كوكايين

الحلقة مئة و إثنى عشر

🔸️حلقة 112
🔸️فتون_تحكي:
حطيت تليفون من يدي و رجعت شعري لتالي...بالرسمي مفهمتش شنية لي قاعد يصير...من أمس نطلب فيه ميهزش...نفس الشي بالنسبة لروجين و لجين..حتى فهد و خالتي سلطانة طلبتهم...منعرفش علاش إحساسي خبرني انو فما شي خايب قاعد يصير...خاصة و هاذي اول مرة تصير حاجة هكا...اصلا ليه برشا ميباتش غادي حتى كان لزم يدخل وجه الصباح...أما المرة هاذي كلشي قاعد يصير غير العادة...غزرت لجواد لي قاعد يحبي في وسط البيت...هزيت الفاست متاعو و البوني لبستهملو...وين حسيتو شايخ...شاورلي لسوسات متاعو كأنو يذكر فيا بيها...علقتها في رقبتو...و هزيتو في حملتي...رجعت لبيتي هزيت كبوطي و صاكي و نزلت اللوطة...حليت الباب و خرجت مترددة...مدام عطلة اليوم ميجيش نخرج وحدي...من غير علمو...فرد وقت منحبش نلقى روحي في مشكلة جراير نبيل...كبست على جواد...نستنى في الطاكسي لي طلبتها...أول ما وصلت...هزيت روحي ركبت...و عطيتو أدراس الفيلا عديت الثنية على اعصابي...لدرجة منعرفش كيفاش وصلنا...طلبت منو يستنى على اساس باش نخلي جواد و نمشي للكلينيك...خاطرني منجمش نبقى على أعصابي أكثر من هكا...خاصة و تليفونو تسكر زادة حلتلي زهور مش قد بعضها...ضيقت عينيا نحكي
انا:زهور شبيك ؟
زهور:م..مدام فتون...الجماعة مش هوني
أنا:علااش ؟
زهور:روجين امس طاحت من الدروج...و على حسب ما فهمت حالتها خطيرة برشا
عديت عينيا على وجها و رجعت لتالي من غير ما نقول حرف آخر...كاني بديت نستوعب لي قاعد يصير...و الف فكرة جات لمخي ساعتها...كبست على جواد و عاودت ركبت...عطيتو عنوان الكلينيك نحكي
انا:فيسسسع امااانك
غمضت عينيا بالقاوي و عاودت حليتهم...خايفة من فكرة انو تكون صارتلها حاجة...و لا تعاود تتعب مرة اخرى جراير عمليتها...هزيت براسي لا...نعرفها قوية و باش تعدي لي صار مهما كان قوي عليها...غرقت في افكاري...لي خرجت منها مع صوتو يحكي
هو:وصلنا
مديت يدي خلصتو و نزلت بالزربة...منعرفش على روحي كيفاش وصلت للداخل...قربت من رسيبسيون نحكي
انا:ياااسين وينو ؟
هي:دكتور ياسين ؟
هزيتلها براسي ايه...و كبست على جواد لي باقي يفركح بين يديا...جاوبتني مترددة تحكي
هي:عالاغلب في البيرو متاعو
خليتها و دخلت نجري...ساقي اعلى من راسي...الجماعة لي عرضتني...خلاتني ندخل بعضي اكثر...غزرت لفهد اول واحد لي متكي لتالي...منعرفش من وين جبت القوة و قربتلو...نحكي
انا:فهههد شفما يااخي ؟ شنية لي قاعد يصير هوني
هز راسو غزرلي ندرا كيف...يمكن هاذي من المرات القليلة لي نلقاه تاعب لهدرجة...و مش منجم حتى يحكي...غزرت لصوفيا نحكي
انا:رووجين وينها ؟
نزلت راسها بالوقت...من غير ما تجاوبني...جات عيني على راجل واقف معاهم...ملامحو مش غريبة عليا منعرفش وين ريتو قبل...فرد وقت خالتي سلطانة تقريب دايخة جملة...كبست على جواد نحكي
انا:فهههد جاااوبني...روجين شبيها ؟ و لجين وينها ؟ شبيكم ساااكتين...حد منكم يجااوبني
فهد:روجين تعظات مرحلة الخطر...أما لتوا مفاقتش
انا:شبيك ماااكش معاها توا ؟ يااخي لجين الداخل ؟
فهد:ل..لجين قاعدة تصارع في الموت
