كوكايين

الحلقة مئة و أربعة و ثلاثون

🔸️حلقة 134
🔸️فهد_يحكي:
خذيت نفس و مديت يدي دقيت الباب...شوية و حلتلي تبسمت تحكي
فتون:أهلا بيك
أنا:عيشك عزيزتي
قربت منها شوية...بستها من خدها و هزيتو من حملتها نحكي
أنا:وينو سي الشباب ؟
فتون:مزال في بيتو
أنا:معادش فما وقت...شيعمل لتوا ؟
فتون:يحضر في روحو
بست جواد و عاودت حطيتو بين يديها و غزرتلها نحكي
أنا:نمشي نعاونو
فتون:ان شاء الله ما يقلك شي
أنا:علاش شبيه ؟
فتون:مخنوق من الجبيرة لي في يدو
انا:نمشي نفركهم عليه ملا
جواد:فاااد
فتون:هز جواد في يدك...مدام شافك توا ماهوش باش يسكت
أنا:إيجا يا بطل
عاود مدلي يديه مرة أخرى...كبست عليه و هزيت روحي طلعت عندو...حليت الباب نغزرلو...يعدل في شعرو ضيقت عينيا نحكي
أنا:يظهرلي انا لي ماشي نخطب مش أنت
ياسين:الصبر يا ربي...منجمتش تستنى اللوطة
أنا:توحشتك
ياسين:●●●●● عليا...عندك حق
أنا:و باش تحط برفان زادة...هات تراه نشمو...ميجيش الجماعة يهتمو بيك و يخلوني على جنب
فكيتو من يدو رشيت منو شوية...نزلت راسي لجواد شاور لرقبتو يحكي
جواد:منااا
ضحكت و حطيتلو منها شوية...فركح بساقيه يضحك غزرتلو نحكي
أنا:بالله هذا علاش محضر روحو هكا زادة
ياسين:هذا اللي في يدك بالظبط...عندو حظ خير مني و منك
أنا:نعرف...ساعة النسا الكل تجري وراه باش تبوسو ياخي مفكرتش تعطيه لسلطانة
ياسين:قولها لأختك...متقعدش لحظة من غيرو
فتون:نسمع فيكم راني
دورت راسي نغزرلها...قربت مني شوية...فكاتو من يدي تبوس فيه و تحكي
فتون:شبيك أنت و هو على ولدي...لهدرجة تغيرو منو ؟
جواد:منا ماما
شاورلها بيدو لرقبتو وين حطيتلو برفان...شمتها عليه تحكي
فتون:صحة لولدي...ساعة طلعت عليك أحسن منهم زوز
ياسين:جيب عزاها لهوني و أخرج عليا
أنا:شعندي قلت أنا ؟ ياخي باش تمسحها فيا توا متنجمش تحكي معاها هي
فتون:شعندي عملت أنا زادة
ياسين:فتوون حضر روحك عزيزتي معادش وقت خليني نتهنى عالفرخ هذا...خير ما يبقى واحل في راسي
أنا:مزال فما عرس و تحضيرات...ياخي باش تخليني في النص وحدي...هكا و أنا ديما معاك و عطيتك أختي زادة
ياسين:انت عطيتني ؟
أنا:إي
ياسين:متحبش نعاود نطلبها منك...بلكشي نعملو عرس مع بعضنا
أنا:علاش لا...أما من غير الجبيرة هاذي...تمشيش تنقص من هيبة الصياد
ياسين:ملا فاش قام تهز فيا معاك ؟
انا:منعرفش شنية لازمني نقول...زيد كان جات عليا نعرس مباشرة معنديش مشكلة
ياسين:علاش منعرفكش
فتون:معادش فما وقت...ميمشيش عم إبراهيم يرفضكم مبعد
أنا:خلينا نمشيو ملا
هزيت الفاست متاعو...حطيتها على اكتافو و خرجت خلطو عليا بالوقت...ركب بجنبي يحكي
ياسين:هاك تعرف تختار
كبس على بوكي الورد في يدو يدور فيه...ضحكت نحكي
