كوكايين

الحلقة مئة و ستة عشر

🔸️حلقة 116
عديت عينيا على وجهو مرة اخرى و دورت راسي عندها بالوقت...غزرتلها مستغرب...محاولة مني باش نفهم لي قاعد يصير...قبل ما نتهور أكثر...على خاطر مستحيل تخلي عليا حاجة هكا...مستحيل تكون تعرف بوجودو و ساكتة طول الوقت هذا...منحبش نشك فيها و لا حتى نخمم في احتمالات اخرى...خاطر كان عرفت بوجودو قبل أكيد راهي خبرتني...غزرتلي ندرا كيف و جبدت روحها مني...تبعتها بعينيا و هي تقرب منو...وين حسيت الارض تهزت تحتي في لحظة...وقفت قدامو بالظبط...و غزرتلي مرة اخرى...اصلا منعرفش كيفاش بقيت واقف في بلاصتي من غير حتى حركة..منجمتش نستوعب اللي قاعد يصير جملة...مدبت خطوة باش نقرب منهم...اما يد ياسين منعتني و خلاتني عاجز مرة اخرى...هزيت راسي غزرتلو...ملامحو متفرقش برشا عليا...حتى هو حسيتو تصدم كيفي و أكثر...عاودت غزرتلها مصدوم اكثر شي منها هي و من وجودها بجنبو...تبسمت كانها تستفز فيا تحكي
روجين:انا وين لازم نكون...مع بابااا
كبست على يدي مع آخر كلمة لي قعدت ترن في وذني...خاطر تعرف بالقدا انو مستحيل تكون بلاصتها هوني...مدامو مزال حي و رجع بعد السنين هذوما...معندوش حق فيها و معندوش حق في الكلمة هاذي و هي تعرف هذا بالقدا...اصلا كلامها خلاني عاجز حتى باش نرد عليها...فقت من سرحتي كي قرب منهم شوية يحكي
ياسين:شنية لي قاعد يصير هوني؟
روجين:ياسين...نظن لازمنا نحكيو وحدنا خير
ياسين:إنتي مدخلش روحك رووجين
قربلو أكثر وقف في وجهو...غمضت عينيا بالقاوي..نفس الأحداث الخايبة تعاودت قدامي لدرجة حسيت روحي بديت نتخنق و نفقد في اعصابي فرد وقت...كان يطلع فما احتمال واحد صغير...أنو عندو يد في موت بابا وقتها مستحيل نجم نسامحو...حليت عينيا على صوتو يحكي
إبراهيم:أنا لي استدعيتكم لهوني على خاطر فما حساب بيناتنا لازمو يوفى
قربت منو بالزربة لدرجة منعرفش كيفاش حرقت المسافة لعندو...هديت عليه في لحظة و كبست عالفاست متاعو نحكي
أنا:اغزرلي هوووني...كااان نعررف لانت عندك يدد في موووت باباااا نهااايتك على يدي
روجين:فههههد يزززي فاش تعمل ياااخي
دورت راسي قحرتلها...جبدت روحي منو و قربت منها نحكي
انا:انتي متنجمش تتخلى عليااا...جيييست خاااطرو خرج في حياااتك...انتي شنية تعرف عليه باش تقولو بابااا تكللللم
روجين:عرفت لي لازم نعرفو و انت معندكش حق باش تدخل فيااا و في قراراتي جملة
انا:امتى لحقت تعررررفو...باااش تاخو قرااار
ابراهيم:هدي رووحك...مش بالطريقة هاذي تتحل الامور
انا:انت بالذااات متمسنيش...متقربليش...ررد باالك
ياسين:وين كنت ياااخي؟ علاااش حتى ظهرت توا؟ و لشنوة قااعد تخطط ؟
انا:وااااضح باااش يكمل لي بداااه
روجين:فهههد...متحكييش حاااجة انت متعرفهاااش
ابراهيم:رووجين انتي اطلع لبيتك و متدخلش فيها الحكاية
قحرتلي و وخرت خطوة باش تمشي...كبست على يدها و جبدتها عندي نحكي
انا:حتى حددد مااا عندو حق يأمررها في وجووودي خلي المعلووومة هاذي في مخك انت زااادة
حاولت تجبد روحها...قحرتلها بالوقت باش نحكي...قص عليا كي قرب منو اكثر يحكي
