كوكايين

الحلقة الثانية و التسعون

🔸️حلقة 92
🔸️ياسين_يحكي:
مديت يدي شوية...بعدتلها خصلات شعرها لتالي...نثبت في ملامح وجها كي العادة...الليلة لي تعدات فهمت قداش ضيعت على روحي...و من شنية تحرمت بالظبط رغم أنها كانت بجنبي ديما...نزلت بصوابعي لشفايفها...و تنهدت بالقاوي...كل مرة تبدا قريبة مني...نتسوعب قداش حرمتها و حرمت روحي معاها...من حياتنا بالرسمي معادش نحب شي آخر يبعدني عليها...و لا حتى ياقف بيناتنا...و خاصة الساقط لي منعرفش من وين طلعلي...فقت من سرحتي على صوت تليفوني شكون باش يطلب صباح ربي...مديت يدي هزيتو حطيتو سيلونس...إستغربت كي لقيت أمي تطلب جبدت روحي منها شوية شوية باش متفيقش...خرجت من البيت و هزيت عليها نحكي
أنا:شفتني في منامك سلطانة
سلطانة:بالله ؟ وينكم يااخي ؟
أنا:شفما ؟ ساعة شبيه يبكي ؟
سلطانة:حمد الله تذكرت لعندك صغير يستنى فيك تعرف لي هو مستانس بأمو و ما يرقد كان عندها..ساعة وينها هي زادة ؟
أنا:راقدة عندي
سلطانة:شنوووة ؟ يكب سعدك شنية لي تقول فيه ؟
أنا:شنية عندي قلت ؟ حتى أنا عندي حق كيفو
سلطانة:حق شنوووة يااا ساقط ؟ شنية الكلام لي تقول فيه ؟ ياخي هبلت ؟
أنا:قلت الحق...و توا حضرلي ولدي و أبعثو مع جمال لداري...هاني نستنى
سلطانة:بالله...لهدرجة وليت متحشمش...أما الحق مش عليك...الحق على لي راهي معاك...حسابها عندي
أنا:علاش شكون يحاسبها و انا موجود ؟
سلطانة:يا ربي صبرني عالخلفة لي جبتها...ما نفع حد منهم
أنا:حقك علينا سلطانة...ابعثلي ولدي توا...و من غير ما تحاول تجي...خاطر مانيش باش ندخلك...ماك تعرف ولدك شهور و وهو محروم
سلطانة:باهي يا ياسين بااهي
أنا:نهاارك زين
تبسمت و علقت عليها...رجعت للبيت نغزرلها...لتوا غاطسة في النوم...خذيت دوش خفيف و نزلت اللوطة حضرت الفطور...و الطاولة فرد وقت...هزيت راسي على صوت الباب...حطيت من يدي...و مشيت حليتو تبسمت و أنا نغزرلو...ترمى في حملتي بالوقت...خذيت بوسة من خدودو نحكي
أنا:صباااح االسكر يا صغرون
جمال:تطلب حاجة أخرى سي ياسين ؟
أنا:عيشك جمال تنجم تمشي
شديت عليه الصاك متاعو...حطيتو عالطاولة و سكرت الباب...نحكي
أنا:ملا منجمتش تقعد من غيرها يا فرخ
جواد:ب..بابا
أنا:رووح باباتك
قربتو ليا أكثر نبوس فيه...كبست عليه و هزيت روحي طالع عندها نحكي
أنا:سلطانة بدات تفد منك من توا...ساعة أنت الوحيد لي تنجملها
ضحك و حط يدو على فمي...بستو منها و دخلت..قربت منها بالوقت...قعدت على طرف السرير و حطيتو في الوسط...غزرلها و عاود غزرلي...فهمتو فرح خاطرو شافها...مد يدو يمس فيها...حلت عينيها بالوقت..و مدت يدها كبست على يدو...نزلت عليها بالوقت...بستها من خدها...نحكي
أنا:يظهرلي مش كان أنا منجمش نصبر عليك
فتون:إمتى جبتو ؟
أنا:توا وصل
فتون:إيجا هوني يا روحي...قداش توحشتو يا ربي
جبداتو عندها تبوس فيه...دور راسو و ضحك...يحكي
جواد:بابا
فتون:جوااااد
أنا:ريت ماو طلع متوحشني أنا
فتون:بالله...هو جيست ميعرفش يقول ماما...من غير ما تصدق روحك
