🌺عبق ياسمين 🌺 (طور التنزيل )

part44

عبق الياسمين 🥀
🖋️ نور آية 🖋️
بارت...44🍂
ثورية: شكووون سربي خلاص
دعاء: عريس الغفلة اختاي هههههههه
مريم: شكووون واش خطيب ياسمين
ثورية: واش محمد
دعاء: ايه هو بشحمه و لحمه
ثورية:(باستغراب) لاش صونا لك اش بغا
دعاء: بغا يطمن على حبيبة القلب ههههههه قالك من الصباح وهو يصوني خلعاتو
زوهرة: وا هانتي على بنت ختي كيخاف عليها گااااع
دعاء: واك واك احبيبتي (خالتهم الكبيرة تيعيطو ليها حبيبتي العائلة كاملة) كون تشوفي ملي قلت ليه عيانة (بدات كتقلد فيه وهوما غير كيضحكو) مالها شعندها نجي عندها نديها لسبيطار ههههههههه سرسبهم ليا كاملين خلعني
مريم: هههههه السيد غاااارق ياختيي ياسمين فقيهها صحيح
هاجر: وا هانتي على الحشومية ههههههه بالحق تستاهل
دعاء: واللهيلا ضحكني هههههه....
كملو هضرتهم فداك المنوال قولها و ضحك عليها مقشبين و فرحانين حتى نزلات ياسمين مدوشة من العرق حنيكاتها حمرين و شعرها فازك دخلات للكوزينة كلات شوية و عاودت شربات الكينة باش توكض شوية عاد خرجات عندهم لقاتهم حاطين المكسرات و جالسين على النميمة غير شافوها طلقاتها هاجر و دعاء بضحكة طويلة حتى شافت فيهم باستغراب طالع ليها الخز محاملاش تهدر لاعبين عليها الهرمونات حتى دوات مريم بمزاح..
مريم: ياختي فقيهك صحيح عطينا غا النمرة
ياسمين:(باستغراب)كيفاش
دعاء: كيفاس مع مكناس ههههههه نتي نعستي و خليتي سيد غيحماق
ياسمين: مفهمتش دوي نيشان راه راسي دارني
ثورية: دعاء هداي على ختك راها مريضة (دارت عند ياسمين) راجلك ابنتي من الصباح وهو يعيط لك حتى عيط لدعاء
ياسمين:(وقفات بالزربة) اويلي نسيت مطليت على التيلي...
زوهرة: غا بشوية علك ابنيتي
ياسمين: ماما حگا بغيت نقولك شي حاجة
ثورية:(تقادات فالجلسة) الله يسمعنا خبار الخير
ياسمين:(حشمات عاوتاني و بانت فيها معرفات ماتقول بقا غير كتمتم) دابا... ه. هو انا..... محمد
دعاء: ههههههه مالك كتهجاي تي طلقيها بلا تعصار
ياسمين: وا دابا هو محمد..... قاليا نسافرو (خرجات فيها مها عينيها ولوخرين ضحكو) زعما مورا العقد
ثورية:(بجقات فيها عينيها) كيفاش اختاااااي
ياسمين:(بارتباك) والله حتى هو اللي قال انا ماقلتش مابغيتش صافي
دعاء: عادي مالها شنو فيها راه غيولي راجلك واش نتي حمقة
ثورية:(دارت عند دعاء مخنزرة) هذا ماقدرك عليه الله ابنت كرشي (دارت شافت فياسمين) فين بالسلامة
ياسمين: مراكش
زوهرة: مافيها باس ابنتي ديك الساعة راه غيولي راجلك حلالك سيري معاه تال طركيا
ثورية: لا لا معندها فين تمشي
مريم:(خرجات فيها عينيها) اويلي واش حماقيتي من الدقة والحين تقول للراجل لا (شافت فياسمين) سيري اختي راه حلالك هداك دوزي وقيتة زوينة باش توجدي ثاني للعرس..
