كوكايين

الحلقة الرابعة عشر

🔸️حلقة 14
🔸️روجين تحكي:
حليت عينيا على نهار جديد...هزيت روحي تقعدت...و تكيت لتالي...دورت راسي شوية على صوت الباب...نغزر لزهور لي صبحت عليا و حطت الصينية عالتابل دونوي و خرجت...بقيت نغزرلها من غير حتى كلمة...اصلا معادش نعرف قداش من نهار تعدا عليا هوني...من ليلة عرسو معادش قابلت حد فيهم من غير امي لي تدخل طيش كلمتين و تخرج...عديت يديا زوز على كرشي حتى الوجيعة لي كانت تذكرني بالغلطة متاعي..معادش حسيت بيها...فرد وقت الوجيعة لي في قلبي قوات أكثر...كرهت روحي و كرهت كلشي يربطني بالعيلة هاذي...خذيت نفس و هزيت روحي لبيت البانو...عديت عينيا على وجهي...استغربت من الحالة لي وصلتلها متوقعتش بعد عرسو باش يصير فيا هذا الكل...نعرف روحي قوية...اما كلشي جا ورا بعضو...حتى منعرفش قداش تعدا من نهار...و لا حتى شنية لي قاعد يصير خارج بيتي...كلشي كان يهمني...اني نسترجع صحتي و ما نخلي حتى حد يشلق باللي صار...فتون الوحيدة لي نجمت نهز عليها تليفون و نحكي معاها...مديت يديا زوز...نحيت الروبة...و دخلت تحت الما...خذيت دوش خفيف...خلاني نسترجع عافيتي شوية...لفيت روحي و خرجت...مدامني تحسنت من غير ما نخلي حالتي تسوء اكثر...اول خطوة يلزمني نعملها بعد هذا الكل...اني نخرج و نواجه كلشي يعرضني...من غير خوف...و من غير تردد...شيحت شعري...و حليت القاردروب...نعدي في عينيا على كل قطعة تعرضني...يمكن لحق الوقت باش نعيش كيما هوما بالظبط...اني نهتم بالمظهر اكثر من شي آخر...بلكشي امي عندها حق المرة هاذي...انا منستهلش نكون فرد من العيلة هاذي...يمكن اما عالاقل نكون نليق بالمستوى متاعهم...هذا كان كلامها ديما بعدت دبشي على جنب...و غزرت لكل قطعة جابتها هي من قبل...اما و لا وحدة منهم جات على بدني...حتى نظن انو لحق وقتهم توا...بدلت دبشي و حطيت مكياج خفيف...خبيت بيه التعب لي كان واضح على وجهي غزرت للبرفان لي يحبها...و تبسمت على جنب...حتى هاذي معادش تنفع...عملت رشتين من برفان أخرى...و عديت عينيا على روحي...من ال pul بروتال...لسروال لي خلى فورمة بدني تبان اكثر...حتى الكعب لي كنت نفد منو...حليت صاكي...حطيت مفاتحي و تليفوني هزيت الفاست في يدي...و خرجت...نزلت بحذاهم اللوطة...نحكي
انا:صباح الخير
هز راسو غزرلي من فوق للوطة...لين جات عيني في عينو...تبسمت و دورت وجهي غزرت لامي...لي باقي تغزرلي مستغربة...تبسيمتها تقول انو عجبها لي قاعد يصير...خذيت نفس و غزرت لبلقيس...طلعت حاجبي مستغربة و انا نغزرلها قاعدة بجنبو و في بلاصتي زادة...خذيت نفس و قربت منها نحكي
انا:بلقيس عزيزتي...كان معندكش مانع نحب نسترجع بلاصتي
هزت راسها غزرتلي مستغربة...و تبسمت على جنب تحكي
بلقيس:شقصدك ؟
انا:قصدي واضح...كان فهد يحب يبدل بلاصتو و يقعد بجنب امورو...اما مانيش مظطرة نبدل بلاصتي على خاطركم زوز
هارون:رووجين...يزي عزيزتي
انا:خالي انت أكثر حد تعرف اني منفرطش في الحاجة لي نحبها...ينجم هو يبدل بلاصتو على خاطر مرتو
فهد:بلقيس خليها تقعد
بلقيس:شنية لي قاعد يصير فهد ؟
سلطانة:رووجين...عيب عزيزتي
