عبق الياسمين 🥀
🖋️ نور آية 🖋️
بارت...100🍂
احلام: زربانين ههههه راه شي مرات كتشد اصاحبتي
حنان: ايمتا خاص تجيك ليغيگل تسناي تتشوفي متزربيش
احلام: واحد صاحبتي شدات ليها الكينا شي عام و نص و ملي حملات بقات تتجيها لي غيگل حتى وصلت للثالث عاد تقطعت عليها
ياسمين: كان خاصها تجيني ولبارح غنتسنا واحد 4 ايام و ندير تيست
احلام: زربانين زعما بلاتي عليكم شوية عيشو لافي
ياسمين:هههههه الله يجعل البركة محمد بغا شي وليد و تا انا ماكرهتش شي بجيغيط يونسني
احلام: ايوا الله يسهل عليكم و نتي احنان فرحانة مع يوسف
حنان: الصراحة هو ولد الناس و دار معايا داكشي اللي ميديروش معايا لحمي ولكن منكذبش عليكم مازال خايفة....
ياسمين:(اسطاسيونات الطوموبيل و دارت عندها تتحيد فالصمطة) طبيعي داك الخوف اصاحبتي راه عادي ولكن غير غطيحو العقد و غتشوفي داك الخوف غيمشي الصراحة تستاهلو تجمعو والله بزوج بيكم عانيتو و تستاهلو ترتاح
حنان: ايوا الله يدير اللي فيها الخير اختي.....
نزلو للمحل ديال القفاطن اللي كان كبير..... رحبات بيهم مولاتو بما ان احلام كليان ديالها و بدات تتجبد ليهم فالقفاطن اخر ماخرج واحد ينسيك فلاخر..... اختارت احلام قفطان احمر بالفوقي و التحتي عامر و ثقيل مخدوم بالعقيق و الحجر و الكول ديالو جاي اوفيص مع مضمة ذهبية كيحمق خدات معاه صبيبيط دومي طالون مذهب بما انها كتبقا هازة وليدها متقدرش تعذب.....
اما ياسمين فاختارت قفطان اصفر فاتح مطروز كلو من الفوق و الكمايم و جاين طريزات هابطين لتحت بليد بالوان متناسقة مع الاصفر و حنان وحلات ماعرفات متختار بحيت خبرتها قليلة فهدشي و عرس واحد اللي حاضرا ليه هو عرسها اللي ممحسوبش تا عرس.....
تكلفت ياسمين تختار ليها وفعلا اختارت ليها قفطام ازرق ملكي حتى هو مطروز بالوان صيفية و كمايمو جايين واسعين..... اختارت معاه صباط فلون الوردي...... خرجو من تما متوجهين للصالون اللي موالفا تتمشي ليه احلام و ياسمين....
فالرياض الجري فسما و الارض..... مالين البرزة كيقادو فيها و طريطور جاب طباليه و داكشي كيقاد فيه..... مالين الدار يتجاراو من هنا لهنا الا واحد الزوج حلفو لا حطو يديهم فشي حاجة هوما محمد و يوسف من الصباح وهوما فالمحل ديال محمد سالتين بحجة الخدمة بزوج بيهم مازال ماتسرطات ليهم شمتة شيماء و مقادينش يدوزوها بجغمة ديال الما.....
شيماء اللي كانت النگافة جات غير هاد المرة زادت بنت اخرى بداو تيقادو ليها فالظفار و الشعر على تيساع..... قررات انها تلبس 5 اللبسات و مع البرد العرس كانو غيبداوه مع الخمسة باش يله يسالي بكري.....
البنات فالصالون كيتهلاو فالحالة حيدو الزغب بلاسير و حنان غواتها بقا فالسما و الارض مع اول مرة تجرب حتى من البكا بكاتو..... دارو مساج رخاو العضيمات..... طلبو الغدا تما نيت تغداو عاد بداو الظفار و الشعر و ختمو بالماكياج.....
ياسمين بوكلات شعرها على طولتو و جمعات نصو منفوخ الفوق مع مكياج ثقيل شوية واللي اول مرة كانت غتجربو جات يا سلام..... حنان لبسات محمد امين حوايجو عاد بدات تاهية الشعر اللي صاوباتو سامبل و جاي حتى لتحت عاد بوكلاتو مع مكياج خفيف مناسب بشرتها القمحية.....
اما احلام فدارت شينيون خفيفة مع مكياج خفيف..... جات كل وحدة كتقول لثانية متبانيش قدامي كيبانو كيف الحوريات..... لبسو قفاطنهم و خلصو واخا ياسمين عيات فحنان تخلص ولكن رفضت حنان و خلصت بوحدها فرحانة حتاهيا و حاسة فشكل هو غدير اللي نفسها فيه و تخلصو هي..... خرجو من الصالون مع الخمسة و نص و محمد كل مرة يصوني......
ياسمين: فضحني ياختي بالتعياط
احلام: كلهم هكاك بحالا مفطومين
حنان:(شافت فيهم كضحك) هههههه انا لا
احلام:(شافت فيها بمكر) نتي راه غا باقي حشمان منك
ياسمين: غا تسناي يدوق العسل متبقايش تزحزحي من حداه
حنان:(حشمت و ضحكت عاجبها الحال) صراحة مكنتيخلنيش انا و يوسف كنديرو شي حاجة
ياسمين:(ضحكت بقوة) ههههههههه على انا كنت نتخيل داك الميسخ عندي تنديرو شي حاجة لهلا يوريك احنينتي
احلام: فاللول مغتخليش شوية غذوقي و تحشمي شوية غتاكلي و متحشميش شوية غتولي نتي طيبي ماكلتك بالمهل.... (ضحكو على هضرتها و كملو طريقهم ضاحكين)
وصلو صوت الجوق مسموع شيماء دارت عرس نيت واخا واليديها مابغاوش لكن ماشي شيماء هي اللي تسمع هضرة واليديها.... ماشي شيماء اللي يتملى عليها شنو دير.....
