كوكايين

الحلقة الثامنة عشر

🔸️حلقة 18
هزيت راسي شوية...لتوا منجمتش نتجرع كلامها لي قالتو و خرجت...اصلا من الاول نعرف موقفها مني نعرف لي فهد كلن حاجز بالنسبة ليها في كل مرة تخمم توجعني بكلامها...هاذي امي...امي لي حتى منعرفش اذا موجودة و لا لا...امي لي منجمتش نكرها...رغم انها ما حملتني حتى مرة...و لا مرة حسيت بقربها و لا حتى باستني كيما كانت تعمل سلطانة مع لجين...لي خلاني اكثر من مرة نقعد معاها باش نعيش نفس إحساسها رغم انو فهد مكانش مقصر معايا...اما ديما كنت بحاجتها...كنت ديما نحس بالقهرة...اني نغزرلها و نحكي معاها..اما منجمش نتعدا حدودي و نقرب منها..منجمش نضحك معاها و نقعد معاها كيما اي ام و بنتها...برشا حاجات خلاتني نستفقدهم رغم وجودها معايا...اما اليوم بالظبط...إحساسي كان عكس كل مرة...مع إني ستانست بتعاملها هذا...اليوم بالظبط وجعني كلامها غير العادة...خاطرني نعرف إني ولا مرة خممت إني نضرو...و لا حتى نعمل حاجة عكس اللي يحب عليها هو لي اختار...هو اختار ثنيتو بعد ما عفس عليا...هو لي وجعني و خلاني نتيتم من أول و جديد...هو لي خلاني نكره روحي و نكره كلشي داير بيا...هو اختار يبعد عليا و يكسرني...حتى لاول مرة نحس أنو عندها حق في كلامها...يمكن حتى هو حس أنو ضيع سنين من عمرو و هو معايا...على خاطر أصلا معادش عندي شنية نعطيه أكثر من هكا...و الدين لي عليا خذا حقو بطريقتو هو مسحت دموعي لي نزلو مرة اخرى...خذيت نفس و هزيت روحي وقفت...قربت من الكوافوز...و رجعت شعري لتالي...نغزر لروحي...نغزر لسنين ضاعت من عمري...سنين كنت نحاول نلقى روحي في وسطهم نلقى بلاصتي لي لازمها تكون من الأول...مش فهد لي خلاها تكون موجودة بالسيف عليهم...كيما متأكدة انو بكلمة منو...نلقى روحي من غير عيلة و من غير دار زادة...اصلا امي تستنى في فرصة هكا منو...و معادش نستغرب حتى شي يعملو...حتى نشوف في النهار هذا مش بعيد عليه...هاذي اول مرة في حياتي...نحس روحي بحاجة بابا...بابا لي ما نعرف عليه جتى شي...من غير إسمو لي عطاهولي...و عمري ما خممت إني نفركس عليه...خاطرني كنت تحت جناح فهد طول السنين هذوما...تنهدت بالقاوي...و شيعت راسي لتالي...اللي عرفتو من كلام امي ليلة...أنهم عاملين فيا مزية خاطرني مزلت معاهم هوني...و منعرفش رفضي ليه وين باش يرصيلي المرة هاذي...غزرت لساعة...تقريب نص الليل...خذت نفس و خرجت من البيت...الضو متاع بيتو لي طفى بالوقت...خلاني نتنهد بحصرة...اصلا من وقت دخلت لبيتي معادش حطيت ساقي برا...و فكرة لي هوما مع بعضهم...مزالت تقلقني لتوا...و تخليني ننقم عليه و على روحي فرد وقت...هزيت روحي باش ننزل اما ضو و الباب لي محلول شوية...خلاني نرجع لتالي دقيت عليها و دخلت نحكي
انا:مزلت تقرا لتوا ؟
لجين:لا قاعدة و كهو...ايجا
دخلت و سكرت الباب ورايا...قعدت على طرف السرير نغزرلها...و نحكي فرد وقت
انا:شنية لي مسهرك لتوا ؟
لجين:قاعدة نخمم
انا:في شنية ؟
لجين:كان جينا من عيلة بسيطة...عايشين في حومة شعبية...من غير هذا الكل...زعمة باش نكونو فرحانين على هكا ؟ و كنا باش نقعدو مع بعضنا على طاولة وحدة...من غير ما نحسو روحنا في اجتماع ؟
