🌺عبق ياسمين 🌺 (طور التنزيل )

part96

🥀 عبق الياسمين 🥀
🖋️ نور آية 🖋️
بارت...96🍂
النگافة: يله نبداو اختي باش يله تسالي مع الوقت
شيماء:(طلعات فيها و هبطات) واخا (ناضت تقادت فالجلسة شوية وهي دور مخسرة سيفتها) شكون فيكم اللي دايرا شي ريحة مجهدة
البنت: اناا اختي ولكن ممجهداش
شيماء:(رفعات صوتها بعصبية) لا اختي مجهدة ديك الساعة مديريهاش واه بنادم ميعرفش يختار تا الريحة
النگافة:(غمزت البنت و بدات تتسايس) صافي اختي سمحي لينا....
بدات البنت خدامة و شيماء غير تتنگر حتى كرهاتهم فالنهار اللي جاو يخدمو ليهااا.... دخلات مها لقاتها تتنگر عليهم غمزاتهم بمعنى غا سايسو و خرجت تدور راسها بلا حول ولا قوة الا بالله.....
ياسمين بقات مع حنان تا جاو السرباية و داكشي و طلعاتها معاها للبيت..... دخلو جلسات حنان مشات ياسمين تتجبد فالحوايج و هاضرة معاها.....
ياسمين: ياختي محمد امين ولفك
حنان:ههههه شحال حليلو داك الوليد حتى انا عز عليا مسكين
ياسمين: تا باه الله يعمرها دار و درويش
حنان: اه السي يوسف تاهو مهلي فيا الله يسهل عليه
ياسمين: (جلسات حداها) و ايلا قلت يوسف راه طالبك للزواج
حنان:(خرجات عينيها) اويلييي واش تضحكي اختي
ياسمين: اويلي على الهبيلة واش هادشي فيه الضحك راه داويا معاك هضر معايا انا و محمد باش نهضر معاك و نشوف اش غتقولي
حنان:(حدرات راسها حشمانة) معرفت ما نقولك انا ماشي من مقامو اختي و انا غير خدامة وهو تبارك الله ولد الدار الكبيرة
ياسمين: شتي نتي والله حتى حمقة متفكريش هكا تانتي بنت الناس و يتمناك الف واحد و كون مابغاكش مغيجيش يهضر معانا
حنان: ولكن معرفتش خفت اختي والله خفت نعيش داكشي اللي عشتو مع اللول
ياسمين: شوفي اناااا خوديها گارانطي من عندي والله يوسف تا ولد الناس و غيعوضك على گاع اللي داز غير فكري و ديري بين عنيك ولدك اللي ضاع و محمد امين اللي جابو الله فبلاصتو.....
ناضت للدوش خلاتها تتفكر مع راسها..... راس كيقوليها شوفي ابنت الناس شنو دار معاك و كون كان خايب كون نهار قلتي اللي ليه مطلقة ميزگلكش ولكن بالعكس احتارمك و وقرك و ماخلا ما دار معاك اللي ميديروش معاك خوك.....
و راس كيقوليها افلانة راك متبدلي صاحيك غير بما كرف و گاع الرجال بحال بحال و ماشي بعيد لا تزوجتي بهذا تعيشي كثر من داكشي.... حارت و معرفات مادير.... بقات هكاك حايرا تا خرجات ياسمين عندها....
ياسمين: فكرتي ولا مازال و اناااا معاك فاللي اختاريتيها كوني هانيا راك ختي
حنان: معرفتش والله خفت اياسمين
ياسمين: كاين حل غتهضري معاه بينك و بينو و ديك الساعة يدير الله خير.... نساي دابا و نوضي لبسي هاد القميص اللي حطيت لك بينما لبست تا انا و اجي نصاوب ليك...
جبدات ليها فراشة زوينة عصرية الفوقي رمادي و حمرة من التحت مخدومة بعقيدات و عقيق حتال الوسط و ليزيسطراس و ياسمين جبدات قميص جوهرة ديال الزقلي فالابيض و الذهبي مخدومة بالراندة......
لبسو حوايجهم و ياسمين طلقا شعرها بعدما بوكلاتو على طولتو اما حنان جمعاتو سفينجة اللور..... دارت ليها ماكياج خفيف و نزلات لعند النسا تعاونهم.... بقات ياسمين تتسنا فمحمد يبان مع الفاليز ديالها.....بدات تدير فماكياجها تا دخل مبدل على اللبسة ديال الصباح و هاز فاليز صغيرة حطها و توجه لعند ياسمين اللي جالسا باسها بقوة فحنكها تا قفزات من برودة وجههو....
