كوكايين

الحلقة الثامنة و العشرون

🔸️حلقة 28
🔸️روجين_تحكي:
بدلت دبشي...و مديت يديا نلم في شعري...منعرفش شبيني شايخة عالميساج متاعو...و لا حتى علاش نحب نقابلو...أما بالرسمي نحس في غسان مختلف برشا طبيعة كلامو و تصرفاتو...تجاهلو للحالة لي تلاقينا فيها...و الوضع لي كنت انا فيه قبل...يمكن هذا الكل خلاني نرتاح في التعامل معاه...خاصة بعد تفهمو ليا بعد اللي صار آخر مرة...من شيرة اخرى...منجمتش ننسى لي حكاهولي فهد...منجمتش ننسى كلامو و الغصة لي كان يحكي بيها على بوه...أنا أكثر وحدة نعرف قداش متعلق بيه...رغم ما يظهر حتى شي من مشاعرو...اما الطريقة لي يحكي بيها عليه...وصفو ليه في كل مرة و طول هذوما سنين...خلاني نعرف قداش هو متعلق بيه و يحبو...خذيت نفس طويل و هزيت روحي خرجت من البيت...لقيتها في وجهي كي العادة غزرتلي ندرا كيف...حاولت نطفيها كي العادة أما خطواتها ليا...خلاني ناقف في بلاصتي مستغربة..هزتني و حطتني تحكي
بلقيس:و أخيرا تلاقينا وحدنا
أنا:مكنتش نعرف لإنتي تحب تشوفني
بلقيس:ممم صراحة نحب نشوفك و نحكي معاك فرد وقت
أنا:كنت باش نسمعلك أكيد...أما توا عندي موعد أهم منك
بلقيس:متكونش تلعب عالحبلين ؟
أنا:وين تحب توصل ؟
بلقيس:لبرشا حاجات...للعريس لامك تحاول دبرهولك لفهد لي متحبش تبعد عليه
هزيت عينيا في وجها...متوقعتش باش توصل تجبد فهد بالطريقة هاذي...قحرتلها نحكي
أنا:شكون عطاك الحق باش تتكلم على حياتي الخاصة
بلقيس:فهد راجلي...فهد لي تحاول ترجعو ليك
تبسمت على جنب...و قربت منها شوية...حطيت عينيا في عينيها نحكي
أنا:فهد من الأول ليا...مخسرتوش حتى نرجعو عزيزتي
بلقيس:أما أمك باش يكون عندها راي آخر في الموضوع
أنا:تهدد فيا إنتي ؟
بلقيس:ماهوش تهديد...أما مجرد تنبيه صغير مني ليك خاطرني مانيش باش نسكت أكثر من هكا
أنا:طبيعي عزيزتي...مدامك وليت من عيلة الصياد..يولي عندك حب التملك...و إطلاق الأوامر...اما مش عليا..مش روجين لي تتهدد من وحدة كيفك
بلقيس:جربني ملا
أنا:باهي...مدامك تحب تلعب عالمكشوف...برا افضحني توا...هوكا الكل باش يتلم عالعشا...قلهم لروجين على علاقة بفهد...صراحة باش تخدمني خدمة العمر...و أنا مانيش خاسرة في الحالتين...مدام فهد مينجمش يحط يدو حتى على مرتو
تبسمت و أنا نغزر لملامح وجها لي تبدلو...رجعت خصلات شعري لتالي...نحكي
أنا:حبيت و لا كرهت يا بلقيس...انتي مجرد لعبة...اداة عبور بالنسبة لفهد...و انتي بالظبط معندكش تحكي على علاقتي بيه...خاطر وحدة كيفك مستحيل تفهمها
بلقيس:صدقني باش تندم يا روجين
انا:ندمني ملا
بلقيس:ساعة نتوقع كلشي منك...مدامك تربيت وحدك تي حتى امك تنفر وجودك
مديت يدي...و ضربتها كف على آخر كلمة قالتها...حطت يدها على خدها...و هزت راسها غزرتلي ندرا كيف منعرفش كيفاش عملتها و لا علاش...اما الموضوع هذا بالظبط...ما نحب حتى حد يحكي فيه...هزيت راسي شوية نغزرلو...من تقحيرتو عرفت لي حضر على كلشي أصلا هو السبب في كلشي...هو لي خلى وحدة غريبة علينا تدخل في علاقتنا...هو لي عطاها الحق في هذا الكل...خذيت نفس طويل نهدي في روحي...قرب منا يحكي
فهد:شفما هوني ؟
بلقيس:أسألها هي