بقيت نغزرلو من غير حتى كلمة...جملة وحدة خلاتني نفقد توازني بالحق...كان مش يدو لي سندتني...كبس على جواد يحكي
فهد:هاات عليك
شدو عليا...و كبس على ظهري بالوقت...هزيت راسي غزرتلو نحكي
انا:ش..شنية لي صار ؟ و من غير ما تحاول تخبي عليا
فهد:صارت محاولة اغتيال كيما آخر مرة...و منعرفوش اذا كانت هي لي مقصودة و لا حد آخر فينا
انا:هااارون...اكيييد هو...هو لي عمل هذا الكل
كبس على يدي أكثر...و بعدني عليهم شوية...يحكي
فهد:فتوون...هدي رووحك توا...كان يطلع هو ورا هذا الكل نهايتو على يدي
انا:م..مستحيل...علاااش حتى يضرهاا هي
فهد:هو مستقصد الكل...بما فيهم انتي و الصغير هذا زادة
عديت عينيا على وجهو...تروهجت أكثر من اللي سمعتو منو...خذيت نفس نحكي
انا:ملااا باش يقضي علينا الكل
فهد:اللي يهمني توا انو ترجعلنا اختي...بعدها باش نصفي آخر حساباتي معاه
انا:هي باش تعيش مش هكا ؟
فهد:ان شاء الله...أما إنتي بالظبط لازمك تكون أقوى منا...خاطر ياسين بحااجتك أكثر من أي حد فينا باهي
هزيتلو براسي باهي...و مديت يدي نمسح في دموعي خذيت نفس نحكي
انا:و..وينو توا ؟
فهد:تلقاه في البيرو
انا:لجين شنية وضعها...شنية قاللكم عليها ؟
فهد:لازمنا نتوقعو كلشي بعد توا
انا:باش تمنع أكيد...خاطرها قوية كيفكم...حاول متهملش روجين زادة...ميجيش تلقى روحها وحدها
هزلي براسو باهي...شديت عليه جواد لي ترمى عندي كبست عليه نحكي
انا:لازمني نشوفو توا...و أنت أعمل لي قتلك عليه
فهد:باهي...عيش اختي
جبدت روحي منو و رجعت لتالي...ملقيتش جرأة باش نحكي مع خالتي و هي في الحالة هاذي...لي خلاني نكمل ثنيتي للبيرو متاعو...حليت الباب بالسياسة...جات عيني عليه...متكي على يدو و غاطس في نوم...دخلت و سكرتها...حطيت جواد عالفوتاي...حتى هو ركح بصفة غريبة...خاصة أنو يخاف ياسين كي يكش عليه وقت يعمل الحس...قربت منو شوية...حليت الملحفة لي محطوطة على جنب...دوب غطيتو تخطف من نومو كأنو كان في كابوس و فاق منو...نزلت عليه بالوقت حطيت يدي على خدو نحكي
انا:سااامحني يا روحي
ياسين:فتوون
جيت باش نحكي...جبدني من يدي بالوقت...حضني بالقاوي...دورت يديا زوز على رقبتو...و كبست عليه نحكي
انا:كلشي باش يكون لبااس...انا عندي ثقة فيك لي باش تمنعها يا روحي
كبس عليا اكثر...لين حسيت بأنفاسو لي تضرب في رقبتي بدات تهدا...جبد روحو شوية...و عدا عينيه على وجهي يحكي
ياسين:جواد وينو ؟
دورت راسي غزرتلو...باقي قاعد في بقعتو...أول ما غزرلو ياسين تبسم...كأنو يستنى فيه باش يهزو...قعدت بجنبو و كبست على يدو نحكي
انا:كيفاش تحس في روحك توا ؟
ياسين:أنا بحاجتك توا...أكثر من أي وقت تعدا عليا
مديت يدي بالوقت...حطيتها على خدو...و عديت عينيا على وجهو نحكي
أنا:نحبك تكون قوي...لجين بحاجتك و امك زادة...كيما الكل باش يكون بجنبك يا عمري...و انا مستحيل نتخلى عليك جملة
ياسين:مدامك جيت ماكش باش تخرج وحدك مرة اخرى...و جواد متحطوش من يدك زاادة...مفهوم كلامي
انا:مفهووم
مديت يدي شوية دورتها على رقبتو و جبدتو عندي أكثر...نحكي
انا:إيجا هوني تراه
