🌺عبق ياسمين 🌺 (طور التنزيل )

part94

عبق الياسمين 🥀
🖋️ نور آية 🖋️
بارت...94🍂
يوسف: حنان (هزات راسها فيه بزز مقدراتش تجاوبو) واش شوية...
ماحسات تا طاحت على طولتها سخفانة..... شدها بالزربة قبل ماطيح للارض مخلوع معارف مالها..... دخلات مو لقاتها سخفانة وهو شادهااا و معارف مايدير مشات تتجري لعندو......
حفيظة: مالها اولدي مالهاااا ياك لاباس
يوسف:(معصب) وايلي الواليدة على مالها واش البنت مريضة و موقفاها فالكوزينة (هزها عندو غادي بيها لبيتها) صيفطي ليها وحدة فالبنات..
وصل لقاه مسدود حلو بصعوبة و دخل حطها فوق السرير..... هز الما من الكوافوز و رشو عليها حتى بدات تتفيق..... دخلات عليه تيسير لقاتو تيتسنى فيها حاط يدو على جنبو غي شافها داز خارج و قال.....
يوسف: شوفي اختي الله يحن عليك بدلي ليها و عطيها شي دوا راك عارفا داكشي...
خرج حشمان خلا تيسير تكلف و مشا عند مو لقاها جالسا وجهها صفر كثر من حنان حتى هي عيات جلس حداها و خدا يدها لعندو....
يوسف: الوالدة الله يهديك نتي مريضة و البنت مريضة و نايضين تتشقاو نوضي البنات ولا جيبي داكشي من الزنقة گااااع
حفيظة: وا ولدي شغندير خطبة ختك اليوم و مبغيتش نحشم بيها
يوسف:(اصلا كاره هاد السيرة) هاد ختي تهبط هي نيت توقف على شغلها ولا نتوما غتبقاو غي مضسرييينها تاطلع ليكم فراسكم عطي الراحة لراسك الواليدة.....
خرج كافر و معصب من جهة بقات فيه مو اللي عيات و واخا هكاك نايضا باغا تحمر وجه وحدة محارتش فيهم و نزلات بوجهم للتراب.... غير هاد الفكرة تتخليه يبغي يحماق و يضرب راسو للحيط.....
مرضاش و مكرهش يجري عليها و ميبقاش يشوف كمارتها لكن مجاتش اللحم لا خناز كيهزوه ماليه و يدك منك واخا تكون مجدامة..... زوينة ختو و خايبة ختو.... و من جهة قلبو دارو على ديك بنت الناس اللي عايشا فتمارة و مسكينة المرض و كولشي و مع ذلك واقفة و مقالت حتى كلمة......
طلع لبيتو بدل و داز هز ولدو و قرر يدوز معاه النهار فدار محمد اللي خلا ليه السوارت محاملش يحضر ولا يشوف وجه ايوب.....
اما حنان فنوضاتها تيسير بشوية بدلت و غسلت و شربات الدوا عاد طاحت دودة..... و احسن نعسة تتنعسيها هي ديك اللي تتجيك مور الوجع ديال البيريود.... تتحسي بحالا كل همومك و احزانك مشات و تترتاحي.... وحتى هي نعسات فحال شي بيبي مخلية كولشي وراها.....
داز النهار عادي فالليل جاو واليدين ايوب بالورد و الشوكولا اللي شافهم يقول هنا نبات..... تناقشو و دوزو الهضرة باش يديرو ليلة وحدة بيناتهم فيها ضريب الصداق و صافي تمشي مع راجلها..... لكن الغريب انهم تصدمو انها قبلات تسكن مع دارهم واخا السبب الاول فطلاقها كان بسبب ام طليقها...
حسن مرتاحش ليهم و حتى حفيظة لكن ملي شافو بنتهم باغا وكلو امرهم لله و دارو للما منين يدوز...... توادعو معاهم و فضلو انهم ميتكلموش فالموضوع خصوصا مع نفسية شيماء اللي خاصها غا معامن.....
الجوج كانو محمد و ياسمين فاگادير...... عيات ياسمين فالطريق.... خصوصا انها ممولفاش السوكان بزاف..... الجو دافي و زوين واخا الضبابة...... تغداو على برا و ارتاحو شوية عاد دازو تقداو عشاهم و مشاو للدار...... مع دخلت سمات الله و بدات تتحل فالشراجم......
عجباتها الدار و فراشها..... مشات لبيت النعاس لقاتو حتى هو مفرش زوين..... حطت لي فاليز و تلاحت عيااااانة....تبعها محمد كيضحك موراها و تلاح حداها.....