انا:رد بالك تحطو لتالي...ميجيش ولدك يلعبلي بالمستقبل
ياسين:نقدموه هو في بلاصة الورد
انا:خاصة بالبابيون الأحمر لي ربطتهولو أمو...فتون ياخي باش تعرسلو من توا
طرشقنا بالضحك فرد وقت لي خلاها تقحرلنا من المرايا تحكي
فتون:ميزيتوش توا ؟ ياسين مش أنت اخترتلو دبشو ياخي
ياسين:صحيح أما من غير بابيون
طرف السيريو لي شديتو...فقدتو مع كلامو...ضحكت لدرجة منجمتش حتى نخدم الكرهبة...كبست عليه تحكي
فتون:صحيتك ياسين
ياسين:أيااا عاد انت خدم الكرهبة و سيبلي مرتي و ولدي
انا:باهي...باهي هاني باش نمشي
عديت يدي على وجهي و خدمت الكرهبة..طول الثنية و هي ساكتة...حسيتها تغشت من الفازة...عكس الفرخ لي عامل جو..أول ما بديت نقرب لدارهم...دخلت بعضي شوية...منعرفش شنية لي حسيتو بالظبط...و لا علاش صار معايا هكا...ضحك يحكي
ياسين:مزال شوية...شد روحك
أنا:مش وقتك أنت زادة
ياسين:اسمع ياخي حكيت مع ابراهيم قبل و لا هكا على ربي باش نخطبو إحنا ؟
انا:حكيت معاه و حسيتو مزال متغشش من الطريقة لي هزيت بيها روجين من المطار
ياسين:محسوب الكل يعرفك متخممش
انا:خاطر الكل ولا يخطط ورا ظهري
فتون:انا منجمش نخلف بوعدي لصحبتي
انا:و تخبي على راجلك زادة
فتون:خاطرك متنجمش ترقد قبل ما توصل الأخبار لخوك
ياسين:بالله وليت انا الغالط ؟ تو نتفاهمو عليها مبعد هاذي
انا:وفرولي العرك متاعكم توا...كلم سلطانة شوفها إذا وصلت
فتون:وصلو من بكري
ياسين:عالحسبة هاذي...راهم تفاهمو على راسك
انا:زعمة تعملها فيا سلطانة ؟
ياسين:متخافش هاني معاك
انا:باهي
شديت الفران على جنب...هزيت بوكي الورد و الشكولاطة و نزلت...خلط عليا بالوقت...وقف قدامي يحكي
ياسين:أكبس روحك...لي يشوفك هكا يقول أول مرة شاف طفلة...عاد انت تاريخك حافل...احنا نكملو في رسميات برك
أنا:زيد افركهم عليا أنت توا
ياسين:علاش مش صحيح...ساعة منستغربش اذا حبلتها الطفلة قبل العرس
أنا:تهنى ممسيتهاش
ياسين:حمد الله...عشت و شفت النهار لي تربيت فيه
أنا:أسمعني...أحكي معاه أنت يسمعلك و رد بالك سلطانة تبدا تخلط في تاريخ العرس و تقلبلي الحسابات
ياسين:فهد شقولك تاخو شهيق و بعد زفير...ينقصلك التوتر و يخلينا نكملو الحكاية لي جينا على خاطرها
هزيتلو براسي باهي...خذيت نفس طويل و كبست عليهم في يدي..غمضت عينيا بالقاوي و عاودت حليتهم تبسمت و مديت الخطوة فرد وقت...رغم منعرفش في الأصول هذوما و لا حتى شنية باش يصير الداخل اما فرحان عاللخر بالتجربة اللي باش نقدم عليها...خاصة و عروستي تستنى فيا توا...هزيت راسي شوية...جات عيني عليها وين دقات قلبي قوات بالوقت كأني مكنتش معاها ليلة أمس تنهدت بالقاوي و كملت ثنيتي لأهم مرحلة في حياتي.