🌺عبق ياسمين 🌺 (طور التنزيل )

part46

🥀 عبق الياسمين 🥀
🖋️ نور آية 🖋️
بارت...46🍂
ياسمين: (عنقاتها بدورها و قالت) اللي يخليك ليا اماما
دعاء:(جات عنقاتهم حتى هي و قالت) الله يخلينا لبعضياتنااااا يارب (باست ختها) الله يكمل عليك اختي بالخير
ياسمين:(شافت فيها بنظرة حب من ديما كانت الاخت المثالية بالنسبة ليها مثال ديال الاخت الكبيرة الحنينة الناصحة اللي ديما كتسمح فحقها لختها اللي كضحي على ود ختها و ايلا غير شمات ريحة شي واحد جبدها كتوقف فوجهو عنقاتها بحب و قالت) الله يخليك ليا احبيبتي و ميحرمنيش منك....
اكتفت دعاء بتعناقها و مشات جابت مبيخرة فحين مها قرات عليها ما تيسر من القرآن خوفا من العين بخراتها بالعود اللي كانت ريحتو جميلة و رشات ريحتها حتى سمعو صوت الدقايقية فالزنقة دليل على وصول العريس خرجو بالزربة يتعضرو ليهم فحين هي رجليها بقاو كيقفقو عليها قدات ليها سعيدة مضمتها و خرجات معاها تحت اصرارها هي و دعاء اللي أكدو عليها باش تلبس و تحضر بحال معروضين....
خرجاتها تحت صلاة و سلام ديال الحضور اللي كانو مبهورين بجمالها الفتان جلسات فبلاصتها متوترة و حاسة بمعدتها كضرها بكثرة التوتر تسمع صوت الدقايقية كيقرب دليل على وصولهم و دخل محمد اول واحد هاز بوكي ديال الورد فيد و طقم ديال الذهب فيد جانبو مو اللي كانت هازة الطقم الاخر و جدته هازة الخواتم و عاد الحضور اللي صدم ثورية مكانتش متوقعة هادشي كامل ولكن جاب الله كانت دايرا بحساب زايد و دارت السوكور...
سلم محمد على مصطفى و ياسين و دعاء و ثورية و خدا التمر فقط بلا حليب لأنه مكيشربوش و دخل بجانب مو و جداه كيحسب فالخطوات باش يوصل لعند محبوبتو ما ماديها فحتى واحد من غيرها و بنات عائلتها حطو خمسة على فامهم و خدمو عينيهم كيشوفو فالسعد المقاد الراجل كيف الجبل زين و طولة و تجريدة اما الدفوع خلاهم حايرين اش منك يا ذهوبات واش منك يا حوايج ايلا كان هدا دفوع الخطبة فالعرس اش غيدير ماشي غير هوما اللي تبلعو ليهم الفام...
حتى عائلتو تصدمووو المخيرة فيهم ما جاهاش داك الدفوع شيماء اللي كتقول يا ارض نهدي ما عليك قدي تصدمات و شرعات عينيها و قلبها واكلها بالفقصة و الغيرة يمكن كون كانت تقدات مع مها ماكانوش غيجيبو ليها تا ربع فداكشي ولكن بالنسبة لمحمد ياسمين لوكان يجيب وزنها ذهب مايوفيهاش حقها و ميبينش ليها قيمتها عندو...
للحظة توقف عندو الزمن هادشي غير مازال ماشاف ملامحها اللي زادهم الماكياج فتنة كيشوف غير فلبستها اللي رجعات فيها كيف شي اميرة و شعرها الاسود المصفف لايق عليها مع لونها الابيض اللي زادتو الحنة جمال على جمال...
خصوصا انه مكانش من النوع اللي مكيحملش الحنة و لكن فيدين ياسمين زاد عشقها و مل يديها بلا بيها....الحنة حمرة كتشعشع زاد قرب كثر و حط داكشي اللي هاز فوق الطبلة وقفاتها دعاء حتى تقادات معاه و هزات عنها بحشمة و فضول....
و يااااااالهي صدمتووو ماليها مثيل ملاك مصور قدامو حورية من حوريات البحر اميرة من قصور الف ليلة و ليلة اذا كانت مهبلاه بطبيعتها فأكيد بهاد الطلة و السر اللي طالعها طيرات ليه الفرافر ديال عقلو وقف عندهم الوقت هي كتشوف فوسامتو الطاغية و الفرحة اللي خارجة ليه من عينيه كيفاش لا وهو اخيرا لقا محبوبتو اللي كان كيتمنى و مابقا الا دقائق معدودة و تكون ليه و يعيش معاها اجمل ايام حياتو يتوجو حبهم بثمرة منو و منها تحمل اسمو يصونها و يخاف عليها..
و هو تيشوف ملاكو الطاهر اللي كلما شافها كتكون كأنه شافها لأول مرة من ديما كتبهرو بجمالها و جمالها الداخلي اللي كينعكس على صورتها.
قبط يدها خداها حتى لعندو باسها و طبع قبلة على راسها عاد جلسو فالبريزة و الاهل و الاحباب دايرين بيهم فرحانين ليهم ولكن كاين اللي كارههم و كيتوعد ليهم بالشر...
اميمة اللي ملي دخلات و هي محاملاش راسها والجو قلبها كيتعصر بالكره و البغض و نفسها تزيرات عليهااا وهي تتشوف فياسمين بجمالها البريئ و محمد اللي فجنبها محتوي ايديها و عينيه معلقين عليها و المقارنة اللي كدوز فبالها كتقتلها بحالا كيدوز عليها موس حافي....
