كوكايين

الحلقة مئة و ثلاثة عشر

🔸️حلقة 113
🔸️روجين_تحكي:
حليت عينيا شوية شوية...نحس في راسي يوجع فيا بصفة غريبة...خاصة مع الاحداث لي قاعدة تتعاود معايا...حتى بدني خاني المرة هاذي و ما نجمت نحرك منو شي...كل قطعة توجع فيا بصفة غريبة...دورت عينيا على امل نلقى حد منهم هوني...خاطرني نحس في روحي عطشت عاللخر...استغربت اكثر خاطر حد منهم ما بقى معايا هوني...حتى فتون زادة...زعمة لهدرجة وليت منبوذة بالنسبة ليهم ؟ حتى هو مكلفش روحو باش يبقى معايا بعد اللي صار الكل...منعرفش على روحي علاش تصدمت لهدرجة...و لا في شنوة قاعدة نخمم بالظبط...كلشي نحب عليه توا...اني نحس بحد جنبي...عالأقل في الوقت هذا...الخوف لي سيطر عليا غريب برشا...فكرة اني بقيت وحدي و خسرت حتى اقرب الناس ليا...خلاتني نتجرع مرارة قوية برشا...كبست بيدي على طرف السرير...محاولة مني باش نهز روحي شوية...أما الوجيعة لي في ظهري و ساقيا منعتني...غزرت لدبوزة الما مرة اخرى...و تقويت على روحي أكثر...لدرجة محسيتش بالباب كيفاش تحل...هزيت راسي نغزرلو مستغربة...نحكي
أنا:غسااان
عديت عينيا على وجهو و تبسمت بالوقت...متوقعتش لي هو باش يجي في الوقت المناسب...قرب مني بالوقت...عبا كاسة الما...هزلي راسي شوية و شربني منها يحكي
غسان:لباس توا ؟
أنا:حمد الله أنك جيت
غزرلي ندرا كيف...عدا يدو على شعري...و تنهد بالقاوي يحكي
غسان:شنية لي صار ؟ كيفاش حتى طحت ؟
أنا:د..دزتني أمي
غسان:شنوووة ؟
غزرلي مصدوم...يمكن حتى هو مستغرب اللي سمعو أما هاذي الحقيقة...حتى مانيش مستغربة من اللي عملاتو خاطر طول عمرها تحب تتخلص مني...و جاتها الفرصة المرة هاذي...اصلا كان هو مزال يهتم بيا حتى شوية مستحيل كان يخلي غسان يدخل لهوني...كبست على يدو...اول ما حسيتو باش يبعد عليا...هزيت راسي شوية نحكي
أنا:متمشيش غساان...متخلينيش هوني وحدي أماانك
نزل عليا اكثر...عدا يدو على خدي...مسحلي دموعي لي هبطت على غفلة...و تبسم يحكي
غسان:متخاافش...ماانيش باش نخليك
باسني من جبيني و جبد روحو شوية...ضيقت عينيا بالوقت و انا نغزر لزريقة لي في يدو...هزيت راسي شوية نحكي
انا:فااش تعمل يااخي ؟
قرب مني شوية...كبس على يدي بالوقت...حاولت نفك روحي اما الوجيعة لي في بدني منعتني...غمضت عينيا كي حسيت بيها اخترقت جلدي...قحرتلو نحكي
أنا:س..سيبني...لبااس مااهو...علاااش تعمل في هذاا الكل
حااولت نصيح...أما صوتي خاني...كانو فما شكون يجبد فيا لتالي...وين حسيت روحي تخدرت جملة...و بدني فشل بصفة غريبة لدرجة منجمتش نحرك يدي جملة جيست نغزرلو و كهو...هز الغطا من فوقي و نزل عليا بالوقت...هزني في حملتو يحكي
غسان:متخاافش...إنتي باش تكون في أمان بعد توا
حطيت راسي على صدرو بالوقت...منجمتش نقاومو و لا حتى ناخو تفسير من اللي نعمل فيه...اصلا غسان و لا مرة ضرني قبل...زعمة باش يعملها توا...الغريبة انو ما كان فما حتى حد يمنعو...و لا حد منهم بقى معايا و لا جا باش يطمن عليا...دوب نجمت نركز في اللي قاعد يصير...حطني في الكرهبة...رجع الكرسي لتالي...غطاني بالفاست متاعو و خلط عليا...عدا يدو على خدي يحكي
غسان:تحمل شوية عزيزتي