ياسين:كان يطلع عندك يد في موت بابا...تكون قضيت على روحك برجوعك لهوني
روجين:يااااسين...شبيكم ياااخي لهدرجة حد منكم ما ينجم يسمع زوز كلمات مع بعضهم
انا:روووجين...انتي مدخلش روووحك فيها الحكاية احسنلك
إبراهيم:انا ما قتلت حد و مدامني استدعيتكم لهوني...معناها نحب نوضح الحكاية لي رواها عليكم هارون...و نبرأ روحي من تهمة معنديش يد فيها
ياسين:علااش حتى لتوا باش رجعت ؟
إبراهيم:تفضل تو تعرف كلشي
تلفت عطانا بظهرو...خلط عليه من غير ما يخمم..كبست على يدها اكثر نحكي
انا:وصلنا لهووني يااا فرخة...لحقت تعرف بوووك و تسلم فياااا
روجين:سيبني ياااا مهبووول اصلا كان جيت نعرف لي هو باش يطلبك لهوني رااني رفضت و خليتك معلق...خااطرك تستهل
انا:اغزرلي هووني...عاااقبني كيمااا تحب و باللي يجي في مخك اماااا رد باالك تستغل حكاااية بابااا ضدي يا رووجين
فلت يدها و عطيتها بظهري...خلطت عليهم من غير ما نعاود نغزرلها...اصلا مش مصدق اني نجم ناقف قدام حقيقة استنيتها سنين...حقيقة نحب نسمع تفاصيلها الكل و نرتاح حتى منعرفش كيفاش ساقيا هزوني وراهم...دخلت للبيرو متاعو وقفت جنب ياسين بالظبط و هزيت راسي نغزر لتصويرتو مع بابا...تصويرة تمنيت نعنقها في لحظة و نحس اللي بابا موجود معايا مرة أخرى...فقت من سرحتي على صوتو من غير ما يتلفتلنا و لا ينزل راسو من التصويرة هو زادة
إبراهيم:سنين لتالي كمال خلالي امانة كبيرة...انا مكنتش قدها و منجمتش نوفي بوعدي ليه
تنهد بالقاوي و تلفت عندنا...وقف قدامنا بالظبط...غزر لياسين و غزرلي يحكي
ابراهيم:الامانة لي وصاني عليها كنتو نتوما زوز...كان ديما يقول ياسين اكبر من عمرو...ماهوش باش يتعبك و ديما يتفهم الامور بسرعة...أما فهد
غزرلي ندرا كيف و تبسم فرد وقت وين لقيت روحي نحب نسمع كلام بابا عليا خذيت نفس نحكي
أنا:أما فهد شنية ؟
إبراهيم:فهد متسرع...ميحبش يعترف بالغلط متاعو و لا حتى يتنازل زادة...أكا علاش ديما لازمو شكون يوجهو و يفهم انو سندو الوحيد في الدنيا هو خوه و كهو
غزرت لياسين بالوقت...الكلام هذا نعرفو بالقدا و كان لازمني نفهمو بكري مش توا...كيما عندو حق انا ديما متسرع و منجمش نخمم كيما العباد الكل...و منجمتش نكون كيما بابا يحب زادة...تنهد بالقاوي يحكي
إبراهيم:أنا منجمتش نأدي الأمانة خاطرني تحبست لمدة طويلة
دورت راسي غزرتلو مستغرب...آخر احتمال جا في مخي أنو يكون عايش و موجود في الحبس...لدرجة لقيت روحي عاجز باش نسألو كان مش ياسين لي تكلم
ياسين:شقصدك؟ و شنية لي خلاك تتحبس طول السنين هذوما ؟
إبراهيم:الدوسي هذا...موجود فيه كلشي تحتاجوه...هارون سنين لتالي خلى كمال يوقع على صفقة مزورة و نجم ياخو بصمات على الفرد مقتول بيه شكون...وقتها جبرني بين اني نتحمل هذوما في بلاصة بوكم و لا
ياسين:شنية ؟
ابراهيم:يتحبس هو
انا:انت تحملت التهمة عليه ؟
هزلي براسو ايه و كبس على يدو بالوقت...كأنو يجبر في روحو باش يتكلم
ابراهيم:نهار النطق بالحكم...هو نفسو النهار لي مات فيه كمال...انا لا نجمت نحميه و لا ننقذ روحي...عديت 15 سنة بين اربع حيوط ما نعرف عليكم شي...كان من الكلام لي عالجرائد...سجل الحبس موجود في الدوسي زادة اي حد منكم ينجم يتأكد منها الحكاية