غمضت عينيا مع يديه لي استقرو على ظهري...هاذي أول مرة نحسو تاعب برشا...بالعادة ميضعفش مهما كانت الحكاية كبيرة...ياسين من نوع لي يتحكم في روحو لاقصى درجة...حتى كي يبدا حزين ما يظهر شي لحد و لا يخلي حد يسندو...أما توا بالظبط...حسيت انو بحاجة شكون يسندو و يخليه يحس بالأمان زادة..فقت من سرحتي على صوت جواد لي بدا يبكي و على شعرة باش يطيح من الفوتاي...قربت منو بالوقت...هزيتو في حملتي و كبست عليه...باقي يضرب فيا بيديه...غاضتو الفازة خاطر حد ما تلهى بيه...مدلو يديه يحكي
جواد:بابااا...باباا
ياسين:إيجا هوني تراه
هزو من حملتي بالوقت...دور يديه زوز عليه كيما عملت أنا بالظبط...و سكت فرد مرة...عدا يدو على ظهرو يحكي
ياسين:بلاصتك ما يفكها حد يا غيور
دور راسو غزرلي...دوب ضحك و عاود عنقو...دوب تبسمت...خاصة كي ريتو يشم في ريحتو و يبوس فيه قربت منو شوية...و حطيت يدي على يدو كبست عليها نحكي
انا:ياااسين...نحبك ترتاح شوية...نعرف مكاانش لازم نفيقك...أما أنت بحاجة راحة...باش تنجم تكون مع لجين...خاطرها هي بحاجتك انت معاها...انت ركيزة العيلة هاذي...خواتك زوز بحاجة وجودك معاهم...لجين وحدها ماهيش باش تمنع روحها وحدها...و فهد باش يضيع من غيرك...حسيت بيهم خاطرني نعرف اهمية وجودك في حياتي انا و جواد يا روحي
ياسين:خليك معايا فتوون...حتى انا بحاجة شكون يدعمني...و يقويني في كل لحظة
انا:هاني معاك يا روحي...و مستحيل نخليك لآخر نهار في حياتي
غزرلي ندرا كيف...و باسني من جبيني...هزيت روحي قعدت عالطاولة باش نخليه يتسطح...كبس على جواد في حملتو و تكى معاه...من غير ما يفلت يدي...مديت يدي نعدي فيها على شعرو...لين غفى مرة أخرى...حتى جواد رقد في حملتو...عديت عينيا على وجهو...احساس الخوف قوا داخلي..خوف من اللي جاي و من اللي يهدد في العيلة...من شيرة نحب نخرج توا نطمن على روجين لي بقلت وحدها...و على لجين زادة و من شيرة منجمتش نسيب يدو لحظة وحدة..خاطرني نعرف بالقدا شعور الخسارة و وين ممكن يوصل...كان تصير حاجة للجين...كان هوما فقدو اختهم...عيلة كاملة باش تنهار...لجين كانت و باش تبقى أصغر أخت فينا طبيعتها كانت عكس الكل..برائتها ديما سابقتها..تتغشش و ترضى فيسع...تعبر على حبها لكل حد فينا....و تحب الكل داير بيها زادة...رغم انو في الوقت هذاكا حد ما كان مهتم باش يوفر الجو لي تحب عليه...وجود هارون بيناتهم كان طاغي...و كافي باش يخلق فجوة كبيرة في وسطهم...الفيلا هذيكا قد ما هي كبيرة...تخليك تحس انك في دائرة مغلوقة من غير مخرج...و هذا لي استوعبتو اكثر...بعد ما عشت وحدي...و بعد ما عشت مع ياسين زادة...الحل الوحيد لي كان لازم يصير من سنين...انهم يستقلو وحدهم...من غير ما يوصلو لتضحيات هذوما الكل...منستغربش انو هارون ورا هذا الكل و هو كان السبب لي خلى لجين تكون بين حياة و موت زادة...عديت عينيا على وجهو مرة أخرى...هاذي أول مرة نحس بخوفو من الخسارة...و معندوش إستعداد باش يحارب...رغم أنو غطس في نوم...أما كبسة يدو قعدت قوية...كأنو خايف من إني نبعد عليه حتى جواد كابس عليه في حضنو غرست يدي في شعرو أكثر...و نزلت عليه شوية...بستو من جبينو...أهم شي أنو يرتاح توا باش ينجم يقاوم لي مزال و يكون بجنب أختو...خاطر حتى لجين ماهي بحاجة حتى حد فينا من غيرو هو و كهو...نزلت عليه شوية...بستو من خدو و جبدت روحي منو...سكرت الباب و خرجت منجمتش نصبر أكثر...لازمني نطمن عليهم و نرتاح هزيت راسي نغزر لهالة جاية...منعرفش على روحي كيفاش قربت منها...وقفتها نحكي
