🌺عبق ياسمين 🌺 (طور التنزيل )

part108

عبق الياسمين 🥀
🖋️ نور آية 🖋️
بارت...108🍂
خرجو من لوطيل بعدما بقا حتى طيب خاطرها و رجع الضحكة لفمها اللي مكيرتاح تا كيشوفو ضاحك و عويناتها مبسمين كيلمعو كيما ديما..... اول حاجة داروها هي مشا كرا طوموبيل باش غيبقا يتحرك....
عاد بداو رحلتهم..... اول وجهة ليهم كانت هي القلب النابض لمدينة اسطنبول.... معشوق السياح.... ميدان او منطقة تقسيم.... البلاصة اللي مكتخواش..... البلاصة اللي وقتما مشيتي ليها تلقاها عامرة.... فيها كلشي.... مطاعم.... متاجر..... مقاهي..... بوتيكات...... فنادق و كولشي..... سطاسيوناو الطوموبيل و خدا محمد كامرتو اللي مكتخطاه فحتى رحلة....
بداو بميدان تقسيم اللي كان عامر كيف العادة بالسياح نظرا لتواجد واحد من المعالم التاريخية الجميلة فالمدينة اللي هو نصب تذكاري او تمثال الجمهورية التركية اللي تنحت سنة 1923 على يد نحات إيطالي بمناسبة الذكرى الخامسة لتأسيس الجمهورية التركية..... تصورو معاه و الاغلبية ياسمين صورها بجميع لي بوزيسيون و فينما دارت يصورها.....
خداو الكعك التركي من عند راجل تما بكروستو و تمشاو لناحية للشارع اللي فيه الحوانت و البوتيكات.....كان عبارة على شارع طويييل عامر بالمحلات التجارية واحد حدا واحد و وسطو دايز المترو..... هنا بدا هرمون السعادة تيتفرز عند ياسمين و لقات محمد قالها متعرفيش كل مرة يدخلها لمحل يحملو و يجملو و يخرجو و مع الحوايج رخاص مكاين غير الله يعطيك صحيحتك.....
من ملابس داخلية لبيجامات لشوميزات بالألوان و الاشكال ليها و للبنات لملابس خارجية لملابس تقليدية تركية..... غير الشيلان و الزيوفة دارت فيهم خبلة..... الصبابط و السيكان غير تتهز و محمد يهز و يخلص.... حتى ما بقا عندهم فين يزيدو مازال.... اضطرو انهم يرجعو طوموبيل يحطو بگاجهم و يرجعو.....
محمد: دابا خاصك متشريش الحوايج واحد العماين امدام.
ياسمين: ههههه مال هادشي كامل ليا مازال نمشي نفرق
محمد: مالي اختي شاري لك نتي ولا ليهم لي بغا شي حاجة يجي ليها انا كنشري لحبيبي يلبس حبيبي سيرتو داك الشوميز الحمر ليوووووم ابنتي
ياسمين: سكت سكت يسمعووك الناس اويلي متتحشمش
محمد:(شافيها بمعنى من نيتك) لاااا والله نتي تا عندك بلاصة العقل عتد حمار مجبد شكون بغا يفهمني هنا....
ياسمين: يااااااك حماااار واخا (زادت تدردك خلاتو تابعها كيضحك كيف الهبيل و كل مرة يصورها)
تجوهو لواحد من المطاعم اللي كان تما نيت اختارو مطعم تقليدي كلو بالخشب ديكورو زوين و عامر..... دخلو خداو الموني لقاو فيه مختلف الاطباق من كباب و مشاوي و فطائر و حوت گاع الاكلات المعروفة فيه..... خداو كباب مع فطائر و جلسو مستمتعين بالجلسة مع بعضهم.....
العائلة السعيدة ديالنا جمعو حوايجهم و حوايج محمد امين و قررو باش يخرجو بكري شوية..... فعلا الخمسة ديال الصباح فاقت حنان نزلت للكوزينة وجدت فطور خفيف و رجعت لبست حوايجها فيقت يوسف و مشات تفيق محمد امين....
لبساتو و كبطاتو على البرد و نزلت باش يفطرو.... فطرو علاش قدو و بينما دا يوسف الباليزات لطوموبيل غسلت لماعن و لبست مونطوها و خرجت..... محمد امين جالس فكرسي خاص بيه اللور و يوسف فبلاصتو حال الباب و جالس مقابل معاه تيكمي فگارو على الصباح يحل ليه دماغو..... طلعت حداه لاح الگارو و دار عندها كيسد فالباب....
يوسف: صبحتي تتشقاي على الصباح ديك الساع خلي تال شي سطاسيون
حنان: لا لا مكاين حتى مشكل نفطرو عاد نمشيو و تا يلا جاع محمد امين نهبطوه ياكل شي حاجة
يوسف:(خدا يدها باسها و حطها على حنكو) شكرا
حنان:(ابتسمت ليه بحشمة) مدرتش علاش.....
خدم الراديو و شدو الطريق مرة يدويو مرة يسكتو وقفو جوج مرات دخلو لطواليط و خداو لمحمد امين السقاطة عاد رجعو شدو الطريق..... و بعد تقريبا ثلاث ساعات وصلو لسويسرا المغرب.....