تبسمت على تفكيرها...و مديت يدي...حطيتها على سرير نحكي
انا:ايجا هوني 
هزت روحها...و قربت مني...قعدت بجنبي...غزرتلها نحكي
انا:هذا لي مغشش الاميرة الصغيرة ؟
لجين:روجينا...انتي ماكش باش تفهم عليا...انا معادش نحس روحي مرتاحة هوني...حتى حد ماهو باش يفهم عليا...ياسين طلق فتون و بعدها علينا...و بعد معاها و فهد يهتم بيك انتي و كهو...اما انا بقيت في يد سلطانة...و لتوا منجمش ناخو قرار يخص حياتي...حتى في أبسط حاجة
تبسمت بوجيعة...و بعدت عينيا من وجها...ما نحب حتى حد يحس بوجيعتي...خذيت نفس نحكي
انا:انتي غالطة في تحليلك ؟
لجين:شقصدك ؟
انا:فهد توا عندو ما اهم مني
لجين:تقصد بلقيس ؟
انا:مممم...بعد ما عرس نقص اهتمامو بيا...و معادش نفرق معاه برشا
لجين:مستحيل...الكل يعرف لي هو مستحيل يستغنى عليك
انا:هذا لي كنت نتوقعو من قبل انا زادة...اما طلعت غالطة...و في الاخير بقيت وحدي...اما انتي عندك حاجة لي تخليك ترقد مرتاحة ديما
لجين:شنية ؟
مديت يدي...حطيتها على يدها...كبست عليها و غزرتلها نحكي
انا:عندك سلطانة...يمكن تحس بالخنقة على خاطرها كابسة عليك...اما صدقني...متأكدة لي هي تحبك اكثر وحدة فيهم...حتى تصرفاتها الكل تقول لي هي خايفة عليك...اكا علاش تتصرف معاك هكا
لجين:حتى انتي عندك عمتي صوفيا
انا:بربي لجين...الكل هوني يعرف لامي متحبنيش...و متعتبرنيش بنتها جملة...حتى عمرها ما خافت عليا...عمرها ما نصحتني كيما طاطا سلطانة قاعدة تعمل معاك...حتى كي تكلمني...جيست باش تعرف وين انا...خايفة من الفضايح جرايري
ضحكت وقت تذكرت كلامها متاع قبيل...و عاودت غزرتلها نحكي
أنا:صراحة صوفيا تعتبرني مصدر الشؤم في حياتها حتى متحبش تغزر لوجهي وقت تحكي معايا...على هذاكا رد بالك تقارنها بطاطا سلطانة...خاطرها هي كهو وقت نحضنها نحس بريحة الام لي استفقدتها طول السنين هذوما
لجين:روجين يا روحي...منقصدش نخليك تحكي هذا الكل
أنا:عادي عزيزتي...ماهيش حاجة جديدة عليا...اما متاكدة انو فما شي اكبر من هكا مخليك سهرانة لتوا
لجين:سحر صحبتي
انا:شبيها ؟
لجين:أختها رزان باش تعرس...و انا نحب نحضر لعرسها
أنا:هذا لي محيرك ؟
لجين:امي رفضت تخليني نمشي بحذاهم...ساعة انا وعدتهم راش نحضر...و باش نعدي ليلة معاهم
انا:مممم مشكلة
لجين:أصلا حبيت حومتهم عاللخر...و حبيت الجو غديكا
انا:ملا تحب تحضر ؟
لجين:عاللخر
انا:باهي ملا...أنا نعاونك
لجين:شباش تعمل ؟
انا:اول شي باش نعملو مداهمة للكلينيك...عند سي ياسين...موافقتو تعني موافقة سلطانة...نعرف ماهوش باش يخلي الاميرة الصغرونة تتغشش...فرد وقت باش نخبرو الكل لي انا باش نمشي معاك
لجين:باش تجي معايا بالرسمي ؟
انا:مهمتي توا عند راس النهج...نوصلك و نعدي ليلة بحذا فتون...و من غدوة نجي نهزك
لجين:تحكي بالرسمي
انا:اما يبقى سر بيناتنا
لجين:باهي وعد
انا:امتى العرس ؟
لجين:بعد غدوة...اما ؟
انا:شفما زادة ؟
لجين:انا لتوا منعرفش شنية نلبس
انا:دبشي على حسابك...ماك تعرف صوفيا...كل قطعة في سوق تصبها عندي...باش نليق بعيلة الصياد
لجين:روجين صراحة...حد ما يعرف اني من العيلة هاذي