أنا:غ..غسان...ا..أنت فاش ت..تعمل ؟
غسان:باش نمشيو لبلاصة ترتاح فيها أكثر...نحبك تاثق فيا روجين...خاطرني مستحيل نضرك و انتي تعرف هذا بالقدا...الزريقة هاذي متخليكش تحس بالوجيعة في الثنية...باهي
دوب غزرتلو و دورت وجهي للبلار...أصلا معنديش جهد باش نجاوبو...و لا نحكي معاه...بالرسمي نحس في بدني مخدر...لدرجة ما نجم نعمل حتى حركة...غمضت عينيا بالقاوي و عاودت حليتهم...و في كل مرة نغمضهم نشوف لي صار معايا مرة اخرى...كأنو الحادثة ترسخت في مخي و متحبش تتفسخ جملة...كلام بلقيس...و فهد و امي...كانو كافيين باش نعرف وضعي في الفيلا هذيكا...هارون كان عندو حق في كلامو...حتى لأول مرة نشوف الثقة لي كان يغزرلي بيها...فهمت انو هو ينجم يغلب فهد و يفرض عليه اي حاجة...كيما فرض عليه عرس بلقيس قبل...ينجم يفرض عليه باش يتخلى عليا...كيما كان لازمني نحط إحتمال أنو باش يجي نهار و تتفضح الحقيقة للكل...و إحتمال اني باش نحمل الذنب هذا وحدي...من غير ما يكون هو معايا...كيما كان لازمني نفهم انو بعد اللي صار مفماش فرصة ثانية خاطرني باش نضر روحي بيها و كهو...الغريبة انو بعد صدمتي الاولى فيه معادش نستغرب أي شي منو...كيما مستغربتش لي أمي حاولت تتخلص مني في أول فرصة جاتها...رغم أنها السبب الأول في كلشي عشتو عديت عينيا عالسما و ضو الشمس الخفيف لي ضرب في وجهي...هذا نهار آخر جديد نحو المجهول...بعد الخايب اللي تعديت بيه...رغم هكا جزء مني مش مصدق كلامهم على بابا...كان مزال حي راهو مخلاش هذا الكل يصير...و مخلاش هارون يضرني زادة منعرفش علاش إحساسي يغلبني في كل مرة...و ميخلينيش نصدق الكلام لي نسمعو عليه زادة...غمضت عينيا بالوقت...اصلا دوب نجمت نركز في الثنية أكثر نعست عاللخر بعد الزريقة لي خذيتها منو...و لي منعرفش وين باش نلقى روحي بعد ما نفيق...حتى نكذب كان نقول عندي ثقة فيه...على خاطر معادش عندي ثقة حتى في روحي...أكثر شي وجعني بالرسمي هو غياب ياسين و فتون و حتى لجين زادة...خاطرني كنت نعتبرهم سندي بعد فهد...نعرف غلطتي كبيرة برشا و متتغفرش...أما مش لدرجة أنهم يبعدو عليا بالطريقة هاذي...عالأقل لين يتحسن وضعي...هزني النوم مع دموعي لي بدات تنزل...منعرفش قداش تعدا وقت...و لا كيفاش فقت من أصلو...حليت عينيا و انا في سريري نغزر لممرضة و هي دور في البيت...قربت مني شوية تفحص فيا و تحكي فرد وقت
هي:كيفاش تحس في روحك توا ؟
عديت عينيا على وجها و دورت راسي نثبت في البيت لانا فيها...بيت جديدة عليا...فرد وقت كلشي متوفر فيها...فقت من سرحتي و من الأسئلة لي هدت عليا مع صوتها تحكي
هي:مدموزال كان تسمع فيا جاوبني ؟
أنا:و..وين انا ؟
هي:متخاافش...انت في امان هووني
أنا:غ..غسان
غمضت عينيا بالقاوي و عاودت حليتهم...كأني بديت نتذكر لي صار معايا...و كيفاش وصلت لهوني زادة عاودت غزرتلها نحكي
أنا:غ..غسان هو لي جابني لهوني...وينو توا ؟
هي:هدي رووحك تواا...شوية هكا و يجي بحذااك
أنا:ن..نحب نعرف شنية لي قاااعد يصير...خليه يجي لعندي توا
مديت يدي بالسيف...فكيت السيرو...قربت مني باش تشدني...بعدتلها يدها نحكي
أنا:متمسنييش
