كوكايين

الحلقة الستون

🔸️حلقة 60
حليت عينيا على جواد لي بدا يتحرك في حضني..نزلت راسي شوية نغزرلو...مزال غاطس في النوم...مديت يدي شوية نزلت الملحقة لي محطوطة فوقنا...عرفت لي هي حطتها من غير ما تهزو من حضني..دورت راسي نغزرلها...قربت مني شوية تحكي
فتون:لحظة باش نهزو عليك...من غير ما يفيق توا
هزيتلها براسي باهي...قربت عندي اكثر...و نزلت عليا حطت يديها زوز على اجنابو و هزاتو في حضنها..باستو تحكي
فتون:هاني باش نحطو في بيتو
أنا:باهي
هزيت راسي شوية نغزرلها...أول ما دخلت هزيت روحي وقفت...عديت يدي على وجهي...محاولة مني باش نفيق بالقدا...رجعتلي تحكي
فتون:العشا حاضر
أنا:باهي...هاني باش نغسل وجهي و نجيك
فتون:باهي
خليتها و دخلت لبيت البانو...غسلت وجهي أكثر من مرة و هزيت راسي نغزر للكاب متاعها..للحاجات لي مرتبتهم بنفس الطريقة متاع قبل..حاجات ستانست إني نشوفهم كل يوم...حتى التفاصيل الصغيرة مشات معاها...تنهدت بالقاوي...و خرجت...لقيت الطاولة حاضرة...و جواد في يدها...ضيقت عينيا نحكي
انا:مش على أساس كان راقد
فتون:فااق...و كان نخليه وحدو ماهوش باش يسكت
أنا:باهي هات عليك
فتون:لا...اقعد انت...ماهوش باش يخليك تاكول في راحتك
أنا:تهنى
قربت منها شوية...هزيتو في حملتي...و جبدت الكرسي قعدت..مد يدو لصحن بالوقت..محاولة منو باش يجبدو وقفتو نحكي
أنا:ششش فااش تعمل ياخي؟
فتون:هههههههههه قتلك لي متنجمش تتحكم فيه
أنا:من إمتى ولى هكا ياخي
فتون:ياخي محسيتش لي هو قاعد يكبر
أنا:أما مش بالقباحة هاذي
هز راسو غزرلي و ضحك...نزلت عليه شوية...بستو و كبست على يدو نحكي
أنا:معناها عاجبك لي تعمل فيه يا فرخ
فتون:ياخي باش تبقى تكش عليه هكا
أنا:باهي لالة...حقك علينا
فتون:صحيح عرفت من روجين...لي عم هارون باش يعرس
أنا:يمكن على قريب
فتون:متوقعتش باش يعرس بعد الوقت هذا الكل
أنا:حد ما يعرف هارون في شنوة يخمم بالظبط...حتى العرس هذا وراه حاجة متأكد
فتون:كيما شنوة ؟
أنا:منعرفش...اللي يهمني توا انو فهد ميكونش متورط معاه أكثر من هكا
فتون:و أنت زادة خليك بعيد عليه
هزيتلها براسي باهي...أصلا منعرفش شنية لي مخلي فهد مزال في جرتو لتوا...كبست على جواد...و نزلت راسي لصحن نطرد في الافكار لي جات في مخي ساعة ليا برشا على حاجة بنينة هكا...رغم أنو زهور ماهيش مقصرة...فقت من سرحتي على صوت تليفوني...ضيقت عينيا و هزيت نحكي
أنا:شفما ياسمين
ياسمين:دكتور ياسين...لازمك تجي للكلينيك توا
أنا:صارت حاجة ؟
ياسمين:ه..هالة...حاولت تنتحر
أنا:شنووة ؟
ياسمين:منعرفش شنية لي صار بالظبط...توا جابها بوها و أمها...عالأغلب شربت حرابش...معرفتش نتصرف..كان لازمني نطلبك
أنا:باهي هدي روحك...أعملو اللازم لين نوصل باهي
ياسمين:باهي
علقت عليها و هزيت روحي وقفت...وقفت في جرتي تحكي
فتون:شفما ياسين ؟
عديت عينيا على وجها...منحبش الحكاية لي صارت تأثر عليها...حتى هي بحاجة أنها ترتاح...حطيت جواد في يدها و تبسمت نحكي
أنا:لازمني نمشي توا...عندي عملية مستعجلة
فتون:باهي