هزيت راسي شوية...ما نحب نسمع انتقادات من حد جبدت الكرسي...و وقفت جات عيني في عينها...تبسمت تحكي
بلقيس:تفضل عزيزتي...مكنتش نعرف لي هي بلاصتك
انا:هاك وليت تعرف...حتى نظن فما برشا قوانين لازمك تتعلمها من فهد
هزتلي براسها باهي...و جبدت روحها لتالي...خذيت علقت صاكي و الفاست متاعي...و قعدت...نحكي
انا:زهور ميسالش تبدل الصحن
قربت مني بالوقت...هزيت راسي نغزرلها...كيفاه مشات من غير ما تتلفت عندنا و لا حتى تقعد باش تكمل فطورها...كبست عالكاسة متاع الما...خذيت رشفة منها و حطيتها...كمل يفطر كانو ما صار شي...هزيت راسي شوية على صوتو يحكي
فهد:شنية تحاول تعمل ؟
انا:تنجم تبدل بلاصتك...فما زوز بلايص فارغين في آخر الطاولة
فهد:مممم...متوقعتش لإنتي باش ترضى تقعد بجنبي مرة أخرى
انا:و أنت لتوا منجمتش تنقص من الثقة لي عندك...اما هاني باش نوضحلك مرة أخرى ميسالش...انا تخليت عليك أنت مش على الحاجات لي في حياتي...معناها مانيش مظطرة نتخلى على كلشي لبلقيس متاعك
هزيت راسي على الصحن لي تحط قدامي...تبسمت نحكي
انا:عيشك زهور
زهور:بالشفا عزيزتي
امي:وين ماشية مبعد ؟
انا:للفاك...بعدها عندي قضية مستعجلة
امي:خذيتلك موعد في سونتر بوتي...نظن وقيت باش تمشي عندو
أنا:مممم باهي كيما تحب
فهد:تطلع تبدل دبشك ساعة
أنا:تحكي معايا ؟
فهد:متخلينيش نفقد أعصابي أكثر
أنا:وفر أعصابك و أطلع رضي مرتك...ساعة مفهمتش شمدخلك فيا
سلطانة:شبيكم نتوما زوز ؟ فاش تحكيو ؟
فهد:أمورنا سلطانة
أنا:خاالي
هارون:تفضل عزيزتي
انا:نحب نبدل كرهبتي
هز راسو غزرلي ندرا كيف...خاطر الكرهبة كانت هدية منو...و هو أكثر حد يعرفني قداش متعلقة بيها...تي حتى وقت يحب يبدلهالي كنت نرفض...تبسمت نحكي
أنا:شقولك ؟
هارون:فهد يتكفل بالحكاية
انا:لااا...فهد توا عندو التزامات أخرى...أنا نحب نختارها وحدي
هارون:باهي روجينا...إختار إنتي لي تحب عليه...و أنا نتصرف مبعد
أنا:عيشك خالي
هزيت روحي وقفت...هزيت صاكي و الفاست متاعي نحكي
أنا:صحة و عافية
كبست عليهم في يدي...و هزيت روحي بعدت عليهم من غير ما نحكي معاه كلمة أخرى...حليت الباب و خرجت...حليت صاكي...نفركس على مفاتحي...اول ما كبست عليهم...جبدني من يدي و دورني عندو...دزني عالكرهبة...يحكي
فهد:أغزرلي هوووني...مانيش باش نطول بالي معاك أكثر...ترجع لبيتك و تبدل اللي عاملاتو في روحك أحسنلك
أنا:أغزرلي أنت باش نموت من الخوف...أحسن حاجة تعملها توا...تبعد عليا خاطرني روطار
فهد:أطلع...فيسع
أنا:منطلعش
قربلي أكثر...حصرني مع الكرهبة...حسيت بانفاسو لي ضربت في وجهي...كبست على صاكي بالوقت...نحارب في روحي باش منضعفش قدامو...نعرف غشو خايب أما مش المرة هاذي...مستحيل نخليه يفرض رايو عليا مرة أخرى هزيت عينيا في وجهو تحكي
أنا:أبعد عليا
فهد:نعرف لي مزلت موجوعة مني...أما تصرفات هذوما مش عليا...ترجع لبيتك توا
انا:والله أنا معادش نحس بحتى شي معاك...من أول ليلة عفست عليا...أنا عفست على قلبي...و منظنش كلامك مزال يأثر فيا بعد توا
قربلي أكثر...غمضت عينيا على أنفاسو لي ضربت في رقبتي...و يدو لأخرى لي تمدت لجنبي...دقات قلبي قوات مع صوتو لي هدا و هو يحكي في وذني