هي:ميجيش هكاا...باش تضر رووحك
أنا:سييببنيييي...نححححب نخرررج من هووني توااا...غسااااان...غساااان وييينك يااااخي...غساااان
كبست على طرف السرير...نادي فيه بكل قوتي...كلشي نحب نفهمو...علاش جابني لهوني و شنية مصلحتو هو زادة...سكت على صوت الباب لي تحل...هزيت راسي شوية نغزرلو...وين حسيت صوتي تقطع و منجمتش نعمل حركة اخرى...آخر حد توقعت اني نشوفو و لا يظهر قدامي بالطريقة هاذي...مد يدو شاورلها باش تخرج...هزتلو براسها باهي و خرجت من غير حتى كلمة...عديت عينيا على وجهو مروهجة...كل خطوة يقربلي بيها...دقات قلبي تقوا اكثر...اول ما وصل عندي...وخرت لتالي بالوقت...وقفني بيدو يحكي
يوسف:متخاافش مني عزيزتي
انا:ش..شتعمل هوني انت ؟ غ..غسان وينو ياخي ؟
يوسف:روجين...منحبكش تخاف...انتي في بلاصة آمنة عاللخر...و غسان ميطولش و يكون بحذاك
انا:ا..انت شكوونك ؟ ع..علاش حتى تجيبني لهوني...كان هارون ضرك بحااجة...والله ما عندي ذنب جملة...حتى هو ميحبنيش زادة
يوسف:هدي روحك...مجبتكش هوني على خاطر هارون
انا:انت باش تنتقم من فهد بيا انا ؟
قرب مني اكثر قعد على طرف السرير...وين وخرت اكثر...لين حسيت أنفاسي تقطعت جملة...كيما كل مرة نتفجع فيها...مد يدو بالوقت كبس على يدي يحكي
يوسف:قتلك متخافش مني...مانيش ساقط باش نستغل طفلة صغيرة في حاجة معندهاش ذنب فيها
انا:م..ملا شنية لي يخليك تجيبني لهوني ؟
يوسف:خاطرني وعدتك قبل اني مانيش باش نتخلى عليك
انا:كيفاش عرفت بالل صار ملا ؟
يوسف:خاطر جمال صاحبي...نعرف أخبارك منو
أنا:عم جماال ؟
هزلي براسو ايه...سكت شوية و عاودت هزيت عينيا في وجهو...نحكي
أنا:حتى كان وعدتني...اللي عملتو مخاطرة
يوسف:كلشي يهون على خاطرك
أنا:ا..انت شكونك ؟ و علاش حتى تعاوني بالطريقة هاذي ؟ ي..يعني قربت مني قبل على خاطر فما مصلحة في الوسط مش هكا
يوسف:ششش شبيك تسأل برشا ؟
أنا:جاوبني اماانك
يوسف:صحيح انا كنت نعرفك قبل...حتى كل مرة قابلتك فيها مكانتش صدفة عزيزتي
انا:يعني ؟
يوسف:ا..أنا و ابراهيم صحااب برشا
أنا:ت..تقصد في بابا ؟
يوسف:مممم و اللي نعرفو انو ابراهيم مستحيل يخلي بنتو وحدها في وضع هكا
أنا:ب..بابا كان يعرف بوجودي
يوسف:متتوقعش قداش كان فرحان بيك...و بوجودك في الدنيا هاذي
بقيت نغزرلو من غير حتى كلمة...خاطرني متوقعتش باش نسمع على بابا من شخص آخر...و فكرة انو بابا يعرف لانا كنت موجودة و فرحان زادة منجمتش نستوعبها...كبس على يدي اكثر و قرب مني بالوقت دوب عنقني...بدني الكل تخدر...و أنفاسي تنظمت حاجة فيه غريبة...نفس الأمان لي كنت نحسو مع فهد قبل رغم اني منعرفوش بالقدا و منعرفش وين يحب يوصل بالظبط...مديت يدي بالوقت حطيتها على ظهرو...كاني نحب نرتاح أكثر...و نكسب طاقة جديدة منو...اصلا منعرفش شنية لي يخليني نصدق كلامو...من غير حتى ما نشك فيه...حتى معادش نعرف روحي صحيحة و لا غالطة...اما كلشي كنت نخمم فيه اني نشم ريحة بابا في عبد كان قريب منو...اني نحس بوجود بابا حتى لحظة وحدة في حياتي...منعرفش شنية لي يستنى فيا بعد توا...اما اللي متأكدة منو...إني مستحيل نكون فرد من عيلة الصياد مرة أخرى.
#روجين_غسان_ابراهيم💔