انا:شقصدك ؟
لجين:نقصد من غير سحر...حد ما يعرف انو هارون عمي...و اني غنية
انا:فهمت عليك
لجين:منقصدش اني نكذب عليهم...اما ما نحب حتى حد يعاملني معاملة خاصة...على هذاكا منحبش نلبس حاجة غالية...و لا حتى تخلي الانظار الكل عليا
أنا:اهدا عزيزتي...اصلا احسن ما عملت...توا نحبك ترقد و ما تخمم في حتى شي...نلقاك حاضرة الصباح من الكلينيك...نمشو نشرو حاجة تليق عليك...و ماهيش مكلفة برشا
لجين:تحكي بالرسمي ؟
انا:اكيد يا روحي
قربت مني بالوقت...حضنتني بيديها زوز...كبست عليا تحكي
لجين:أحلى روجينا والله...مكنتش نعرف شنية نعمل من غيرك...والله انتي احلى شي موجود في الفيلا
عديت يدي على ظهرها...و تبسمت بالوقت...رغم اني متأكدة انو مستحيل نكون هكا بالنسبة للباقي...جبدت روحي منها...و كبست على وجها بيديا زوز...نحكي
انا:خليك ديما هكا لجين...و ما تسمح لحتى حد يبدل فيك برائتك...و لا حتى يكسر فيك شي مستحيل تنجم تصلحو مبعد...متأكدة لانتي باش تكون ناجحة في حياتك
لجين:يا بنتي شبيك تحكي معايا...والله خوفتني...ساعة هاك انتي مصممة شاطرة...و باش تنجح اكثر مني
هزيتلها براسي باهي...و تبسمت بالوقت...نحكي
انا:عيشك عزيزتي...يلزمني نخليك توا...و اعمل لي وصيتك عليك...يستنى فينا نهار طويل
لجين:باهي روجينا عيشك
هزيت روحي وقفت...و قربت من الباب...كبست عالبواني نحكي
انا:تصبح بخير
لجين:و انتي بخير يا روحي
تبسمتلها و هزيت روحي خرجت...يكفي لي تعدا علينا انا و فتون...منحبش لجين تعيش حتى شي من اللي تعدا عليا...رغم نعرف انو حد ماهو باش يخليها بيها...و خواتها بجنبها ديما...تنهدت بالقاوي...و نزلت اللوطة أصلا ريقي شاح من بكري...حتى حسيت روحي تاعبة بطريقة غريبة من اللي صار معايا بكري...كل درجة نهبطها...قلبي يعصر عليا أكثر...أصلا كل بقعة هوني معادش تسعني...هزيت راسي على حلة الباب...جات عيني في عينو...بقيت نغزرلو مستغربة متوقعتش مزال برا للوقت هذا...حتى توقعت باش يكون معاها توا...يدو لي رزنت عالبواني...خلاتني نعرف انو استغرب شوفتي توا...دقايق عديتهم واقففة في بلاصتي نغزرلو...بالعادة اول ما يعرضني...نترمى في حملتو...و ننسى كلشي تعدا عليا في غيابو...كلام أمي...و تعب القراية...كلشي يولي لباس...بعد كبست يديه على ظهري...و توا زادة نحب نمشيلو...نحب نخبرو لي صار قبيل...ولي قالتو صوفيا...نحب نحس بالراحة لي فقدتها...كبست على يدي مع كلامها لي تعاود في وذني <<ماني نعرف...أنك وجه الهم و ما يجي وراك كان الخايب...حتى فهد منعرفش عليه كيفاه بدا يفيق على روحو و بعد عليك على هذاكا ما نحب حتى مشكل يجينا جرايرك رد بالك >> يمكن هاذي أول مرة نحس لي هي عندها حق في كلامها...كان لازمني نتوقع من الأول أنو حتى هو ينجم يخليني في نهار من نهارات...و ماهوش مجبور يهتم بيا حياتو الكل...و لا يعطيني من وقتو اكثر من هكا...حتى هو في كل مرة نبدا قريبة ليه نحس لي قاعد يخسر برشا جرايري...الغلطة الأكبر في حياتي إني معملتش حساب لنهار هذا...و لي خلاني في الوسط...لا نعرف نصلح لي عملتو...و لا نعفس على كلشي و نبدا من جديد....