ثورية:(شافت فيها ياسمين بمعنى اش قلتي و هي هزات راسها بعدم حيلة) اش غنقولك سيري اختي غير حضي راسك و قاعك
ناضت ياسمين باستها راشقة ليها متنكرش انها رغم الخجل اللي شادها و الخلعة حيت عارفاه غيولي حلالها و غتولي حلالو و حتى حاجة متمنعها عليه ولكن كاينة واحد الفرحة كبيرة انها غتسافر مع راجلها و حبيبها يدوزو وقيتة زوينة بجوج....
طلعات لبيتها بعدما علماتها دعاء باش تنشف شعرها و تلبس قميصها بحيت النقاشة غتجي هزات تيليفونها لقات فيه كثر من ربعين ابيل و المسجات على الجهد ضحكات بخفة على هاد التصرفات و المواقف البساط اللي تيبينو ليها مكانتها و معزتها عندو يكفي انه صونا لختها باش يطمن عليها قلبها كيضرب بعنف جراء هاد الافعال البسيطة ولكن الوقع ديالها على نفسيتها و حتى شعورها كبير....
كتعقل فترة خطوبة دعاء و حتى العام اللول من زواجها كانت كتعاني من برودة زوجها و عدم الاهتمام ديالو بل التجاهل و الاغرب انها للان كتلاحظ واحد البرود فعلاقتهم رغم انهم كيبغيو بعضياتهم ولكن واحد الهالة ديال البرود دايرة بعلاقتهم كتقول مع بالها واش حتى هي ملي غطول فالزواج مع محمد غيوقع هكا....
ولكن كترجع تقول ان سبب البرود ديالهم راجع لاساس علاقتهم اللي متبناتش على اسس مثينة منها الاحترام و الثقة و الحب القوي بحيت كانت ديما دعاء كتعاني من اهانات زوجهاااا و كانت ديما كتحصل عليه دلائل على الخيانة و كتبرك عليها مها و كتصبر و حتى ملي بغاها كيما قال مكانش الحب كافي بحيت بغاها و بقا مكمل فاهاناتو بقا ديما عند بالو راه غتصبر و راه حبو ليها كافيها بلا مواقف الغيرة اللي كان خانقها بيها لدرجة غار من منصف اللي هو بمثابة اخ ليها مكانش عارف ان الحب بوحدو مكافيش...
الحب بوحدو بحال شي بطاطا حطيتيها و قلتي هذا هو الغدا بلا تقشار بلا طياب بلا والو واش كافية ديك البطاطا لا اكيد محتاجة تنقا و تغسل و طيب و تزاد عليها شحال من حاجة هكاك الحب....
الحب بلا احترام إهانة فحق الطرفين، الحب بلا ثقة بناء معندوش الساس و مبني بالمسوس فاي لحظة يقدر يطيح....
الحب بلا تضحية بحالا كاري دار و ساكن فالزنقة نتا مشرد ولكن كلا شهر كتخلص الكرا كتعطي و مكاتخدش و اخيب حاجة تقدر ديرها المراة او حتى الراجل فحق نفوسهم انهم يصبرو للاهانات و مايديرو حتى ردة فعل بحيت الطرف الثاني كيولف علك مكدير والو و مكتوقفوش حتى كيتمادا و كيبقا ديما يعاملك بنفس المعاملة بحيت الانسان بطبيعتو مهما كان واعي و مثقف ايلا عطيتيه فرصة فين يهينك و يركب علك تأكد انه عمرو غيتردد....
العكس ايلا ولفتيه سكوتك على حقك و جيتي شي نهار و دويتي غتسما ممزيانش و ولد الحرام و كتقلب و مصدقتيش فحين هو مكاينش اللي يحاسبو على افعالو و هادشي واقع لجوج شخصيات فقصتنا (قولولي نتوما شكوو هاد جوج شخصيات نشوف واش متبعين 💗)...
دوزات ليه لابيل و جاوب فالبلاصة تقول كان عاس عليه جاوب بصوت مرتافع مخلوع كيستفسر على حالها..
