🥀 عبق الياسمين 🥀
🖋️ نور آية 🖋️
بارت...81🍂
فواحد من المستشفيات الخاصة فالرباط و فشومبر فيها زوج ديال الناموسيات اختاروها محمد و ياسمين كل واحد جالس فديالو بحوايج السبيطار ياسمين متكية عادي و محمد ناعس عوج بسباب الجبيرة اللي جاتو فذراعو ليسر بسبب كسر تعرض ليه فالحادث....
دايرين بيهم عائلتو من ماماه و باه و احلام و الحاجة كلثوم و حكيمة و معاهم مصطفى و ثورية كيديو و يجيبو فالهضرة و سميرة جالسة حدا راس ولدها مخلوعة عليه....
سميرة: الله ياولدي الله عيت معاك جلسو جلسو وااا هانتا غتجلس بلهلا يطريه ليك..
احلام:(كضحك كانت جالسة حدا ياسمين من جيهة اخرى) وا ماما الله يهديك ولدك راه تيموت على دارو
محمد:(ضحك على هضرتها و خدا يد ماماه بليد السليمة باسها) معندك لاش تخافي الواليدة ولدك شديد شوفي غا مرات ولدك مسكينة (دار شاف فياسمين اللي كانت متكية تتشوف فيهم و ضحك و غمزها عند بالو مشافو حد و هي تتحمار و تصفار)...
🔙🔙فلاش باك🔙🔙
جر محمد ياسمين حتا تكات على كتفو هازا فيه عينيها كتشوف فتقاسيم وجههو محساتش ايمتا قالت....
ياسمين: كنبغيييك
محمد:(صدماتو نزل فيها عينو بسرعة و رجع شاف فالطريق لقاها خاوية و استغل الفرصة رجع هبط عينو فيها و قال بدورو) كنموت عليك احياتي....
مورا هاد الكلمات ممنعش شهوتو و مشاعرو انهم يتحكمو فيه و نزل عليها بقبلة حنينة زلزلات ذاتها و شعلات النار فقلبها..... بادلاتو القبلة للحظات و فصلاتها.... عينيه معلقين عليها و قلبو كينبض بسميتها.... هزات عنيها بعفوية فالطريق حتى توسعو و غوتات بلاما تحس...
ياسمين: عاااااااندااااااااك...
شاف محمد قدامو بالزربة و بصدمة لقا كاميو جاي نيشان ليهم بسرعة خارقة دور الفولون ديال الطوموبيل حتى خرجات على الطريق و فقد السيطرة عليها اكتفى يشد فيد ياسمين بقوة محاول يهدنهاااا حتى تخبطات الطوموبيل مع شجرة.....
غابت ياسمين بحر الخوف على الوعي فالبلاصة و طاحت على لإيرباغ ديال الطوموبيل فحين محمد كلا دقة بيدو فالبلاصة و طاع عليه الزاج ديال السرجم اللي فجنبو بسبب جدع اللي تخشا فيه الشي اللي خلا الزاج يجرحو جريحات صغار فوجهو و يديه..... دور عينو لعند ياسمين لقاها غايبة على الوعي و ضربة فجبهتها كتسيل بالدم...
محمد:(مد يدو بصعوبة لذراعها و زعزعااا محاول يفيقهاا) ياسمييين..... ياسمييين حبيبة فيقييي ياااااسمييين
حاول معاها لكن مفاقتش فحاول يحل الباب لكن عكس ليه بسبب الضربة القوية..... عيااا و طاقتو استنزفات و حس براسو غادي يغيب لكن بقا كيكابر حتى مبقاش ليه فين و غاب على الوعي..... بقاو قرابة زوج سوايع هكاك بحكم الظلمة حد مارد ليهم البال حتى تمو دايزين شي دراري فتقادة ديال محمد بالطوموبيل و وقف واحد فيهم يقدي حاجتو و لفت انتباهو الدخان اللي طالع عيط على صحابو و جراو عندهم حاولو يحلو الباب لكن عكس.....
صوناو للبوليس و الاسعاف.... استغرقو وقت باش يجيو لكن بالزربة جبدوهم عتقوهم و بقاو البوليس تيقلبو على سبب الحادث..... وصلو بيهم يله مدخلينهم فاقت ياسمين راسها دارهااا كتحاول تستوعب هي فين..... غير شافتها الفرملية طلبات منها النمرة بالزربة ديال شي واحد.... بالدعقة عطاتهااا النمرة ديال محمد....