و أول شي إني نتغلب عالغصة لي نحس بيها في كل مرة نتحط في الموقف هذا...فقت من سرحتي على صوت خطواتو لي ماشية و تقرب مني...منعرفش شنية لي صار معايا بالظبط...منجمتش نتحرك من بقعتي...و لا حتى نرجع لتالي...كل خطوة يقرب بيها لعندي...نحس روحي ضعفت قدامو أكثر لدرجة حسيت بدموعي خانوني مرة أخرى...يديه لي دارو على ظهري بالوقت خلاوني نضيع في عالم آخر..عالم ندخل ليه مع كبسة يديه و ريحتو...للحظات لقيت روحي مسلمة في كلشي حتى يديا منجمتش نهزهم...و لا حتى نبعدو عليا غمضت عينيا بالقاوي...محاولة مني باش ننسى كلشي تعدا عليا قبل...عالأقل لحظة وحدة...لحظة وحدة كافية باش تخليني نحس أنو كلامها مش صحيح...و لي فهد عمرو ما اعتبرني كيفها..و لي عشتو طول السنين هذوما معاه...مش وهم...و الإهتمام لي كنت نحسو بوجودو حقيقة يعرفها الكل...نحب نحس أنو هو الخاسر الوحيد في الأخير...خسر على خاطرو قرر يعيش من غيري ريحتو لي دخلت في خشمي كانت الكوكايين لي كنت بحاجتو طول الوقت هذا...المخدر لي يخرجني من روحي لعالم ما فيه حتى حد غيرنا عالم خرجت منو على صوتها تحكي
بلقيس:فهههد ؟
حليت عينيا مروهجة...و مديت يديا بالسيف...حطيتهم على صدرو باش نبعدو عليا...كبس على ظهري بالوقت هزيت راسي شوية...غزرتلو مستغربة...ملامح وجهو بردت في لحظة...قحرلها يحكي
فهد:أرجع لبيتك
بلقيس:شنية لي قاعد يصير ؟
فهد:بلقيييس
دوب خرج صياحو مع صوتو لي تاعب...و ريحتو لي دوب مخلطة بالشراب...من خطواتها عرفتها رجعت لبيتها...حط يدو على خدي...و غزرلي ندرا كيف يحكي
فهد:شبي صغرونتي ؟ صوفيا مرة أخرى ؟
جيت باش نحكي...أما للحظة تذكرت كلشي تعدا عليا جرايرو...تذكرت كلام أمي بكري...و مرتو لي عندها دقيقتين واقفة فوق راسنا...حتى شي ماهو كيما الأول لا هو و لا حبنا...و لا الوضع لي إحنا فيه...كبست على صدرو أكثر...و جبدت روحي منو...نزلت عينيا من وجهو و دخلت للكوجينة...عبيت كاسة الما و كبست عليها في يدي...شربتها فرد مرة...و حطيتها عالرخامة دخل ورايا جبدني من يدي يحكي
فهد:روجين شنية لي صار ؟
مديت يدي باش نبعدو عليا...طيحت الكاس بالوقت نزلت راسي نغزرلو...تبسمت بالوقت...و جبدت يدي منو...نحكي
انا:ريت ماو ؟ مفماش بلاصة نكون فيها و متصيرش كارثة
فهد:روووجين...سألتك شنية لي صار ؟
أنا:حتى شييي...أبعد عليا و كهو
مد يدو جبد الكرسي بنطرة...و جبدني عندو قعدني يحكي
فهد:ترص هووني
انا:فاااش تعمل ياخي ؟
جبد الكرسي لي بجنبي و قعد...حط يدو عالطاولة و غزرلي ندرا كيف يحكي
فهد:اغزرلي هوني...مزلت على أعصابي من فازة الصباح معناها متهبلش ■■■■■ أكثر...توا تخبرني شبيك في الحالة هاذي...و اللي عملتو صباح حسابو وحدو
أنا:مش أنت لي اخترت الثنية هاذي...شنية مزال تحب عندي...شبيك مزلت في جرتي لتوا ؟
فهد:ياخي ناوية تهبلني إنتي ؟ تعرف لي هذا العرس الكل مجرد صفقة
انا:منعرفش...أما نعرف أنك وجعتني و حرقتني...نعرف لأنا منجمش نسامحك...و مهما عملت كرامتي أقوى من أنك تزيد تعفس عليها بساقيك
كبس على يدي في لحظة...مخلاليش فرصة إني نجبد روحي منو...غزرلي ندرا كيف يحكي