ياسين:باهي العشر سنين لاخرى وين كنت ؟
ابراهيم:عشر سنين لتالي...بعث شكون يقتلني اما ربي عطاني عمر جديد و سي رياض الميساوي جا في طريقي و اسعفني
ياسين:تقصد بو غسان ؟
غزرتلو بالوقت و ضيقت عينيا مستغرب...دورت راسي نحكي
أنا:معناها الواطي هذاااكا هو لي جاابلك روجين لهووني
إبراهيم:صحيح
انا:ريييت ماااو في الأخير طلع صاااحبك...بالله هذا يحبني نقتلو و لا شنية حكايتو ؟
ياسين:وقتو تو...هذا لي شديتو من الحكاية الكل ؟
انا:و ان شاء الله قااعد يزوور فيها هوني ؟
ابراهيم:لا طمن طول الفترة هاذي ما تحب تقابل حد...و انت منهم زادة
انا:يمشيش في باالك فكيتلي بلاصتي...رووجين انا لي ربيتها...كنت في الحبس...تحت الأرض مستحيل نخليك تفكها مني
ياسين:فهههد هدي رووحك...لباااس ماهو؟ انت تحكي مع بوها مش حد آخر كيفاش يفكهالك
انا:خاااطرها تحب تبقى معاه هووني
ياسين:باااش تبقى اكييد
انا:مستحيييل
ياسين:سي ابراهيم...روجين باش تبقى هوني لين يجي يخطبها و يعرس بيها كيما العباد الكل...وقتها تنجم تمشي معاه
انا:كهووو...فيسع وليت في صفو انت ؟
ياسين:فهههد ميسااالش نسمعو شنية لي صاار...خااطرنا نحكيو على جريمة صاارت و حقيقة نفركسو عليها
انا:باااهي كمل تراه و خبرنا على السي يحيى زادة
ابراهيم:يحيى يدي اليمين...عمري ما استغليتو ضد حد و كان شكيت للحظة وحدة انو هو باش يضر لجين مستحيل كنت نخليه يقرب منها
أنا:اما ضرها
إبراهيم:زوز غالطين...كيما انت غلطت مع بنتي قبل...اما مدام فما فرصة ثانية لازم كل حد يستغلها و انا مانيش ضدكم...و عمري ما خممت نضركم و لا حتى نبعد بنتي من ثنيتك...اما هوني هي في امان اكثر...خاطر حتى حد ما يعرفني بالاسم لانا بيه توا...و هارون مستحيل يشك لانا مزلت عايش زادة اكا علاش مدامكم تخمو باش تسافرو لجين...فتون و جواد يقعدو هوني عندي
ياسين:و انت شنية مصلحتك من هذا الكل ؟
ابراهيم:نكون رديت الدين لي عليا و الاهم اني نكون ساهمت في نهاية هارون الصياد
انا:صوفيا تعرف لانت عايش ؟
ابراهيم:لا و يا ريت حد ما يخبرها...نعرف جنانها باش يخرب كلشي...اكا علاش نهارت اللي باش تعرف بوجودي تقعد تحت عيني و متقابلش هارون لين ترجعو من السفر
ياسين:باااهي...انا باش نعطيك نفس ثقة بابا قبل
ابراهيم:و أنا معاكم لآخر نفس في حياتي
انا:باهي و انا نحب نخطب توا...هوكا خويا الكبير قدامك و بنتك باش توافق عليا اكيد...خليها تجي لهوني
ابراهيم:والله لازمك تطبق مراسيم الخطبة...انا عندي طفلة وحدة و لازمني نفرح بيها
ياسين:فهههد لبااس ماهو...امشي قدامي توااا
انا:أحكي معااه أنت يسمعلك
ياسين:هياااا ايجااا
مد يدو يدز فيا لين خرجني وين لقيت روحي نقاوم فيه...مستغربتش انو هارون ورا كلشي خاطرو وقت لي قرر يقتل روجين قبل فضح روحو اما المرة هاذي مانيش باش ننتقم منو و كهو لا...باش نخليه يعيش نفس اللي خلى بابا يعيشو لدرجة انو باش يتمنى الموت في كل لحظة تتعدا عليه.
#روجين_فهد💔