صونات جاوبوهااا البوليس اللي كان عندهم تيليفوناتهم بزوج.... قطعو و قلبو حتى لقاو بزطام محمد فيه دي كارط فيزيت منهم لكارط ديال المحل و ديال باه و يوسف..... صوناو على يوسف اللي فاق مفزوع علموه بالخبار..... لبس بالزربة و خرج بلاما يعلم حتى واحد لكن قلب الام كان حاس....
منعساتش سميرة و قلبها كان مقبوط عليها.... بقات حتى الفجر حالا عينها حتى صلاتو و صونات فالنمرة ديال محمد مجاوبهااا حد.... تزاد معاها الزايد و صونات لياسمين فين جاوبها بوليسي علمها بالحادث ناضت قافزة فيقات حسن كتفتف و خلطو عليهم فالكلينيك فين كان يوسف تكلف بكولشي و محمد فاق و جبرو ليه يدو و داواو ليه جرحات و ياسمين اللي كانو فحصوها و مكان عندها والو من غير الجرحة اللي فجبهتها داواوها ليها و داروهم فشومبر وحدة.....
فاقت ياسمين لقات محمد متكي و حال عينيه كيدور فيهم غي حسن بيها فاقت دار عندها طافج بصوت ملهوف....
محمد: ياسمين حبيبة فقتي كضرك شي حاجة
ياسمين:(تقادات فالجلسة و تقابلت معاه) لا انا بيخير نتا اللي كليتي الدقة (كابرات و ناضت لعندو واخا ركابيها محشوشين حتى وصلات عندو و جلسات فجنب سريرو) سمح ليا احبيبي اناا اللي بقيت داويا معاك
محمد:(خدا يدها باسها و حطها على حنكو كيشوف فيها بحب) شششش يا الهبيلة متقوليش هكاك كتااابت معندناااا منديرو الحمد لله خرجات طريفة و موقع لك والو
ياسمين:(دوزات يدها على حنكو بحب) ولكن نتا شوف
محمد: مالي انااا بخييير تجربي ازين (مع غمزة)...
يله بغات تجاوبو دخلات سميرة كتفتف مع حسن و يوسف اللي كان براا مشات كتجري لعند ياسمين ياسمين عنقاتها....
سميرة: الله يابنتي اشنو وقع ليكم (طلقات منها و دازت لمحمد غير شافتو نقزات الدمعة من عينها) و ولدي مالك اش عندك..
ياسمين:(سلمات على حسن و جلسات فسريرها) خرجات طريفة اخالتي حكم الله و تصرف
محكد:(تقاد فالجلسة حتى جلس و ذرع مو بليد اليمنى كيبوس فراسها) امالك الواليدة مكاين والو حادث صغير و صافي
حسن:(قرب لعندو سلم عليه) الله ياولدي اشمن صغير كيفاش وقع لك
عاودو ليهم الحادثة كيفاش وقعات و بقاو جالسين شوية حتى دخلات ثورية و مصطفى و دعاء مخلوعين كيتفتفو حتى هوما سلمو عليهم و طمنو عليهم.... دعاء صونا ليها باش ترجع و بقات ثورية و مصطفى معاهم حتى جات احلام جايبا معاها الحاجة كلثوم و حكيمة...
دخلو لقاوهم جالسين ناضت سميرة من حدا ولدها مخلية جداه تريح حداه..
..
كلثوم: الله على الغالي ديالي اش هاد المكتاب تصرف عليكم كيوقع ليكم اولدي
محمد: هانيا الميمة راك قلتيها مكتاب الله و تصرف معرفتي علاش هزات و خرجات طريفة
حكيمة:الله على كبدتي ماطريفة والو (دارت عند ياسمين) ونتي ابنتي باش تتحسي ياكما تقصحتي
ياسمين: لا لا انا بيخير محمد اللي هز الدقة مسكين
سميرة: غيي ملي مكاينا تا حاجة الداخل راه هانيا دابا يبرى ان شاء الله نقابلو بيدي....
