كوكايين

الحلقة مئة و ثمانية

🔸️حلقة 108
🔸️لجين تحكي:
غزرت لساعة اكثر من مرة...اصلا منعرفش شبيني مهتمة بالوقت لهدرجة...يومين عديتهم في بيتي ما نحب نقابل حتى حد و لا حتى نمشي للفاك...هزيت الايكو في يدي و تنهدت بالقاوي...قد ما تقويت بوجودو معايا...نحس في طاقة غريبة تجبد فيا لتالي...اكثر من سؤال معندوش جواب...خايفة يصير تعطيل في حكاية السفر و يطيح كلشي في الما...خايفة نجيبو لدنيا و سلطانة تحرمني منو...نكذب كان نقول خممت نتخلى عليه و لا حتى نزلو...منعرفش علاش نحس فيه حاجة خاصة بيا انا و كهو...و حد ما عندو حق باش يدخل و لا يقرر في بلاصتي مصير الصغير هذا...حطيت يديا زوز على كرشي نحكي
انا:متخافش يا روحي...انا مستحيل نتخلى عليك
خذيت نفس طويل و مديت يدي حليت القجر...جبدت تليفوني...من اكا ليلة محليتوش و مخممتش اني نحلو حتى شريت واحد جديد و رقم جديد زادة...باش ما نخلي حتى شي يذكرني بالليلة هذيكا...كبست عليه و شعلتو...قلبي خض بالقاوي من كمية لي ميساج و المكالامات لي وصلتني منو و من سحر...اما محاولتش نحلهم و لا حتى نقرا اللي بعثو الكل...منحبش نضعف اكثر من هكا...حطيتو من يدي و بقيت نغزرلو...وين لقيت روحي في صراع بين اني نطلبو و لا لا....بين اني نخبرو و لا معندوش حق يعرف...هزيت روحي وقفت نمشي و نجي على اعصابي...لدرجة معادش نعرف شنية نعمل بالظبط...خاطرني بيني و بين روحي...نعرف لي ماهوش الغالط الوحيد في اللي صار...كان مجاش في الحالة هذيكا وقتها راهو معملش هذا الكل...اما زعمة باش يقبل الصغير ؟ و لا يطلب مني نطيحو ؟ برا كان طلب هكا القرار يرجع ليا انا و كهو...حتى كان قبل الصغير هذا مستحيل نرجعلو و مستحيل نتراجع على قرار السفر...جيست نحب نخبرو باش نهني ضميري و كهو...و في حالة صارت حاجة خايبة يكون عندو علم قبل...اما رغم الكلام لي قاعدة نقنع في روحي...داخلي نحب نسمع منو كلام آخر...توا بالظبط نحب شكون يسمعني...يهديني و يطمني...نحب نطمن انو الصغير لي في كرشي ماهوش باش يتضرر...و لي عندو بوه زادة و ينجم يحميه حتى من عيلة الصياد...وسط هذا الكل مزال عندي امل انو مستحيل يتخلى علينا...عديت يديا زوز على وجهي و تنهدت بالقاوي...هزيت تليفون في يدي...و طلبتو بعد تردد كبير...كل ثانية دقات قلبي تقوا اكثر...و خواطري دارت غير العادة...دخلت بعضي كي علق عليا...عاودت مرة و زوز...نفس الشي باقي يعلق اما تجاهلت الحكاية...خاطرو يمكن في الخدمة و لا في اجتماع...خذيت نفس و بعثتلو ميساج بالوقت <<انا حبلة>> و طيشت تليفون عالسرير...كبست على يديا زوز بتوتر...نحس في قلبي باش يخرج من بقعتو...اصلا منحبش نحكي معاه و لا ندخل في سؤال و جواب حتى بعثت الميساج من غير ما نخمم أكثر...كلشي يهمني انو يعرف و كهو...دورت راسي على صوت الميساج هزيتو بالزربة...و يا ريتني محليتوش من اصلو جمدت في بقعتي و انا نقرا في كلامو <<كذبة جديدة هاذي>> قريتو أكثر من مرة...كاني نحاول نستوعب اللي نقرا فيه...مدامو يعرف لي عملو...علاش حتى يحكي معايا بالطريقة هاذي...خذيت نفس طويل حطيت يدي على كرشي و جاوبتو <<انا جيست حبيتك تعرف و كهو...باش متلومنيش مبعد على اي خطوة نعملها...