🌺عبق ياسمين 🌺 (طور التنزيل )

part65

🥀 عبق الياسمين 🥀
🖋️ نور آية 🖋️
بارت...65🍂
هز راسو بعفوية لقاها واقفة بديك اللبيسة و عاقدة الحجبان بحال شي بنيتة صغيرة سهى فيها مخلي لوخرى تتهضر حتى شافتو مكيشوفش فيها..... دارت شافت فين كيشوف تا لقات ياسمين كتشوف فيها باغا تاكلها طلعات و هبطات فيها عند بالها شي بنت 18 عام و دارت عندو...
نرجس: محمد فين سهيتي
محمد:(مبتاسم و عينيه على ياسمين) واحد الدقيقة
توجه لعند ياسمين حتى قرب ليها و صفر تصفيرة طويلة حتى رجعات كتحبس فالضحكة طلعها و هبطها...
محمد: الله يا ختي الله واش نتي كولشي تايجي معاك مدوقيناش من هاد الزين عندك
ياسمين: بصح جاتني زوينة
محمد: والو خااايبة مافيك مايتشاف احح و كان
ياسمين: امممم تيقتك (هزات عينها فنرجس اللي مازال حاضياهم) محمد شكون هاديك
محمد: الزين ديال محمد غاير ولا (شدها من يدها) تعالي و تعرفي شكون...
توجهو لعند نرجس اللي ملي شافتو شد فيدها تقادت فالوقفة و عينيها على يديهم حتى وصلو لعندها.... ياسمين زيرات على يدو بدون ماتحس فحين هو ابتاسم فاهمها....
محمد: هادي نرجس كليانة قديمة ديال المحل (دار عند نرجس) هادي ياسمين المدام
نرجس:(حلات فمها و عينيها و وذنيها و اي حاجة تقدر تحلها بالصدمة اول حاجة مكانتش متوقعاه يتزوج و ثاني حاجة ماشي بياسمين حيت عند بالها مازال صغيرة داركت نفسها و مدات يدها بابتسامة صفرة لياسمين) متشرفين مدام ياسمين (شافت فمحمد) صافي دخلتي للقفص الزوجية
ياسمين:(مدات ليها يدها بزز ماحملاتهاش) متشرفين حبيبة (عاودت زيرت على يدو لكن هاد المرة من نيتها بمعنى سالي هاد المهزلة)
محمد:(من التزييرة فهم شنو قصدات) ساعة سعيدة هادي مادموزيل نرجس نخليوك دابا....
مشاو فجيهة ديال التقياس مخلينها موراهم تتشوف و تحسر على محمد اللي طار من بين يديها..... وصلو لبلاصة ديال تقياس الحوايج و هو يوقفها...
محمد: شي ناس مكرهوش يضربونا
ياسمين:(عقدات فيه حواجبها مقدراتش تخبي غيرتها او تسيطر عليها خصوصا انها اول مرة كتحس ببحال هاد الإحساس) شكون هاديك
محمد:ههههه تا شو هاد الفارة كيتاتخنزر قلت لك احبيبة كليان والله العظيم
ياسمين:(مازال عاقدة حواجبها) و علاش سلمتي عليها من الوجه
محمد:(ضحك بمكر) ايوا جريتها بغيت نبوسها من فمها ساعتي هي متتحشمش زربات عليا فالحنك عههههههخ (شافها حمارت) والله احبي ايلا مديت ليها يدي تا نقزات سلمات عليا هي..
ياسمين:(فكات الغوباشة لكن بقات مطمرة) مممم واخا
محمد:(قرصها فعنقها و بقا كيعنكش فيها تا ضحكات) هادي مزيانة خليها و سيري قيسي الشي لاخر...
دخلات ياسمين و بقات لبس نصل حتى ختارو اللي بغاو و حيدو المزيرين و اللي ميليقوش تلبسهم.... دار خلص و حط فلوس صحيحة و خرحو محملين مباشرة دخلو لمحل ديال الملابس البيتية و الداخلية.... ختار ليها عاوتاني شلا بيجامات مكاين غير الله يعطيك صحيحتك فالتقزاب و العرا.... بغا يختار ليها الملابس الداخلية لكن حبساتو بحكم الدنيا عامرة بالعيالات و الرجال قلال حتى صدمها..
