كوكايين

الحلقة الخامسة و التسعون

🔸️حلقة 95
🔸️أمين_يحكي:
شديت الفران على جنب...عديت يدي على وجهي و هزيت روحي نزلت...نحس في راسي باش يطرشق من ظغط الخدمة...غمضت عينيا بالقاوي و عاودت حليتهم للحظة حسيت روحي نستخايل فيها...قربت منها بالزربة غزرت للفاليز متاعها و عاودت غزرتلها...قلبي خض بالقاوي من حالتها لدرجة منعرفش روحي كيفاش وصلت ليها و نزلت عندها...عديت صوابعي على خدها نحكي
أنا:هاالة يا روحي
حلت عينيها مفجوعة...كبست على أكتافها نهدي فيها و نحكي فرد وقت
أنا:متخافش عزيزتي هذا أنا
هالة:أ..أمين
كبست على وجها بيديا زوز...عينيها وساعو من سخانتها خذيت نفس نحكي
أنا:شنية صار يا روحي ؟ هاك تقلي بالسخانة
ترمات في حملتي و دورت يديها زوز على ظهري عديت يدي على شعرها..بدنها الكل يرعش بصفة غريبة..خذيت نفس طويل نحكي
أنا:هيا قوم...دنيا باردة عليك
كبست عليها وقفتها...حليت الباب و هزيت الفاليز متاعها في يدي...دخلتها و دخلت...شعلت الضو...عديت يديا زوز على زنودها نحكي
أنا:شبيك مكلمتنيش ؟
هالة:ت..تسكر تليفوني...أنت شبيك للوقت هذا ؟
أنا:اظطريت باش نعاود شوية حسابات...كيما سلعة لي طلبتها دخلت اليوم
هزتلي براسها باهي...جبدت روحها مني و غزرتلي تحكي
هالة:م..معرفتش وين نمشي
أنا:أكيد باش تجي لعندي يا عمري
هالة:ب..بابا إختارني بينو و ب..بينك
غزرتلها مصدوم...مستخايلتش لي هي باش تختارني بعد اللي تعدينا بيه الكل...جيت باش نحكي أما عينيها لي دوب تحل فيهم...خلاوني نقربلها بالوقت و مديت يدي دورتها على ظهرها قبل ما تطيح...كبست عليها نحكي
أنا:هااالة عزيزتي...تسمع فيا ياخي ؟
حطت راسها على صدري من غير ما تجاوبني...كبست عليها أكثر و هزيتها في حملتي...طلعت لبيتي بالزربة حطيتها في وسط السرير و عديت يدي على وجها نحكي
أنا:هااالة يااا روحي...تسمع فيا ياخي ؟
دوب حلت عينيها غزرتلي و عاودت سكرتهم...تحكي
هالة:ب..بردانة
أنا:باهي متخافش...تو نرجعلك
هالة:م..متخلينيش أنت زادة
نزلت عليها شوية...بعدتلها خصلات شعرها لتالي و بستها من جبينها...نحكي
أنا:مانيش باش نخليك...لحظة و نرجعلك باهي عزيزتي
حلت عينيها شوية...من غير ما تجاوبني جبدت روحي منها و نزلت اللوطة...نحيت الفاست متاعي طيشتها عالفوتاي و دخلت للكوجينة...نزلت القلاص...هزيت الكمادات و الما و رجعتلها...دخلت بعضي كي لقيتها غطست في النوم...قعدت بجنبها...نبدل في الكمادات ورا بعضهم...كبست على يدها بستها منها نحكي
أنا:هالة...عزيزتي هيا فيق
هالة:أ..أمين
أنا:هاني معاك
هالة:ي..ياسر البرد هوني
أنا:البيت دافية يا روحي...شقولك نمشيو للكلينيك توا
هالة:م..منحبش
كبست عالغطا حطيتو عليها و هزيت روحي طلعت بجنبها...غزرتلي تحكي
هالة:ف..فاش تعمل أنت ؟
أنا:هيا إيجا عندي
مديت يدي حطيتها تحت جنبها...جبدتها عندي...حطت راسها على صدري...كبست عالغطا نحكي
أنا:إنتي باش تكون لباس...نحبك ترتاح توا و ما تخمم في حتى شي باهي
حطت يدها على صدري و هزت راسها شوية...غزرتلي تحكي