انا:هاالة...ميسالش لحظة
هالة:تفضل فتوون
انا:نحب نعرف حالة لجين...و من غير ما تخبي عليا أماانك
هالة:ما نجم نقول شي على حالتها...رغم انو العملية كانت ناجحة تقريبا...اما
انا:شنوة ؟
هالة:كيما قال دكتور ياسين قبل...في 48 ساعة الجاية كلشي متوقع
انا:معناها لتوا مفاقتش ؟
هالة:للاسف لا
انا:باهي و روجين شنية وضعها ؟ نجم نشوفها توا ؟
هالة:أكيد تنجم...إيجا معايا
أنا:فاقت ؟
هالة:تقريبا أما لتوا تحت تأثير البنج
هزيتلها براسي باهي و خلطت عليها...اول ما وصلت لقيت فهد خارج من عندها...قربت منو نحكي
انا:حكيت معاها ؟ شنية وضعها ؟
فهد:كي العادة...خليك معاها توا لين نطمن على لجين
هزيتلو براسي باهي...شديت الشارلوت على هالة و دخلت...سكرت الباب ورايا...نغزر للجبيرة لي في يدها و الفاصمة لي على راسها...قربت منها بالوقت...و جبدت الكرسي قعدت بجنبها...مديت يدي شوية...كبست على يدها نحكي
أنا:رووجين يا روحي
دوب حركت راسها شوية و كبست على يدي...ضيقت عينيا نحكي
انا:روجين...تسمع فيا يااخي
حلت عينيها شوية و عاودت سكرتهم...كبست على يدها اكثر...نحبها تحكي معايا باش نطمن عليها...عاودت حلتهم مروهجة تحكي
روجين:ف..فتون
أنا:هاني معاك يا روحي...هاني معااك...قولي انتي في شنية تحس ياخي ؟
روجين:م..موجوعة ب..برشا...بدني يوجع فيا
أنا:حااول متتحركش...متخاافش عزيزتي إنتي باش تكون لباس
غمضت عينيها بالقاوي...لي خلى دموعها تنزل بالوقت وين بدات تبكي بالشهقة...فرد وقت ظاهر لي هي موجوعة عاللخر...كبست على يدها أكثر و عديت يدي على شعرها نحكي
أنا:روجين...شبيك عزيزتي...شنية لي صار ؟
روجين:ا..أمي هي لي د..دزتني من فوق
أنا:شنننوة ؟
روجين:ع..عرفت علاقتي مع ف..فهد
أنا:شكوون خبرها ؟ و فهد شبيه متصرفش
روجين:ح..حكى كلشي لبلقيس بخصوص الصغير لي خسرتو...و ه..هي كملت الباقي و فضحتني معاهم
عديت عينيا على وجها...مصدومة من الكلام لي تقول فيه...مستحيل نصدق لي فهد يعمل حاجة هكا...أكيد فما حاجة غالطة في الموضوع...نزلت بصوابعي لخدها نمسح في دموعها و نحكي فرد وقت
أنا:ششش يززي كهو...متبكيش أكيد فهد عندو تفسير للي صار
روجين:م..منحبش نشوفو مرة أخرى
أنا:باهي هدي روحك توا ؟
روجين:ي..ياسين عرف بالحكاية مش هكا ؟ أكيد ر..راني تفضحت معاه
أنا:ما تخمم في حتى حد توا...لازمك ترتاح و كهو
روجين:م..موجوعة برشا فتون...ما نجمت نحرك حتى شي من بدني
أنا:متخاافش...باش ترتاح مع الوقت يا روحي
روجين:ش..شبيه ياسين مجاش عندي...معادش يحب يشوفني حتى هو مش هكا ؟
أنا:لا مش هكا عزيزتي...عدا ساعات في عملية متاع شكون...هاني حتى أنا كي جيت لقيتو راقد
روجين:ف..فتون متخليهش يكرهني عيش أختي معنديش غيركم تواا
أنا:ششش يزي كهو...حد ماهو باش يخليك عزيزتي