محمد:(تمشات شوية مبعدة عليه حتى دوا معاها رافع صوتو حتى سمعوه معظم الناس) شوفي الحمر و الكحل احبيبة كثري منهم هههههه
حشمات و تزنكات و بقات كتولول و كتقول واش هذا ما عندوش المراگات علاش يحشم حتى دوات معاها بنت اخرى كانت كتقلب فشي شوميزات..
البنت: هههههه نتي عندك هذا كثر من وعدي مكيحشمش
ياسمين:ههههههه والله ياختي تا مرگني
البنت: عادي احبيبة مدام حلالك مكاين اللي يسالكم اللهم فيك ولا فبنات الزنقة راه كثرو.
وافقتها ياسمين الرأي و ختارت حتى هي ملابس داخلية منوعة فالألوان اللي طلب نيت و زادت البيج و الأبيض..... مشات لقاتو خدا ليها ثلاثة شوميزات ببينواراتهم فكرطونة مختالفين فاللون و الشكل كيبانو غاليين حتى قرقشو عينيه على لبسة معلقة ديال الرقص كانت على شكل دوك العبايات ديال مصر اللي كيجيو لاصقين بزاااف فيها فتحة تال فوق الفخض و عريانة من الصدر معاها فاللون الأسود و الذهبي معاها حزام ديال الموزون عامر.....
شافتو فين كيشوف تا تصدمات كون لقات الأرض تنشف و تبلعها.... شاف فيها و ضحك بمكر حتى قال للبنت اللي خدامة تعطيه وحدة فقياصها.... غير شافتو قال هكاك هزات ساكها و بعض الساشيات و خرجات مخلياه حتى خرج محمل و ضاحك حتى كتبان ليه الخوية ديال ضرسة العقل فرحان و مناقصو حتى خير....
محمد:(قرب ليها كانت عاطياه بالظهر قرصها فخصرها تا قفزات و شافت فيه كيضحك ليها) هههههه اح دابا مكاين غي جلسات وناسة و غنوة
ياسمين:(تجمع ليها الدم فوجهها شافت تا عيات ضرباتو لصدرو و قالت بصوت متذمر) باسل والله حتى باسل
خلاتو كيضحك موراها على حشمتها و عقلو كيدورو فيه غير الأفكار السافلة.... دخلو لمحل اخر ديال الصبابط بطلبو اما هي تتقوليه غي باراكااا.... خدا ليها عاوتاني مجموعة ديال الصبابط و السبرديلات و لي صوندال بسيكانهم حتى مابقاو لاقيين فين....
ياسمين:(هازا سيكان قلال بحيت مخلاهاش هو اللي محمل و مجمل) وا محمد فين غنديرو هادشي راه بزاف
محمد:(خرج وجهو بين الكراطن و شاف فيها) ياختي من صباح و نتي تنگري تقولي مخلصاهم من جيبك (حط الساشيات حطاها) دو مينيت وانا معاك....
مشا خلاها تتشوف و تضحك على هضرتو ولكن فرحانة باهتمامو و سخائو و اكثر طبع ممكن يكون خايب فالراجل هو البخل... كاينين رجال اللي مفحالهومش و على باب الله لكن سخاوتهم كتخلي الرزق غير مشتت عليهم و ربي زارع ليهم البركة فداك القليل اللي عندهم.... و كاينين اللي عاطيه ربي مناش و ميسور لكن بخيل و الريال الحمر ميخرجو تا كيبقا ديما بلاش و نهار كيمشي كيخليها كاملة و كيما كنقولو كبير الكرش تفرگع ليه.....