هالة:م..محبيتش هذا الكل يصير و..و لا حتى نحطك في موقف هكا...م..مكانش عندي حل آخر و إلا كلشي كان باش يوفى قبل ما يبدا
كبست على يدها و عديت عينيا على وجها...نحكي
أنا:هالة يا عمري...إنتي بجيتك عندي عطيتني قوة أكبر...مستحيل كان مزلت نخليك تبعد عليا و لا نسمح لحد يفرقني عليك
نزلت عليها شوية بستها من جبينها...كبست عليا أكثر و غمضت عينيها...بقيت نعدي في يدي على شعرها...لين بدات تهدى و بدنها بدا يدفى...عديت بقية الليل نغزرلها مش مصدق لي هي في حضني حتى التعب لي جيت بيه حسيتو طار في لحظة...أصلا عديت سنين و أنا نحلم بيها...من أول لحظة خليتها ورايا و مشيت...غفيت وجه الصباح بعد ما حسيتها إرتاحت...حليت عينيا كي حسيت بيها تجبد في روحها باش تقوم...كبست عليها نحكي
أنا:وين ماشية ؟
هالة:م..مقصدتش باش نفيقك
أنا:إيجا هوني...إيجا
هالة:أمين
كبست عليها و رجعتها عندي...رجعتلها خصلات شعرها لتالي نحكي
أنا:خليك عندي
هالة:جعت و نحب ننزل باش ناكول حاجة
أنا:بالله...علاش إنتي إمتى فقت ؟
هالة:من بكري أما محبيتش نفيقك...خاطرني تعبتك معايا
أنا:كيفاش تحس في روحك توا ؟
هالة:أحسن...مرسي برشا أمين
أنا:مكنتش نعرف روحي محظوظ لهدرجة
هالة:معناها ماكش باش تتقلق مني ؟
أنا:منك ؟ بالله ياخي أنا نجم نستغنى عليك ؟
هالة:يمكن تصير مشكلة مع مرتك جرايري ؟
أنا:تتذكر لي حكيناه آخر مرة ؟
هالة:لا
تبسمت و عديت صوابعي على خدها...تنهدت براحة نحكي
أنا:كملت إجراءات الطلاق الكل و في أقرب مدة معادش يربطني حتى شي بيها
هالة:تحكي بجدك ؟
أنا:أنا استنيت برشا يا روحي...معادش نجم نبعد عليك أكثر من هكا...كان إنتي بدلت رايك فيا
هالة:لااا...أما متوقعتش كلشي يصير بالسرعة هاذي كيما منحبش نكون سبب في طلاقكم
أنا:إنتي ما عندك ذنب في حتى شي...الغالط الوحيد في اللي صار الكل هو أنا
بستها من خدها و جبدت روحي منها...عديت عينيا على وجها نحكي
أنا:صغرونتي باش تاخو دوش توا...تبدل دبشك و تخلط عليا
هالة:و أنت ؟
أنا:مش قلت لأنا جعت و نحب ناكول ؟
هزتلي براسها إيه...مديت يدي شوية قرصتها من شفايفها و هزيت روحي وقفت نحكي
أنا:هيا ملا فيسع
هالة:باهي
تبسمت و هزيت روحي نزلت...طلعت الفاليز متاعها و رجعت للكوجينة...منعرفش على روحي شبيني شايخ لهدرجة...لتوا مش مصدق لي صار...رغم إني محبيتش فازة أنها تتعارك مع بوها و توصل لهوني...منحبش الأمور تتحل بالطريقة هاذي...خاطرني نعرف حساسيتها من الموضوع...تلفت كي حسيت بيها ورايا...تبسمت و مديتلها يدي...قربت مني بالوقت...عديت يدي على شعرها نحكي
أنا:كارك منزلتش بيه هكا يا روحي
هالة:هاك دفيت الدار قبل ما ننزل
أنا:باهي إيجا هوني تراه
كبست على أجنابها و هزيتها شوية...حطيتها عالرخامة قحرتلي تحكي
هالة:أمين فاش تعمل ياخي ؟
أنا:خليك هوني...نحب نشبع بيك أكثر
هالة:بالله...شبيك لتوا متخدمش ياخي ؟
أنا:طرد فيا إنتي...ساعة من غير ما نمشي اليوم...ياخي معنديش حق باش نبقى معاك
هالة:بالله و تنجم تفهمني فيها الخدمة لي تغيب عليها كيما تحب
