🌺عبق ياسمين 🌺 (طور التنزيل )

part88

عبق الياسمين 🥀
🖋️ نور آية 🖋️
بارت...88🍂
محمد: صباح الخير اولاد الناس كملو فطوركم ديرونا مكاينينش (وجه كلامو لشيماء) ختي شيماء مرتاحة ليا ياك
شيماء: محمد.... يوساااف.... شنو كديرو هنااا
يوسف: صبري على خبزتك طيب ابنت ميمتي
ايوب:(مفاهم والو كيشوف فيهم و فيها) شكون نتوماااا شيماء شكون هاد خوتنااااا
محمد:(تقاد فالجلسة و شافيه بشوفة وحدة خلاتو يزم) حنااااا معرفتيش شكون حناااا.... حنا هومااا الرعاوين اللي مخليين ختنا كتق*** مع الزو**** قدام الناس اون بلان بيبليك عرفتينا دابا
شيماء:(دخلاتها الرعدة ولأول مرة فحياتها غتحشم من محمد و يتزاد معاها الزايد) بلاتي غي تفهمووو
يوسف: خليتي لينا منفهموووو اختيي هادشي غا اللي باين العالم الله اش مخبي
ايوب:(لقا القضية حماضت ناض بغا يعلق) المهم نخليكم انا دابا (دار مخاطب شيماء) نتلاقاو من بعد اشيماء
محمد:(وقف شدو من كتفو زير عليه و دوا بنبرة قاصحة) اريح اصحبي مازال الهضرة (صونا ليه التيلي لقاها ياسمين بعد عليهم شوية و جاوب)الو ياسمين
ياسمين: صباح الخير كيصبحتي
محمد: ابتي نقولو مزيان ونتي
ياسمين:الحمد لله مالك نتا شنو عندك واش ضراتك يدك
محمد:ضرني البعد واخا تخلي من بعد و نصوني لك
ياسمين:(عرفاتو غيكون مشغول) واخا صافي تتسالي...
قطع معاها و رجع اشار ليوسف باش يريح.... جلسو كيتسناو فيهم يبدااااو ساعة تاحد ماهضر....
يوسف:يله الاخوان كنتسناو شي واحد يفتاتح الجلسة يقولينا شهاد الخرا كنشوفو
شيماء:(قصحات وجهها و دوات) هذا ايوب خدام فبنكة و باغي يتزوج بيا
محمد:ياك المرضية و ملي باغا باغا تزوجي رجعي لراجلك اللي ضيعتيه و ضيعتي ولدك معاه ولا كتموتو على الحرام و كتموتو مع اللي كيضحكو عليكم و يشطحوووكم فالزناقي و البراتش (تنفس بعصبية)
يوسف: هضر اسي ايوب شفتك ساكت سمعناااا صوتك
ايوب:(كيدور فعينيه كان مازال رافض فكرة الزواج ولكن شاف حتى عيا و دوا) اه الصراحة انا بغيتكم ديرو شي نهار نجيب واليديا و نخطبها
محمد: مكاين بو زواج (الكل شافيه مصدومين و اكثرية شيماء صدمها) كون بغيتيها تقصد دارهم ولا باها ولا واحد فخوتها متبقاش تخيط نتا وياها الدروبة
شيماء:ولكن مايمكنش
يوسف: هضرة وحدة تقالت و بلاما يوصل هادشي لواليد باغا تزوجي رجعي لراجلك و ربيو ولدكم
ايوب:(سكت حتى سكت و حزقها قد راسو) مايمكنش راه شيماء حاملة....
لحظة صمت.... لحظة صدمة...... العينين خارجين..... الوذنين كيحاولو يكذبو داكشي اللي سمعو...... القلوب كتخفق بسرعة...... الغضب.... الصدمة..... الخوف...... العار..... الخزي..... الخجل...... كولها مشاعر كانت كدور بيناتهم......
يوسف حدر راسو بخزي و عار...... و محمد كيشوف فيها بصدمة و غضب..... و شيماء حادرة راسها بخوف و خجل..... لسانو تلجم..... ماعرف مايقول...... متوقعهااااش...... توقع كولشي منها..... لكن تال هادي لا...... طيحات براسو و راس عائلتو للأرض..... بدون ما يزيد حتى كلمة..... وقف و تحرك..... سرعان ما وقف يوسف و جمع الدفلة ففمو حتى جمعهاااا..... و لاحهاااا على شيماء للوجه نيشان حت عمرات وجهها.....
