:باهي...هدي روحك توا
فتون:خ..خفت برشا إني منجمش نشوفك مرة أخرى
أنا:و أنا خفت برشا...خفت من إني نكون خسرتك بالحق
مدت يدها بالوقت حطتها على خدي...وين تخنقت أكثر مع الزروقية لي عليها...أما منجمتش نسألها...ما نجمت نحكي على شي و هي في حضني...منحبش نظغط عليها و هي في الحالة هاذي...دوب بستها منها...نحكي
أنا:ساامحني فتوون...سامحني يا روحي...خاطرني خليتك تعيش هذا الكل
فتون:م..معادش تلوم روحك ياسين...يكفي أنك خرجتني من غديكا
دوب كملت كلامها و غمضت عينيها...شوية و غطست في نوم مرة اخرى...بستها من جبينها...و عديت يدي على شعرها...تنهدت بالقاوي...خاطرني نعرف انو اللي جاي صعيب برشا...و لي ماهيش باش تتعدا لي صار معاها بالساهل...خاصة بعد اللي عملو فيها ساقط...اصلا لتوا مخنوق من اللي ريتو أمس...مخنوق من فكرة اني كان موصلتش في الوقت...و شنية كان باش يعمل فيها زايد...خاطرني و لا مرة توقعت أنو الهوس متاعو بيها باش يوصلو لهوني...أكا علاش نحبو يعيش...نحب نخليه يندم على اللحظة لي خمم انو يقرب منها و يحط يدو عليها...وقتها برك يمكن نجم نرتاح و نخليه يخاف من اسمي مدامو عايش...و مستحيل يخمم يقرب من اي شي يتعلق باسم الصياد.