سلوى حتى هي مكانتش حسن منها اللي رفضات مرارا و تكرارا انها تجي لولا تدخل محمد اللي اصر عليها تجي و ياريتها محطات رجلها فداك المكان ولا شافت المنظر اللي دخل لقلبها كيف السهم تتشوف فالولد اللي حياتها كاملة و هي كتبغيه اللي بنات عليه احلام جالس كيحقق فيهم مع وحدة اخرى و فقرارة نفسها عارفة انه ما عندو حتى ذنب بحيت عمرو عطاها امل او لمح ليها بشي حاجة و هي اللي دارت كولشي لراسها.....
شيماء الغيورة و الحقودة اللي متترضاش تشوف شي واحد حسن منها قلبها واكلها بالحسد و الغيرة وهي تتشوف ياسمين و زينها و حشمتها و كولشي فيها اللي مقدراتش بينها و بين راسها تنكر انها زوينة بجميع المقاييس و هادشي اللي كيذبح فيها غير على الحوايج اللي جاوها والاهتمام اللي عاطينها كرهااااتها بلا تعرفها حكمات عليها من اللول و توعدات ليها بالجحيم...
و حتى مها مكانتش حسن منها... "قلب الجرة على فمها تطلع البنت لمها" هاد المثل فغالب الاحيان كيكون بصح ماشي حيت كتخرجي تشبهي لمك ولكن بحيت داكشي اللي فيها و مربية عليه تتربيك حتى نتي عليه داكشي باش حفيظة السم اللي فيها كامل زرعاتو فبنتها شيماء مجاتش و جابت داك الخبث من الخوا كانت حفيظة هي السبب فيه و زادت ملي شافت انهم تخلاو على رأيها اللي كان هو كولشي كانت مولات الري و الشوار حتى جات ياسمين اللي مسمياها "قدام النحس" و تقلب كولشي بعدما كانت راس رجعات رجلين....
تحط الدفوع فالارض و المصورة كتصور لقطة بلقطة و الخطيبين فرحانين قابطين فيدين بعضياتهم مسايعاهمش الدنيا بالفرحة حتى قرب محمد لودنها و قال
محمد:(بصوت هامس ضربو انفاسو فعنقها حتى بورشات) سبحان من صورك اغزالي.... القمر غار من جمالك.....و قالهم نزلوني و طلعو ياسمين فبلاصتي
لاحظ ابتسامتها الخجولة و زاد ابتاسم مكرهش يضمها لعندو و يتلي عليها قصائد و ابيات شعرية يمجد فيهم جمالها اللي ماشاف ليه مثيل....
تقدمو الصواريات و العصائر بعدما تفرقو الرجال على النسا و بقا غير محمد و خوتو و بعض اولاد عائلة ياسمين حتى جا علي و جاب معاه العدول دخلوهم لصالون و ناض محمد و باه و مو و اب ياسمين دخلو تممو الاجراءات اللولة حتى نده العدول على ياسمين اللي جات برفقة الام ديالها لقات السلام و تلى العدول الكلام ديالو و جاءت ساعة الحسم.....
سؤال واحد غيحدد مصيرهم بزوج.... بكلمة غيبنيو حياة و مستقبل و اسرة.... كلمة كافية تبني او تهدم....
العدول: بنتي السيد محمد تاج الدين طالب سيادتك للزواج على سنة الله ورسوله واش قابلة تزوجي بيه و تعيشي معاه فالسراء و الضراء؟؟
ياسمين:(مقدراتش تجاوب يمكن هاد الحشمة اللي حاسة بيها دابا عمرها حسات بيها للحظة قالت واش انا بصح باغا نكمل حياتي مع هاد السيد و لكن قلبها مخلاش الفرصة لعقلها فين يفكر و ضرب بعنف كجواب على سؤالها اعتمدت الصمت من حشمتها حادرة راسها)
حسن: السكوت علامة الرضا...
العدول:(بامتناع) السكوت لا يعتد به اسيدي لازم نسمعو القبول او اشارة عليه من عند البنت (دار عند ياسمين) تفضلي ابنتي عطينا موافقتك او رفضك
ياسمين:(بارتباك تحطات بين نارين ولكن فالاخير زيرات راسها و قالت بصوت خفيف) موافقة (غير سمعها محمد حس بارتياح...)
العدول: على بركة الله..... توصلتي ابنتي بالصداق ديالك
محمد:(خلاه تا سالا و مد ليه ملف فيه بعض الاوراق و قال) هاهو اسيدي صداقها
العدول شاف داخل الوراق و عطاهم للاب ديالها بلا حتى كلمة و حتى مصطفى مقلبهمش و عاود سول ياسمين اذا كانو عندها شروط و ردات بلا عاد عطاهم العدول الثاني الكتاب وقعو فيه و وقعو الشهود اللي كان علي و ياسين و تعلنو انهم ولاو زوج و زوجة على سنة الله و رسوله...
عطا العدول عقد الزواج الاصلي لياسمين لأنه فالقانون و الشرع من حق المرأة و عطا النظير لمحمد اللي بالنسبة ليه داكشي غي بروطوكول اهم حاجة ان حبيبة قلبو ولات مراتو و حلال فالشرع و القانون و قدام العالم كامل....
تسالمو العروسين مع عائلاتهم و خداو رضاهم.... خرج علي مع العدلين بعدما رفضو انهم يبقاو للعشا و عطاهم مستحقاتهم....
خرجو من الصالون تحت صلاة و سلام و الزغاريت و الكل فرحان بيهم رجعو للبرزة جلسو تحت و قرب لودنها و قال بصوت حنين..
محمد: مبروك علينا امراتي
ياسمين:(شافت فعينيه بحب كتقول واش انا تزوجت واش محمد راجلي دابا و قالت حتى هي بصوت احن من ديالو دخل مع مسامعو بحال شي اغنية هادئة) الله يبارك فيك.....