مخلي كاع اللي جالسين كيشوفو جيهتهاااا..... تبع محمد حتى لقاه حداات لوطو.....طلعو بزوج و ديمارا الطوموبيل..... تحركو لجهة البحر بدون ماينبس حتى واحد فيهم ببنت الكلمة...... الصدمة و الغضب مسيطرين عليهم......
عند ياسمينتناااا..... فاقت ناشطة صبحات على واليديها ببوسات..... واليديها اللي توحشو نشاطها و وجودها فالدار..... و اليوم فكراتهم فايام زمان و تمناو لوكان غير ترجع..... عرفاتها مها تصالحت معاه غي من ضحكتهاااا..... فطرت و صونات على دعاء دوز عندها و تجيب حوايجهاااا....
فحين هي وصلها ميساج فتيلي من الابليكاسيون ديال البنك كتفيد بيلا حول ليها محمد مبلغ من المال..... ضحكات بسعادة و صونات ليه هي فين جاوبها و كان مشغول..... وصلات دعاء لقاتهاااا لابسة جلابتها باش جات و جامعة حوايجهاااا..... نزلات عندها لقاتهاااا جات غير فطاكسي هزو طوموبيلة باها و توجهو لمركز كاريطا.....
واحد من ارقى و احسن صالونات الدار البيضاء.... ديال الناس اللي لاباس عليهم...... غاديين فالطريق مخدمين الموسيقى و ناشطين حتى نقصات دعاء و دارت عندها...
دعاء: ايوا ياختي ممعولاش تعاودي ليا ولا كيفاش
ياسمين: اش غنعاود لك
دعاء: ياسمين راك ختي و عارفاك ارا ما عندك يا هوى
فعلا عاودات ليها ياسمين لافير من اللول تال اللخر و دعاء غير كتصنط تا سالات عاد دوات....
دعاء: عاذرااااه ياختي اويليييي العالم الله اش سمع مسكين ملي صبر و مدارش لك نييت علاش تغضبي عند بوك الزهر
ياسمين: تانا ملي عاود ليا سكت و طمرت عرفتوووو تعصب و مقصدش اصلا عمرو عاملني هكاك (وقفات فواحد سطوب)
دعاء: ياختي راه تيغيييير الحوب (هزات راسها فالزاج اللي مورا ياسمين حتى تصدمات و قالت) فارس
ياسمين عقدات حواجبها باستغراب و دورات راسها تفاجأت بالدكتور فارس اللي كانت تلاقات بيه فعرس رانيا..... راكب فالرونج ديالو دور حتى هو عينو بعفوية حتى تلاقاو عينيهم..... عرفها بالزربة و ابتاسم ليها و حتى هي مقدراتش متبتاسمش ليه.....
شعل الضو و زادت و زاد حتى هو.... شوية جا قدامها و عطاها الضو باش توقف.... ماعرفات مادير حتى قالت ليها دعاء وقفي..... فعلا وقفات الطوموبيل و بقات فيها حتى بان ليهم جاي عاد عبطات الزاج...
فارس: نهار غليظ هذا عاش من شافكم
دعاء: دكتور فارس لاباس عليك امورك بيخير
فارس: الحمد لله كولشي هو هداك و نتوما مزيانين
ياسمين: الحمد لله الله يخليك
فارس: ايوا صدفة زوينة هادي اللي تلاقينا تبارك الله جاية لعام
دعاء: اه واللهيلا صدفة بصح
فارس: هادي هي الفرصة فين نديرو شي كافي يله انا عارض عليكم
ياسمين: لا لا واللهما نصيبو وقتنا مدروك غير شكرا بزااف
دعاء: اه واللهيلا الوقت مكاينش غير سمحلينا
فارس: لا مايمكنش مالكم شنو عندكم كاااع نعيطو لسي ياسين يجي عندنا و نديرو شي قهيوة
دعاء:(ماحسات تا حزقاتها) لا راه دايرين مع راجل ياسمين
فارس:(شافيها و رجع شاف فياسمين بعدم تصديق) علاش ياسمين تزوجت
ياسمين: اه هادي شي خمس أشهر باش تزوجت فالرباط
فارس:(حس بمرارة فحلقو مينكرش انها كانت عاجباه لكن ماعندوش حق يهضر لانو مدار حتى خطوة) مزيان الالة الله يكمل بالخير مبروك عليك تساليني كادو
ياسمين: ربي يخليك اخويا مابيناتناش....
