🌺عبق ياسمين 🌺 (طور التنزيل )

part36

عبق الياسمين 🥀
🖋️ نور آية 🖋️
بارت...36🍂
حسن: الله يبارك فيك اخويا هي نقراو الفاتحة
حركو ريوسهم بالايجاب و بداو كيقراو...
بِسْمِ اللَّهِ الرَّحْمَنِ الرَّحِيمِ (1)
الْحَمْدُ لِلَّهِ رَبِّ الْعَالَمِينَ (2) الرَّحْمَنِ الرَّحِيمِ (3) مَالِكِ يَوْمِ الدِّينِ (4) إِيَّاكَ نَعْبُدُ وَإِيَّاكَ نَسْتَعِينُ (5) اهْدِنَا الصِّرَاطَ الْمُسْتَقِيمَ (6) صِرَاطَ الَّذِينَ أَنْعَمْتَ عَلَيْهِمْ غَيْرِ الْمَغْضُوبِ عَلَيْهِمْ وَلَا الضَّالِّينَ (7)آمييين....
سبحان ربك رب العزة عما يصفون و سلام على المرسلين و الحمد لله رب العالمين....
قراو الفاتحة مجموعين و عنقات سميرة ياسمين بحب و بداو تيسلمو على الكبار و يتلقاو منهم التهاني و دعوات الخير كان اذان العشاء تيأذن مشاو الرجال يصليو و بقاو النسا اللي نساو الصلاة كيديو و يجيبو فالهضرة....
سميرة: تبارك الله علك اختي ثورية راك والدة الزين
ثورية: الزين عندكم اختي
حكيمة: (معنقة ياسمين بجنب) عروستنا زينة ياختي الله يحجبها
ياسمين:(حشمانة خصوصا انها ممتعوداش على هاد المعاملة من عند شي واحد غريب جاتها فشكل ولكن فنفس الوقت فرحانة و عاجبها الحال و حاسة بحبهم ليها صادق) ربي يخليك اخالتي...
كملو الجلسة ديالهم حتى نضمو ليهم رجال و تحطات الصينية مع طباسل ديال الحلوة مغربية و الفاكية مشكلة حتى نغز محمد باه غير بريط...
حسن:(ضحك للمرة الثانية على النغزة ديال ولدو) سي مصطفى ايلا كان مسموح الدراري يهضرو بيناتهم و منها يتافقو على الخطبة و داكشي...
مصطفى: ايه اسي حسن مسموح طبعا بنتي ياسمين نوضي نتي و خطيبك لصالون
ياسمين:(تصدمات و برد ليها الما فالركابي هي جالس بعيد عليها و غتموت بالحشمة عاد دابا تمشي تهضر معاه الراس فالراس قالت بسرعة و بعفوية) لا لا بلاش
ضحكو كاملين على جاوبها اللي قالتو بلاما تحس بسبب خجلها عاود باها قاليها...
مصطفى:هههههه غير نوضي ابنتي راه غير خطيبك هداك
سلمات امرها لله وناضت سبقاتو هو وقف قاد سروالو و تبعها حابس الضحكة كيطلع ويهبط فمشيتها و عينيه كيزلقو ليه بلاما يحس لمؤخرتها اللي بارزة فالقميص كيجيوه لبالو شي افكار سافلة واخا فقرارة نفسو متمني يطبقهم و مكرههاش تكون بين يديه و يمارس عليها مختلف طقوس الحب يبين ليها عشقو ليها و يخليها ذوب بين يديه دخلات للبيت و دخل موراها كانت الصالة مدرقة عليهم جلس فوق السداري و جلسات هي بعيدة عليه كتفرك فيديها مع بعضياتهم حشمانة....
محمد:(كيشوف فيها مبعدة عليه بميترو <مسافة الامان😂😂> جاتو الضحكة وقف و قرب تال حداها و جلس) مالك مبعدة مني غناكلك هههههه...
ياسمين:(بكثرة ما متمنية قربو بكثرة ما كرهاه دابا و باغا تبعد منو بسباب حشمتها بغات تبعد و هو يشدها من يدها حتى جلسات بلهلا يحزقو ليها) طلقني عافاك دابا يجي شي واحد..
محمد:(كيمرر صبعانو على يديها و كيستشعر ملمسهم الناعم و عينيه على وجهها و شعرها) شششش مكاين اللي يجي (قرب ليها كثر حتى ولا وجهو فوجهها و قال بهمس) هزي عينيك اياسمين (تسنى منها تهزهم ولكن والو بقات على حالها حابسة البكية حتى عاودها مرة اخرى) ياسمين... هزي فيا عينيك..