فهد:مستحيل نعفس عليك روجين...أنا نعفس عالدنيا على خاطرك إنتي
أنا:أما الواقع يعكس حاجة أخرى
جبدت يدي منو...و عديت يدي لأخرى فوقها...نتحسس في كبسة صوابعو و نحكي فرد وقت
انا:أنت فرضتني على العيلة هاذي
فهد:فاش تحكي إنتي ؟
انا:تعرف شنية قالتلي صوفيا اليوم ؟
نزلت راسي شوية...نرد في النفس لي حسيتو باش يخنقني في لحظة...تبسمت على جنب و عاودت غزرتلو نحكي
انا:قالت ما يجي من وراك كان الخايب...ماهوش جديد الكلام هذا عليا...حتى من كثرة لي سمعتو وليت نصدقو و الدليل انو أول ما دخلت لهوني طاحت الكاسة
فهد:روووجين اسمعني
انا:أنت اسمعني...تتذكر نهار جيتك لسوسيتي...الصفقة لي كنت باش تربحها...خسرتها بمجرد إني دخلت عندك وقتها زادة قالتلي نفس الجملة...حتى مرة كنت نلعب انا و لجين...و طيحتها من غير قصد...زادة خلاتني نسمع نفس الكلام...رغم إني كنت صغيرة و مفهمتش قصدها...أما أنت وسط هذا الكل و في كل مرة كنت تحاول تغطي كلام أمي...بطريقة أخرى...و تخليني نحس العكس...اما اليوم كلامها كان عندو وقع جديد عليا فهد...كلامها خلاني نعرف انو انا عطيت من روحي برشا...انا سلمت في حقوقي الكل ليك...باش متخلينيش و باش منحسش روحي يتيمة تعلقت بيك اكثر...انت عطيتني كلشي تحرمت منو...اما فكيتلي كلشي عندي في لحظة...أمي عندها حق...انت في الأخير فقت على روحك و بعدت عليا...و أنا زادة بديت نستوعب بلاصتي بالقدا...على هذاكا منحبش مرتك تشك في علاقتنا قبل و لا حتى حد من العيلة...و الا باش تجبرني نخرج من هوني جملة
فهد:إمتى كبرت إنتي ؟ و وليت تاخو قرارات ؟
أنا:في الوقت لي أنت عطيتني بظهرك و خليتني نشوف دنيا جديدة...أنا مستحيل نسامحك يا فهد...و لا ننسى لي عملتو فيا جملة...على هذاكا معادش نحبك تقرب مني مرة أخرى...من توا اعتبرني كيما لجين بالظبط...و ماكش باش تكون أكثر من ولد خالي و كهو
مد يدو شوية جبد الصحن لعندو...و عاود غزرلي يحكي
فهد:ليلة لي ولدت فيها إنتي...كنت شؤم لصوفيا...و الخلاص ليا أنا...إنتي جيت لدنيا هاذي على خاطري روجين و باش تبقى فيها على خاطري زادة و مستحيل يجي نهار نسلم فيك...معاناها باش تعب روحك برشا في الموضوع هذا...و صوفيا حسابها معايا
انا:مش لازم تحكي معاها
قرصني من خدي بصوابعو...و طلعلي راسي شوية يحكي
فهد:شكون عطاها الحق تغششلي بنتي ؟ و ساعة مكنتش نعرف لي هي تحبني لهدرجة و جات في صفي
أنا:حتى هي عندها حق في كلشي قالتو لتوا
نطرتلو يدو...و دورت وجهي عليه...منحبش نغزرلو..تنهد بالقاوي يحكي
فهد:باش تبقى متغشة هكا ؟ ساعة مزال حسابنا طويل
أنا:حاسب روحك قبل
فهد:شنية حكايتو سي غسان ؟
أنا:شمدخلك أنت ؟
فهد:والله كان تحبو يبقى عايش...جاوبني إنتي
أنا:هاك وليت مجرم زادة
غزرلي ندرا كيف...و مد يدو لصحن هز كعبة من ال gataux يحكي
فهد:باهي على راحتك
قحرتلو و تكيت لتالي...منعرفش من وين يجيب في برودة الدم لي عندو...و لا كيفاه ماخو راحتو في الحديث...حتى أنا منعرفش شبيني قاعدة نحكي معاه مد يدو للكعبة الثانية يحكي
فهد:بقات وحدة كهو...متحبش ؟
أنا:لااا
فهد:باهي على راحتك
