🌺عبق ياسمين 🌺 (طور التنزيل )

part83

🥀 عبق الياسمين 🥀
🖋️ نور آية 🖋️
بارت...83 🍂
خرجات مع احلام و خدات لياسمين بيجامات جداد و ريحة و خدات لمحمد سيرفيط المهم مابخلات عليهم بحتى حاجة و مخلاتش من حقها باش تبين ليهم فرحتها.....
الحياة فالرياض بقات على عادتها حنان خدامة من نيتها و دارت بلاصتها عند كولشي بضرافتها و معقولها..... وافقها جو الرياض و الراحة و الماكلة و بانت فيها زادت فالوزن و الوجه صفا و زيان.....
خلصاتها سميرة و دورات معاها تدويرة صحيحة نيت خدات منها لبيسة ديال الخروج كاملة و شي بيجامات ديال الدار و بقات ليها شي براكة بغات تاخد بيها تيليفون حتى هي.....
شيماء بان عليها الحمل و الوحم و هاد المرة جاها قاصح كثر من حملها الاول كظل نهار كامل تبوع و محاملا والو لدرجة ولات كدوز النهار كامل يا برا يا فبيتها باش مايعيقوش بيها و لكن يوسف و حسن عايقين بشي حاجة و غير ساكتين....
النهار اللي خرجو فيه سبقو الدار هي اللولة دوزهم ليها يوسف اللي كانت معاه حنان بطلب من ياسمين باش تعاونها..... هاد الجوج اللي من نهار جاو لكلينيك بزوج و الهضرة اللي دارت بيناتهم تكونت واحد الكهرباء بيناتهم كل واحد حاس بيها بوحدو.....
من جهة حنان اللي كتحس بخجل شديد غير على الاخرين ملي كتلاقا معاه و لا كتهضر معاه مع اعجاب بيه طبيعي انها تعجب بشاب وسيم شخصيتو زوينة و الاكثر مستقل بذاتو لكن كتقنع نفسها انها مستحيل تكون معاه او تكون بيناتهم شي حاجة......
و من جهة يوسف اللي كتعجبو بجمالها الطبيعي و خفتها و عاد ضرافتها و حشمتها لكنو مأجل اي علاقة دابا خصوصا ان قلبو مازال مفطور من العلاقة باميمة اللي عمرو مازال عاود شافها و اللي سمع انها سافرت لشمال خصوصا ان الولد بقا معاه فما بقا عندو لاش يهضر او يتلاقا معاها......
دازو للدار ديال محمد جلسو الرجال فالصالون و عمرات ليهم حنان اتاي باش مايملوش..... دخلو البنات للبيت و بدات ياسمين كتعزل فالحوايج بدات بديال محمد جمعت ليه حوايجو و برودوياتو عاد دازت لحوايجها..... بدات كتجبد و فينما بانت ليها شي حاجة عندها منها جوج او عجبات حنان كتعطيها ليها واخا امتانعت لكن بزات عليها جمعات حتى هي حوايجها و دازت لي برودوي حتا هوما عطات لحنان بعضهم من باندوش و دي كريم و حتى ماكياج ما بخلاتش عليها و عطاتها الحوايج اللي كانت كتحلم تشريهم......
شكراتها بزااااف و دعات معاها بالخير و التيسير و الدمعة واقفة عند عينها بالفرحة..... جمعات الحوايج اللي عطاتها ففاليز صغيرة و خرجو عند الرجال يجلسو شوية فعلا تبادلو الهضرة و الضحك و كل مرة محمد محشم ياسمين قدامهم حتى ناضت و خلاتوو..... خرجو فاتجاه الرياض فين كانو معرضين ليهم بالحليب و التمر و فرحانين بمجيتهم.....
دوزو ثلاث ايام فالرياض عادية مرة مرة كيمشي محمد يطل فالمحل و اليوم قررو يديرو صدقة يعرضو فيها على اقرب المقربين بما انهم ناضو بيخير..... الصباح فالرياض غير على كل الصباحات بحيت ريحة الطياب عاطية و الكوزينة فيها الطيابات خدامات..... الصالات مخملين و معطرين.....
و النسا كل وحدة و شنو كدير..... فبيت محمد و ياسمين جالسة ياسمين كتجمع حوايجها و حوايج محمد فقفيفة باش يهبطو للحمام البلدي اللي كاين فالرياض و بحيت محمد مضروب فيدو كطر تدوش ليه هي...... كتجبد فحوايجها و هو داوي قتيلي مع علي و شي صحابو كيعلمهم يجيو.....
قطع و دار شافيها كانت لابسة بيجامة سخونة مكونة من كولون و بيل قصير فالاسود و شعر مطلوق عينيه شعلو فيهم قلوبة و دار فيها شوفة تزلالية بامتياز.... تمرح بجلسة رجولية فوق الفوطوي حاضيها غادية جاية و طرفاية كتحرك معاها بالكولون..... ماحسات بيه حتى طلق تصفيرة طويلة..... دارت تتشوفيه مستغربة وهي تلقاه داير ديك الجلسة و ديك الشوفة و حتى هو معطلهاش عطاها غمزة طيحات منها النص.... غلبات عليها الضحكة..... و قالت تتفرنس..
ياسمين: ههههههه مالك تاني
محمد:(تنهد) ميلتيه ليا اختي بداك الطروفة عندك.