استاجبت ليه هاد المرة و هزاتهم ببطئ حتى توقفو على عينيه و غرق فلون عيونها اللي كيجيبو لضس طايح على زنافرو من صفاوتووو و بريقهم اللي عمرو شافو فشي وحدة فيهم بريق فشكل كيلمعو فحالا حابسة البكية سها فعويناتها و حتى هي سهات بعويناتو اللي كانو كيشعو بالحنان و الحب واخا تكون عمية غيبان ليها الحب اللي عندو من جيهتها فعينيه خصوصا ابتاسمتهم الحنينة مقوسين على شكل هلال كل واحد ساهي فالاخر العينين كيتكلمو فحين الفام ساكتة و القلوب تتعزف سمفونية العشق اللي تترقص عليها الفراشات فكرش كل واحد عاق محم براسو و دور نظرو على وجهها كامل و قال بصوت خافت حتى ضربو انفاسو فوجهها بفعل القرب ديالهم
"ما شاء الله"
ابتاسمت بلا ارادتها بخجل و هبطات راسها قلبها كيضرب ولكن فرحانة و عاجبها راسها و كونها انثى بغزلو المحترم و شوفاتو قدر يرضي غرورها كإمرأة و يزيد من ثقتها بنفسها و شكون فينا متبغيش تكون الاحسن فعيون حبيبها بقات كتفكر حتى حسات بيديه على وجنتيها وجر عندو راسها طابع قبلة شغوفة على جبهتها موصل ليها بزاف الرسائل بحكم ان للقبل رسائل و اللي وصلها من قبلتو رسالة حب و احترام و تقدير والاكثر رسالة ديال الامان، الامان اللي حسات بيه معاه بوحدو حتى ملي قرب ليها محساتش بشي شعور خيب بالعكس تمنات اللحظة متساليش و المثل عندو هو اللي مقدرش يصبر قدام هاد الخجولة الفاتنة اللي سلباتو عقلو و قلبو و تفكيرو و برهنات ليه انها الانثى الوحيدة اللي كيخضع ليها و ميقدرش يسيطر على نفسو قدام انوثتها الطاغية و خجلها البريئ و جمالها الخلاب...
مد يدو بدون تردد لحنيكاتها و هنا كانت الصاعقة ملي استشعرو يديه ملمس حنيكتها اللي كانو رطبين و سخان و حومر و طبع قبلة بريئة على جبينها وهو مساخيش بيها ولكن تفكر انهم تعطلو عليهم ولازم يتكلمو فالاجراءات طلق من وجهها مساخيش و شد يدها وقال بصوت حنين...
محمد: ياسمين (تسناها للحظة حتى شافت فيه) قولي ليا شنو تبغي ديري خطبة و ضريب الصداق و عرس او شنو
ياسمين:(تالفة و معارفة والو فهادشي اللي عارفة انها مباغاش العرس و عارفة تاني ان مها غتبزز عليها دير العرس قررات تخلي كولشي عليه) احم انا..... انا معرفتش اللي بان لك
محمد:(بمزاح) انا اختي لا جيتي عليا نهبط دابا نجيب العدول نديك فيدي هههههه (رجع للجدية ديالو) غير قولي اللي باغا متحشميش
ياسمين:(تالفة و حشمانة) غيير اللي بان لك نتا والله
محمد:ههههه واخا الالة اشنو بان لك نديرو خطبة و ضريب صداق من هنا ل15 يوم و موراها بشهر العرس (شاف فيها كيحاول يقرا ملامحها) اش بان لك
ياسمين: مزربتيش شوية؟
محمد:(طاااايب و واصلة فيه للعظم) اشمن زربت راه مكرهتش من غدا تكوني فداري ولكن ضروري من العادات جاوبيني دابا شنو بان لك.
ياسمين:(باغيا غير تفك) واخا صافي حتى هكا مزيان (ناضت تالفة و حشمانة) يله نمشيو تعطلنا
محمد:(كيشوف فيها سبقاتو كتفتف و ترعد غا بوحدها ناض حتى هو تبعها حاى قرب حداها وقال) الله يرزقني معاك الصبر ابنت الناس (ضحك و حتى هي ضحكات و مشات سابقاه حناكها حمرين و حشمانة من الانظار اللي توجهات ليهم)....
كان الكل مبتاسم وهوما كيشوفو فيهم داخلين متواتين مع بعضياتهم و كيبانو كيحمقو بجوج جلسو و قال ليهم محمد على القرار بغات تعتارض الام ديالها بحجة زربتو لكن قاطعها السي مصطفى بالقبول حيت مجاتش تعتارض و هوما قررو مع بعضياتهم....
انهالو عليهم كاملين بالمباركات و تحط العشا....السلطة فالمقبلة اللي عجباتهم و كلاو فيها نيت و هوماا فرحانين بالاستقبال و الكبرانية اللي كبرو بيهم حسسهوم انهم فرحانين بيهم تهزت السلاد اللي رجعات خاوية و تحط الدجاج البلدي بزيتون و البيض البلدي و اللوز مقلي عجبهوم المنظر و كيف كنقولو العين كتاكل قبل الكرس كلاو فيه حتى هو و تهز حتى تحط نص الحولي مشوي مزين بالبرقوق و المشماش و الزنجلان مرشوش عليه عاد اخر حاجة الديسير اللي كان عبارة على صينية كبيرة اوفال فيها جميع انواع الفواكه اللي متواجدة فالسوق فهاد الفترة و الطبقة الفوقانية فيها طورطة ديال الكراميل باردة حلاو و بردو على قلبهم و تهزت الطبلة شكرو الطياب و الاستقبال الرائع و توادعو معاهم الى اللقاء القادم....