ياسمين: احححح وجهك بارد بارد
محمد: راه الزفزوفي برااا تيخبط بغينا غا نسخنو مالقينا معامن
ياسمين:(هزات فيه حاجبها) كيفااااش مالقيتي معامن
محمد:(مشا جلس فالسرير مقابل معاها) تهدني امدام داوي غا عليك كونما ركزتي على هاد الحزاق كوراحنا فدارنا تنسخنوووو ياخزيت
ياسمين: محمد راه مجاتش متحضرش راك خوهااااا
محمد: ياسمين قلبي هاد السيرة احبيبي مافيا اللي يتعصب وانا تنشوف فهاد الزين قدامي مالك عليه اختي موحال نخلي والديك تهبطي
ياسمين:هههههه حماقيتيي ولا حگا هضرت مع حنان
محمد: وشنو قالت
ياسمين: مازال مترددة و خايفا مسكينة
محمد: الصراحة راه ماشي ساهلة من حقها تخاف و شنو درتي معاها
ياسمين: قلت ليها تهضر معاه و يكون خير...
لتحت كانو النگافة و الماكييوز سالاو مع شيماء بمشقة الانفس..... نزلو بعدما حلفات عليهم حفيظة ميمشيوش واقفين قراب للكوزينة داويين....
النگافة:غي خمسة بحالها نخلي تانگافت و نقلبها مسمن قلبات ليا راسي
البنت: بزاااف على نگييير معرفتش كيفاش كايديرو معاها
النگافة: ختي هكاك مالين الفلوس قليل اللي تتلقايه متواضع
البنت: هادي اختي معرت هاد الراجل كيبغا يصبر عليها
النگافة:غيصبر بلهلا يطريه ليه على نتي معقتيش بيها
البنت: لا مالها ماعقت بوالو انا راه حمارة فهادشي
النگافة:ايوا نوضي على سلامتك راها حاملة مشفتيش الشكلاط اللي كانت كضرب بلاما تعقل و الريحة اللي خسرات سيفتها ملي شماتها
البنت:(خرجات عينيها) واااايلي بصح هادشي
النگافة: ايييه احبيبتي راني والدة ثلاثة النفوس ميخفاش عليا الحمل و الوحم و هي كتوحم عليها الراجل بهلا يحزقو ليه غيصبر..
البنت: ياختي بااااز بغيت نعرف غير هادو اللي تيحملو بلا زواج كيتايديرو باز ليهم
النگافة: على ما سمعت راها مطلقة على ولد يعني لعبات فالنوار تا شبعت و هاد الحمل غا زلق ليهم
البنت: لا حول ولا قوة الا بالله الله يستر اختي الله يستر.....
بدلو الموضوع و بقاو كل مرة داوين فحاجة محسوش بالشخص اللي كان واقف وراهم مصدوم من داكشي اللي سمع.... و بدا كيذكر كو افعال شيماء هاد الايام و تصرفاتها الغريبة و فعلا تأكد انها حاملة..... لكنو كان مصدوم و معارف مايدير حاس بالارض دارت بيه.....
نزلات شيماء جلسات فالبرزة و الصالة عامرة بالنسا منهم ياسمين و مها و حنان جالسين كيضحكو خاصاهم غير دعاء اللي تعذر عليها المجيء بسبب مرض عدوزتها.... بقاو قولها و ضحك عليها و النقاشة خدامة تتنقش لشيماء اللي حتى النقاشة مسلماتش من حدة طبعها و شخصيتها القاصحة ها الملاحظات على كل حاجة ها التعياب ها حشيان الهضرة....
الحاصول شيماء هي شيماء و عمرها غتبدل حيت وقتما كتبغي تبدل كيغلب الطبع على التطبع..... حنان ناضت بعدما صيفطات ليها سميرة بنيتة صغيرة تكلم هي و ياسمين فعلا ناضو خرجو.... متوجهين لصالة اخرى صغيرة شوية من غير الصالة اللي فيها الرجال....
دخلو ليها لقاو محمد جالس بجبادور بلون كاسي كيبان شهوة منو مع الدخلة غمز ياسمين تيطلع و يهبط فيها محمقااااه بالبلدي و اللي لبستها كتجي معاها خلاتو منزل كواريه و طيرات ليه العقل لدرجة اللي يوسف معاها ميقولش هدا محمد ديال شحال هادي....
و عبدالله حتى هو يالالة بالجبادور رمادي واخد منو حتة و سبحان الله و يا محاسن الصدف جا مواتي هو و حنان اللي ملي دخلو عاقت بالبلان و حشماااات حدرات راسها معاوداتش هزاتو مخلية يوسف غير حال فمو فيها.... ايلا كانت بالبيجامة و الفواطة و تتحمقو و طير ليه العقل اش غتكون دارت فيه بالبلدي و الماكياج اللي واخا خفيف جا معاها و باااان فيها.....