توادعو و كل واحد زاد مع طريق.... غاديين ناشطين حتى وصلو لصالون فين كانو ديجا واخدين رونديفو..... بداو ليها بشعرها هو اللول دارو ليها سوان مرطب و مغدي و مشات دير لاسير بينما شد ليها فشعرها.....
دارت لاسير لذاتها كاملة حتى رجعات حمرة لكن حس الرغبة مكيدورش..... غسلو ليها شعرها و دازت لسبا دارت حمام بعقلو رخا ليها عظامها و اعصابها حتى رجعات تتحس براسها خفيفة..... دارت سوان عميق للوجها نقاتو مزيان حتى رجع كيضوي..... قادات ظفيراتهاااا و صاوبت شعرهاااا..... دارت سوان العروس حتى رجعات كتشعل و كتشقشق..... دعاء صبغات شعرها و صوباتو و قادت الظفيرات حتى هي....
نمشيو عند محمد و يوسف فين خليناهم..... دورو الطوموبيل لواحد الجهة خاوية فالبحر فيها غير شي صيادة مفرقين.... وقفو الطوموبيل و خرجو وقفو قدامها كل واحد شعل گارو كيكمي فيه و دماغو مسافر..... حتى سالاوهم عاد دوا يوسف....
يوسف: اش غنديرو فهاد الموصيبة
محمد: من عندي انا ضبر كر** صافي ماشي شغلي دير اللي بغات
يوسف: ميمكنش اصاحبي راه توصل للواليد يمشي فيها
محمد:(شافيه بجمود) تا بالرب العلي العظيم مندخل و لا نقول شي كلمة واش هي مخنزاها اش غنديرو شنو رجعاتنا شمايت اصاحبي
يوسف: مصيبة حق الرب تا مصيبة طلع دابا نمشيو نقديو شغالنا
محمد: واخا سبقني ندوز واحد لابيل (جبد تيليفونو دوز رقم ياسمين اللي كانت ديك الساعة فالصالون صونا شوية عاد جاوباتو) الو الزين
ياسمين: ساليتي دابا
محمد: اشمن ساليت راه القضية مرونة و صافي نتي اش تديري حداك الصداع بزاااف
ياسمين: انا فالصالون ملي صونيت ليك كنت باغا نعلمك
محمد: ايه بالصحة حبيبة ستيكي ليا على الحالة و تقادي ليا و متنسايش الفيرني حمر راه كنذوب
ياسمين: ههههههه الله يمسخك
محمد: بغيتي شي مسخ كثر من هذا ههههه اشوفي متنسايش تاشي شوميز كحلة احححح وكان مع داك اللوين و دوك تفيفيحات الله ياربي الحياة
ياسمين: فخبارك انا اللي مسطية دايرا فيك راسي هههههه سير سير قدي ليك شي شغل
محمد: كون هداك الله كوراحنا تنقديو فيه دابا سيري وكان فيقتي علينا الراگد
ياسمين: يله باي باي بيزوات
محمد:جوطيم (صيفط ليها بوسة و قطع)...
طلع مع يوسف حطو فالمحل ديالو و مشا هو لخدمتو..... دوزو نهارهم عادي واخا يوسف دوز نهارو معصب و معارف مايدير..... من جهة ماكرهش يقتلها و يمسح العار اللي دارت بحيت كيبقى رجل شرقي شرفو اهم من اي حاجة....
و من جهة كيفكر لواليديه مو اللي مرضات و تهدات و باه اللي حتى هو كبر و مابقات عندو خرقة للمرقة.... و من جهة كيشوف انها كبرات على انه يعاتبها او يعقب عليها..... خلا كولشي للوقت....