رجع عندها جار باليزا كبيرة فالغوز بيبي مع سامسونيط ديالها ضحكها لكن كانت احسن فكرة.... تكاواناو فواحد القنت و جمعو الحوايج فيها تتمشي للدار و تقادهم.... حتى بداو غادين بحيت عيات وهو يبان ليه محل ديال الماكياج و الي برودوي جرها ليه دخلها و قاليها تاخد مستلزماتها كاااملين.... دخلات كضحك عليه لقات المحل داير باك كامل ديال الماكياج بثمن مناسب خداتو و خدات البرودويات و لي جيل دوش و جا عاوتاني خلص.....
ماخرجو من داك القنت حتى كانو تسخسخو بالبيان ركبو مسهوتين كان الليل طاااح.... قررو انهم يتعشاو برا بزوج بيهم عاد يدخلو بما انهم سيمانة مغيشوفو بعضهم بغاو يشبعووو.... مشاو لواحد السناك فحي شعبي ديال الحوت خدا كل واحد بلا ميكست ديالو و بداو الماكلة حتى سالاو و خداو مونادا باردة كيتبردو بيها و داويين....
محمد: نتي ممعولاش ديري شي حاجة ولفتي الجلسة فالدار
ياسمين: كيفاش مفهمتش
محمد: زعما ما باغاش تعمري وقتك بشي حاجة قريتي تا عيتي باش تريحي فالدار مكتمليش
ياسمين: الصراحة كنمل ولكن شنو غندير راه دفعت و اللي كيعيط كيكون غير باغي يتفلا
محمد: تخدمي معايا فالمحل؟
ياسمين: بصح مكرهتش ولكن نتا عندك كونطابل
محمد: ونتي سوقك اختي نتي غتكوني سيكريطيرة ديالي احبي
ياسمين:هههههه واخا صافي انا معاك
محمد: اححح على ضحيكة و مع هاد الحوت ختي غنبات فالصالون اليوم
ياسمين:(بعدم فهم) علاش مالك
محمد:(كان گالس جنبها محسات بيه حتى قرصها من فخدها) انا اللي عارف مالي نوضي تگعدي...
فعلا ناضو ضاحكين خلص و مشاو فاتجاه الدار.... وصلو مصهوطين دخل محمد البالز و مشا نيشان للدوش فحين هي بدلات ببيجامة خفيفة و جلسات كتقاد فحوايجها فليفاليز.... خرج لابس شورط قصير كحل سيورو گري كيلعب بيهم و شعرو الفازك طايح على عينيه....
كانت ملهية كتقاد لي برودوي فسامسونيط حتى حست بيه درق عليها ضو هزات فيه عينها فعفوية حتى فهات فطلتو و وسامتو الطاغية.... سهات كدور عينيها عليه و عقلها مسافر غير عينيها اللي كينتاقلو من شعرو لوجهو لصدرو العاري حتى حنحن حابس الضحكة عاد حدرات راسها حشمانة و حتى هو مبغاش يحرجها يكفيه انه رضى غرورو كرجل و شاف فعينيها نظرات الإعجاب اللي قليل فين كيشوفهم من عندهاا...
محمد:(دوا معاها بصوت حنيين) متقدريش تزيدي معايا تا غدا
ياسمين:(هزات فيه راسها بشوية عينيها كيبريو) منقدرش ضروري خاصني نمشي
محمد:(جرها من يدها وقفها حتى لصقها مع صدرو هازة راسها فيه) ولفتك بزاااف معرفتش هاد السيمانة كيفاش غدوز
ياسمين:(بانت لمعة فعينيها اللي تغرغرو بالدموع مقدراتش تنكر انها تا هي ولفاتو) حتى انا ولكن ما بقا قد ما فات....
مجاوبهاش اكتفى انه يهزها من خصرها شوية حتى وصلت لمستواه و خدا شفايفها ببوسة حنييييينة و خفييييفة كيقبل فيهم بكل رقة عاطي لكل شفة حقها حتى حس بيها حتى هي تتفاعل معاه و تتقلدو فتحركاتو.... كانت قبلة حنينة ترجمو فيها المشاعر ديالهم بزوج لغة كيفهموها غي هوما...
تصبحن على خير
تفاعلوا البنات او خليو ارائكم و تفاعلكم