ياسمين: اشمن طروفة
محمد: الطروفة اللور و القدام و زايدة ماديا ذنوبي بداك الكولون
ياسمين:(عطاتو بالظهر بالعاني و دوات) على مال الكولون تا هو منلبسوش
محمد: ازين انا مكرهتكش ما تلبسي والو حبيبك تيموت علك زبطة
ياسمين:(كانت هازا تيشورت فيدها دارت ضرباتو بيه كضحك) والو متتحشمش ههههه
محمد: نحشم منك نتي انا اللي والداني و متنحشمش منها عاد نتي حلالي اجي ازين نقولك
ياسمين: غي خليني ممسالياش
محمد: تي اجي لوالديك نديرو شي فشي عايمين عايمين
ياسمين:(خرجات فيه عينيها) ويلي حماقيتي راك مريض عاد مكاين وقت
محمد:ممريضش شكون قالك مريض مازال كي العود غا اجي غا نقولك
ياسمين: ولا امحمد راك يدك مريضة
محمد:(دار فيها شوفة قاصحة) شنو دابا مابغيتيش
ياسمين:(بدات غادا عندو) ماشي مابغيتش ولكن يدك داراك امحمد خلي غير تتبرا (وصلات بغات تجلس حداه و جرها فوقو فليد لوخرى)
محمد: موحشك اياسمين بزاااف مهاماني لا يدي لا والو المهم تكوني نتي مزيانة و باغا راني موحشك كثر من القياس (خشا وجهو فعنقها كيبوس بنهم و يهضر بكلمات شي كتفهمو و شي لا) كنبغيك...... عمري نتي..... توحشتك
ياسمين:(مرجعة راسها لور مستمتعة معاه و مبغاتش تحرمو من حقو) حتى انا توحشتك و كنبغيك (هز راسو فيها و غير قالتها مشا لشنايفها و طبع عليهم بوسة فرنسية من الطرفين كيمصو و يجرو فشنايف بعد......)
في حظن قلبك خليني 🤎
دوزو علاقتهم الحميمية بكل و حب..... سرات بيناتهم جملة من المشاعر و رغم انها خايفة عليه لكن مقدراتش تحرموو من حقو...... لبسو حوايجهم و نزلو من الدروج اللورانيين فين مكاين حتى واحد للحمام اللي ديجا كانو مسخنينو.....
دارو عومة بلدية من داكشي حتى خرجات ياسمين سخفانة مع الغدا نيشان تغداو غير اللي كانو فالرياض بحكم الكل خارج بحيت الصدقة مكاينا حتا الليل...... كل واحد طلع لبيتو يرتاح محمد تكا و ياسمين نشفات شعرها بعدما دارت ليه سيروم مخلط ب قطرات ديال مسك سائل خلا ريحة شعرها كتهبل دورات ليه باتشا و دازت كتصبغ اظافرها بلون وردي فاتح فتح لون يديها.....
سالات و خرجات للبالكون كتهضر مع دعاء مجمعين حتى سمعات صوت الغوات فالوسط ديال الرياض خرجات بالزربة من البيت و طلات من الفوق لقات شيماء مغاوتا مع حنان رجعات للبيت بالزربة تلبس بينوارها لقات محمد حتى هو هابط نزلو لقاو حنان حادرا راسها و شيماء كتغوت و تعاود و مها غير كتجر فيها مهدودة و مريضة.....
شيماء: تباااارك الله ولات خدامة ديال الخلا باغا تجابه معايا بالحق ضسارتناااااا هادي اما الكلب كيبقا غا كلب..
حفيظة:(بصوت عيان واقفة مثنية و وجهها صفر و المرض و العيا باينين فيها) دوزي يا هاد البنت فحالك و خلي عليك الدرية راه مدارت لك والو العافية الزرقا
شيماء: دارت قالاك مدارتش اشنو هي فملك الله تا نقول ليها الحاجة و تقوليا لا معرفنا شكون تراس عند لاخر
ياسمين:(وصلو لقات حنان كتبكي مشات كتجري عندها عنقاتها كتسولها) مالك احنان شنو واقع
شيماء:هاهيا جات المحامية و الملكة اللي ولات كتقرر شكون دخل و تخرج
محمد:(كان جاي مورا ياسمين لكن سمع الهضرة كاملا غوت بصوت مجهد حتى الكل قفز و اللي ماسمعش غواتهم سمعو و خرج يطل) شيماااااااااااء جمعي فمك و سكتي من الغوات مالك ثاني واش عافيتك مكطفاش
شيماء: لاااااا كملااااات جيتي تحامي عليهم يله زيد ترجل عليا كيما موالف كدير...
محمد:(قرب ليها معصب الشرار تيطير من عينيه و خداها باليد السليمة من ذراعها مزيرها عندو) غتجمعي فمك ولا كنقسم لك بعزة و جلال الله حتى نهرسو ليك و نخليك تحسبي سنانك السلكوطة زدتي فيه..
حفيظة:(قربات ليه مهدودة شداتها غير تيسير باشما طيحش شداتو بيدها كترعد و دوات بزز باش خرجات دوك جوج كليمات) طلقها اولدي الله يرضى عليك طلق الحمارة تمشي تغبز وجهها..
محمد:(دار شاف حالتها و تصدم فنفس الوقت بقات فيه ماحس حتى طلقها بنطرة حتى كانت غطيح و شدات كرشها بسرعة الشي اللي مارد ليه البال غير ياسمين و احلام اللي بالزربة دوزو الشوفة بيناتهم لكن خلاوها لمن بعد.... دار محمد عند حنان اللي كتبكي و تشهق فحظن ياسمين توجه عندها و دوا معاها بصوت هادئ) غير بشوية علك اختي راك غتسخفي مالك غا بشوية جلسي بعدا (عيط على نسرين) اري شي كاس ديال الما..
#يتبع