أنا:مممم باهي...أول ما رجعت لهوني حليت مشروع صغير...خاص بمستلزمات الموتورات و الكراهب و فرد وقت فما فرع خاص لتصليح مع تصدير للمحلات الصغيرة
هالة:هذا لي كنت تحلم بيه ديما
قربت منها شوية...حصرتها من شيرتين و عديت عينيا على وجها نحكي
أنا:لااا...أنا كنت نحلم بيك إنتي و كهو...كل لحظة و كل ثانية تعدات عليا...لا صورتك و لا ريحتك فارقتني
هالة:حتى بعد اللي عملو فيك بابا ؟
انا:شقولك نخمو بإجابية
هالة:كيفاش ؟
أنا:مثلا كان مصارش لي صار و بوك معاملنيش بالطريقة هذيكا قبل...راني موصلتش لهوني...يمكن حكاية العلاج كانت مستعصية و باش طول برشا...كيما أنو فرد وقت عملت على روحي و مضيعتش وقتي زادة
هالة:أما زادة كان يمكن تلقاني مرا معرسة توا
أنا:أما ملقيتكش تعرف علاش ؟
هالة:علاش ؟
أنا:خاطرني طلبتك من ربي...كل لحظة كنت ندعي إني نلقاك مرة أخرى و نعاود نعيش معاك كلشي و لي أحلامي تولي حقيقة
هالة:معناها ماكش ناقم على بابا ؟
أنا:لااا...خاطرو مهما كان في الأخير...هو اللي جابك لدنيا...جابك ليا أنا
غزرتلي ندرا كيف...قربتلها أكثر...دورت يديا زوز على ظهرها و جبدتها...عنقتها بقوة الخوف لي كنت نحس فيه بكري...خاصة بعد ما انقطعت عليا أخبارها...الغربة و البعد...كانت أسوء حاجة مريت بيها في حياتي و منحبش نعيشها مرة أخرى...تبسمت على صوتها تحكي
هالة:أمين والله جعت أنا
جبدت روجي شوية...بستها من خدها و نزلتها نحكي
أنا:إيجا أقعد يا روح أمين
هالة:ياااا كيفاش تذكرت لأنا نشرب حليبي بالعسل
أنا:علاش أنا إمتى نسيت شنية تحب و تكره مدموزال هالة
هالة:صحيح تذكرت...نعرف كلشي جا على غفلة...أما نحب نطمنك مانيش باش نبقى هوني برشا...جيست خاطرني خرجت في الليل معرفتش وين نمشي منحبش نوجعلك راسك بالحكاية هاذي و منجمش نبقى معاك فرد دار زادة
أنا:بالله ؟ و وين ناوية تمشي ؟
هالة:ياسين موفر مسكن لطالبات اللي يجو من بعيد هاني باش نحكي معاه و ناخو بيت
أنا:هاك متأكدة لي هو باش ياقف معاك و يوفرلك وين تسكن زادة
هالة:علاش حتى يرفض...رغم كلشي صار مزلنا أصحاب إحنا
أنا:هااالة...مدامك جيت لهوني باش تبقى هوني معايااا و تهنى مانيش باش نضرك بشي...تنجم تاخو بيتي و أنا باش نبقى في البيت لي بجنبك...حكاية أسبوع او أكثر توفى حكاية الطلاق و نعرسو بعدها
هالة:نعرسو ؟
أنا:ملا عزيزتي...تحبني نصبر عليك أكثر من هكا
هالة:و بابا ؟
أنا:أغزرلي هوني...كلشي باش يصير حسب الأصول و كيما إنتي تحب بالظبط و بوك مصيرو باش يقبل ماهوش باش يلقى نسيب أحسن مني
تبسمت مع ضحكتها...خذيت نفس طويل و عاودت غزرتلها نحكي
أنا:صحيح إسمو الدكتور ياسين...من غير ما تعاود طيح الكلفة لي بيناتكم مرة أخرى...خاصة قدامي
غزرتلي مستغربة...نزلت راسي لصحن و تنهدت بالقاوي رغم أنو مفما حتى شي بيناتهم توا أما زادة حتى حد ما يبدل حقيقة أنو هو كان في حياتها من قبل و اللي كان باش يعيش معاها تفاصيلها الكل...أصلا لتوا مرعوب من الفكرة و منحبش نخمم فيها جملة.     
#أمين_هالة💔