هزيت كبوطي...و قربت منها شوية...بست جواد...و هزيت راسي بستها من جبينها و خرجت...منعرفش على روحي كيفاش وصلت اللوطة...شديت الثنية للكلينيك متوقعتش باش تعمل في روحها هكا...حتى ملقيتش فرصة باش نحكي معاها قبل...أول ما دخلت لقيت بوها في وجهي..غزرلي من غير حتى كلمة حتى انا منعرفش شنية باش نحكي معاهم في الوضع هذا...دوب بدلت دبشي و خلطت عالجماعة..كملت عليهم لي بقى...أحسن شي خلطو عليها...و إلا بالرسمي كانت باش تمشي فيها دوب كملت...وصيتهم باش يطمنوهم برا...و رجعت بحذاها...جبدت الكرسي بيدي و قعدت حتى انا معادش عندي قوة باش ناقف اكثر...كلشي جا ورا بعضو في نهار واحد...منعرفش قداش تعدا وقت بالظبط...أصلا متوقعتش الخطوة هاذي منها...عالأقل كان لازمنا نحكيو في كلشي...نعرف روحي ظلمتها و ضيعتها معايا...أما رغم كلشي كنت نحس في شي ضايع بيناتنا إحنا زوز...كنت نحس أنو فما حلقة فارغة بيناتنا...و مع الوقت لقيت روحي نفركس على فتون في كل تفصيلة منها...اما مكانتش هي...حتى منعرفش شكون ظلمت أكثر في هذا الكل...حلت عينيها شوية شوية...دوب غزرتلي و عاودت سكرتهم...مديت يدي...عديتها على شعرها نحكي
أنا:هالة...تسمع فيا ياخي؟
هالة:ي..ياسين
أنا:شنية تحس في روحك توا ؟
هالة:م..منعرفش
أنا:ساعة كنت نتوقع لانتي أقوى من هكا
هالة:م..مش بعد توا
أنا:نحبك تشد روحك توا...و تكون قوية باهي
مدت يدها شوية...حطتها على يدي...و غزرتلي ندرا كيف تحكي
هالة:خ..خليك معايا ياسين...ص..صدقني باش نضيع من غيرك
أنا:مش وقتو الكلام هذا توا...مش قبل ما توعدني انك تتحسن و معادش تعاود لي عملتو مرة اخرى
هالة:وعد
تبسمت بالوقت...و نزلت عليها شوية...بستها من جبينها رغم كلشي...ما ضرتني بحتى شي...حتى وجودها في حياتي كان مهم برشا...خذيت نفس نحكي
أنا:حاول ترقد توا...و ما تخمم في حتى شي
هالة:خليك بجنبي
هزيتلها براسي باهي...و كبست على يدها...دقايق و رجعت غفات...جبدت روحي منها و خرجت من البيت لقيتهم لتوا يستناو فيا...طمنتهم و فهمت منهم لي ما يعرفو حتى شي من اللي صار...اعتذرت و رجعت للبيرو غزرت لساعة لقيتها تقريب الخمسة متاع صباح...بدلت دبشي...هزيت مفاتحي و خرجت...رجعت للفيلا...أول ما وصلت ترميت عالفوتاي...و تكيت راسي لتالي...حسيت بيها كي دخلت عندي...حطت كاسة التيزانة عالطاولة و قعدت بجنبي تحكي
سلطانة:ماكش باش تقطع الطبيعة هاذي...شنية لي ميخليكش ترجع بكري
أنا:خدمة كي العادة
سلطانة:هذا نفس العذر متاع قبل...لإمتى باش تبقى هكا ؟
أنا:لباس عليا سلطانة طمن
سلطانة:لتوا مقررتش إمتى تعمل عرسك
أنا:مش وقتو الموضوع هذا
سلطانة:ياسين منحبش نظغط عليك...أما مدامك اخترت الطفلة لي تحبها...مفماش علاش تعطل أكثر نحبك تستقر في حياتك
أنا:حياتي ماهيش باش تستقر
سلطانة:شنية لي قاعد يصير ؟
أنا:عرفت من فتون...على حكاية تخص الوعد...ليك و لأمها زادة
سلطانة:أنا وعدت فاطمة قبل ما تموت...إني باش نهتم بفتون...حتى طلبتها منها و هي بين حياة و موت..فتون رفضت...يمكن خاطرها كانت حاسة باللي باش تتعدا بيه...حاولت نقنعها خاطرني كنت نضمن فيك أكثر من فهد...حتى توقعت باش ترتاح معاها...إلحاح فاطمة عليها خلاها توافق..و تعطي كلمتها لأمها...فتون وفات بوعدها أما أنا منجمتش نحميها كيما وعدت أختي