محمد: هاي هاي على لمدام عيات زعما راه خاصك تكوني فرحانة ههههه
ياسمين: سكت عليا نتا اللي جا معاك الضحك جاي مرح
محمد: ههههههه هاهو ساكت (سكت شوية و دار عندها) زعما منخرجوش
ياسمين:(شافت فيه مغلغلة و ناضت) انا غنغبر وجهي علك مكاين خروج ليوم....
خرجات و خلاتو كيضحك..... كتعجبو منين كتعصب كتجيه بحال شي بنيتة صغيرة معصبة بحيت واخا تتقلق متتعايرو متتغوت عليها حدها ديك بعد مني سكت عليا......
دوزو نهارهم فالدار فالعشية صاوبت الگلية و شدو فيلم كيتفرجو ليه حتى سمعو على غير العادة الغوات حدا الباب جاي من الدروج...... ناض محمد بالزربة يطل و تبعاتو ياسمين بعدما لبست بينوار طويل على الكسيوة اللي كانت لابسا....
حل الباب كيبان ليه الباب اللي قدامو محلول و جاي منو الغوات ديال المدابزة و صوت الموسيقى مجهد..... نزلو جيرانهم الفوق و وقفو مع محمد تا واحد ماقدر يدخل حتى طلع الكونسيارج.....
دق مجاوبو حد بدا داخل هو يبان ليه ولد تكون عندو ديك 25 عام لابس غير الكالسون..... وجهو كلو دمايات خارج كيجري و تابعو راجل فالربعينات كيبان صغير و شاد فراسو...... تبعو للباب و شدو فالكولوار و تكا عليه بالعصا و ياسمين و الجارات اللي الفوق حشمو من داك المنظر وهو كيسلخ فيه و يعاير.....
الرجل: وا ينعل ****** ا ز******* تبيدقووووونييييي اولاد الكلاب مخلينيييي تا خرجت يا دينك اليوووووووم يصليو عليك ******
جراو الرجال يفكو و محمد معطوب مالقا كيفاش بزز باش بعدوه عليه يله بغا يهرب شدو الكونسيارج و الراجل تكا راسو على الحيط و بقا كيخبط فيه و الرجال كيجرو فيه وهو ففمو كلمة وحدة.....
الرجل: اشنو فيه و مافياش اعيباد الله هاد الكلبة قتلتني (دار عندهم) واااااا عمري فنيتو علييييها واااا حياتي نعطيها ليها و فاللخر تبيدقنييي مع زا*** قد ولدهااااا....
جبد تيليفونو صونا للبوليس و جلس فالدروج منهار...... بقا فيهم كاملين و حطمهم منظرو خصوصا ان الدموع حاصلين فطرف عينو...... زعمات وحدة من الجارات و دخلات و تبعتها ياسمين بعدما عطاها محمد الاوكي.....
اول حاجة لاحظو تصميم الدار اللي زوين و مفرشة بفرااااش غالي و عاطي للعين..... دازو على الصالون لقاوه مظلم و مشعولين فيه ضواو فالالوان بحال الديسكو و طبلة مقلوبة و الارض فيها الشراب و القراعي مهرسين و الموسيقى مطلوقة.....
طفاتها بنت الجار اللي الفوق و تبعو صوت البكا تا وصلو للبيت النعاس اللي اقل ما يقولو عليه انه رائع و غيكون طالع بالزبابل ديال الفلوس..... لكن المرايا ديال الطابل دونوي مهرسة و الماكياج و الروايح مشتتين و فوق الناموسية مرة فثلاثينات ملوية فيزار و تتبكي و تعطي لقلبها..... وجهها مخلطة فيه دموع و دم لكن مخباش جمالها اللي كان باين.....
العينين خضرين و البيوضية و الشعر زعر و الفورمة باينا من الصدر قتالة...... الظفيرات مسبوغين و مقادين..... قربو ليها وهي تبدا تغوت عليهم......
المرة: خرجووووو عليااااا خرجووووو ق*دوووووو مابغيت نشوف تا واحد...
تاوحدة ماقدرات تبقى خرجو كاملين اماااا عند الراجل اللي غير سمع غواتها بغا ينوض يكمل عليها لكن شدوه الرجال بهداوة حتى خرجو النسا وكل وحدة قصدت دارها..... دخلات ياسمين و رومات الباب بقات كطل موراه و قلبها ضارها على الزوج اللي باينا فيه تيبغيهاااا لكن هي كانت ضاسرة بزينها و ماطلباتش السلامة......
دازت شي ربع ساعة و جاو البوليس..... دخلو عليهم فهمو شنو كاين و هزو الولد بدماياتو هكاك عريان و تبعوه المرة بليزار كامل هابط عليها و تبعهم الراجل كيترعد كلووووو..... سد الكونسييرج الباب و بقاو الرجال غي صافنين فداك المنظر و ديك الشوهة اللي متبغيها لعدوك....
