🌺عبق ياسمين 🌺 (طور التنزيل )

part107

عبق الياسمين 🥀
🖋️ نور آية 🖋️
بارت...107🍂
محمد: مالك اياسمين واش تقلقتي علاش مشيتي و خليتي الفطور
ياسمين:(تخنزرت فيه و رجعت كملت شغلها) علاش غنتقلق درتي ليا شي حاجة؟ومعجبنيش داك الفطور
محمد:تتبعها للطبلة فين مشات ريح حتى هو) و علاش هضرتي هكاك و مشيتي مالك عندك شي مشكل قوليه
ياسمين: نتا اللي شنو مشكلتك و شنو ديك الهضرة تتقول قدام ديك خيتي يحساب ليها غير بصح شاداك نيت
محمد: عادي كنضحك اشنو فيها ياك قلتها لك ما مرة ما جوج مالك دابا
ياسمين:(بعصبية) قلتيها ليا مي قدام ناس مقربين لينا ماشي قدام وحدة مكنعرفهاش اصلا هاديك ماشي هضرة تقال
محمد: ياسمين الله يهديك هضرة عادية هاديك و غير ضاحكين وحتى هي غير ضحكت الا ايلا بغيتي تجبدي الصداع
ياسمين:(خرجت فيه عينيها) دابا انا اللي وليت باغا نجبد الصداع (صفقت ليه بيدها بالشوية) برافو لا برافو سير كمل هضرتك مع كليانتك ضحكك و خليتي لا نجبد لك الصداع...
خلات ليه الفطور و زادت مخلياه غير تيشوف مفهمش مالها و لحد الآن مازال ما بان ليه الغلط ناض تبعها وهي غادة تتشتف اول حاجة معجبهاش تلقاه جالس مع رجاء خصوصا ملي شافتها و شافت جمالها و رقتها طبعا اي وحدة مكتبغيش راجلها او خطيبها يجلس مع وحدة زوينة و مأنثة واخا تكون ثقتها فنفسها مية فالمية و ثاني حاجة اللي زادت كملت عليها الطريقة باش كتهضر معاها هي و الطريقة باش كتهضر معاه و اخر حاجة اللي خلاتها صافي تنفر منها هي هضرة محمد و جوابها هي و كيفاش ثايقة فنفسها و تتهضر متأكدة.....
طبعا هادشي مشافوش محمد او مردش ليه البال لأنه كيبقى راجل و الرجال فغالب الاحيان مكيعرفوش فعايل العيالات بيناتهم كتقدر الحاجة تبان ليهم عادية لكن بالنسبة للمرة فهي معادياش فيها و فيها.... كذلك و مثال بالنسبة للرجال تكلبين الراجل ميعرفو غير الراجل.....
داكشي باش محمد لحد الان مفمش مال ياسمين و مالقا لتصرفاتها حتى تفسير تبعها بالخف شدها من يدها و حاوط خصرها بيدو محاول ميتعصبش حتى هو باش يبقاو زوينين..... حط سبابتو تلى خدها كيدوز فيه و عويناتو الخوضر فعسيلاتها هايمين......
محمد: دابا مال الزين ديالي كاعي راه خاصك تكوني طايرا بالفرحة ماشي العكس احبيبي
ياسمين: كنت فرحانة اما دابا زعفت امحمد
محمد: روح محمد نتي صافي سمحي ليا واخا معارفش شنو درتي اجي متكونيش غايرة
ياسمين: غايرة هههههه انا نغير و منين من هاديك لا كتحلم احبيبي
محمد: اححح (همس فوذنها) خارجة من فمك كيف العسل ههههه يله احبيبي نهارنااااا طويل يله.....
خرجو من لوطيل بعدما بقا حتى طيب خاطرها و رجع الضحكة لفمها اللي مكيرتاح تا كيشوفو ضاحك و عويناتها مبسمين كيلمعو كيما ديما..... اول حاجة داروها هي مشا كرا طوموبيل باش غيبقا يتحرك....
عاد بداو رحلتهم..... اول وجهة ليهم كانت هي القلب النابض لمدينة اسطنبول.... معشوق السياح.... ميدان او منطقة تقسيم.... البلاصة اللي مكتخواش..... البلاصة اللي وقتما مشيتي ليها تلقاها عامرة.... فيها كلشي.... مطاعم.... متاجر..... مقاهي..... بوتيكات...... فنادق و كولشي..... سطاسيوناو الطوموبيل و خدا محمد كامرتو اللي مكتخطاه فحتى رحلة....
بداو بميدان تقسيم اللي كان عامر كيف العادة بالسياح نظرا لتواجد واحد من المعالم التاريخية الجميلة فالمدينة اللي هو نصب تذكاري او تمثال الجمهورية التركية اللي تنحت سنة 1923 على يد نحات إيطالي بمناسبة الذكرى الخامسة لتأسيس الجمهورية التركية..... تصورو معاه و الاغلبية ياسمين صورها بجميع لي بوزيسيون و فينما دارت يصورها.....
خداو الكعك التركي من عند راجل تما بكروستو و تمشاو لناحية للشارع اللي فيه الحوانت و البوتيكات.....كان عبارة على شارع طويييل عامر بالمحلات التجارية واحد حدا واحد و وسطو دايز المترو..... هنا بدا هرمون السعادة تيتفرز عند ياسمين و لقات محمد قالها متعرفيش كل مرة يدخلها لمحل يحملو و يجملو و يخرجو و مع الحوايج رخاص مكاين غير الله يعطيك صحيحتك.....
من ملابس داخلية لبيجامات لشوميزات بالألوان و الاشكال ليها و للبنات لملابس خارجية لملابس تقليدية تركية..... غير الشيلان و الزيوفة دارت فيهم خبلة..... الصبابط و السيكان غير تتهز و محمد يهز و يخلص.... حتى ما بقا عندهم فين يزيدو مازال.... اضطرو انهم يرجعو طوموبيل يحطو بگاجهم و يرجعو.....
محمد: دابا خاصك متشريش الحوايج واحد العماين امدام.
ياسمين: ههههه مال هادشي كامل ليا مازال نمشي نفرق
محمد: مالي اختي شاري لك نتي ولا ليهم لي بغا شي حاجة يجي ليها انا كنشري لحبيبي يلبس حبيبي سيرتو داك الشوميز الحمر ليوووووم ابنتي
ياسمين: سكت سكت يسمعووك الناس اويلي متتحشمش
محمد:(شافيها بمعنى من نيتك) لاااا والله نتي تا عندك بلاصة العقل عتد حمار مجبد شكون بغا يفهمني هنا....
#يتبع ❤️❤️
الله يعطيكم شي تسافيرة تانتوما وانا معاكم 🌚