أنا:مفما حتى شي تسألني عليه...أصلا ضيعت برشا وقت
هزني و حطني...قرب مني شوية...يتفحص فيا و يحكي فرد وقت
فهد:وين ماشية الوقت هذا إنتي ؟
انا:شمدخلك فيا...نمشي وين نحب
فهد:الصبر يا ربي...أرجع لبيتك فيسع
أنا:منحبش
بلقيس:فهههد...ياخي هذا لي يهمك توا ؟
فهد:سكر فمك إنتي
أنا:لا عااد...شبيك تسكت فيها...عندها برشا حاجات تحب تقولهم...مثلا تحكي على علاقتنا للعيلة...مش هكا بلقيس
فهد:شننوة ؟
أنا:تحلو الموضوع مع بعضكم...منجمش نوخر أكثر من هكا
خذيت نفس...و هزيت روحي نزلت...منعرفش كيفاش وصلت اللوطة...لي يهمني إني منطيحش في يدو توا خاطرني نعرف باش نضيع الموعد عليا...حتى أمي مرجعتش عليها...اصلا معادش نحب نحكي معاها الفترة هاذي...هزيت كرهبتي و طرت بيها...مديت يدي لتليفوني...لي ينوقز...هزيت عليه نحكي
أنا:وي غسان
غسان:وينك لتوا ؟
جيت باش نحكي...أما سكت كي ريت كرهبتو من تالي...يزمر بالقاوي...باش ناقفلو...صوت غسان رجعني للواقع
غسان:روجين تسمع فيا
انا:غسان...باش نعاود نطلبك أكيد
علقت عليه قبل ما يجاوبني...و شديت الفران على جنب...خذيت نفس و نزلت من الكرهبة..لحق ليا بالوقت ضرب الباب بالقاوي...و قرب مني يحكي
فهد:يااااخي نااوية تهبلني انتي ؟
انا:شبيك تصيح عليا ؟
فهد:من إمتى تخرج الوقت هذاااا إنتي ؟
أنا:فااش قام حتى تحاسبني...مش كان شديت مرتك أحسنلك
فهد:خذات بايها منك...نظن ماكش بحاجتي باش ترد ضربتك
أنا:متكونش خايف عليها...أصلا هي لي جات عندي...و هي لي قللت احترامها معايا
فهد:آخر همي شنية باش يصير فيها...اللي يهمني إنتي وين ماشية توا
أنا:أموري
عدا يدو على وجهو...يهدي في روحو...نزلت على شفايفي شوية نحكي
أنا:باهي منقصدش
كبست على يديا زوز...نعرف روحي كثرتلها...رغم كلشي نعرفو يخاف عليا...خاطر بالرسمي منخرجش في الليل من غيرو هو...نفخ بالقاوي يحكي
فهد:وين ماشية ؟
أنا:أنا ؟
فهد:روجيين...من غير ما تتبهلل عليا
أنا:عند فتون...كنت باش نعدي ليلة عندها
فهد:سألتك جاوبني ؟
أنا:خبرتك
فهد:الكذبة متاعك ما عندها وين توصلك
أنا:نمشي وين نحب...أنا الغالطة خاطرني مزلت واقفة معاك لتوا
تلفت باش نمشي...خطفني من يدي بالوقت...كبست صوابعو على المعصم متاعي...روهجتني...غزرتلو مستغربة نحكي
انا:فهد وجعتني
قربلي أكثر...تكاني عالكرهبة...و مد يدو لأخرى...عدا صوابعو على خدي...يحكي
فهد:جاوبني روجين...خاطرني كان نعرف وحدي متنجمش تتوقع شنية لي باش نعملو فيك
أنا:متهددنيش
فهد:كان نعرف لي إنتي تلعب ورا ظهري...وقتها باش نفذ تهديدي معاك...كان نحس لي فما ريحة ذكر دور بيك...نسفرلك بروحك يا روجين
نزل بيدو لرقبتي...قلبي خض بالقاوي...لقيت روحي محصورة بين يديه...أول مرة يتصرف معايا بالطريقة هاذي...عديت عينيا على وجهو نحكي
أنا:ماكش باش تعملها...متنجمش تقتلني يا فهد
فهد:صدقني نعملها...نقتلك و نقتل روحي بعدك...على إني نخلي يد أخرى تتحط عليك...واضح كلامي ؟
أنا:هاك أنت خذيت وحدة غيري...و ما عملتلك شي...ما نفذت حتى تهديد من اللي كنت نقولو قبل
نزل على رقبتي أكثر...غمضت عينيا بالوقت...قربلي أكثر يحكي