قعدت بجنبها لين بدات تهدا...منعرفش شنية لي صار بالظبط...أما هاذي أول مرة تتعب لهدرجة و تبين خوفها بالطريقة هاذي...خاطر بالعادة ديما فهد يسندها...أما استبعدت وجودو جملة المرة هاذي...دخلت هالة بالوقت طمنت عليها...و حطت زريقة في السيروم...لي خلاها تغفى مرة أخرى...مسحت دموعها و نزلت عليها شوية بستها من خدها و خرجت...رجعت بحذا الجماعة..قربلي يحكي
فهد:فااقت ؟
أنا:لااا...ياخي كيفاش حتى طاحت ؟
فهد:منعرفش...مفاقتش حتى نسألها
أنا:ياخي أنت معندكش يد في الحادثة ؟
فهد:تعرفني نجم نضرها ياخي ؟
انا:أما ضريتها يا فهد...و برشا زاادة
خليتو و مشيت بالوقت...منحبش ندخل في التفاصيل هذوما توا...قعدت بحذا خالتي لي شبه غايبة...لا تحكي مع حد و لا تجاوب في حد...حتى من صوفيا حسيتها في عالم آخر جملة...هزيت روحي وقفت و قربت منو نحكي
أنا:باش ننزل نشري دبوزة ما و نرجع...تحب حاجة انت ؟
هزلي براسو لا...خذيت نفس و حليت الاصونصير...نزلت للكافيتريا...خذيت الما للجماعة خاطرني نعرف ماهمش باش ياكلو شي توا...و زادة ميجيش يبقاو هكا برشا أصلا مش رافض فكرة أنو تصير حاجة للجين و لا هي باش تخليها بينا...بالرسمي معادش فاهمة شنية لي صار بين ليلة و نهار...حتى هارون ريحتو مفماش في الكلينيك...نعرف لي هو ميحبش روجين و طبيعي ميحضرش...اما في وضع كيما لجين...فازة غريبة منو هذا اذا مش هو ورا كلشي قاعد يصير...تنهدت بالقاوي و رجعت للاصونصير...مديت يدي حليت الباب و دخلت دوب كبست عالزر...وقف الباب بساقو...هزيت راسي غزرتلو مصدومة...آخر حد توقعت اني نشوفو هوني في قلب الكلينيك...بدني رعش و منجمتش حتى ننطق بكلمة...اول ما دخل وخرت لتالي...لصقت في الحيط لين طاحو دبابز الما من يدي ورا بعضهم...بعدهم بساقو و غزرلي يحكي
نبيل:كنت في الطابق الثالث عالأغلب
أنا:ف..فاش تعمل هوني ؟
نبيل:حمد الله نطقت...مشى في بالي تقطع حسك
أنا:ش..شنية تحب من عندي ؟
نبيل:مجاوبتنيش
انا:كان يشوفك ياسين و لا فهد...ماكش باش تمنع منهم
نبيل:ملا تعترف لانتي عايشة وسط مجرمين
انا:حاجة متخصكش...نعيش وين نحب و بالطريقة لي نحب عليها زااادة
مد يدو بالوقت كبس عالزر...وين قلبي خض بالقاوي...منعرفش في شنوة قاعد يخمم...و لا شنية ناوي يعمل بالظبط...فكرة انو يشوفوه توا و في الوضع لاحنا فيه...خلاتني نخااف من اللي جاي... قحرتلو نحكي
انا:انت واحد مجنون...في باالك باش تمنع باللي تعمل فيه ياااخي
نبيل:خوفتني عزيزتي...نحب نذكرك انو انتي لي اخترت الثنية هاذي...من غير ما تخمم في شنوة اللي باش يصير...اكا علاش نهايتكم زوز باش تكون على يدي
انا:رررد بااالك...رد بااالك تخمم تقربلو خطوة وحدة خاااطر وقتها باش تكون نهايتك انت يا سااقط
قرب مني بالوقت...وين لصقت في الحيط أكثر...تخنقت منو و من ريحتو...و من وجودو بجنبي زادة...حتى منحبش نخمم في شنية لي باش يصير فيا اكثر من هكا...خاصة و احنا في الوضع هذا...اول ما حسيت روحي تخنقت بقربو...مديت يديا زوز دزيتوو لتاالي بكل قوتي نحكي
أنا:ررد بااالك تقربلي ياااا واااطي
هد عليا بالوقت...و مد يدو حطها على رقبتي...دزني لتالي و خنقني بكل قوتو...هزيت عينيا في وجهو بالوقت...هاذي اول مرة نشوف نظرة الحقد في عينيه لدرجة خفت من اللي يدور في مخو و اللي ناوي يعملو زاادة...حتى متأكدة انو ماهوش باش يعدي الفازة و ضرب ياسين ليه بالطريقة هذيكا...مديت يديا زوز..نمنع في روحي من قبضة يدو على رقبتي...لي رخفها بعد ما قطع آخر نفس ليا...غزرلي ندرا كيف...و عدا صوابعو على خدي يحكي