📱محمد: الوووو ياسمين.... كيبقيتيييي شوية
📱ياسمين:(بصوت متعب خفيف) شوية الحمدلله
📱محمد: خديتي دوا واش نجي نجيب لك شي حاجة؟
📱ياسمين: لا... خديت دوا و نعست دابا مزيان
📱محمد:(تنهد بجهد و قال بصوت حنين) تخلعت عليك بزااف احبيبة
📱ياسمين:(ابتسمت بحب على خوفو عليها و النبرة الحنينة باش قالها) معندك علاش تخاف انا بيخير نتا مزيان
📱محمد: ايلا كنتي نتي مزيانة غنكون انا مت.... سيري اياسمين ترتاحي
📱ياسمين:(تفكرات موضوع السفر) اه محمد بغيت نقولك على السفر
📱محمد: حگا فكرتيني اشنو تشاورتي مع ماماك
📱ياسمين: اه تشاورت معاها و عطاتني الاوكي
📱محمد:(بسعادة) صافي غدا ان شاء الله نمشيو يله حبيبتي تهلاي فراسك
📱ياسمين:(بحب) بسلامة.....
قطعات معاه و حطات التيلي للحظة على قلبها اللي كان تيعزف بعنف سيمفونية عشقها ليه مشاعر وليدة كتحرك كل مرة داخلها كتخليها مغرومة بيه و متيمة برجولتو و شخصيتو الخفيفة على القلب بضحكو الموزون و ظرافتو و حنانو دخل لقلبها بدون استئذان و الاكثر انها سدات عليه بسوارت لاحتهم بعيد...
محساتش الا وهي واخدة التيلي لعند فمها و طابعة عليه قبلة كأنها كتقبل فمحمد نيت و فلحظة تبدلو مشاعرها و مودها بعدما كانت مقلقة و زعفانة رجعات كضحك و وجهها تبشر ناضت كيف الفراشة....
نشفات شعرها و سرحاتو ببلاك و لبسات قميص خفيف فالموف بارد مخدوم بالعقيق جاها ملبوس اكتفت بمرطب و عكر خفيف و نزلات لقات رانيا و نعيمة و خالتها فتيحة و بنتها نرجس جاو سلمات و جلسات كيتسناو فالنقاشة تجي حتى دوات نعيمة...
نعيمة:(بفضول كتلولب فعينيها) ايوا ا ياسمين العريس معارفا معاه زعماااا فايتا مصاحبة معاه (غمزتها كضحك)
ثورية:(نقزات قبل ما تجاوب بنتها) لا ياختي مشا عند مصطفى للحانوت دوا معاه سول لقاه مزيان و قبل قاليه شافها و تبعها تا عرفها فين ساكنة..
نعيمة:(بتمياق) ايوا تا نجم راه مزيان على مالو ماقبل بيه ولا قبلات بيه بعدا كتعرفوه و تعرفو عائلتو ماشي تنوضو تعطيوها للبراني يتكرفس عليها..
رانيا:(بارتباك نغزات مها بالريط و قالت ملطفة الجو) كل واحد كيدي اللي مقسم ليه الله و الله يدير ليها اللي فيه الخير..
ثورية: على مافخباركش انعيمة داك نجم ديالك اش دار للدرية ولا فخبارك و كتعاماي
نعيمة: بالعمى ياختي واش فخباري شي حاجة اش دار
ثورية: علاه ماشي تحرش بيها حتى كانت غتسخف و هاد الخانزات ماقالو والو خلاوني ناعسة على ود (قاطعها صوت الصونيط كانت نقاشة)..
دخلات نقاشة اللي كانت صاحبة ثورية شربو اتاي و طلقو الماسق و بدات كتنقش لياسمين فيديها نقش خفيف و زوين حتى سالات ليها و دازت للبنات نقشات ليهم صبيعات عاد العيالات دوزو عشية زوينة....
شدو نعيمة و رانيا يباتو و فعلا باتو قصارين الا ياسمين اللي هضرات مع محمد شوية و نعسات بكري باش تصبح مرتاحة...
#يتبع ❤️❤️
الفال البنااات 👇🏼👇🏼👇🏼