فهد:ما خذيت حد...قداش من مرة لازمني نعاود كلامي بلقيس ما تعنيلي حتى شي...وجودها و عدمو نفس الشي بالنسبة ليا...أما مدامك مركزة عالماخذة و مدامك تشوفها هكا...هاني باش نخليها مرتي بالحق
أنا:ماكش باش تعملها ؟
فهد:مش هذا لي مركزة عليه إنتي ؟
أنا:متخلينيش نكرهك أكثر من هكا...متلزنيش فهد
كبس على رقبتي...غمضت عينيا مع النفس لي تقطع مني...أنفاسو لي ضربت في وجهي...خلاتني نحلهم بالوقت...دوب نجمت نرد النفس من كبست يدو...نحكي
أنا:ا..اللي تعملو...باش يولي عليك...م..مدام تحب تقتلني أعملها توا...رتحني و ا..إرتاح
كبس عليا أكثر...لين حسيت بصوابعو...تغرست في رقبتي...عديت عينيا على وجهو...حاولت نحكي...اما شفايفو...لي اخترقت شفايفي في لحظة...خلاتني نسكت...يدو لي ترخفت...خلات بوستو تولي حنينة عكس القوة لي عاملني بيها دقايق لتالي...جبد روحو شوية...دوب عاود باسني يحكي
فهد:أرحمني
كبس على خدي أكثر...رغم برودة الجو...حضنو كان دافي عاللخر...ضو الكرهبة لي ضارب في وجهو...أنفاسو غشو لي مخلط بحنيتو...يخليني نتعلق بيه أكثر...نكذب كان نقول لي انا نجم نحيه من مخي...و لا حتى نعيش من غيرو...فرد وقت نحب نصدق لي هو محطش يدو عليها و لي ماهوش باش يمسها مهما صار..نزل بصوابعو لشفايفي...يحكي
فهد:معادش نعرف نتصرف و إنتي بعيدة عليا...معادش نجم نوفق في شي...حتى وليت خايف من روحي عليك إنتي...ارحمني روجين...و أعطيني يدك المرة هاذي زادة
منعرفش على روحي...كيفاش مديت يدي...حطيتها فوق يدو...لي على خدي...كبس عليها بالوقت...باسني منها يحكي
فهد:متسامحنيش...و متغفرليش لي عملتو معاك...أما رد بالك تخمم تمشي لغيري...إنتي قدرك معايا انا و كهو
حسيت بيدو لي تحطت على ظهري من تالي...لزني ليه اكثر...لين معادش مسافة تفصلنا...خذيت نفس نحكي
أنا:ف..فهد
فهد:يا روح فهد...يا عمري
عديت صوابعي على خدو...منعرفش علاش عملت هكا...ماهوش ضعف مني...اما يمكن خاطرها أول مرة نحسو يستنجد بيا...أول مرة نحس بيه تاعب لهدرجة و أكثر خاطرني نعرف لي هو ما قريب لحتى حد غيري أنا...رغم انو الوضع هذا متعبني...و رغم نعرف باش نتعب اكثر جرايرو...أما في لحظة هاذي نسيت كلشي كلام أمي...و غسان لي يستنى فيا...و استحليت لمسة شفايفو على شفايفي مرة اخرى...لي خلاتني نغطس في حضنو من غير ما نخمم في حتى شي آخر...خاصة بعد كلام اللفعة هذيكا صباح...كبست يديه عليا...خلاتني عاجزة حتى باش نبعدو..حطيت يديا زوز تحت الفاست متاعو...و غطست في تعنيقتو...مهما كانت غلطتو مستحيل يكون كيما أمي...غمضت عينيا براحة...من قربو و ريحتو البنينة...و حليتهم مع دقات قلبي لي قوات...مع ملمس الفرد لي خصرو...فشلت لدرجة لا نجمت نسأل فاش يعمل السلاح معاه...و لا حتى نجبد روحي باش نسألو عليه...هاذي أول مرة في حياتي نعرف لي هو يملك فرد...أما علاش يهز فيه معاه منعرفش...هزيت يدي لظهرو...حتى من رعشة بدني منجمتش نمنعها عليه...حتى لأول مرة نحس بالخوف و انا بين يديه...ونصدق الكلام لي قالو دقايق لتالي...ورا فهد فما لغز كبير من اللي خلاني نعرفو عليه في آخر مرة...يمكن السؤال الوحيد لي باش نسألو لروحي توا....هو شكون فهد ؟ و شكون انا ؟.