نبيل:متخااافش...مزال حاجتي بيك
عديت عينيا على وجهو...من غير حتى كلمة...أصلا ملقيتش جهد باش نقاومو اكثر...تبسم على جنب و كمل كلامو يحكي
نبيل:حسابي معاك مزال موفاش لتوا
انا:ش..شنية مزلت تحب من عندي أكثر ؟
قربلي أكثر...وين حسيت بأنفاسو على وجهي...غمضت عينيا مع كلامو يحكي
نبيل:نحبك أنتي...نحبك تخلي كلشي وراك و ترجعلي يا فتوون
جبد روحو شوية غزرلي ندرا كيف...وين دقات قلبي قواات أكثر...لدرجة حسيتها باش تفضحني قداامو متوقعتش باش يقول الكلام هذا مرة اخرى...خاصة لي هو يعرف اني رجعت لياسين...و وليت على إسمو زادة...منعرفش من وين جاب الجرأة هاذي الكل باش يواجهني بيها...دوب نجمت ناخو نفس باش نهدي روحي...هزيت راسي شوية و غزرت لعينيه نحكي
أنا:ا..أنت واحد مجنون...مستحيل تكون عااادي...حتى نشكر ربي أنووو بعدني علييك
نبيل:و خلاك ترجع لواحد ذلك و لعب بيك
أنا:قتلك و باش نعاودلك أنت آخر حد يحكي على ياااسين...عالأقل ماهوش واطي لدرجة انو يقرب من مرا معرسة و يطلب منها أنها تتخلى على كلشي و ترجع ليه...انت تفتقر للمبادئ لي عندو...و حط في مخك...انا كان نموووت مااانيش باش نغزرلك و لا نتخلى على حياتي معاه...تعرف علاش خاااطرني حبيتو و مزلت نحبو زاادة...اما انت باش تعدي حيااتك بالطريقة هاذي و مستحيل توصل للي تحب عليه زادة
تبسم على جنب...و عاود قربلي مرة اخرى...غزرلي ندرا كيف يحكي
نبيل:جربني يا رووحي...صدقني انا باش نخليك تبكي على قبرو كل ليلة
عديت عينيا على وجهو...مصدومة من كلامو و من نبرة التهديد لي يحكي بيها...جيت باش نحكي...تحل الباب بالوقت...وين دخلت بعضي أكثر...حتى منعرفش على روحي كيفاش دزيتو لتالي و بعدتو عليا...كلشي يهمني اني نبعد من هوني و كهو...خرجت من الأصونصير بالزربة...و هزيت راسي بالوقت...جات عيني في عينو وين حسيت بدني فشل...و ساقيا خانوني خاصة بعد ملامح الفجعة و الخوف على وجهو...دورت راسي غزرت لنبيل...لي مد يديه زوز حطهم في مكتوبو...و قعد يغزرلي...وين لقيت روحي بين ياسين لي قاعد يقربلي و هو لي يغزرلي كأنو يستنى فيه باش يواجهو جمدت في بقعتي و معرفتش شنية نعمل بالظبط...أما كلشي تأكدت منو انو معاادش فما مهرب من الحكاية و إني تحطيت في النص...لدرجة متأكدة انو باش تقوم حرب بيناتهم توا...اكا علااش لازمني نحكيلو كلشي توا أحسن ما يفهمني بالغالط و يرجع اللوم عليا...أصلا مستحيل نجم نعيش في الظغط متاع نبيل...أكثر من هكا...و لا حتى نتحمل هذا الكل...دخلت بعضي و خفت اكثر...بعد ما حسيت بيه وقف بجنبي حتى الكلام وحل في حلقي و منجمتش ننطق غمضت عينيا بالقاوي...و عاودت حليتهم...جيت باش نحكي اما الحروف خانتني كي هز راسو غزرلو بدني رعش مع ملامح وجهو لي تبدلت...حتى طرف الجرأة لي كتسبتها دقايق لتالي حسيتها ضاعت مع غزرتو ليا...لدرجة كلشي خممت فيه اني نتقبل اللي باش يصير مهما كان...خاطرني حطيت روحي في نفس النقطة مرة أخرى.