أنا:علاش مخبرتنيش بهذا الكل من قبل ؟
سلطانة:شنية كان باش يتبدل ؟ محسوب كنت باش تحبها كي تعرف بالحقيقة...يمكن مفهومي كان غالط...و توقعت باش تحبها كي تعرفها بالقدا...أما صار العكس على كل منحبش نظغط عليك أكثر...و نحكي على حاجات من الماضي...المهم عندي زوز تكونو مرتاحين و تبنيو حياتكم بالطريقة لي حبيتوها ديما...حتى هي تستحق باش تبدا من جديد...و تعيش الحب لي تحرمت منو
أنا:متنجمش سلطانة
سلطانة:و شنية لي يمنع ؟
انا:برشا حاجات
سلطانة:لا أنت بديت تهلوس...خليني نقوم انا توا صحيح قبل ما ننسى...عمك باش يعمل وليمة في ريستورون...نسيت على اسمو
أنا:و شنية المناسبة المرة هاذي ؟
سلطانة:باش يعلن على عرسو...و أنت لازم تكون حاضر من غير ما ترفض في خاطري...تعرف لي خدمة خوك تعتمد عليه هو زادة
هزيتلها براسي باهي..من غير حتى كلمة..أصلا معينيش باش ندخل في نقاش يخصو هو...و ما نجمت نحل موضوع فتون..خاطرني نعرف باش تعملي درس الوقت هذا...و مش بعيد تقلب الطرح عليا...تكيت راسي لتالي و تنهدت بالقاوي...من غير شي نحس في روحي تاعب و هالة عقدت الأمور أكثر باللي صار...رغم هكا منجمش نضرها أكثر...و رجوعي ليها باش يخليها تتعب أكثر من إني ننهي هذا الكل...باش نستغل فترة وجودها في الكلينيك...و نحاول نفسر كلشي قاعد يصير...منحبش نضيع وقت أكثر من هكا...حتى لأول مرة منحسش روحي ضايع و نعرف شنوة لي نفركس عليه بالظبط...و من كلامها اليوم فهمت أنو مهما كانت الثنية طويلة...و مجهولة فرد وقت...يبقى فما أمل اني باش نرجعها ليا و نرجع عيلتي...لي خرجت منها بإرادتي...كلام سلطانة تحقق بعد شهور قليلة...الندامة ماهيش باش تفيد بعد اللي صار الكل...أما منجمش نتحصر اكثر من هكا لازمني نتصرف و نحل هذا الكل...موضوع هالة...و الساقط لي تخدم عندو زادة...حتى علاقتها بيه تخليني مش قد بعضي...مستحيل نخليه يوصل للي يحب عليه خذيت نفس طويل و هزيت روحي...نمد في الخطوة بالسيف...منعرفش كيفاش وصلت لبيتي...عملت دوش خفيف تفرهدت بيه...بدلت دبشي...و خرجت...الغفوة لي خذيتها مع جواد فادتني برشا...و إلا منعرفش كيفاش كنت باش نركز في هذا الكل...توا بالظبط منجمش نخليها وحدها...حتى فما برشا حاجات لازمنا نحكيو فيها...تخصني و تخصها زادة...وسط هذا الكل منحبش فتون تعرف باللي صار...و لا حتى تتأثر بيه...و إلا باش تتعب أكثر...و نكون خسرت فرصة أخرى تجمعني بيها أصلا كلشي نحب عليه توا بالظبط...إني نحل الأمور هذوما الكل...فرد وقت لازمني نركز على فهد و خدمتو مع هارون...حتى مجبور يحكيلي كلشي قاعد يصير معاه و كلشي يخططلو...و إلا نهاية هذا الكل...حد ماهو باش ينجم يتوقعها...و لا شنوة لي باش يكون الثمن في آخر الثنية...و عيلتنا باش ترجع كيما قبل لازمو يخرج منها كيما دخلها...هارون باش يبقى الفرد الدخيل بيناتنا و لي لازم يلقى ثنية جديدة ليه من غير ما يحاول يمس حتى فرد آخر منا...مرة أخرى.