فهد:تكذب...إنتي متنجمش تخرجني منك...حتى متأكد لي توحشتني كيما توحشتك بالظبط يا روحي
حليت عينيا مروهجة...موجوعة من كلامو...كلامو لي معادش نحب نسمعو...معادش نحب نصدقو بعد اللي عملو فيا...هزيت راسي شوية...نغزر لمرتو لي تغزرلنا من فوق..أصلا كلمة مرتو منجمش نستوعبها لتوا..منجمتش نتحمل فكرة...أنو ولى ملك مرا أخرى...خذيت نفس نحكي
أنا:مرتك تراقب فيك
جبد روحو شوية...و عدا عينيه على وجهي...بعدت عينيا منو نحكي
أنا:ما نحب حتى حد يشك في علاقتي بيك...مش بعد ما وفات...خليني نعيش حياة نظيفة مرة وحدة كهو
دزيتو لتالي...و جبدت روحي منو...حليت الباب و ركبت خدمت الكرهبة من غير ما نخمم مرتين...أصلا حسيت كلامي تالي...كافي باش يخليه يبرد...عالأقل يحس شوية من اللي حسيتو وقت إختار ثنيتو و عفس عليا كبست عالفولون بيديا زوز...نمنع في دموعي...معادش نحب نبكي عليه اكثر من هكا...شديت الثنية للكلينيك من غير حتى ما ناخو موعد منو...جبدت الكارت متاعو و طلبتو...هز عليا يحكي
غسان:تفضل
أنا:نجم ناخو رونديفو توا ؟
غسان:شكون معايا ؟
أنا:روجين
غسان:روجين ؟
أنا:مممم كانك مشغول نجي في وقت آخر
غسان:وينك توا ؟
أنا:قدام الكلينيك
غسان:باهي إيجا...نستنى فيك
انا:باهي
خذيت نفس و نزلت...دخلت عندو مترددة...هز روحو وقف و مدلي يدو...صافحتو...تبسم يحكي
غسان:تفضل
انا:نحب نعمل كنترول
غسان:باهي ايجا
هزيتلو براسي باهي و خلطت عليه...عديت دقايق تحت الفحص من غير حتى كلمة...أصلا لتوا مش مستوعبة لي عملتو...بقيت نسمع في كلامو من غير ما نجاوبو كلشي فهمتو منو اني بديت نرتاح و كهو خذيت نفس نحكي
انا:مرسي على كلشي عملتو معايا
غسان:والله كان باش تبقى تشكرني هكا نستغنى على خدماتي
انا:هههههه منقصدش...اما جيست حبيتك نشكرك على آخر مرة
غسان:تنجم تشكرني بطريقة اخرى
انا:شقصدك ؟
غسان:خليني نشوفك مرة اخرى
انا:منعرفش...لازمني نمشي توا
غسان:رد بالك على روحك
انا:عيشك
هزلي براسو باهي...صافحتو مرة و خرجت هاربة منو هو زادة...اصلا معاد نجم ناثق في حد بعد توا...رجعت لكرهبتي..شديت الثنية لفتون...منعرفش كيفاش وصلت عندها...حلتلي الباب مصدومة تحكي
فتون:رووجين...عزيزتي مش مصدقة
انا:صدق صدق...أما قبل هذا جيبلي أي حاجة نلبسها فيسع
فتون:شنية لي صار ؟
دخلت و طبشت صاكي من يدي...نحيت الفاست و الكعب نحكي
انا:تي فيسع...الدبش لي اختارتو صوفيا باش يخنقني الحق عليا حاولت نكون كيفها
فتون:هههههههه باهي ايجا معايا
خلطت عليها...عطاتني روبة من عندها...بدلت بالوقت..و حطيت شعري على جنب...و رجعت بحذاها...باقي تضحك عليا...غزرتلها نحكي
أنا:والله نشفق عليها...و على الطبقة متاعها...و على روحي خاطرني حبيت نولي منهم
فتون:هههههه يا طفلة قاعدة تحكي على امك
انا:اه نسيت باش نقلك خذاتلي موعد في سونتر بوتي
فتون:تفدلك
انا:والله هههههههه على قريب باش تشوف نسخة جديدة من صوفيا
غزرتلي ندرا كيف...عديت عينيا على وجها و طرشقنا بالضحك فرد مرة...هاذي اول مرة نضحك فيها من قلبي...بعد اللي تعدا على راسي الكل....اصلا مستحيل نستخايل روحي نسخة من امي و مانيش باش نكون كيفها مهما صار
#روجين_فهد 💔💔💔