مدينة افران..... المدينة البيضاء...... مبهوضين بطرقانهااا اللي كتحس براسك ماشي فالمغرب..... الشجر بيض بالثلج.... و كيبانو القرودة كينقزو..... بلا الارض اللي نقية تتشعل متلقاش الوسخة.... بقاو غادين حتى وصلو لواحد المكتب ديال العقارات..... بقات حنان فالطوموبيل و نزل يوسف دخل.....
بقا مدة لا بأس بها عاد خرج هو و واحد السيد ركب السيد فطموبيلتو و تبعو يوسف من اللور.... زادو شوية و وقفو فحي كالم كيما گاع الاحياء ديال المدينة غير هو كيتميز بستيل اوروبي حي لبريري..... دخلو مع السيد للشقة اللولة كانت كبيرة بزااف معجبتهمش...
زادو لشقة اخرى وهي اللي عجبتهم كثر صغيرة و على قدهم فيها صالون زوج بيوتة ديال النعاس كوزينة بستيل اوروبي و طواليط و دوش..... مجهزة بكولشي و مفرشة على حقها و طريقها..... قررو انهم ياخدوها و فعلا تافق يوسف مع السيد على الثمن حتى خلاها ليه ب300 درهم للنهار......
خرج السيد و يوسف و بقات حنان و محمد امين اللي كان فرحان..... اول حاجة عطاتو ياكل و جلساتو قدام التلفازة و مشات هي تتستكشف الشقة و البيوتة..... لاحظت انها نقية خصوصا ان الفام دميناج كتجي كل سيمانة تنقيها..... رجعت حدا محمد امين كتلعب معاه و تعنكش فيه حتى دخل يوسف بليفاليز كيترعد بالبرد.....
يوسف:(حط لي فاليز و مشا حدا شوفاج اللي كانو معرفوش يشعلوه شعلو عاد ريح) واااا البرد كيصرفق الحناك اش هادشي
م.امين: ههههه انا مجانيش البرد انا بطل
حنان:(عنقاتو عندها) نتا ولدي الواعر اللي غينوض يعاوني ياك (حرك ليها راسو بايجاب و دارت عند يوسف) خاصنا نتقداو
يوسف: واخا نمشيو نتغداو و ملي نساليو نتقداو....
مشات دات ليفاليز ديالهم للبيت و بقات كدور هي و محمد امين فالدار حتى وصلت وقيتة ديال الغدا و خرجو يتغداو..... مشاو على رجليهم لمطعم بلدي كيدير الطواجن على الفاخر اختارو طاجين اللحم ديال المعزي بالقوق طايب على الفاخر بنييين كلاو حتى شبعو و خداو تصيورات عاد ناضو مشاو لاقرب سيبير مارشي تقداو و مشاو للدار.....
نرجعو لعند الكوبل ديالنا اللي ختمو نهارهم بعرض ديال الاوبيرا حضرو ليه فمركز اتاتورك الثقافي..... موراها خرجوو و دازو خداو عشا خفيف ضريف عاد شدو طريق لاوطيل سخفانين.....
و هوما داخلين محملين سمعو صوت بنت كتعيط محمد دارو لقاوها رجاء..... كحلت ياسمين بالعما و وقفت بالسيف عليها تا وصلت عنذهم.....
رجاء: كتبانو ليا متقلين ههههه مخليتو والو
محمد: ضروري اللي بغاتها المدام تحضر ولا لا اياسمين.
ياسمين:(بضحكة صفرة) اه هههه الله يخليك ليا و خلاص
رجاء:(ردت ليها الضحكة و قالت) ايوا بصحتك(وجهت كلامها لمحمد) كيما عرفتي انا جيت بوحدي و مالقيت معامن داكشي باش قلت غدا نمشيو اونسوبل فرحلة فدوك العبارات ديال البوسفور اذا مكان عندكم حتى مانع...
محمد: الصراحة ماعرفتش مانقولك (نغزاتو ياسمين) كون غير عفيتينا
رجاء:(حطات يدها على ذراعو بجرأة) عفاك امحمد عارفني بوحدي هنااا
محمد:(مشكلاتو ياسمين اللي تتنغز فيه و فنفس الوقت ماقدرش يرفض) واخا صافي مكاين مشكل
رجاء:(ضحكت بفرحة و زادت نقزت ملي شافت ملامح ياسمين اللي كدل على أنها بقا ليها قسم و تنفجر) ياااي شكرا المهم غدا مع العشرة نتلاقاو هنا يله تصبحو على خير (زادت كضحك مخلياهم موراها)
محمد:(دار عند ياسمين لقاها تتخنزز فيه رفع حواجبو قال بقلة حيلة) هانتي تشوفي امدام ملقيتش كيفاش....
مجاوباتوش ياسمين زادت و خلاتو تتحس براسها غتنفجر بالفقصة و الغيرة و زادتها الردة اللي جاتها زادت قدامو مخلياه غير كيشوف ما عرف مالها مع دخلو مشات تتجري لطواليط ترد.... بقات كتبوع حتى حسات براسها غتلوح مصارنها.....
جا محمد كيجري خايف عليها وقف موراها كيحك ظهرها حتى سالات.... ناضت غسلت و خرجت مع بغات تزيد شدها من يدها..... هزت فيه عينيها بتخنزيرة و نطراتها ليه بالجهد معصبة و ماعندها فين تزيد.... مشات لسرير تكات و حطت يدها فوق عينيها تا حست بيه جلس حداها و حط يدو على كرشها كيدوز عليها....
#يتبع 🔥🔥
بشوية على ديك الكلافيي و مادعيوش ليا فولدي 😐