تكفحو الجيران كلا لدارو مستنكرين هاد الفعل و كل واحد و اش كيقول و كيفاش كيحلل و هادي مغريبش على مجتمعنااااا..... مجتمع الحكم المسبق و المناظر بامتياز..... شي كيقول حشومة تخونووووو..... و شي كيقول العالم الله علاش دارتها..... و شي كيقول سرو باش يحسو باحساس المرة ملى كتخان..... وشي كيقول تفوتو غا هو وتجي فيمن ما بغات..... شي كيطلب السلامة..... و اللي تيعرفها و غاير منها تيتشفى فيها و يطلب ليها الغرق..... دخل محمد لقا ياسمين جالسة تتفرج جلس و ساط بالجهد.....
محمد: بقا فيا الراجل مسكين
ياسمين: وايييه موقف خايب تحط فيه
محمد: الصراحة كاينين شي عيالات خاصهم الحريق
ياسمين: متنساش بيلا تا الرجال راه كاينين بنادم فيه و فيه
محمد: واييه بنادم حجر و طوب غير الله يهدي ماخلق...
دوزو عشيتهم عادي واخا راه الموقف اللي طرا صعيب ينساوه و اثر عليهم واخا مشكوش ولا ولكن بقا شاغل بالهم.....
مشات ايام و جات.... و سيمانة دازت على أبطالنا..... محمد و ياسمين دوزوها كلها عسل فعسل ماخلاو فين مشاو مكانوش كيدخلو..... شبعو حلوة و عجبو التغيير اللي طرا فشخصية ياسمين اللي تخلات على الحشمة الا فبعض المواقف.....
مبقاتش كتقمع نفسها ولا تحشم فشي حاجة رجعات اللي بغاتها كديرها معاه..... حلالها و عندها كل الحق فييه.... و حتى هو رجع معاها حسن و حسن غرقها شريان حتى رجعات كتقول باراكا...... اللي شافتها و عجبتها تاخذها لسميرة عاد لمها..... تهلات فيها ديال بصح و ماخلات ماخدات ليها.....
مشات مع محمد للمحل و بان ليها بروش ديال الذهب من الشوفة اللولة حمقها و قالت ليه بغيتو لسميرة...... كبراااات فعينو ديال بصح بتصرفاتها و شنو غيبغي الراجل كثر من مرتو و مو مفاهمين.......
سميرة اللي كانت الروينة ديال التوجاد نايضة عندهم فالرياض..... ضريب الصداق ديال شيماء بقاو ليه يوماين..... ومن قلة عقلها بغات تنگف و دير العمارية و اللبسات..... حد ماقدر يهضر معاها ولا يقوليها شي حاجة باغيين غير السلاكة معاها و سلامة الوقت....
يوسف من داك النهار وهو كيدوز نهارو فدار محمد..... محاملش داك الجو و محاملش وجههو يتلاقا مع وجه شيماء ولا يشوف المهزلة اللي دايرا اللي كون عرفو واليديه شوهتهااا كون دفنوها فأرضها ولا يبقاو عايشين على شوهتها..... وفنفس الوقت كان باغي يدوز وقت بينو و بين نفسو باش يعرف نوع الاحاسيس اللي عندو من جيهتها و فعلا عرف انه كيكن ليها اعجاب و كبير و فمدة قصيرة خدات بلاصة فحياتو و خدا قرار اللي من بعد و غتعرفوه....
حنان كانت مدهية فخدمتها و تتحاول ما امكن متحتكش بشيماء اللي شوكتها غير طالعة و باغا غير معامن..... عايشا مرتاحة فالرياض و كولشي محتارمها و تيعاملوها مزيان لكن اللي شاغل بالها يوسف اللي مبقاش كيبان مرحبا....
صور ليها عقلها شلا سيناريوهات و قالت مع بالها عطاك شوية ديال الوقت طمعتييي دارت فبالها انه معارف مع وحدة اخرى و داكشي و قررات انها تركز على خدمتهاا و تنسى دوك الافكار.....
اليوم الكوبل ديالنا اليوم راجعين للرباط باش يحضرو لليلة شيماء اللي بالطليب و الرغيب باش قبل و غادي و محاملش..... اليوم كان بارد و شتى مزكاتش..... خرجو بكري مكبطين شدو الطريق و كل شوية ينزلو ترتاح ياسمين شوية و يكملوو.....
وصلو دازو للرياض نيشان بما انهم بزوج عيانين مقادرين على والو..... وصلو دخلت ياسمين ساك متوسط كانت دايرا فيه داكشي اللي جابت لسميرة و البنات.....