محمد: الا الواليدة دااااري لا تفلت
سميرة: ايلا مسكتيش غنهرس والديك من الرجلين بجوج و ديك ساعة نديوك تال دزاير تا معطوب و مرتك عيانة شكون غيقابلكم
ثورية: عندها الحق اولدي جلسو معاهم غي تتولي لاباس
محمد:(شاف فياسمين) صافي امدام حكمات المحكمة... (قاطعو دخول يوسف) افين اسبع اش درتي فلافير
يوسف: كون هاني كولشي هو هداك غاااا توكض معانااا
حسن:(ابتاسم بفرحة كيشوف علاقة وليداتو مزيانة) الله يرضي عليكم اوليداتي (دار عند لوخرين) سي مصطفى يله ترتاحو ليكم شوية يله الواليدة خليوهم يرتاحو..
ثورية: غير خلينا معاهم شوية
مصطفى: عندو الحق معندنا مانبقاو نديرو يله نشدو الطريق تاحنا
حسن: ايه واخا غتشدو الطريق
سميرة: وااا كون غا خليتيني
حسن:يله يا هاد المراة فحالك
سميرة: بااااز (دارت عند يوسف) يله معانا اولدي نوجدو لك ماتجيب ليهم (سولات ياسمين) ياك كاين كولشي فالبيت
ياسمين: اه اخالتي كولشي راه فالبيت قادي الساك...
خرجو كاملين مخلينهم الراس فالراس.... مع خرجو بدا محمد كيحاول ينوض حتى ناضت ياسمين كتعاون فيه...
ياسمين: شنو بغيتي دير
محمد: بغيت نتصور اختيي راني تزيرت باغي نقدي حاجتي
ياسمين:(شاداه من يدو) متتحشمش ياربي سلامة
محمد:(وقف حتى تقابل معاها و مد يدو لخصرها جارها عندو كيشوف فعينيها) نحشم منك اوهو و مالك اختي على هاد الزين الناس تيخيابو ملي كيمرضو و نتي غادا و تتزيدي تحلاي فعيني
ياسمين:(طلعاتها التزنيكة و حدرات عينيها) ههههه و صافي مبقيتيش مزير
محمد: شوف هاد الزين مازال كيحشم قالك ياختي حلوة (هبط على فمها ببوسة جمع فيها شفايفها بزوج مكانش بزاااف حتى بادلاتو حتى هي البوسة بحب قاطعهم غي صوت التيلي اللي صونا) الحب نتي سيري جاوبي..
فعلا مشا هو كيتعكز لطواليط و مشات هي جاوبات كانت سميرة تتسولها على اشنو ديير ليها..
فالرياض وصلو كل واحد مشا يقدي شغالو الا سميرة اللي دازت عند حنان علماتها باش توجد ليهم ما ياكلو من صوبا و خضر مفورة و طلعات للبيت خدات ساك جمعات فيك كولشي اللي غيحتاجو..... نزلات لقات حنان سالات و قادات كولشي فقفة....
سميرة: لبسي ابنتي عليك تدي ليهم هادشي راه صافي تگزرت
حنان: واخا اخالتي ولكن معرفتش الكلينيك فين جا
سميرة: الا منصيفطكش بوحدك راه يديك يوسف
حنام:(حمارت و صفارت بحكم كتحشم من يوسف كثر من لوخرين) واخاا اخالتي هاني غادة....
مشات لبيت لمخصينو ليها خدات جلابة كحلة ديال المليفة مخيطاها ملي كانت باقا شوية ضعيفة و ملي بدات تتزيد فالوزن جاتها قتالة مع بيوديتها لبسات معاها صبيبط بلا حتى هو كحل و طلقات شعرها رطيطب جمعت ليه الزغيبات القداميات بفليل جات زوييينة و بسيطة..... رجعات للكوزينة كتقاد فداكشي حتى دخل عليها يوسف مبدل عليه حتى هو و لابس مزيان....
أنت تقرأ
🌺عبق ياسمين 🌺 (طور التنزيل )
Adventure______🥀👑 على مختلف اللهجات 👑🥀______ ________🌺عبق الياسمين🌺________ ___بقلمي:aya oulaaidi ( Aya Oulaaidi 🤍)___ معنى الحب: أنت معنى الكفاية: قربك معنى الراحة: كتفاك معنى السلام: صوتك معنى الجمال: عينيك معنى الضياع: شفتاك معنى الانتصار: قلبك مع...