شيماء هي اللي كادير اللي گالها ليها راسها ماعندها سوق فحد...... شيماء هي اللي غارقا فالعيب و تتزيد تعلم عليه..... لبسات و نگفت و تقادت و اللي شافها يحلف مامزوجة غا هو كرشها فارشاها و بدات تتبان و ملقات النگافة كيدير درقها......
الرياض عامر بالعائلة و الجوق خدام و شيماء فالبرزة تتسنى سي السيد..... داخلين البنات بثلاثة بحال الحوريات وحدة تنسيك فالاخرى و مكذبش اللي قال المغربيات اجمل نساء الكون..... من لباسنا لجمالنا لحضورنا لهيبتنا اي حاجة فالمغربية تخليك توقف احتراما و اجلالا ليها..... و المغربيات ملكات ميحتاجوش تاج لان مغربيتهم هي تاجهم......
مشات احلام من الباب للبيت تشوف بنتها و كملات ياسمين و احلام طريقهم للطبلة ديال العائلة و الانظار كلها عليهم..... كاين اللي ماعرفهومش بزوج و تيسول شكون هاد الشميعات اللي داخلات..... و كان اللي تيعيب فيهم و حاسدهم...... كاين اللي عرف ياسمين مرات محمد و تيسول شكون حنان......
وصلو للطبلة فين كانت سميرة و تيسير و نسرين و زوجات العم و مرت سعيد و مرت امين..... سلمو عليهم و جلسو كيشكرو فبعضياتهم و البنات فديك الطبلة وحدة تنسيك فلوخرى....... الجوق مشخد القضية و البنات تيشطحو و الدراري مقابلينهم و العيالات اللي عندها شي ولد بلا زواج راها راميا السنارة تصيد ليه و طبعا كلنا عارفين ان الاعراس هوما اكثر بلاصة تيتعزلو فيها العيالات لولادهم علاش تتلقاو بعض الأمهات تيقولو لبناتهم نوضو شطحو و اخرات تيقولو ليهم جلسو و كونو......
داخل محمد و يوسف و سعيد حتى هوما مشيكين على الحالة و ريحة بارفانهم كتشم منين يا منين......
ضربو على طبلة البنات يوسف شاف حنان بجنب مبانتش ليه كاملة اما محمد كانت عاطياه بالظهر...... مع وصلو رماو السلام مع جاتهم الصدمة بجوج......كل واحد مخرج عينيه فمدامتو...... من محمد اللي عمرو شافهاااا بالماكياج الثقيل و اللي فعلا صدماتو و مكانش كيكذب ملي كان كيقوليها اللي درتيها تتجي معاك.....
اما يوسف حاجة اخرى.....عينيه لمعو و قلبو ضرب..... طيرت ليه حنان العقل...... طبيعي منين تتكون تتشوف شي واحد ديما بلا ماكياج و نهار تيديرو تيبهرك..... ولكن يوسف حاجة اخرى.....ملقاش شي كلمة توصف شعورو ولا حالتو فهاد اللقطة..... اللي عارف انها عجباتو و صدماتو بجمالها حتى انه غار من العينين اللي كيشوفو فيها..... جر محمد كرسي جلس خدا مرتو و يوسف حتى هو زعم و جلس حدا حنان.....
و اللي فالطبلة كيتغامزو عليهم و يضحكووو..... بلا الحضور لاخر اللي كيما العادة مقسوم لشي عاجبينهم..... وشي حاسدينهم..... وشي محاملينهمش..... و شي معارفينهمش اصلا......
محمد:(قرب لوذن ياسمين باش تسمعو و قال) ديما مطيرة ليا عقلي ابنت الناس حني فهاد القلب مسكين
ياسمين:(ضحكت و قالت فوذنو) وا كون تشوف نتا راه بقا ليا شوية و نتف شي وحدة
محمد:(دار فيها واحد الشوفة تاضحك تا ضحكات بجهد و ضحك حتى و قال) الهضرة ماشي دابا امدام ههههههه جيتي تتحمقي احبيبة ما شاء الله
ياسمين:(ضحكات ليه حتى هي و قربات بحالا باغا تهضر فوذنو و باستو) حتى نتا جيتي زوين....
عند الكوبل ديالنا التاني جلس يوسف و عينيه على حنات اللي مقداتش تهزهم فيه و فينما علات عينها فيه تلقاه كيشوفيها ترجع تحدرهم اما هو جاتو بحال اللقوة بحال الحشمة ماعرف يقوليها جيتي زوينة ماعرف مايدير بحالا اول مرة غايجلس حدا شي بنت و راه تقريبا اول مرة غيجرب هادشي حيت اول مرة ليه كانت مع اميمة اللي مجمدة المشاعر كان كيقوليها شي كلمة زوينة تتقلب وجهها جاتو صعيبة دابا يعبر لحنان شاف تاعيا و قرب ليها و قال.....
#يتبع ❤️❤️
الحب غا مشتت فهاد القنت جيبو ميكة و عمرو شوية 😂🌚
أنت تقرأ
🌺عبق ياسمين 🌺 (طور التنزيل )
مغامرة______🥀👑 على مختلف اللهجات 👑🥀______ ________🌺عبق الياسمين🌺________ ___بقلمي:aya oulaaidi ( Aya Oulaaidi 🤍)___ معنى الحب: أنت معنى الكفاية: قربك معنى الراحة: كتفاك معنى السلام: صوتك معنى الجمال: عينيك معنى الضياع: شفتاك معنى الانتصار: قلبك مع...