أنا:يكفي بوه متوحشك...مش برشا
فتون:لا مش برشا
غرست يدي في شعرها...و قربتلها أكثر...عديت عينيا على وجها نحكي
أنا:شنية تحب صغرونتي أكثر من هكا ؟
فتون:نحبو ينطق إسمي انا زادة...مش كان أنت
أنا:معناها غايرة مني
فتون:عاللخر زادة
تبسمت بالوقت...و نزلت عليها أكثر...عديت صوابعي على خدها نحكي
أنا:و الحل توا ؟
فتون:مفما حتى حل...لين هو ينطق
نزلت راسي غزرتلو...كبست على يدو و جبدتو عندي نحكي
أنا:و أنت ماكش باش تفكها توا ؟ هكا تعمل في المشاكل ميغيضكش بوك ؟
فتون:شبيك تكش عليه ؟
أنا:بالله ؟
فتون:والله...أصلا أنت ديما تكش علينا
أنا:باهي ملا معادش تتذمر كي يقول إسمي
جواد:بابا
ضحكت بالوقت...حتى هو نحسو يعمل فيها بلعاني قحرتلي و مدت يدها تجبد فيه...نزلت عليها شوية خطفت بوسة من شفايفها نحكي
أنا:هاني باش نخليكم شوية...أما مطولش عليا
فتون:وين ماشي ؟
أنا:نستنى فيك اللوطة
فتون:باهي
بستو من راسو و هزيت روحي خرجت...دخلت لبيتو هزيت الكرسي متاعو و نزلت اللوطة...حطيتو قدام الطاولة و دخلت للكوجينة...دقايق و خلطت عليا تلفت نغزرلها...ضيقت عينيها تحكي
فتون:إمتى شريت الكرسي هذا ؟
أنا:كان موجود في بيتو من الأول
غزرتلي ندرا كيف و قعدت...قعدت بجنبها...و عطيتو قطعة حلو في يدو...حسيتو شاخ بيها...ضيقت عينيا نغزرلها تلعب بالمغرفة...خذيت نفس نحكي
أنا:شبيك متحبش تاكول ؟
فتون:إمتى عملتلو بيت هوني ؟
أنا:بعد أسبوع أكاكا من اللي جا لدنيا
فتون:في الوقت لي كنت باش طلقني فيه ملا
أنا:علاش سؤال هذا توا ؟ عملت حاجة غالطة ؟
فتون:منعرفش...خطيبتك شنية كان رايها في الحكاية هاذي ؟
أنا:شمدخلها في ولدي هي ؟
فتون:أما كنت باش تعيش معاها في دار هاذي...و كنتو تحضرو لعرسكم زادة...طبيعي باش تاخو موقف خاطرك عامل بيت لولدك هوني و هو ماهوش باش يعيش معاك
أنا:فتوون...وين تحب توصل ؟
فتون:أنت كنت ناوي تفكلي ولدي بعد ما تعرس ؟
أنا:شنووة ؟ فاش قام الكلام هذا ؟
فتون:كلامي واضح...و إلا مكنتش باش تحضرلو بيت هوني...و أكيد كنت باش تخليها هي لي تتلهى بيه
أنا:بالله هذا لي خرج معااك توا ؟ في بالك أنا نجم نعمل فيك هكا ؟ عملت هكا خاطرني كان عرست بيها منحبش ولدي يحس بالنقص وقت يلقى روحو قدام خاوتو
فتون:ملا كنت مخطط باش تجيب صغار منها زادة
أنا:فتوون...ريتني جبتهم ياخي
فتون:مدامك رسمت حياتك معاها...و خططتو لحياتكم مع بعضكم...علاش رجعتلي توا ؟
أنا:الصبر يا ربي...باهي من غير ما تبكي توا...مش حكينا فيه الموضوع هذا ؟
فتون:أنت عملت كلشي على خاطرها...و مش بعيد تعمل نفس الشي مرة أخرى...و ترمي عليا اللوم و تردني أنا السبب اللي بعدك عليها
أنا:لا اله الا الله...توا أنا نعمل هكا ؟
فتون:أنت كنت تلومني على كلشي من قبل
أنا:و فقت على وضعي توا...و مستحيل كان مزلت نغلط معاك و الا نوجعك مرة أخرى
فتون:ا..أنا شبعت...كمل فطورك و وصلني لداري
حطت من يدها و هزت روحها وقفت...وخرت بالكرسي لتالي...و جبدتها في حملتي...غزرتلي مصدومة...دز فيا و  تحكي فرد وقت