و اعتبر انك ما سمعت حتى شي مني>> شيعت راسي لتالي نرد في النفس...نحس في روحي باش ندوخ من اللي قاعد يصير معايا...هزيت يدي على صوت الميساج متاعو مرة اخرى...حليتو على أمل اني نقرا حاجة اخرى تهديني شوية...أما صار العكس كي العادة...بردت اكثر و انا نقرا فيه <<يكون احسن...و معادش تطلبني بعد توا...خاطر عرسي في آخر الاسبوع>> غمضت عينيا بالوقت...نتحسس في دموعي لي نزلو على خدي...ندمت عاللحظة لي خممت اني نخبرو و عاللحظة لي تنازلت فيها...خاطرني توقعت باش نلقى دعم منو بعد ما بقى ورايا طول المدة هاذي و خاصة بعد اللي صار...معناها كان يستنى فيها باش يتحرر مني و يهني ضميرو...كان يستنى مني نقولو انسى كلشي و عيش حياتك...منعرفش على شنوة لقيت روحي نبكي...و الحرقة لي حسيتها و كتمتها طول الايامات لي فاتو...خرجت اقوى توا...لدرجة منجمتش نمنع روحي...و منجمتش نهدا جملة...حطيت تليفون من يدي و دخلت لبيت البانو...وين لقيت روحي نرد بصفة غريبة...لين حسيت روحي باش تخرج...غسلت وجهي اكثر من مرة و رجعت لبيتي...قعدت على طرف السرير و تكيت لتالي...نرد في النفس لي تسكر عليا...وجيعة صغيرة شدتني...وين نقول باش تنقص...نلقاها ماشية و تزيد...لين معادش نجم نتحرك...و خوف قوي تسلل داخلي...خوف من اني نتفضح قبل ما نعمل شي...خوف من اني نخسر ولدي لي دوب عرفت بيه...وسط هذا الكل...نقمة قوية و حقد حسيتهم ناحيتو...محسيتهمش حتى في اكا الليلة الخايبة...من ساعة...تعدات ساعات اخرى من غير ما نتحرك من بقعتي...حتى الماكلة لي حطيتها زهور و خرجت منجمتش نمد يد ليها...عديت يدي على كرشي نحكي
انا:ت..تحمل على خااطري...و نوعدك ما نخلي حد يضرك يا روحي...تحمل اماانك
بقيت نغزر لتليفوني...منعرفش فاش قاعدة نستنى بالظبط...اصلا متوقعتش حتى طرف انو يحكي معايا بالطريقة هاذي...و لا حتى يخاف مني اني نخربلو حياتو...بعد ما كان يقول لهو مينجمش يعيش من غيري...كل كلمة نتذكرها...نلقى دموعي سابقتني أكثر...عديت يديا زوز على وجهي...الوجيعة لي شدتني خلات عندي رغبة قوية باش نصيح و ترتاح...هزيت روحي وقفت بالسيف...باش نرجع لبيت البانو...اما دخلت بعضي و انا نغزر لقطرات الدم عالفرش...هزيت براسي لا...مستحيل نخسرو مش توا...مستحيل يكون ضعيف و يسلم بسرعة...كبست بيدي عالحيط...وجيعتي غلبتني باش ناقف على ساقيا...و الدم وليت نحس فيه بين ساقيا...حاولت نخمم في اي حاجة ننقذ بيها الوضع اما منجمتش...كان نقعد هوني وحدي...و مهما تحملت الوجيعة هاذي...مصيري باش نتكشف كان يجي لعندي اي حد توا...و مستحيل نجم نسوق الكرهبة و انا في الحالة هاذي...ستنيت نص ساعة اخرى لي طمنت اني ما نلقى حتى حد برا...هزيت التليفون من يدي...خاطرني خفت امي تدخل ورايا للبيت...حليت الباب شوية و خرجت...نمد في الخطوة بالسيف...لدرجة منعرفش على روحي كيفاش وصلت لبيتها...دقيت الباب ورا بعضو دقايق و حلتلي...ضيقت عينيها مستغربة تحكي
روجين:لجين ؟ لباس ماهو ؟ شبي حالتك هكا ؟
انا:ع..عاوني روجين...نحس في روحي باش نموت
روجين:باهي ايجا أدخل قبل ما يشوفك حد
جبدتني من يدي و سكرت الباب...حطت يدها على خدي تحكي
روجين:لجين شفما يا روحي ؟