جالسة سميرة بالقفطان ديال ميبرة مراية فالبوردو مخدوم بنفس اللون مع مضمة ديال الذهب و الزيف فالبوردو و الذهبي نازل شوية على شعرها مع كحيل و عكير تحلف عليها ما والدة محمد تتبان وسطهم بحالا ختهم.... و حفيظة اللي عيات و مرضاااات و ولاو تيقولو فين ايام حفيظة اللي كانت متتهدش و متتعياش ولكن الزمان هدها و الصحة غدرتها و من هنا الظالم ياخد عبرة بيلا كيجي واحد النهار و قداش ما كنتي عالي و ظالم و متحبر غطيح و ترجع كثر من ولد صغير حيت لا الفلوس كيدومو ولا الصحة كدوم كيدوم الفعل الزين و الكلمة المزيانة و ايلا كنتي مزيان راه يهزوك فوق شفارهم اما لاكنتي خايب فواخا يكون عندك الف واحد نهار طيح مغتلقى حتى واحد.....
جالسا حفيظة بقفطان بيض و شال بيض و كحل وجهها سمار بزاف و ضعااافت و بان فيها المرض.... المرض اللي عارفاه هي و الطبيب و الله...
حفيظة: زيدو ابنتي دخلو جلسو
سميرة: تبارك الله على الزينات قل اعوذ برب الفلق
ياسمين:(ابتاسمت ليها) ربي يخليك و يحفظك اخالتي (غمزت محمد بلاما يشوفها حتى واحد و رد ليها هو بوسة من عندو مزهيين الوقت)
حفيظة: ايوا اليوم هضرتنا غتكون مع حنان
حنان: اهاه اخالتي مرحبا
حفيظة: شوفي ابنتي انا قبل مندخل فالموضوع بغيت نقولك و لهاد الناس واحد الحاجة انا الحاجة اللي ندمت عليها بزاااف فحياتي هي تدخال اللي دخلت فحياة ولادي و خصوصا يوسف..... حاسة بالذنب حيت انا اللي اختاريت ليه عروستو و كنقول يمكو كون خليتو اختار بوحدو واخا يكون اختار اميمة نيت مكنتش غنحس هكا ولكن دابا حاسة بذنبو و ذنب داك الوليد عليا..
يوسف:(خدا يدها باسها ليها) متقوليش هكاك الوالدة هداك مكتاب و المكتابة توصلك توصلك و داكشي ولا ماضي نشوفو الحاضر و المستقبل اش جايبين..
سميرة: ايه عندك الحق اولدي ختي حفيظة ضروري الانسان يدوز و يندم و يصحح هكا الدنيا غادة ولكن الله اللي عارف اش مخبي اللي جاي
حفيظة: ايه عندكم الحق و انا والله شاهد عليا من نهار دخلتي لهاد الدار دخلتي لخاطري لامن ظرافتك لا من صغر عقلك ولا من كولشي و زدت فرحت ملي شفتك كيفاش دايرا مع محمد امين اللي كيقطع ليا فقلبي وليدي مسيكين (نزلو دميعاتها و مدات يدها لشالها كتمسح فيهم)
سميرة:(عنقاتها جنب كتواسي فيها و حتى هي غرغرو عينيها) متبكيش اختي تا دابا جاب ليه الله اللي تعودي و تملي الفراغ اللي فقلبوووو
حفيظة: ايه الله يشوف من حالووو....ايوا يابنتي ملي جا اليوم ولدي يوسف و قالي الواليدة بغيت نخطب (هنا يوسف شاف فحنان لقاها كتخطف منو شوفات حشمانين ابتاسم بشوية و رجع كمل مع مو) قلبي قفز قلت الله ياربي و شكون بغا يتزوج تكرفس ليه على ولدو و لكن ملي قاليا حنان بحالا طفا ليا العافية اللي كانت شاعلة فقلبي قلت ليه اولدي انا معاك حنان هي اللي غتهلى ليك فولدك و تصونو و بنت الناس تستاهل....
سميرة: الحق يتقال حنان من نهار جات عمرها هزات العين فشي واحد بنت باب الله و درويييشة و تستاهل كل خير وانا كيما قلت ليها داك النهار غنقولها قدامكم من نهار دخلت وهي مقامها من مقام ياسمين و احلام و نسرين و تيسير ايوا اش قلتي ابنتي
حنان:(عينيها فالارض و كدوي غا بزز) انا مخليتو ليا منقول والله حتى انا من نهار دخلت لهاد الدار و انا حاسباكم واليديا اللي معنديش و خير ياسمين عمرني نساه فحياتي (حطات ياسمين ايدها عليها) و محمد امين ولفتو و حاسة بيه و ربي اللي شاهد عليا ولدي اللي مولدتوش و اللي بانت ليكم ديروها انا خليت الامر فيديكم...
#يتبع ❤️❤️
صعيييبة هاد اللقطة بلا واليدين 😭
اللي والديه مازال حيين الله يخليهم ليه و اللي ماتو الله يرحهم 💔