كوكايين

الحلقة مئة و ثلاثون

🔸️حلقة 130
🔸️فتون_تحكي:
نزلت عليه شوية بستو من خدو و عديت عينيا على وجهو...للحظة عز بيا...هملتو فوق طاقتي...منجمتش نركز معاه و مخي مع ياسين...لتوا مش مصدقة لي قاعد يصير معانا...الخوف لي نحس بيه توا...معشتش كيفو قبل احتمال برك اني نخسرو و ماهوش باش يكون معايا خلاني في عالم آخر...خلي هو يعملها بالحق...تعدا الوقت رزين برشا...لدرجة محسيتش كيفاش طلع النهار...حتى روجين غفات شوية...وين لقيت روحي مزلت نستنى في فهد باش يخليني ندخل عندو...هزيت راسي على حلة الباب...غزرتلو بالوقت حتى هو ظاهر فيه مرقدش...غزر لروجين و قرب منها بالوقت...نحى الفاست متاعو حطها عليها...عدللها المخدة تحت راسها و قرب مني يحكي
فهد:هيا ايجا
أنا:نجم نشوفو توا
فهد:مزال ممنوع...اما مفما حتى حد برا...تنجم تدخل بالسرقة و تخرج فيسع
بقيت نغزرلو مصدومة...عدا يدو على شعرو و عاود غزرلي يحكي
فهد:هيااا فيسع...المهم انك تطمن عليه توا...باش تنجم ترقد شوية
حطيت جواد من يدي و هزيت روحي وقفت...غطيتو و خلطت عليه...شاورلي بيدو يحكي
فهد:من هوني...لازمك تبدل قبل
دخلت معاه بالوقت...جبد كيس و قطعو بالوقت...حطو في يدي يحكي
فهد:شد هذوما و هوكا كمامات هوني...و شارلوت زادة هاني نستنى فيك برا
هزيتلو براسي باهي...اول ما خرج...لبستهم بالزربة و خرجت عندو...غزرلي يحكي
فهد:مطولش برشا...و ما تخاف من حتى شي
انا:ماهيش باش تصير مشكلة جرايري ؟
فهد:عزيزتي مدامك من عيلة الصياد لازمك متخافش و اعمل لي تحب عليه ديما
هزيتلو براسي باهي و قربت من الباب...تحلت وحدها هي و الباب لي بعدها...خذيت نفس طويل و دخلت...دقات قلبي قوات اكثر...منعرفش علاش خوفي زاد...مديت يدي شوية حطيتها على يدو...قعدت على طرف السرير و عديت عينيا على وجهو...حسيت روحي توحشتو غير العادة...توحشت نسمع صوتو و نعنقو مرة أخرى...مديت يدي مترددة...عديت صوابعي على الجروح لي على جبينو و خدو...كلشي لقيت روحي نخمم فيه في اللحظة هاذي اني نقربلو أكثر...نشم ريحتو و نحس بقربو لي تحرمت منو...كبست على خدو و نزلت عليه شوية...خذيت نفس من رقبتو...فرد وقت نتحسس في دقات قلبو...نحب نتأكد لي هو معايا و ماهوش باش يخليني...خذيت نفس نحكي
انا:ياسين...يا عمري توحشتك برشا...توحشت قربك و ريحتك زادة...رد بالك تخمم تمشي و تخلينا...انا منعرفش نعيش من غيرك...قااوم على خاطري و على خاطر جواد لي يستنى فيك هو زادة...اماانك يا روحي...حتى نوعدك مانيش باش نخليك تتغشش مني مرة اخرى و لا حتى نبعد عليك...سااامحني أماانك سامحني خاطرني معرفتش نتصرف و هردت الدنيا بسبب غيرتي...كان هزيت عليك وقتها راهو مصارش هذا الكل و مخرجتش من الكلينيك الوقت هذاكا
غمضت عينيا بالقاوي...معادش نعرف الغلطة متاع شكون اما متأكدة كان هزيت عليه راهو مخرجش من الكلينيك بكري و مصارش عليه هذا الكل...حليت عينيا مع دموعي لي نزلو على صدرو...كبست على خدو اكثر و بستو من خدو لآخر نحكي
انا:انا معاك و باش نبقى نستناك لين تفيق و ترجعلي يا روحي
جبدت روحي شوية و دورت راسي نغزر لفهد لي واقف مع الدكتور موسى...لي مصدوم من تصرفاتنا...كبست على يدو بالوقت...بستو منها نحكي
انا:تو شوية نرجعلك يا روحي
هزيت روحي وقفت...عديت عينيا على وجهو مرة اخرى و وخرت لتالي خرجت...قحر لموسى و قربلي يحكي
فهد:علاش خرجت ؟
انا:خلي الدكتور يطمن عليه قبل...منحبش حالتو تسوء على خاطري أكثر
فهد:باهي ايجا معايا توا...لازمك ترتاح شوية
جيت باش نحكي...اما سكت كي ريتها داخلة عندو..جبدت روحي من فهد و قربت منها بالوقت...وقفت في وجها نحكي
انا:وين ماشية انتي ؟
سارة:باش ندخل نطمن عليه...تنجم تبعد شوية
أنا:ممنوع الزيارة
سارة:فتوون...انا من حقي ندخل وين نحب...خاطرني نخدم هوني عزيزتي
انا:حد ما منعك...اما ما عندك حتى شي هوني 
سارة:نظن فما حاجات اهم مني لازمك تخمم عليها توا
انا:امشي من هوني احسنلك
سارة:و الا شنية باش تعمل...ياخي صدقت روحك اصلا اول حاجة لازمو يعملها انو يتخلص منك
مديت يدي بالوقت ضربتها كف بكل قوتي...و دزيتها لتالي نحكي
انا:تمشي من هوني بقدرك و الا انا لي باش نتخلص منك بطريقتي
قرب مني بالوقت...وقف قدامي بالظبط و غزرلها يحكي
فهد:اغزرلي هوني...معنديش خلق ليك انتي بالظبط...اكا علاش باش تمشي من هوني توا و هاذي آخر مرة تقرب منها و لا تحاول تحكي معاها بالطريقة...خاطرني وقتها انا لي باش نقضي عليك
غزرتلي ندرا كيف و عطاتني بظهرها...حط يدو على كتفي كبس عليا...حطيت راسي على صدرو بالوقت...و تنهدت بالقاوي...منحبش نخمم فيها اكثر من هكا و لا نعطي للحكاية أهمية كبيرة...على خاطر توا بالظبط ما يهمني حتى حد من غير ياسين...كلشي يتحل مع الوقت...و كلشي باش يكون عندو مخرج بعد ما يرجعلي هو...هزيت راسي على صوتو يحكي
فهد:هيا ايجا لازمك ترقد شوية
انا:منحبش نخليه وحدو
فهد:انا موجود هوني...و كان صار شي نعلمك بيه
انا:و متخليهاش تدخل عندو
فهد:طمن...حتى حد ماهو باش يدخل عندو من غير إذنك عزيزتي
انا:عندي ثقة فيك فهد
فهد:عيش اختي
دورت راسي غزرتلو مرة اخرى...و رجعت للبيت...حل عينيه شوية يفركس على السوسات...حطيتها في فمو بالوقت قبل ما يبدا يبكي و يفيق روجين زادة..ضحكلي و عاود غمضهم...قعدت بجنبو و نزلت عليه شوية..بستو من خدو و خذيت نفس من ريحتو خاطرو الوحيد لي يخليني قوية و نتحمل اللي قاعد يصير أكثر من هكا.
#ياسين_فتون💔