نزلت راسي شوية...نغزر لساقيا وين غزرت هي زادة عينيها وساعو تحكي
روجين:شنية هذا ؟
انا:م..موجوعة عاللخر
روجين:لجين انتي حبلة ياخي ؟
هزيتلها براسي ايه...أصلا منجمش نخبي عليها...خاطر معنديش لشكون نلجأ من غيرها...رجعت شعرها لتالي و جبدت روحها مني تحكي
روجين:علاااش محكيتليش قبل ؟ ياخي هاذي عملة تعملها لجين...متقوليش حاولت تنزلو وحدك ؟
انا:ل..لااا...والله لا...منعرفش شنية لي صار...م..موجوعة باش نموت...ع..عاوني منحبش نخسرو يا روجين امااانك والله مستعدة باش نعمل لي تحب عليه الكل
روجين:هدي روحك...متخااافش شي ماهو باش يصير
رجعت لتالي بالزربة...هزت المنشفة من الفوتاي تمسحلي في الدم...و جابتلي كبوط طويل تحكي
روجين:البس هذا توا
انا:و..وين ماشيين ؟
روجين:كان تبقى هكا تنجم تموت انتي و الصغير
غزرتلها بخوف...كانها فهمت لي يدور في راسي...كبست على وجهي بيديها زوز تحكي
روجين:متخااافش باااهي...انا معاااك و شي ماهو باش يصير
انا:ف..فهد هوني ؟
روجين:لا جااب ربي ماهوش هوني...و نظن باش يعدي ليلة في دارو...نحبك تركز معايا و تتحمل شوية لين نوصلو للكرهبة باهي
هزيتلها براسي باهي...لبست كبوطها و هزت مفاتحها...كبست على يدي تمشي فيا...دوب نجمت ننزل الدروج معاها...خايفة لا يظهر حد و يشوفني...و لا نصادف فهد على غفلة...اول ما ركبت تكيت راسي لتالي...خلطت عليا و طارت بالكرهبة...وين حسيت روحي بديت ندوخ...كبست على يدي تحكي
روجين:لجييين خلييك قوية عزيزتي...متخااافش
انا:ن..نحس في روحي باش نموت...م..منحبش نخسرو
روجين:صدقني باش تكون بخير...تحمل شوية كهو يا روحي...خاطرني منجمش نهزك لكلينيك بريفي...الكل باش يعرفنا غادي و منجمش نطلب من غسان زادة خاطر صاحب ياسين...شباش نعمل توا يا ربي
غمضت عينيا بالقاوي و عاودت حليتهم...معاادش نجم نتحمل اكثر من هكا...آخر جملة سمعتها منها و هي تحكي
روجين:هاني باش نهزك لسبيطار...جيست تحمل شوية على خاطر ولدك...تحمل على خاطرو مش على خاطر حد يا لجين
مديت يدي بالسيف...حطيتها على كرشي...معنديش يومين من اللي عرفت بيه و بوجودو معايا...احساس القوة لي خذيتها منو مكنتش نعرفها قبل...يومين كانت كافية باش نبني احلام ما فيها حتى حد غيرنا احنا و كهو...انا السبب في الحالة لي وصلت ليها توا...و صغيري لي عرضت حياتو للخطر...كان سكت...كان واصلت في اللي نعمل فيه من غير ما نحاول نخبرو...راني موصلتش لهوني...و متوجعتش منو بالطريقة هاذي...كان جا في بالي احتماال صغير انو باش يجاوبني بالطريقة هذيكا...و لي هو باش يتهرب من غير حتى ما يحاول يفهم...مستحيل كنت نخبرو...و لا حتى نحاول نفسرلو...دمعة سخونة حسيتها على خدي...حرقتني من داخل...حتى كانت آخر دمعة نحس بيها...خاطرني مهما قاومت...بدني محبش يطاوعني...و فقدت القدرة حتى باش نقول حرف آخر...كبست على كرشي اكثر...كأني نحاول باش نحميه...و نكبش فيه فرد وقت...نحب نقولو قاوم و تمسك فيا اكثر...خاطرني باش نكون قوية بيك...و باش نحارب اي حد يحاول يقرب منك و لا يحاول يفكك مني...حبيت نقول هذا الكل...اما نعست بصفة غريبة...و غطست في نومة طويلة...منعرفش اذا باش نفيق منها مرة اخرى.
#لجين_يحيى💔