قحرتلو و كبست على يديا زوز...خاطرو يعرف لي القاطو متاع زهور هو نقطة ضعفي...هزيت روحي وقفت نحكي
انا:على أساس أنت مستانس تاكول منو...أما بلكشي يفيدك شوية...و تفيق من سكرتك...زايد معاك
دوب مديت خطوتين باش نمشي...يدو خطفتني من تالي...كبس على كرشي و لصقني فيه...يحكي
فهد:إيجا هوني...إيجا
أنا:سييبني...فاش تعمل ؟
فهد:مش تحبني نفيق من سكرتي ؟
دورت راسي شوية...عديت عينيا على وجهو...و جيت باش نحكي...أما يدو لي كبست على وجهي...و شفايفو لي قطعت أنفاسي خلاتني نسكت حاولت نجبد روحي أما قوتو كانت أكبر...دورني عندو...و دزني لتالي..يحكي
فهد:مكنتش نعرف باش تتغشش على كعبة...يا فرخة و مدامك معايا مستحيل نفيق من سكرتي...على خاطرني باش نغرق فيها أكثر
عديت عينيا على وجهو...نعرف لي دوب واقف...فرد وقت نحس في روحي باش نضعف بين يديه...و منحبش نخسر روحي اكثر من هكا...منحبش نرجعلو و لا حتى نصدقو المرة هاذي...يديه لي تغرسو في أجنابي خلاوني نغمض عينيا من قوة الكبسة...قربلي أكثر يحكي
فهد:آخر مرة نلقاك في الحالة...بسبب صوفيا...على خاطرها متستهلش تكون أم...و إنتي زادة معادش تعاملها على أساس عندها حق
أنا:مانيش بحاجة لنصيحتك
فهد:مدامك نسخة مني كيما قلت...معادش تخلي صوفيا توجعك بكلامها
أنا:و مانيش باش نخليك تقرب مني مرة أخرى زادة
جبدت روحي منو...و هزيت دبوزة الما من الطاولة...جا باش يحكي...ضربتو بالما ورا بعضو نحكي
انا:هكا باش تفيق على وضعك و تفيق من سكرتك...يا ساقط
هزيت آخر كعبة في يدي...و عطيت على ساقيا...من غير ما نثبت في حالتو...أصلا هاذي أول مرة نعمل معاه هكا...كيما متاكدة اكثر شي ينفر منو التصرفات هذوما و يستهل لي صار فيه زادة...أول ما وصلت الفوق خرجت من بيتها...دوب تبسمتلها و دخلت لبيتي سكرتها و نزلت عالزر...باش نضمن لي ماهوش باش يخلط عليا...تكيت عليها...ناكول في الكعبة متاعي...اصلا غشي منو ماهوش باش يوفى بكعبة وحدة كهو...رغم انو كلامو يفرهدني اما مقارنة باللي عملو فيا...يخليني نحقد عليه اكثر...منجمتش ننسى لي خلاني نعيشو منجمتش ننسى معاملتو ليا في آخر ليلة بيناتنا بعد 5 سنين...و منجمتش ننسى لي صار فيا ليلة عرسو...و منجمتش ننسى ولدي...لي مزلت نبكي عليه كل ليلة نزلت بيدي لكرشي...و تنهدت بالقاوي...بعد كلام امي استوعبت الغلطة متاعي اكثر...انا فرطت في اكثر شي كان فما احتمال انو يحبني من غير مقابل...كان باش يمدلي يدو و يخليني نحب الدنيا اكثر...يمكن هاذي الغلطة الوحيدة لي مستحيل نجم نصلحها مهما عملت...و مستحيل نبرر لروحي...و لا نغفرلها عاللي عملتو في صغيري...خذيت نفس و حليت القجر...جبدت الايكو متاعي...و قعدت على طرف السرير...عديت صوابعي عليه كيما كل مرة...زعمة كان عرف بيه قبل اكا ليلة...كان خبرتو عليه قبل ما نصارحو باللي سمعتو من سلطانة...شنية كان باش يعمل...و كيفاه باش تكون ردة فعلو...تبسمت بوجيعة...مش لازم نتوقع منو العكس مدامني هنت عليه بعد السنين هذوما...باش يكبش في مجرد قطعة بالنسبة ليه...بست الايكو و كبست عليه في يدي...و حطيت راسي عالمخدة...محاولة مني إني ننسى كلشي و كهو.
#روجين_فهد 💔💔💔
#كوكايين 🎭🎭🎭
#سمر 💙💙💙