ودعو النسا ياسمين بحرارة و تبادلت مع سميرة و احلام ارقام الفون و سلمات على الرجال بقبلة على يدهم و هوما كيرضيو و يعاودو و بقا محمد اللي شد فيدها مبقاش بغا يطلق حتى هزات فيه عينيها مخرجاهم فاجأها بغمزة و بوسة من فمو تلفاتها و صدمتها و طلق من يدها كيضحك مخليها وراه كيف الصنم عينيها كيرمشو و قلبها كيضرب بعنف.....
مرة على مرة كتكتاشف جانب جديد منو و اليوم اكتشفت الجانب الجريئ منو و الزلال و الغريب فالامر انها بينها و بين نفسها مقدراتش تنكر انها عجبها الحال دخلات على صوت مها كتنگر على الزربة ولكن هي اخر همها عقلها معلق بيه حتى بداو كيشكرو و يعاودو فيهم بدلو حوايجهم كاملين و حلفات ثورية ماتكمخ شي وحدة حتى يجمعو الروينة فعلا جمعوها و تجمعو فالصالون حاطين الديسير و بداو كيحلو فالكادوات من البوكي ديال الورد اللي عجب ياسمين للشكلاط اللي كان بنين و غالي داقو منو كاملين حتى تصدمو بالطقم ديال الالماس اللي جابو عمرهم شافو ولا تصورو انهم غيجيبو ليها الذهب فالرشيم عجبهم الجيست بزاااف و تأكدو انهم ولاد الخير و ناس كرماء جمعات ليها مها الطقم فسامسونيط ديال ذهبها خوفا عليه و بقاو قصارين مخلية تيليفونها فالبيت اللي كان كيصوني بنمرة ديال محمد....
نرجعو عند محمد اللي مشاو مجموعين فالطريق فرحانين طالقين المواسق و ناشطين عجباتهم العشية و الاكثر عجبتهم ياسمين بل حمقاتهم سيرتو جداه بقات غير كدعي معاها و تشكر فيها على صوابها و حشمتها اللي قلالت فوقتنا وهو كيسمع و يزيد يغرق فيها....
وصلو للدار ناشطين رغم ان الوقت متأخر الا انهم محسوش بالعيا بفعل الجلسة اللي كانت زوينة بعيدة على اي طاقة سلبية تجيب ليهم العيا و هنا فهم باه علاش رفض محمد انه يجيب حفيظة او شيماء حيت عارفهم اشنو كيسواو و عارف هضرتهم و افعالهم كانت غتنوض شي مشكلة ايلا مشاو....
دخلو للرياض حتى لقاوهم فوجههوم فجليسة ديال المرح حفيظة و شيماء و اميمة و خولة و عيالات العمام اما سلوى كانت بايتة عند صاحبتها مقدراتش تشوف المنظر كانو داوين غير سمعوهم و هوما يسكتو حتى زعزعاتهم حكيمة بتزعريتة حااااارة جامعة فيها فرحة و فقصة و قليان السم خلاتهم غير كيتخنزو....
حسن دخل لبيتو و خوه مشا لبيتو و محمد باس لجداه راسها و باس مو و عمتو و خرج يبات فدارو معندو گانة يجلس معاهم يسممو فرحتو بشي كلمة....
جلسو النسا كيتعاودو بيناتهم و يعاودو للبنات و عيالات العمام على ياسمين و اهلها يشكرو و يعاودو....
حكيمة: تبارك الله و صلى على النبي عليها عمرني شفت فحال زينها تقول حورية ماشاءالله و اش منك يا حشمة و يا صواب الله يحجبها..
كلثوم:(بتأييد لكلام بنتها) اه ابنتي و حتى اهلها ناس مزيانين و معقولين جيدين و موجودين..
حفيظة:(بسم) ايوا صافيييي ضحكو عليكم و بينو ليكم الوجه المزيان اليوم دابا تشوفو مغيخرج فيكم البراني تمشيو عند اللي طامع ليكم فرزقكم و تخليو القريب..
سميرة:(كرهاها و محاملاهاش مكرهاتش تنوض تخنق بحيت كتحاول تنغص عليهم فرحتهم) ايلا كنت انا تقلب و خرجت العار فناسي راه تا ديك بنت الناس غتخرح فيا العار و زايدون يخرج البراني حتى يخرج و ميكونش فحال القريب و فاش غتطمع البنت و الخير اللي عايشة فيه البنت مغرقها و غرقنا معاها غير العراضة ديال اليوم هماوية من داكشي
كتمعني عليها و على اميمة اللي غير ساكتة و دايرا بيها واحد الهالة ديال الهدوء غريبة كتخوف و فداخلها كتسمم بكل كلمة و كتزيد تكره هاد المتطفلة كيما سماتها هي و تحقد عليها....
#يتبع 🐍🐍