فتون:فاش تعمل ياخي...سيبني ياسين
أنا:ماانيش مسيبك
غزرتلي ندرا كيف...مديت يدي غرستها في شعرها كبست عليها و قربتها ليا أكثر...نحكي
أنا:متقاومش خاطرني مانيش مسيبك
فتون:شنية تحب مني زادة ؟
أنا:نحبك إنتي...نحبك تسامحني و معادش تبعد عليا مرة أخرى...كيما نحب نخطط لحياتي معاك إنتي
فتون:أنت أناني ياسين
أنا:شنعمل لعمري...أنانيتي تحضر معاك إنتي...مكنتش نعرف لي حياتي باش تتبدل لهدرجة بعد ما تبعد عليا
فتون:مكنتش باش تخمم بنفس الطريقة...كان حبيت خطيبتك و عرست بيها...حتى مكنتش باش تعملي حساب من أصلو
أنا:في الحالتين...كنت باش نطلع خاسر في الأخير خاطر مستحيل...فما شكون باش يحبني كيفك
فتون:منحبكش
أنا:متأكدة ؟
فتون:عاللخر
ضحكت بالوقت...و كبست على شعرها أكثر...غمضت عينيها موجوعة...و حلت فمها باش تحكي...فازتها خلاتني نغطس في شفايفها من غير ما نخمم...كبست على صدري بالوقت...جبدت روحي شوية...نحكي
أنا:معادش تقولها و لا باش تكلفك برشاا
فتون:معاادش تبوسني
أنا:هاك إنتي بستني من قبل
فتون:مش نفس الشي
أنا:كان تحب تبوسني معنديش مشكلة
فتون:ياااسين يزززي عاااد
أنا:رجعلي بوستي ملا
فتون:يززي من بلادتك...الحق علياا نبوس فيك
أنا:هاني باش ناخوها وحدي
دورت راسي لجواد لي يضحك و يفركح بساقيه تبسمت نحكي
أنا:حتى ولدي معندوش مشكلة معايا اليوم
فتون:أنت بالرسمي مخممتش تبعدو عليا ؟
أنا:مانيش خايب لهدرجة يا روحي...و زيد جواد عندو أم وحدة لي هي إنتي...مستحيل نخلي حد آخر يدخل في حياتو
فتون:أنت تحب ترجعلي على خاطرو ؟
أنا:خاطرني نحبك...و بالنسبة لولدي في الحالتين منتخلاش عليه
فتون:حتى كان أنا عرست ؟
عديت صوابعي على خدها...لي باش يطرشق...و غزرت لعينيها نحكي
أنا:شقولك نحكيو على عرسنا إحنا...مش خير
فتون:عرس شنية ؟
أنا:نحبك تعرس بيا...أما المرة هاذي من غير ظغط...و من غير ما تشاور حد...نحبك تكون متاعي خاطرك تحبني...مش على خاطرك مجبورة
غزرتلي من غير حتى كلمة...دوب عاودت بستها و جبدتها عندي نحكي
أنا:إيجا هوني...نحبك جاوبني و إنتي مرتاحة...ما تخمم في حتى شي توا
يديها لي دار عليا خلاوني نكبس عليها اكثر...أصلا منستخايلش لي هي تنجم تكون مع حد آخر و منحبش نخمم فيها الفكرة من أصلو...خذيت نفس طويل من ريحتها...و تنهدت براحة...هزيت عينيا نغزرلو...بلبز الكرسي و روحو بقطعة الحلو لي في يدو...غمزتو بالوقت...مدلي يديه يحب يجي عندي...تبسمت بالوقت كبست عليها و قربت لوذنها...نحكي
أنا:هاك فكيت بلاصة ولدك...يظهرلي غاير منك
دورت راسها بالوقت غزرتلو...باقي يضحك عامل جو تبسمت تحكي
فتون:سيبني توا
أنا:خليك عندي...من غير ما يفكك مني توا
فتون:ظاهر برشا شكون غاير في الحكاية
ضحكت بالوقت...و كبست عليها أكثر...معينيش باش نسيبها توا...بالرسمي حسيت روحي كنت مضيعها و لقيتها...حتى لتوا مزلت خايف من إحساس أنها تبعد و تخليني...خاطر معنديش إستعداد نخسر عيلتي مرة أخرى...مهما كان اللي باش يصير بعد توا.
#ياسين_فتون❤❤❤