بعد السلام و الاحضان و داكشي عطات لسميرة الساك اللي فرحات بيه و عجبها الجيست اللي دارت ياسمين..... هاد الاخيرة اللي منساتش حنان اللي ديما كانو على تواصل جابت ليها تاهيا الباروك فساشي كبيرة شوية عطاتو ليها و لوخرى كدعي معاها و تشكر فيها.....
تغداو معاهم و عياو يشدو فيهم يتعشاو لكن والو مبغاوش..... جلسو شوية و ناضو خارجين..... يله غيفوتو الباب جا عندهم يوسف.....
يوسف: محمد.... ياسمين بلاتي بغيت نهضر معاكم فشي حاجة
محمد: ايه مرحبا يله تحرك معانا ولا هنا نيت
يوسف: لا هاد الموضوع خاصو جلسة نيت نمشيو لشي كافي و يكون خير
محمد: حالفين يا خويا متخليوني مع مرتي براحة وا قيلوني
ياسمين: ويليي تا حشم هههههه زيد اخويا
يوسف:(خرج معاهم تا بانو ليه وقفو قدام طوموبيل دوبلفي) هاي هاي بصحة الحديدة بدلتي ديالك اسيموحماد
محمد: لا اخا هادي راه ديال المدام
يوسف: هكاك ايوا مبروك اختي ياسمين العقبة للباطو و الطيارة
محمد:(هز اليد الصحيحة قرفدو بيها) غرق جد بابايا ايوسف راني تنصنع الصوارخ..
عبدالله: وا غي نبسطو معاك يله طلعي اختي سوقي بينااا
ياسمين: لا اخويا هاك (عطاتو الكونطاك) سوق نتا حشوووومة نتا كاين و نسوق بيك
يوسف: لا لا شدي سوقي طوموبيلتك
محمد:(حل الباب ركب و عاد دوا) زيد لا بغيتييي تسوق وكان هاديك راها غير عيات بالطريق...
طلعو شدو طريق المدينة..... وقفو قدام قهوة كبيرة عائلية صطاصيونا الطوموبيل و نزلو.... عنق محمد ياسمين جنب فرحان بيها و حتى هي الراحة باينا على وجهها.... علاقتهم عجبات يوسف بزاف و مكرهش حتى هو يعيش شي نهار شي علاقة بحالها..... خداو طبلة حدا شوميني اللي كان شاعل فيه العواد مسخن القضية..... داو و جابو فالهضرة شوية عاد قرر يوسف يدخل فالموضوع....
يوسف: الصراحة معرفتش كيفاش نهضر فهاد الموضوع و ماعرفت مانقول
محمد: ياودي غا بلزهااااا شحال فعمر الدري
يوسف: علاش داوي نتاااا
محمد: داوي على هادي اللي حملت منك و قالتلك تزوج بيا ولا نشوهك
ياسمين: اويلي محااامد ههههههههه خليه يهضر باراكا من البسالة
محمد:(قرب و دوا فوذنها بهمس) هاااد محاااامد تتفيق الراگد تتفكرني غا فالناموسية (ضرباتو ياسمين بيدها حشمانة) هههههه يلاه اسي قول اللي عندك
يوسف: مغندويش معاك نتا بحيت ميكروب غندوي مع ختي ياسمين
ياسمين: خليه راه باغي غا يضحك و يتفلا
محمد: خلينييي اختي نضحك مالك بغيتيني نموت صغييير اغي صبري عليا غدا نحيد هاد الگبص من يدي و تفرجي
يوسف: ماعندك عقل المهم اختي انا بغيت نهضر معاك على ود حنان
ياسمين: مالها ياكما كاين باس قلقاتك فشي حاجة
محمد: تي اشمن قلقاتو السيد راه مزعوط شو كيتايدير
يوسف: نوض اخويا سير غبر كمارتك خليني نهضر.... لا ختي بالعكس معمرها دارت شي حاجة خايبة غير بغيتك فواحد البلان ايلا سمحتي
ياسمين: ايه اخويا على الراس و العين
يوسف: بغيتها ان شاء الله للزواج و مقدرتش نقوليها والو خليت تتهضري معاها نتي و تشوفي اشنو تحت راسها عاد يهضرو معاها الدار حيت امكن ماعندها تا عائلة من عندمن نخطبوها
محمد:(بجدية) اشوف اسيدي ديك بنت الناس نهار تلاقينا معاها ولات ختي و دابا بغيتيها غتقصدني انا و تخطبها من عندي انا انا و ياسمين هوما عائلتها....
##
شي تزغرييييتة البناااات عراسية أخرى جاية فطريق 😍🔥 ولكن واش غتكمل ولا لا؟ و شنو مازال كيتسناهم؟ خليييو ليا توقعاتكم 🔥🔥🖤